Go dayrɛkt to di men tin

I Pas 300 Langwej dɛn we JW.ORG De Insay!

I Pas 300 Langwej dɛn we JW.ORG De Insay!

If yu klik na di jw.org Wɛbsayt yu go si langwej list na dis pej. I pas lɛk 300 langwej dɛn we de de—i at fɔ si da kayn tin de na ɛni ɔda wɛbsayt!

Wetin na di rizɔlt if yu kɔmpia da nɔmba de wit ɔda wɛbsayt dɛn we bɔku pipul dɛn sabi? Tink bɔt dis: Bay Julay 2013, di United Nations dɛn wɛbsayt bin de insay siks langwej dɛn. Europa, we na di ɔfishal wɛbsayt fɔ di European Union, bin de insay 24 langwej dɛn. Google de insay 71 langwej dɛn, ɛn Wikipedia de insay 287 langwej dɛn.

Dis wɛbsayt de insay lɛk 300 langwej dɛn so, ɛn i kin tek lɔng tɛm fɔ mek dɛn du di transleshɔn fɔ di wɛbsayt! Na bɔku bɔku Jiova Witnɛs dɛn we de difrɛn say dɛn na di wɔl kin du bɔku pan dis wok bikɔs dɛn want fɔ prez Jiova. Ɛni langwej kin gɛt in yon tim we de translet wetin de insay Inglish.

JW.ORG gɛt bɔku bɔku pej dɛn usay bɔku tin dɛn de we pɔsin kin lan, ɛn i pas 300 langwej dɛn we pɔsin kin ebul fɔ lan dɛn tin dɛn de we dɛn dɔn translet. So we dɛn kɔnt ɔl di pej dɛn we de na di wɛbsayt, i pas lɛk 200,000 pej dɛn!

Bɔku pipul dɛn no bɔt JW.ORG. Wi bin ebul fɔ no dat we Alexa kɔmni bin kɔmpia ɔl di wɛbsayt dɛn. Dɛn put am ɔnda “Religion and Spirituality”, ɛn ɔnda da say de, dɛn bin gɛt lɛk 87,000 wɛbsayt dɛn. Bɔku big big rilijɔn dɛnsɛf yon wɛbsayt bin de ɔnda da pat de. We dɛn chɛk da list de insay Julay 2013, jw.org bin de sɛkɔn! Di fɔs wan na di list na wan wɛbsayt we gɛt difrɛn difrɛn Baybul transleshɔn dɛn.

Bay Ɔktoba 2013, i pas lɛk 890,000 pipul dɛn we de go na jw.org ɛvride. Wi go kɔntinyu fɔ mek pipul dɛn we de ɔlsay lan bɔt di Baybul fɔ fri.