Go dayrɛkt to di men tin

Go dayrɛkt to di say we di difrɛn difrɛn atikul dɛn de

 KWƐSTYƆN DƐN WE PIPUL DƐN KIN AKS . . .

Wetin Rɔng wit Krismas?

Wetin Rɔng wit Krismas?

Fɔ lɔng tɛm naw, pipul dɛn se Krismas na Kristian ɔlide fɔ sɛlibret di de we Jizɔs bɔn. Bɔt bɔku pan di tin dɛn we dɛn kin du fɔ sɛlibret Krismas kin mek wi wɔnda aw Krismas kam fɔ bi di de we Jizɔs bɔn.

Di fɔs tin na dat, wi gɛt di lay lay stori bɔt Fada Krismas. Dis Fada Krismas na sɔm tin we dɛn mek lɛk mɔtalman. I gɛt wayt bia bia, in jɔ dɛn frɛsh, i wɛr rɛd klos, ɛn i gladi ɔltɛm. Dɛn bin mek Fada Krismas insay 1931, fɔ advatayz fɔ wan kɔmni na Nɔt Amɛrika we de mek drink dɛn fɔ sɛl. Insay dɛn 1950, sɔm Brazilian pipul dɛn bin mek Granpa Indian fɔ mek i tek Fada Krismas in ples. Wetin bin apin we dɛn du dis? Wan Masta sabi bukman we nem Kalɔs E. Fantinati tɔk se Fada Krismas nɔ jɔs win Granpa Indian bɔt i ivin “win bebi Jizɔs ɛn i kam fɔ bi di men tin we mek pipul dɛn de sɛlibret Disɛmba 25.” Fɔ se di lay lay stori bɔt Fada Krismas na di wangren prɔblɛm we Krismas ɔlide gɛt? Fɔ gɛt di ansa, lɛ wi tɔk bɔt di Kristian dɛn we bin de trade trade.

Di Encyclopedia Britannica tɔk se: “Insay di fɔs 200 ia we di Kristian rilijɔn bigin, if pɔsin sɛlibret ɛnibɔdi in batde we dɛn bin dɔn kil fɔ wetin i biliv ɔ Jizɔs in batde, pipul dɛn go vɛks pan am bad bad wan.” Wetin mek? Kristian dɛn bin no se na pipul dɛn we de wɔship lay lay gɔd dɛn, na dɛn bin de sɛlibret batde. So, dɛn no se na sɔm tin we dɛn fɔ rili avɔyd. Infakt, di Baybul nɔ tɔk bɔt di tɛm we dɛn bɔn Jizɔs.

Pan ɔl we di Kristian dɛn we bin de trade trade bin tinap tranga wan nɔ fɔ sɛlibret batde, afta i dɔn pas 300 ia we Krays day, di Katolik Chɔch bin mek pipul dɛn bigin sɛlibret Krismas. So bikɔs di chɔch bin want fɔ gɛt bɔku pipul dɛn, dɛn tray fɔ pul di tin we de ambɔg dɛn Chɔch fɔ go bifo, dat na di pegan Roman rilijɔn dɛn ɛn dɛn winter solstice fɛstival dɛn. Wan uman we nem Pɛnɛ L. Rɛstad we bin rayt wan buk we nem Christmas in America, bin tɔk se ɛni ia, frɔm Disɛmba 17 to Janwari 1 “bɔku Roman dɛn kin ɛnjɔy dɛnsɛf pasmak, ple gem dɛn, pared, mek big big pati dɛn, ɛn jɔyn ɔda fɛstival dɛn as dɛn de rɛspɛkt dɛn lay lay gɔd dɛn.” Ɛn insay Disɛmba 25, di Roman dɛn bin de sɛlibret di tɛm we dɛn bɔn di san we dɛn biliv se tu pawaful. Na da de de di chɔch pik fɔ sɛlibret Krismas, ɛn dɛn bin de ɛnkɔrej bɔku Roman pipul dɛn fɔ sɛlibret di tɛm we Jizɔs bin bɔn, bifo dɛn sɛlibret di tɛm we di san bin bɔn. Wan buk we Gɛri Bola rayt we nem Santa Claus (Fada Krismas), bin tɔk se di Roman pipul dɛn “bin stil ebul fɔ ɛnjɔy di fɛstival dɛn we dɛn bin de gɛt we di ples kin kol,” we dɛn de kɔl naw Krismas. So fɔ tɔk tru, dɛn “kɔntinyu fɔ sɛlibret di nyu de dɛn di we aw dɛn bin dɔn yus fɔ du am trade.”

Dis dɔn sho klia wan se di men prɔblɛm wit Krismas na dat di say we i kɔmɔt nɔ fayn. Wan man we nem Stivin Nisɛnbawm we bin rayt wan buk we nem The Battle for Christmas, bin tɔk se, i nɔ si Krismas as “natin bɔt na pegan fɛstival we dɛn kɔba wit Kristian tin dɛn fɔ ful pipul dɛn.” Krismas de briŋ badnem pan Gɔd ɛn in Pikin we na Jizɔs Krays. Fɔ se dis nɔ impɔtant? Di Baybul bin aks se: “Aw tin we rayt ɛn tin we nɔ rayt go jɔyn? Aw layt ɛn daknɛs go de wan ples?” (Sɛkɛn Lɛta Fɔ Kɔrint 6:14) Jɔs lɛk tik we dɔn bɛn, na so Krismas insɛf dɔn so bɛn-bɛn dat i “nɔ go tret igen.”—Ɛkliziastis 1:15.