Imajin se yu go waka na say we yu nɔ wande sabi. Yu nɔ yus to di pipul dɛn, dɛn kɔlchɔ, dɛn it dɛn, ɛn dɛn mɔni. Yu go mɔs fil bad.

Sɔntɛm yu go fil dis sem we di fɔs tɛm we yu rid di Baybul. Yu de rid bɔt tin dɛn we bin de apin trade trade we yu nɔ no bɔt. Yu go rid bɔt pipul dɛn we dɛn kɔl Filistin, ɔ yu go rid bɔt tin dɛn we pipul dɛn bin de du we yu nɔ no bɔt lɛk fɔ “chɛr chɛr dɛn klos,” ɔ yu go lan bɔt wan it we dɛn kɔl mana, ɛn wan kɔyn we dɛn kɔl silva kɔpɔ. (Ɛksodɔs 16:31; Jɔshwa 13:2; Sɛkɛn Samiɛl 3:31; Lyuk 15:9) Ɔl dɛn kayn tin dɛn de kin mek yu kɔnfyus. Jɔs lɛk we yu go na say we yu nɔ sabi, yu nɔ go lɛk fɔ lɛ dɛn ɛp yu fɔ no tin dɛn we yu nɔ sabi?

Frɔm di tɛm we dɛn bigin rayt di Baybul lɛk 1,500 ia so bifo Krays kam, pipul dɛn bin dɔn de fɔ ɛp ɔda pipul dɛn fɔ ɔndastand am. Fɔ ɛgzampul, Mozis we na bin di fɔs pɔsin fɔ lid di Izrɛlayt dɛn, bin “ɛksplen” di lɔ dɛn to di pipul dɛn.—Ditarɔnɔmi 1:5.

Pipul dɛn we bin rili fit fɔ tich ɔda pipul dɛn di Skripchɔ bin stil de afta lɛk wan tawzin ia so. Insay di ia 455 bifo Krays, bɔku bɔku Ju pipul dɛn ɛn dɛn pikin dɛn bin gɛda na di say usay pipul dɛn kin gɛda na Jerusɛlɛm. Pipul dɛn we bin de tich bɔt di Baybul bin de de ɛn “dɛn bin de rid frɔm di buk we PAPA GƆD in lɔ rayt.” Bɔt nɔto dat nɔmɔ dɛn bin de du, dɛn bin de ɛksplen di minin “so dat di pipul dɛn go ɔndastand wetin dɛn rid.”—Nɛimaya 8:1-8.

Fayv ɔndrɛd ia afta dat, Jizɔs Krays insɛf bin de du da sem kayn wok de. Infakt, pipul dɛn bin sabi am as ticha. (Jɔn 13:13) I bin de tich bɔku bɔku pipul dɛn ɛn i bin de ivin tich pipul dɛn wan wan. Wan tɛm, i bin prich to bɔku bɔku pipul dɛn we i bin de tich ɔp wan mawnten ɛn “di pipul dɛn we lib [de] de, bin lɛf de wɔnda pan aw Jizɔs lan dɛn.” (Matyu 5:1, 2; 7:28) Insay di ia 33, Jizɔs bin “ɛksplen wetin dɛn rayt na Gɔd in Buk” to tu pan in disaypul dɛn we dɛn bin de waka fɔ go na wan vilej we de nia Jerusɛlɛm.—Lyuk 24:13-15, 27, 32.

Jizɔs in disaypul dɛnsɛf bin de tich Gɔd in Wɔd. Wan tɛm, wan big man we kɔmɔt Itiopia bin de rid wan say na di Skripchɔ. Wan disaypul we nem Filip bin kam mit am ɛn aks am se: “Yu ɔndastand wetin yu de rid?” Di Itiopian man ansa am se: “Aw a go ɔndastand wetin a de rid wɛn pɔsin nɔ de fɔ ɛksplen am to mi?” So Filip bin ɛksplen to am wetin di Skripchɔ min.—Di Apɔsul Dɛn Wok [Akt] 8:27-35.

Lɛk pipul dɛn we bin de tich bɔt di Baybul trade, Jiova Witnɛs dɛn de ɛp pipul dɛn fɔ ɔndastand di Baybul insay 239 kɔntri dɛn. (Matyu 28:19, 20) Ɛni wik, dɛn kin ɛp pas nayn milyɔn pipul dɛn fɔ ɔndastand di Baybul. Bɔku pan di wan dɛn we dɛn de tich bɔt di Baybul na pipul dɛn we nɔto Kristian. Di stɔdi na fri ɛn dɛn go du am na yu os ɔ ɛnisay we yu want. Sɔm pipul dɛn kin ivin lɛk fɔ yuz fon, kɔmpyuta, ɔ ɔda ilɛktronik tin dɛn fɔ stɔdi.

Duya aks ɛni Jiova Witnɛs fɔ no mɔ bɔt aw yu go bɛnifit frɔm di Baybul stɔdi we dɛn kin du. Yu go kam fɔ no se di Baybul nɔto buk we at fɔ ɔndastand, bifo dat na buk we gɛt ɔltin we “gud fɔ mek pipul lan di tru tin, fɔ mek dɛn no dɛn tin we dɛn de du we nɔ rayt, fɔ mek dɛn wan we nɔ de du rayt bigin du wetin rayt,” so dat pɔsin “go gɛt ɔl wetin i fɔ gɛt ɛn bi wetin i fɔ bi so dat i go ebul du ɔl kayn gud wok lɛkɛ aw i fɔ du am.”—Sɛkɛn Lɛta To Timoti 3:16, 17.