Go dayrɛkt to di men tin

Go dayrɛkt to di say we di difrɛn difrɛn atikul dɛn de

“Tinap Tranga Wan fɔ Wetin Yu Biliv”

“Tinap Tranga Wan fɔ Wetin Yu Biliv”

“Tinap tranga wan fɔ wetin yu biliv, . . . ɛn kɔntinyu fɔ gɛt trɛnk.”—1 KƆR. 16:13.

SIŊ DƐN: 60, 64

1. (a) Wetin bin apin to Pita na di si we de na Galili di tɛm we wan big briz bin de blo? (Luk di pikchɔ nia dis atikul in taytul.) (b) Wetin mek Pita bigin fɔ sink?

DI APƆSUL Pita ɛn sɔm ɔda disaypul dɛn de tray tranga wan fɔ padul dɛn bot na di si we de na Galili. Na bin nɛt ɛn big briz bin de blo. Wantɛm wantɛm dɛn si Jizɔs de waka pantap di wata. Pita kɔl Jizɔs ɛn aks am if lɛ i waka pantap di wata kam mit am. We Jizɔs tɛl am fɔ kam mit am, Pita kɔmɔt insay di bot ɛn bigin waka pantap di wata go mit Jizɔs. Bɔt afta sɔm tɛm, Pita bigin fɔ sink. Wetin mek dat apin? Na bikɔs i pe atɛnshɔn to di big briz we bin de blo ɛn bigin fɔ fred. Pita kɔl Jizɔs lawd wan, ɛn Jizɔs ol in an kwik ɛn tɛl am se: “Yu we gɛt smɔl fet, wetin mek yu dawt?”—Mat. 14:24-32.

2. Wetin wi de kam tɔk bɔt naw?

2 Lɛ wi tɔk bɔt tri tin dɛn we bin apin to Pita we gɛt sɔntin fɔ du wit fet: (1) aw Pita bin fɔs sho se in abop pan Gɔd fɔ ɛp am, (2) wetin mek Pita in fet bigin fɔ wik, ɛn (3) wetin bin ɛp Pita  fɔ gɛt fet bak. We wi no dis i go ɛp wi fɔ si aw wi go “tinap tranga wan fɔ wetin [wi] biliv.”—1 Kɔr. 16:13.

WI FƆ GƐT FET SE GƆD GO ƐP WI

3. Wetin mek Pita kɔmɔt insay di bot? Aw wisɛf dɔn du sɔntin we fiba lɛk wetin Pita bin du?

3 Pita kɔmɔt na di bot ɛn bigin waka na di wata bikɔs in bin gɛt fet. Na Jizɔs bin dɔn kɔl Pita, ɛn Pita bin biliv se Gɔd in pawa go ɛp am jɔs lɛk aw i bin de ɛp Jizɔs. Semweso, we wi gi wi layf to Jiova ɛn baptayz, wi du dat bikɔs wi gɛt fet. Jizɔs kɔl wi fɔ fala am, ɛn waka di we aw i bin waka. Wi fɔ gɛt fet pan Gɔd ɛn Jizɔs, ɛn biliv se dɛn go ɛp wi difrɛn difrɛn we dɛn.—Jɔn 14:1; rid Pita In Fɔs Lɛta 2:21.

4, 5. Wetin mek wi go se fet na valyu tin we wi gɛt?

4 Fɔ tru, fet na valyu tin we wi gɛt. Jɔs lɛk we Pita in fet bin mek i ebul fɔ waka pantap wata, na so wisɛf yon fet go mek wi ebul du tin dɛn we mɔtalman nɔ fil se wi go ebul fɔ du. (Mat. 21:21, 22) Fɔ ɛgzampul, bɔku pan wi dɔn chenj di we aw wi bin de biev ɛn lɛf di bad tin dɛn we wi bin de du. Ɛn pipul dɛn we bin no wi trade nɔ kin ivin ebul fɔ mɛmba wi. Na Jiova dɔn ɛp wi fɔ du dɛn tin ya bikɔs wi gɛt fet pan am. (Rid Kɔlɔse 3:5-10.) We di fet we wi gɛt mek wi gi wi layf to Jiova, wi dɔn bi in padi wantɛm wantɛm. Ɛn dis na sɔntin we wi nɔ go ebul fɔ du if i lɛf to wi wan.—Ɛfi. 2:8.

5 Di fet we wi gɛt de kɔntinyu fɔ ɛp wi. I kin mek di Dɛbul we na Setan nɔ ebul wi. (Ɛfi. 6:16) Apat frɔm dat, we wi abop pan Jiova, i go ɛp wi lɛ wi nɔ de wɔri tumɔs we tin tranga fɔ wi. Jiova tɛl wi se, if wi gɛt fet ɛn put in Kiŋdɔm fɔs na wi layf, i go gi wi ɔl wetin wi nid. (Mat. 6:30-34) Pantap dat, bikɔs wi gɛt fet, wi go gɛt gift we no mɔtalman nɔ go ebul fɔ gɛt fɔ insɛf, dat na layf we go de sote go.—Jɔn 3:16.

WE WI LƐF FƆ PE ATƐNSHƆN, I GO MEK WI LƆS WI FET

6, 7. (a) Na to wetin wi go kɔmpia di big briz ɛn swɛlin we bin de arawnd Pita? (b) Wetin mek wi fɔ ɔndastand se i pɔsibul fɔ lɛ wi fet wik?

6 Wi go kɔmpia di big briz ɛn swɛlin we bin de arawnd Pita we i bin de waka na di wata to di prɔblɛm dɛn we kin mit wi we wi dɔn gi wi layf to Jiova. Ivin if wi gɛt siriɔs prɔblɛm dɛn we de mɔna wi, Jiova go ɛp wi fɔ tinap tranga wan. Mɛmba se nɔto di big briz ɔ swɛlin bin mek Pita sink. Tink bak bɔt wetin bin apin: We Pita bin “luk di big briz, i bigin fɔ fred.” (Mat. 14:30) We Pita lɛf fɔ pe atɛnshɔn to Jizɔs in fet wik. Wisɛf kin bigin fɔ sink if wi bigin “luk di big briz,” ɛn pe atɛnshɔn to di pawa we i gɛt ɛn bigin dawt if Jiova go ebul fɔ ɛp wi.

7 Wi fɔ ɔndastand se i pɔsibul fɔ lɛ wi nɔ gɛt bɛtɛ fet igen, bikɔs we di Baybul de tɔk bɔt di wan dɛn we nɔ gɛt bɛtɛ fet igen ɔ di wan dɛn we nɔ gɛt fet igen i kɔmpia am to “di sin we kwik fɔ rap rap pan wi.” (Ibru 12:1) Pita in ɛgzampul ɛp wi fɔ no se, wi fet kin wik kwik kwik wan, if wi pe atɛnshɔn pan di rɔng tin dɛn. Aw wi go no se wi fet dɔn bigin fɔ wik? Lɛ wi tɔk bɔt sɔm kwɛstyɔn dɛn we go ɛp wi fɔ chɛk wisɛf.

8. Wetin kin mek wi nɔ biliv di tin dɛn we Gɔd prɔmis lɛk aw wi bin biliv dɛn trade?

8 A stil biliv di prɔmis dɛn we Gɔd dɔn mek lɛk aw a bin biliv dɛn trade? Fɔ ɛgzampul, Gɔd dɔn prɔmis fɔ dɔnawe wit di bad tin dɛn we de apin na di wɔl. Bɔt wi kin alaw di tin dɛn we de na di wɔl, lɛk di tin dɛn we pipul dɛn de yuz fɔ ɛnjɔy dɛnsɛf fɔ ambɔg di fet we wi gɛt pan di tin dɛn we Gɔd dɔn prɔmis? Sɔntɛm we go bigin de dawt if di ɛnd dɔn rili de nia. (Aba. 2:3) Lɛ wi tɔk bɔt dis ɔda ɛgzampul. Bikɔs Jizɔs dɔn day fɔ wi, Gɔd dɔn prɔmis fɔ fɔgiv wi sin. Bɔt if wi de tink tumɔs bɔt di mistek dɛn we wi  dɔn mek trade, i go ambɔg wi, ɛn wi go bigin fɔ dawt if Jiova dɔn rili pul “kɔmɔt” ɔl wi sin dɛn. (Akt 3:19) Dis go mek wi nɔ gladi we wi de sav Gɔd ɛn i kin mek wi nɔ du bɛtɛ.

9. Wetin go apin if wi de tink bɔt wi yon biznɛs nɔmɔ?

9 A stil de wok tranga wan fɔ Gɔd lɛk aw a bin de wok trade? Di apɔsul Pɔl sho se fɔ wok tranga wan fɔ Jiova kin mek wi “rili biliv se [wi] go gɛt di tin we [wi] op fɔ gɛt te to di ɛnd.” Bɔt wetin go apin if wi bigin fɔ pe atɛnshɔn pan wi yon biznɛs nɔmɔ, lɛk fɔ fɛn wok we go mek wi gɛt bɔku mɔni bɔt we go ambɔg wi wɔship to Jiova? Dis kin ambɔg di fet we wi gɛt, ɛn i go mek wi “lezi,” wi nɔ go de du bɛtɛ igen fɔ Jiova lɛk aw wi bin de du. —Ibru 6:10-12.

10. Aw wi go sho se wi gɛt fet pan Jiova we wi de fɔgiv ɔda pipul dɛn?

10 I nɔ izi fɔ lɛ a fɔgiv ɔda pipul dɛn? We ɔda pipul dɛn ambɔg wi ɔ du wi bad tin, if wi jɔs de tink bɔt aw dɛn mek wi fil, dat kin mek wi vɛks pan dɛn ɔ lɛf fɔ tɔk to dɛn. Bɔt, if wi fɔgiv dɛn, wi go sho se wi gɛt fet pan Jiova. Wetin mek wi se so? Di wan dɛn we kin sin agens wi gɛt dɛt fɔ pe wi, jɔs lɛk aw wi gɛt dɛt fɔ pe Gɔd fɔ wi sin dɛn. (Lyuk 11:4) We wi fɔgiv ɔda pipul dɛn, wi fɔ biliv se i bɛtɛ lɛ Jiova gladi fɔ wi pas fɔ lɛ wi tɔn am gi dɛn bak. Jizɔs in disaypul dɛn no se if wi fɔ fɔgiv ɔda pipul dɛn, i min se wi fɔ gɛt fet. We Jizɔs bin tɛl dɛn fɔ de fɔgiv ivin di wan dɛn we dɔn du dɛn bad bɔku tɛm, dɛn beg se: “Gi wi mɔ fet.”—Lyuk 17:1-5.

11. Wetin kin mek wi nɔ bɛnifit frɔm di advays dɛn we de na di Baybul?

11 A kin vɛks we dɛn gi mi advays frɔm di Baybul? Bifo wi tink bɔt aw di advays go bɛnifit wi, sɔntɛm wi go bigin de wach di pɔsin we de gi di advays ɔ wi go bigin de pe atɛnshɔn to di mistek dɛn we de insay di  advays. (Prɔv. 19:20) Ɛn sɔntɛm dis go mek wi lɛf fɔ tink lɛk aw Jiova de tink.

12. If pɔsin de tɔk bad ɔltɛm bɔt di wan dɛn we Jiova de yuz fɔ ɛp in pipul dɛn, wetin dat de sho?

12 A kin tɔk bad bɔt di wan dɛn we Jiova dɔn pik fɔ de bifo di kɔngrigeshɔn? We di tɛn pipul dɛn we bin go wach aw Kenan tan, kam wit bad nyus, di Izrɛlayt dɛn bin pe atɛnshɔn to dis bad nyus, ɛn dɛn bin bigin fɔ tɔk bad bɔt Mozis ɛn Erɔn. Dis bin mek Jiova aks Mozis se: “Aw lɔng dɛn go sho se dɛn nɔ biliv mi?” (Nɔm. 14:2-4, 11) We di Izrɛlayt dɛn tɔk bad bɔt Mozis ɛn Erɔn, dɛn sho se dɛn nɔ gɛt fet pan Jiova we dɔn pik Mozis ɛn Erɔn fɔ de bifo dɛn. Semweso tide, if wi de tɔk bad ɔltɛm bɔt di wan dɛn we Gɔd de yuz fɔ ɛp wi, yu nɔ tink se dis de sho se wi nɔ gɛt bɛtɛ fet pan Gɔd?

13. Wetin mek wi at nɔ fɔ pwɛl if wi notis se we nɔ gɛt bɛtɛ fet igen?

13 Afta wi dɔn tɔk bɔt ɔl dɛn kwɛstyɔn dɛn ya, lɛ wi at nɔ pwɛl if wi si se wi nɔ gɛt bɛtɛ fet igen. Mɛmba se ivin di apɔsul Pita, bin de fred ɛn i bin gɛt dawt. Infakt, sɔntɛm dɛn de Jizɔs bin de kɔrɛkt ɔl in apɔsul dɛn bikɔs dɛn nɔ gɛt “bɛtɛ fet.” (Mat. 16:8) Mɛmba bak se di impɔtant lɛsin we wi lan frɔm Pita in ɛgzampul, na di tin we i bin du afta we i sho se i nɔ gɛt bɛtɛ fet ɛn i bigin fɔ sink na di wata.

PE ATƐNSHƆN TO JIZƆS SO DAT YU FET GO STRƆNG

14, 15. (a) Wetin Pita bin du we i bigin fɔ sink? (b) Wi nɔ ebul fɔ si Jizɔs, so aw wi go ebul fɔ “luk [am] gud gud wan”?

14 We Pita bin pe atɛnshɔn to di big briz ɛn bigin fɔ sink, i bin fɔ dɔn tray fɔ insɛf fɔ kam bak na di bot. Pita na pɔsin we sabi swim, so na dis i bin fɔ dɔn du. (Jɔn 21:7) Bɔt bifo i abop pan insɛf, i tɔn in atɛnshɔn bak to Jizɔs, ɛn gri fɔ lɛ Jizɔs ɛp am. If wisɛf si se sɔntin dɔn bigin fɔ ambɔg wi fet, wi fɔ falamakata Pita in fayn ɛgzampul. Bɔt aw wi go ebul du dat?

15 Jɔs lɛk we Pita bin tɔn in atɛnshɔn bak to Jizɔs, na so wisɛf fɔ “luk Jizɔs gud gud wan. Di Chif Lida ɛn di wan we de mek wi fet pafɛkt.” (Rid Di Ibru Pipul Dɛn 12:2, 3.) Na tru se wi nɔ go ebul fɔ si Jizɔs jɔs lɛk aw Pita bin de si am. Bɔt wi go “luk Jizɔs gud gud wan” bay we wi de stɔdi di tin dɛn we i bin de tich, di tin dɛn we i bin de du, ɛn we wi falamakata am gud gud wan. Lɛ wi tɔk bɔt sɔntin dɛn we wi go du fɔ falamakata di tin dɛn we Jizɔs bin de du. If wi de du dɛn tin ya, wi go gɛt di tin dɛn we go mek wi fet strɔng.

We wi de pe atɛnshɔn to Jizɔs in ɛgzampul ɛn falamakata in fut mak gud gud wan, wi go gɛt mɔ fet we go mek wi ebul fɔ tinap tranga wan. (Luk na paregraf 15)

16. Aw wi go stɔdi di Baybul we go mek wi gɛt strɔng fet?

16 Kɔntinyu fɔ du sɔntin we go mek yu biliv di Baybul mɔ ɛn mɔ. Jizɔs bin biliv se di Baybul na Gɔd in Wɔd, ɛn i bin biliv se na di bɛst tin we go gayd wi na layf. (Jɔn 17:17) Lɛk Jizɔs na so wisɛf fɔ biliv Gɔd in Wɔd. Wi fɔ de rid di Baybul ɔltɛm, stɔdi am, ɛn tink gud wan bɔt wetin wi de lan. We yu de stɔdi di Baybul yu wangren, i go fayn lɛ yu stɔdi bɔt tɔpik dɛn we yu go want fɔ no mɔ bɔt. Fɔ ɛgzampul, yu kin biliv gud gud wan se di ɛnd dɔn de nia bay we yu stɔdi bɛtɛ bɛtɛ wan bɔt di tin dɛn we di Baybul dɔn tɔk, fɔ sho se wi de na di las dez. Yu kin kɔntinyu fɔ biliv di tin dɛn we Gɔd dɔn tɔk se go apin tumara bambay, we yu stɔdi bɔt di bɔku tin dɛn we di Baybul bin dɔn tɔk se go apin we dɔn ɔlrɛdi apin. Yu go biliv di advays dɛn we de na di Baybul, we yu stɔdi bɔt pipul dɛn we di Baybul dɔn ɛp fɔ liv bɛtɛ layf. *1 Tɛsa. 2:13.

17. Wetin mek Jizɔs bin ebul kɔntinyu fɔ du wetin Jiova want pan ɔl we bɔku bad tin bin mit am? Aw yu go ebul fɔ falamakata am?

 17 Put yu at pan di blɛsin dɛn we Jiova dɔn prɔmis. Bikɔs Jizɔs bin put in at pan “di op we bin de bifo am,” i bin ebul kɔntinyu fɔ du wetin Jiova want pan ɔl we bɔku bad tin bin mit am. (Ibru 12:2) Jizɔs nɔ bin ɛva alaw di tin dɛn we de na di wɔl fɔ tek in atɛnshɔn. (Mat. 4:8-10) Yu go falamakata Jizɔs we yu de tink gud wan bɔt di wɔndaful tin dɛn we Jiova dɔn prɔmis yu. Imajin se yu de na di nyu wɔl. I go fayn fɔ rayt ɔ drɔ wetin yu go want fɔ du na di nyu wɔl we Gɔd go dɔnawe wit dis wikɛd wɔl. Rayt di pipul dɛn nem we yu go want fɔ mit we dɛn gɛt layf bak ɛn rayt bɔt wetin yu go lɛk fɔ tɔk wit dɛn. Yu nɔ fɔ si dɛn prɔmis ya lɛk prɔmis we Gɔd mek to mɔtalman, bɔt yu fɔ si am as prɔmis we Gɔd dɔn mek to yu.

18. Aw prea go ɛp yu fɔ gɛt mɔ fet?

18 Pre fɔ mɔ fet. Jizɔs bin tɛl in disaypul dɛn fɔ aks Jiova fɔ oli spirit. (Lyuk 11:9, 13) As yu de du dis, pre fɔ lɛ yu gɛt mɔ fet, bikɔs fet na wan pan di tin dɛn we di spirit de gi. We yu de pre to Gɔd, aks am fɔ di rayt tin we yu nid, aks Gɔd fɔ mek i ɛp yu, so dat yu go ebul fɔ lɛf ɛni bad abit we yu tink se yu gɛt, we de sho se yu fet dɔn bigin de wik. Sɔntɛm i go bi se yu na pɔsin we nɔ ebul fɔ fɔgiv ɔda pɔsin.

19. Wetin wi fɔ luk fɔ we wi de fɛn padi?

19 Go de kip kɔmpin wit pipul dɛn we gɛt fet. Jizɔs bin de tek tɛm fɔ pik in padi dɛn, mɔ di wan dɛn we i dɔn invayt fɔ bi in apɔsul. Dɛn in tayt padi ya, dɔn sho se dɛn gɛt fet, ɛn dɛn nɔ bin kɔmɔt biɛn Jizɔs. Dɛn bin de obe ɔl wetin i tɛl dɛn. (Rid Jɔn 15:14, 15.) So we wi de fɛn padi, i go fayn fɔ pik di wan dɛn we de sho se dɛn gɛt fet pan Jizɔs ɛn we de obe ɔl wetin i dɔn se. Ɛn wi fɔ mɛmba se wan tin we go mek wi padi biznɛs wit sɔmbɔdi go bifo na we wi de tɔk tru to wisɛf ɔltɛm, ivin we wi de gi dɛn advays ɔ we dɛn de gi wi advays.Prɔv. 27:9.

20. Us bɛnifit wi go gɛt we wi ɛp ɔda pipul dɛn fɔ gɛt mɔ fet?

20 Ɛp ɔda pipul dɛn fɔ gɛt mɔ fet. Jizɔs bin de ɛp in disaypul dɛn fɔ gɛt mɔ fet. I bin de du dat bay di tin dɛn we i bin de se ɛn du. (Mak 11:20-24) Wi fɔ fala in ɛgzampul, bikɔs we wi ɛp ɔda pipul dɛn fɔ gɛt mɔ fet, wisɛf go gɛt mɔ fet. (Prɔv. 11:25) We wi de go prich ɛn tich pipul dɛn, i go fayn fɔ sho dɛn se Gɔd de, i kia bɔt wi, ɛn na in Wɔd de insay di Baybul. I go fayn bak fɔ ɛp wi brɔda ɛn sista dɛn fɔ gɛt mɔ fet. If ɛni wan pan wi brɔda ɛn sista dɛn gɛt dawt, ɛn bigin fɔ tɔk bad bɔt di ɛlda dɛn we de bifo na di kɔngrigeshɔn i nɔ go fayn mek wi jɔs avɔyd dɛn lɛk dat. Bifo dat, lɛ wi tek tɛm ɛnkɔrej dɛn ɛn ɛp dɛn fɔ du sɔntin we go mek dɛn gɛt fet bak. (Jud 22, 23) If yu de na skul ɛn dɛn de tɔk bɔt di tɔpik we se ɔltin kam bay chans, i go fayn mek yu tɔk bɔt wetin yu biliv. Yu fɔ mek lɛ dɛn no se na Gɔd mek ɔltin. Yu go sɔprayz fɔ no se wetin yu tɔk go afɛkt dɛn.

21. Us prɔmis Jiova dɔn mek to ɔl di wan dɛn we gɛt fet?

21 Pita bin lɛf fɔ fred ɛn lɛf fɔ dawt bikɔs Gɔd bin yuz Jizɔs fɔ ɛp am, ɛn dis bin mek i ebul fɔ ɛp in kɔmpin Kristian dɛn we bin de trade trade fɔ gɛt mɔ fet. Semweso, Jiova de ɛp ɔl di wan dɛn we tinap tranga wan fɔ wetin dɛn biliv. (Rid Pita In Fɔs Lɛta 5:9, 10.) We wi de du sɔntin we go ɛp wi fɔ gɛt mɔ fet dat na fayn tin. Wi nɔ go ebul kɔmpia di blɛsin dɛn we wi go gɛt to ɛnitin.

^ par. 16 Fɔ ɛgzampul, rid di atikul dɛn we gɛt di taytul “The Bible Changes Lives” insay di Wachtawa we kin kam fɔ ɔlman.