Go dayrɛkt to di men tin

Go dayrɛkt to di say we di difrɛn difrɛn atikul dɛn de

Aw Wi Go Sho se Wi Lɛk Jiova?

Aw Wi Go Sho se Wi Lɛk Jiova?

“Wi lɛk am, bikɔs na in fɔs lɛk wi.”—1 JƆN 4:19.

SIŊ DƐN: 56, 138

1, 2. Frɔm wetin apɔsul Jɔn tɔk, aw Jiova dɔn tich wi fɔ lɛk am?

PIPUL dɛn dɔn kam fɔ gri se, di bɛst we aw papa kin tich in pikin dɛn na bay di tin dɛn we i de du. Di apɔsul Jɔn bin rayt se: “Wi lɛk [Gɔd] bikɔs na in fɔs lɛk wi.” (1 Jɔn 4:19) So wi dɔn si klia wan se Jiova dɔn sɛt fayn ɛgzampul as papa we lɛk in pikin dɛn ɛn dis go ɛp wi fɔ lɛk am.

2 Uskayn we Gɔd dɔn sho se “na in fɔs lɛk wi”? Di apɔsul Pɔl tɔk se: “Gɔd dɔn sho se i lɛk wi, bikɔs pan ɔl we wi na sina, Krays day fɔ wi.” (Rom 5:8) So we Jiova bin mek in Pikin day fɔ sev mɔtalman dɛn we biliv, i sho se i rili lɛk wi. I sho dis lɔv we i gi in wangren Pikin pan ɔl we i nɔ bin izi fɔ am. Dis tin we Jiova du, dɔn mek am pɔsibul fɔ lɛ wi kam nia am so dat wi go bɛnifit frɔm in lɔv ɛn dis go ɛp wi fɔ lɛ wisɛf sho se wi lɛk am.—1 Jɔn 4:10.

3, 4. Aw wi fɔ sho se wi lɛk Gɔd?

3 Lɔv na di men kwaliti we Jiova gɛt, so wi ɔndastand wetin mek Jizɔs bin tɛl wan man se, di fɔs lɔ we Gɔd gi na di wan we se: “Una fɔ lɛk Jiova una Gɔd wit ɔl una at ɛn wit ɔl una sɔl ɛn  wit ɔl una maynd ɛn wit ɔl una trɛnk.” (Mak 12:30) Frɔm wetin Jizɔs tɔk, wi dɔn lan se na frɔm wi at wi fɔ lɛk Gɔd. Jiova nɔ lɛk pɔsin we nɔ de sav am wit ɔl in at. Bɔt wi no se if wi fɔ lɛk Gɔd, wi fɔ lɛk am bak wit ɔl wi sol, maynd, ɛn trɛnk. Dis min se fɔ gɛt tru lɔv fɔ Gɔd nɔto jɔs aw yu de fil na yu at fɔ am. Pantap dat fɔ lɛ wi go lɛk Gɔd wit ɔl wi at, i min se wi fɔ ɔndastand gud gud wan di tin dɛn we wi de lan bɔt am ɛn wi fɔ wɔship am. Na dis di prɔfɛt Mayka se Jiova want lɛ wi du.—Rid Mayka 6:8.

4 Aw wi go sho se wi rili lɛk wi Papa we de na ɛvin? Wi fɔ lɛk am wit ɔl wi at. As Jizɔs bin dɔn tɔk, wi fɔ lɛk Jiova pan ɔl wetin wi de du, wit ɔl wetin wi gɛt, ɛn wi fɔ tray fɔ no am gud gud wan. Insay di atikul we wi bin stɔdi bifo dis wan, wi bin lan 4 we dɛn we Jiova dɔn sho se i lɛk in pikin dɛn. Naw lɛ wi tɔk bɔt aw wi kin sho se wi rili lɛk Jiova. Bikɔs na dis Jiova want ɛn na in i lɛk.

SHO SE YU GLADI FƆ ƆL DI TIN DƐN WE JIOVA DƆN GI WI

5. Wetin wi go du fɔ sho se wi gladi fɔ ɔl wetin Jiova dɔn du fɔ wi?

5 We dɛn gi yu gift, wetin yu kin du? Yu go mɔs du sɔntin fɔ sho se yu gladi fɔ wetin dɛn gi yu. Apat frɔm dat, yu go mɔs yuz di gift fayn fayn wan, ɛn yu nɔ go tɛk am mek natin. Di disaypul we nem Jems tɔk se: “Ɔl gud gift ɛn ɔl pafɛkt prɛsɛnt na ɔp i de kɔmɔt, i de kam dɔŋ frɔm di Papa, we mek di layt dɛn we de na di skay, ɛn we nɔ de chenj lɛk aw shado kin chenj.” (Jems 1:17) Jiova nɔ de stɔp fɔ gi wi ɔl di tin dɛn we wi nid ɛn ɔl di tin dɛn we wi nid fɔ mek wi gladi. Yu nɔ tink se dis fɔ mek wi lɛk am bak?

6. Wetin di Izrɛlayt dɛn bin nid fɔ du fɔ lɛ dɛn kɔntinyu fɔ gɛt Jiova in blɛsin?

6 Fɔ lɔng lɔng tɛm Jiova bin de kia fɔ di Izrɛlayt dɛn ɛn i bin de blɛs dɛn. I bin de gi dɛn ɔl wetin dɛn nid ɛn i bin de ɛp dɛn fɔ no am. (Dyut. 4:7, 8) Bɔt fɔ lɛ dɛn go kɔntinyu fɔ ɛnjɔy di blɛsin dɛn, dɛn fɔ obe Gɔd in Lɔ dɛn. Wan pan dɛn Lɔ ya we dɛn fɔ obe, na di wan we se dɛn fɔ gi Jiova “di bɛst pan [dɛn] fɔs frut dɛn we dɔn rɛp” we de gro na di land. (Ɛks. 23:19) If dɛn du dis, dɛn go sho se dɛn rili gladi fɔ di lɛk we Jiova lɛk dɛn ɛn di blɛs we i de blɛs dɛn.—Rid Dyutɔrɔnɔmi 8:7-11.

7. Aw wi go yuz wi “valyu tin dɛn” fɔ sho Jiova se wi lɛk am?

7 We wisɛf? Pan ɔl we Jiova nɔ tɛl wi fɔ sakrifays animal dɛn tide, wi stil nid fɔ sho se wi lɛk am bay we wi de ɔnɔ am wit wi “valyu tin dɛn.” (Prɔv. 3:9) Aw wi go ebul fɔ du dis? Wi kin yuz di tin dɛn we wi gɛt fɔ sɔpɔt di wok we Gɔd in Kiŋdɔm de du ɔlsay na di wɔl. Dis na fayn we fɔ sho se wi lɛk Jiova, ilɛksɛf wi gɛt bɔku ɔ wi nɔ gɛt bɛtɛ. (2 Kɔr. 8:12) Bɔt ɔda we dɛn de we wi go sho Jiova se wi lɛk am.

8, 9. Wetin mek wi go se we wi biliv Jiova in prɔmis wi lɛk am? Gi wan ɛgzampul.

8 Mɛmba se Jizɔs bin dɔn tɛl di wan dɛn we de fala am se dɛn nɔ fɔ wɔri bɔt wetin dɛn go it ɛn wetin dɛn go wɛr, dɛn fɔ jɔs kɔntinyu fɔ put Gɔd in Kiŋdɔm fɔs. I tɔk se in Papa no wetin wi rili nid. (Mat. 6:31-33) Di kayn we aw wi biliv dis prɔmis, na in go sho if wi rili lɛk Jiova, bikɔs fɔ lɛk ɛn biliv pɔsin de go togɛda. Wi nɔ go rili lɛk pɔsin if wi nɔ biliv am. (Sam 143:8) So wi fɔ aks wisɛf dɛn kwɛstyɔn ya: ‘Di tin dɛn we a plan fɔ du ɛn di we aw a de liv mi layf de sho se a rili lɛk  Jiova? Di tin dɛn we a kin disayd fɔ du ɛni de de sho se a biliv se Jiova go gi mi ɔl di tin dɛn we a nid?’

9 Wan brɔda we nem Mayk sho se i biliv Jiova ɛn i lɛk am. We Mayk bin yɔŋ i bin rili want fɔ sav Jiova na ɔda kɔntri. I bin mared ɛn bɔn tu pikin dɛn, bɔt i bin stil want fɔ sav Jiova na ɔda kɔntri. Mayk ɛn in famili bin rid bɔku pan wi buk ɛn magazin dɛn we kin ɛnkɔrej pɔsin fɔ go prich na say usay dɛn nid pipul dɛn fɔ prich ɛn dis bin ɛnkɔrej dɛn. So Mayk ɛn in famili disayd fɔ liv simpul layf. Dɛn sɛl dɛn os ɛn go de na wan smɔl os. Mayk bin ridyus pan in kɔstɔma dɛn ɛn i lan aw i go du in biznɛs wit Intanɛt. In ɛn in famili bin lɛf di kɔntri we dɛn de ɛn go na ɔda kɔntri, ɛn afta dɛn dɔn sav fɔ tu ia, Mayk tɔk se: “Wi rili si se wetin Jizɔs bin tɔk na Matyu 6:33 na tru.”

TINK GUD WAN BƆT DI TIN DƐN WE GƆD DE TICH YU

10. Lɛk Devid, wetin mek wi go se i fayn fɔ de tink bɔt di tin dɛn we wi dɔn lan bɔt Jiova?

10 Na lɛk 3,000 ia dɔn pas so we Kiŋ Devid bin luk ɔp di skay. Wetin Devid bin si bin rili tɔch in at. I rayt se: “Di ɛvin de tɔk bɔt Gɔd in glori; di skay de sho di wok we i dɔn du wit in an.” Gɔd in Lɔ dɛn bin tɔch Devid in at ɛn dis bin mek i rayt se: “Jiova in lɔ pafɛkt, i de gi trɛnk bak to pɔsin. Di tin dɛn we Jiova dɔn tɔk, na sɔntin we wi fɔ biliv, bikɔs i de mek pɔsin we nɔ gɛt bɛtɛ sɛns gɛt sɛns.” Wetin bin apin we Devid bin tink gud wan bɔt Jiova in Lɔ dɛn? Devid bin kɔntinyu fɔ tɔk se: “Lɛ di tin dɛn we a de tɔk ɛn di tin dɛn we a de tink bɔt na mi at, bi tin dɛn we yu lɛk, O Jiova, mi Rɔk ɛn di wan we de sev mi.” So wi dɔn si klia wan se Devid ɛn Jiova na bin tayt padi dɛn.—Sam 19:1, 7, 14.

11. If wi lɛk Gɔd, wetin wi go du wit di bɔku tin dɛn we i de tich wi tide? (Luk di pikchɔ nia dis atikul in taytul.)

11 Tide, Jiova dɔn blɛs wi bay we i dɔn ɛp wi fɔ no am bɛtɛ bɛtɛ wan. I dɔn ɛp wi fɔ no di tin dɛn we i mek ɛn di tin dɛn we i gɛt fɔ du. Pipul dɛn na di wɔl de tɔk se fɔ lan bɔku buk ɛn fɔ go na yunivasiti na fayn tin. Bɔku pipul dɛn we dɔn go na yunivasiti fɔ go lan buk dɔn du sɔntin we dɔn ambɔg dɛn fet ɛn di we aw dɛn bin lɛk Gɔd. Bɔt di Baybul tɛl wi se wi nɔ fɔ jɔs tray fɔ no sɔntin bɔt wi fɔ tray bak fɔ gɛt sɛns ɛn fɔ ɔndastand. Dis min se, wi fɔ lan aw fɔ yuz di tin dɛn we wi dɔn no bɔt Gɔd, so dat wi go bɛnifit wisɛf ɛn ɔda pipul dɛn. (Prɔv. 4:5-7) Gɔd “want mek ɔlkayn pipul dɛn sev ɛn lan di tru tin bɔt am.” (1 Tim. 2:4) Wi go sho se wi lɛk Jiova we wi du ɔltin we wi ebul fɔ tɛl pipul dɛn di gud tin dɛn we Gɔd in Kiŋdɔm de du ɛn ɛp dɛn fɔ ɔndastand di tin dɛn we Gɔd gɛt fɔ du fɔ mɔtalman.—Rid Sam 66:16, 17.

12. Aw wan yɔŋ sista bin sho se i gladi fɔ di gift we Jiova bin gi am?

12 Ivin yɔŋ wan dɛn go sho se dɛn lɛk Jiova bay we dɛn de sho se dɛn gladi fɔ ɔl wetin i de gi dɛn fɔ lɛ dɛn gɛt tayt padi biznɛs wit am. Wan yɔŋ sista we nem Shanan bin tɔk se we i bin ol 11 ia, in ɛn in sista we ol 10 ia bin go di “Godly Devotion” Kɔnvɛnshɔn wit dɛn mama ɛn papa. We dɛn bin de na di kɔnvɛnshɔn, dɛn bin tɛl di yɔŋ wan dɛn fɔ sidɔm na  wan say. Shanan bin fred bɔt in du so. I bin gladi pasmak we i si dɛn de gi ɔl di yɔŋ wan dɛn wan fayn buk we gɛt di taytul Questions Young People Ask—Answers That Work. Aw dis bin afɛkt di we aw Shanan fil bɔt Jiova? Shanan tɔk se: “Na da tɛm de a rili no se Jiova rial ɛn i rili lɛk mi.” Shanan tɔk bak se: “Wi rili gladi we wi wɔndaful Gɔd we na Jiova gi wi dis fayn gift fɔ fri!”

FALA JIOVA IN ADVAYS ƐN CHENJ WE I KƆRƐKT YU

13, 14. Aw wi fɔ biev we Jiova gi wi advays? Wetin mek?

13 Di Baybul tɛl wi se: “Jiova de kɔrɛkt di wan dɛn we i lɛk, jɔs lɛk we papa de kɔrɛkt in bɔy pikin we i lɛk.” (Prɔv. 3:12) So wetin wi fɔ du we Jiova kɔrɛkt wi? Di apɔsul Pɔl bin tɔk se: “We dɛn kin kɔrɛkt pɔsin i nɔ kin gladi di tɛm we dɛn kɔrɛkt am, i kin fil am.” Dis tin we di apɔsul Pɔl bin tɔk na tru, ɛn we i tɔk dis, i nɔ bin de tray fɔ se fɔ kɔrɛkt pɔsin na tin we nɔ impɔtant, na dat mek i kɔntinyu fɔ tɔk se: “Bɔt afta dat, di wan dɛn we dɛn kɔrɛkt kin gɛt fayn kwaliti ɛn kolat bikɔs dat dɔn tren dɛn.” (Ibru 12:11) If wi lɛk Jiova wi fɔ tek tɛm so dat wi nɔ go de grɔmbul ɔ vɛks we i gi wi advays. I nɔ kin izi fɔ sɔm pipul dɛn fɔ du dis. Bɔt if wi lɛk Gɔd dat go rili ɛp wi.

14 Insay Malakay in tɛm, bɔku Ju pipul dɛn nɔ bin gladi fɔ di advays we Gɔd bin de gi dɛn. Dɛn no di Lɔ we Jiova bin gi dɛn bɔt sakrifays bɔt dɛn nɔ bin de fala da Lɔ de, so Jiova bin gi dɛn siriɔs advays. (Rid Malakay 1:12, 13.) Aw siriɔs di prɔblɛm bin bi? Lɛ wi lisin to wetin Jiova bin se: “A go sɛn di swɛ pan una, ɛn a go tɔn una blɛsin dɛn to swɛ. Fɔ tru, a dɔn tɔn di blɛsin dɛn to swɛ, bikɔs una nɔ gri fɔ put wetin a se na una at.” (Mal. 2:1, 2) Wi dɔn si klia wan se, if wi tek am mek abit nɔ fɔ de lisin to Jiova in advays dɛn, wi go rili sɔfa fɔ dat.

Fala Gɔd in advays bɔt nɔ fala di we aw di pipul dɛn na di wɔl de tink (Luk na paregraf 15)

15. Insay di wɔl we wi de tide, us abit we wi fɔ avɔyd?

15 Dis wɔl we Setan de rul de ɛnkɔrej pipul dɛn fɔ mek prawd ɛn lɛ dɛn want ɔltin fɔ dɛnsɛf. Bɔku pipul dɛn nɔ lɛk we dɛn de advays dɛn ɔ tɛl dɛn wetin fɔ du. Ivin di wan dɛn we kin gri fɔ tek advays ɔ we kin gri fɔ lɛ dɛn kɔrɛkt dɛn nɔ kin rili gladi we dɛn kɔrɛkt ɔ advays dɛn. Bɔt di Baybul advays Kristian dɛn fɔ “lɛf fɔ fala dis wɔl.” Wi fɔ tray fɔ no ɛn fala wetin “Gɔd gri wit ɛn wetin pafɛkt.” (Rom 12:2) Jiova de yuz in ɔganayzeshɔn fɔ advays wi di rayt tɛm bɔt bɔku tin dɛn na layf. Tin dɛn lɛk, aw man fɔ biev to uman  ɛn aw uman fɔ biev to man, udat dɛn wi fɔ kip kɔmpin wit, ɛn aw wi fɔ ɛnjɔy wisɛf. We wi gri wit wetin Jiova se ɛn fala dɛn advays ya, wi de sho se wi gladi we Jiova de advays wi ɛn wi rili lɛk am wit ɔl wi at.—Jɔn 14:31; Rom 6:17.

ABOP PAN JIOVA FƆ LƐ I PROTƐKT YU ƐN SEV YU

16, 17. (a) Wetin mek wi fɔ tink bɔt wetin Jiova want, we wi de disayd fɔ du sɔntin? (b) Aw di Izrɛlayt dɛn bin sho se dɛn nɔ lɛk Jiova ɛn dɛn nɔ abop pan am?

16 We smɔl pikin dɛn si se bad tin wan mit dɛn, dɛn kin rɔn go to dɛn mama ɛn papa. Bɔt as dɛn de big, dɛn de bigin fɔ abop pan dɛnsɛf mɔ ɛn mɔ ɛn disayd fɔ du sɔntin fɔ dɛnsɛf. Dis kin apin we pɔsin de machɔ. Bɔt pikin dɛn we gɛt tayt padi biznɛs wit dɛn mama ɛn papa kin fil fri fɔ tɔk to dɛn bɔt sɔntin ɛn aks dɛn fɔ advays bifo dɛn disayd fɔ du sɔntin. Na di sem tin we i kam to wi padi biznɛs wit Jiova. Jiova dɔn gi wi in oli spirit we de ɛp wi “fɔ du sɔntin ɛn i de gi [wi] di trɛnk fɔ du am.” Bɔt wi go sho se wi nɔ rili lɛk Jiova ɛn wi nɔ abop pan am if wi disayd fɔ du sɔntin ɛn nɔ tink bɔt wetin i want.—Fil. 2:13.

17 Insay Samiɛl in tɛm, di Filistin pipul dɛn bin kil bɔku pan di Izrɛlayt dɛn pan wɔ. Gɔd in pipul dɛn bin rili nid pɔsin fɔ ɛp dɛn ɛn protɛkt dɛn. Wetin dɛn bin du? Dɛn disayd se: “Lɛ wi tek di bɔks we gɛt Jiova in agrimɛnt wit wi frɔm Shaylɔ, so dat i go de wit wi ɛn sev wi frɔm wi ɛnimi dɛn.” Wetin bin apin we dɛn du dis? “Dɛn kil bɔku bɔku Izrɛlayt dɛn, dɛn kil 30,000 Izrɛlayt sojaman dɛn we bin de waka bay fut. Apat frɔm dat, dɛn kapchɔ Gɔd in bɔks.” (1 Sam. 4:2-4, 10, 11) Di Izrɛlayt dɛn bin tink se we dɛn kɛr di bɔks we gɛt di agrimɛnt usay dɛn de fɛt, Jiova go ɛp dɛn ɛn protɛkt dɛn. Bɔt dɛn nɔ bin rili aks Jiova wetin dɛn fɔ du, dɛn bin jɔs du wetin dɛn tink se rayt. Ɛn we dɛn du dis, bad bad tin bin apin to dɛn.—Rid Prɔvabs 14:12.

18. We wi de aks Jiova fɔ ɛp wi, aw dat fɔ mek wi fil?

18 Wan pan di man dɛn we bin rayt di Sam buk bin de tink di rayt we, we i rayt se: “A go prez am bikɔs nain de sev mi. Mi Gɔd, mi at pwɛl. Na dat mek a mɛmba yu.” (Sam 42:5, 6) Dis sho aw i rili lɛk Jiova! Yu lɛk yu Papa we de na ɛvin dis kayn we? Yu abop pan am? Ivin if yu ansa na yes, yu go ebul fɔ abop pan am mɔ ɛn mɔ we wi du wetin di Baybul tɛl wi. Di Baybul se: “Abop pan Jiova wit ɔl yu at, ɛn nɔ abop pan yu yon sɛns. Pan ɔl wetin yu de du yu fɔ tray fɔ no wetin i want ɛn i go mek ɔltin fayn fɔ yu.”—Prɔv. 3:5, 6.

19. Us we dɛn yu want fɔ sho se yu rili lɛk Jiova?

19 Jiova na in fɔs lɛk wi, we i du dis, i dɔn sho wi aw wi fɔ lɛk am. Lɛ wi kɔntinyu fɔ de tink bɔt di fayn ɛgzampul we Jiova de set fɔ wi. Ɛn lɛ wi kɔntinyu fɔ sho se wi rili lɛk am ‘wit ɔl wi at ɛn wit ɔl wi sɔl ɛn wit ɔl wi maynd ɛn wit ɔl wi trɛnk.’Mak 12:30.