Go dayrɛkt to di men tin

Go dayrɛkt to di say we di difrɛn difrɛn atikul dɛn de

 DI TƆPIK NA DI FRƆNT PEJ | UDAT NA JIOVA WITNƐS DƐN?

Usay Jiova Witnɛs Dɛn Kin Pul Mɔni fɔ Du Dɛn Prichin Wok?

Usay Jiova Witnɛs Dɛn Kin Pul Mɔni fɔ Du Dɛn Prichin Wok?

Ɛni ia, wi kin print ɛn sheb bɔku bɔku Baybul, buk, ɛn magazin dɛn. Na sɔm say dɛn na di wɔl, wi kin bil branch ɔfis dɛn ɛn say dɛn fɔ print. Bɔku bɔku kɔngrigeshɔn dɛn kin ol dɛn mitin dɛn na wan simpul bɔt fayn ples we wi kɔl Kiŋdɔm Ɔl. Na de wi kin wɔship. Udat de pe fɔ ɔl dis?

Na wi brɔda ɛn sista dɛn we de ɔlsay na di wɔl kin gi mɔni fɔ sɔpɔt di wok we wi de du. (Sɛkɔn Lɛta Fɔ Kɔrint 9:7) Insay 1879, di sɛkɔn atikul na dis magazin tɔk se: “‘Na JIOVA de sɔpɔt Zayɔn Wach Tawa’ [na so wi bin de kɔl dis magazin trade] ɛn fɔseka dis, dis magazin nɔ go ɛva beg mɔtalman fɔ sɔpɔt di wok.” Wi nɔ ɛva kɔmɔt biɛn wi wɔd.

Wi brɔda ɛn sista dɛn kin sɛn mɔni na wan pan wi branch ɔfis dɛn ɔ put mɔni na di bɔks dɛn we de na wi Kiŋdɔm Ɔl dɛn. Bɔt wi nɔ de tek tayt, aks fɔ kɔlɛkshɔn, ɔ chaj pɔsin we wi prich to am ɔ gi am wi buk ɔ magazin dɛn. Dɛn nɔ de pe wi fɔ prich, fɔ tich na wi kɔngrigeshɔn, ɔ fɔ ɛp fɔ bil di say dɛn usay wi de wɔship. Jizɔs bin tɔk se: “Una gɛt dis fri, so una gi fri.” (Matyu 10:8) Ɔl di wan dɛn we de wok na wi branch ɔfis dɛn ɛn na wi ɛdkwata dɛn, ɛn ivin di Gɔvnin Bɔdi fɔ Jiova Witnɛs dɛn, dɛn nɔ de pe dɛn.

“Ɔl wetin Jiova Witnɛs dɛn de du na dɛn brɔda ɛn sista dɛn de gi mɔni fɔ sɔpɔt dat. Ɔlman de ‘gi’ wetin i dɔn mekɔp na in maynd fɔ gi.”—European Court of Human Rights, 2011

Wi kin yuz bak di mɔni we wi brɔda ɛn sista dɛn kin gi fɔ ɛp ɔda brɔda ɛn sista dɛn we bad bad tin dɛn lɛk, ebi ebi briz ɛn ren ɔ atkwek apin usay dɛn de. Di Kristian dɛn we bin de trade trade bin de gladi fɔ gi wetin dɛn gɛt fɔ ɛp di wan dɛn we bad tin dɔn mit. (Lɛta Fɔ Rom 15:26) Wisɛf kin ɛp di wan dɛn we bad tin dɔn apin to. Aw wi kin du dat? Na bay we wi kin bil dɛn os dɛn we dɔn pwɛl, di say dɛn we dɛn de wɔship, ɛn bay we wi kin gi dɛn tin fɔ it, klos fɔ wɛr, ɛn mɛrɛsin.