Go dayrɛkt to di men tin

Go dayrɛkt to di say we di difrɛn difrɛn atikul dɛn de

 DI TƆPIK NA DI FRƆNT PEJ | I PƆSIBUL—FƆ LƐ PƆSIN WE DƆN DAY GƐT LAYF BAK?

Yu Tink se Op De fɔ di Wan dɛn We Dɔn Day?

Yu Tink se Op De fɔ di Wan dɛn We Dɔn Day?

Yu tink se di wan dɛn we dɔn day go gɛt layf bak?

WETIN DI BAYBUL SE: “Di tɛm de kam we ɔl di wan dɛn we de na di grev go yɛri [Jizɔs] in vɔys, ɛn grap.”Jɔn 5:28, 29.

Jizɔs bin dɔn tɔk se di tɛm we i go de rul na Gɔd in Kiŋdɔm, di Grev go ɛmti. Fanando we wi bin dɔn tɔk bɔt insay di las atikul, bin tɔk se: “A bin sɔprayz di fɔs tɛm we a rid Jɔn 5:28, 29. I dɔn mek a dɔn gɛt op we a de tink bɔt di bambay.”

Trade trade, Job we bin fetful bin gɛt op fɔ se we i day Gɔd go gi am layf bak. Job bin aks se: “If pɔsin day, i go gɛt layf bak?” Job bin biliv dis, so i ansa se: “A go de wet na di Grev te di tɛm kam we yu go pul mi de. Yu go kɔl, ɛn a go ansa. Yu rili want fɔ si di tin dɛn we yu dɔn mek.”—Job 14:14, 15.

We Lazarɔs bin gɛt layf bak, dat de gi wi op fɔ tumara bambay

Mata, we na Lazarɔs in sista bin no se we pɔsin day i go gɛt layf bak. Afta Lazarɔs day, Jizɔs bin tɛl Mata se: “Yu brɔda go gɛt layf bak.” Mata bin ansa se: “A no se i go gɛt layf bak insay di las de.” Na in Jizɔs tɛl am se: “Na mi de gi layf bak to di wan dɛn we dɔn day, ɛn na mi na di layf. Ɛnibɔdi we sho se i biliv mi, go gɛt layf bak, ilɛksɛf i day.” (Jɔn 11:23-25) Wantɛm wantɛm, Jizɔs bin gi Lazarɔs layf bak! Wetin bin apin da tɛm de, de ɛp wi fɔ tink bɔt aw bɔku pipul dɛn go gɛt layf bak tumara bambay. Imajin we pipul dɛn go gɛt layf bak ɔlsay na di wɔl!

Yu tink se sɔm pipul dɛn go gɛt layf bak fɔ go na ɛvin?

WETIN DI BAYBUL SE: Gɔd in Wɔd se di layf we Jizɔs bin gɛt bak, bin difrɛn frɔm di layf we di ɔda et pipul dɛn bin gɛt bak. Dɛn et pipul dɛn de we bin gɛt layf bak, bin kam liv bak na di wɔl. Bɔt we Jizɔs bin gɛt layf bak, dɛn bin rayt se: “Jizɔs Krays . . . go na ɛvin, i sidɔm na Gɔd in rayt an.” (Pita In Fɔs Lɛta 3:21, 22) Na Jizɔs nɔmɔ bin gɛt layf bak fɔ go na ɛvin? Jizɔs bin dɔn tɛl in disaypul dɛn se: “If a go ɛn rɛdi ples fɔ una, a go kam bak ɛn briŋ una na di ples we a de, so dat usay a de na de unasɛf go de.”—Jɔn 14:3.

Jizɔs bin go na ɛvin ɛn go rɛdi fɔ sɔm pan in disaypul dɛn we gɛt fɔ go mit am. Na 144,000 pipul dɛn go gɛt layf bak fɔ go na ɛvin. (Rɛvɛleshɔn 14:1, 3) Bɔt wetin di wan dɛn we de go na ɛvin de go du de?

 Dɛn gɛt fɔ rili bizi! Di Baybul tɛl wi se: “Di wan dɛn fɔs we go gɛt layf bak go oli ɛn dɛn go gladi. Di sɛkɔn day nɔ go du dɛn natin, bɔt dɛn go bi prist dɛn fɔ Gɔd ɛn Krays, ɛn dɛn go rul as kiŋ dɛn wit am fɔ 1,000 ia.” (Rɛvɛleshɔn 20:6) Di wan dɛn we go gɛt layf bak fɔ go na ɛvin go rul wit Jizɔs as kiŋ ɛn prist oba di wɔl.

Udat dɛn go gɛt layf bak leta?

WETIN DI BAYBUL SE: Apɔsul Pɔl bin se: “A abop pan Gɔd jɔs lɛk aw dɛn man ya sɛf abop se Gɔd go gi layf bak to di wan dɛn we dɔn day, di wan dɛn we bin du wetin rayt ɛn di wan dɛn we nɔ bin du wetin rayt.Di Apɔsul Dɛn Wok [Akt] 24:15.

Gɔd in Wɔd gi wi op fɔ se bɔku bɔku pipul dɛn we dɔn day go gɛt layf bak

Udat dɛn go de pan di wan dɛn we Pɔl bin kɔl “di wan dɛn we bin du wetin rayt”? Lɛ wi tɔk bɔt wan ɛgzampul. Daniɛl bin fetful ɛn bifo i day, Gɔd bin tɛl am se: “Yu go rɛst, bɔt yu go tinap fɔ yu yon ples we di de dɛn dɔn.” (Daniɛl 12:13) Usay Daniɛl go gɛt layf bak? “Na di wan dɛn we de du wetin rayt go gɛt di wɔl, ɛn dɛn go de de sote go.” (Sam 37:29) Ɛn Jizɔs bin dɔn tɔk se: “Di wan dɛn we nɔ gɛt wamat go gladi, bikɔs na dɛn go gɛt di wɔl.” (Matyu 5:5) Daniɛl ɛn ɔda fetful man ɛn uman dɛn go gɛt layf bak ɛn liv bak na dis wɔl sote go.

Udat dɛn go de pan di wan dɛn we Pɔl bin kɔl “di wan dɛn we nɔ bin du wetin rayt”? Na bɔku bɔku pipul dɛn we bin dɔn liv ɛn day, we nɔ bin ɛva gɛt chans fɔ ɔndastand ɛn du wetin di Baybul se. We dɛn gɛt layf bak, dɛn go ebul fɔ no ɛn gladi fɔ Jiova * ɛn Jizɔs. (Jɔn 17:3) Ɔl di wan dɛn we gri fɔ sav Gɔd go gɛt di chans fɔ gɛt layf we go de sote go.

Ɔl di wan dɛn we gri fɔ sav Gɔd go gɛt di chans fɔ gɛt layf we go de sote go. Dɛn go gɛt wɛlbɔdi ɛn dɛn go gladi

Aw di wɔl go tan lɛk da tɛm de?

WETIN DI BAYBUL SE: Gɔd “go wep ɔl di kray wata we de na dɛn yay, day nɔ go de igen, munin nɔ go de igen, kray nɔ go de igen, ɛn pen nɔ go de igen.” (Rɛvɛleshɔn 21:4.) “Dɛn go bil os ɛn liv insay de, ɛn dɛn go mek gadin ɛn it wetin dɛn plant.”—Ayzaya 65:21.

Imajin aw i go tan lɛk fɔ liv na di wɔl wit yu fambul dɛn we dɔn gɛt layf bak di tɛm we di wɔl go dɔn fayn! Bɔt wan kwɛstyɔn stil de we wi nid fɔ ansa, dat na, Aw yu go no fɔ tru se pipul dɛn go gɛt layf bak?

^ par. 15 Di Baybul se Gɔd in nem na Jiova.