Go dayrɛkt to di men tin

Go dayrɛkt to di say we di difrɛn difrɛn atikul dɛn de

Wetin Wi Kin Lan Frɔm Joana

Wetin Wi Kin Lan Frɔm Joana

BƆKU pipul dɛn no se Jizɔs bin gɛt 12 apɔsul dɛn. Bɔt dɛn nɔ bin no se sɔm pan Jizɔs in disaypul dɛn na bin uman dɛn we bin de wit am. Joana na bin wan pan dɛn uman dɛn de.—Mat. 27:55; Lyuk 8:3.

Wetin na sɔm tin dɛn we Joana bin du di tɛm we Jizɔs bin de prich, ɛn wetin wi kin lan frɔm in ɛgzampul?

UDAT NA BIN JOANA?

Joana “in man nem Kuza” ɛn Kuza “bin de wok fɔ Ɛrɔd.” I go mɔs bi se Kuza na bin savant we de kia fɔ di tin dɛn we de apin na Ɛrɔd Antipas in os. Joana na bin wan pan di uman dɛn we Jizɔs bin mɛn. Joana ɛn ɔda uman dɛn bin de travul wit Jizɔs ɛn in apɔsul dɛn.—Lyuk 8:1-3.

Sɔm Ju Ticha dɛn bin de tich se uman dɛn nɔ fɔ miks wit man dɛn we nɔto dɛn fambul, dɛn nɔ fɔ ivin travul wit dɛn. Infakt, man dɛn nɔ fɔ tɔk bɔku to uman dɛn. Jizɔs nɔ bin fala di tin dɛn we di Ju Ticha dɛn bin de tich, i bin gri fɔ mek Joana ɛn ɔda uman dɛn we bin biliv, fala dɛn.

Joana nɔ bin de wɔri bɔt aw ɔda pipul dɛn go si am if i de miks wit Jizɔs ɛn in apɔsul dɛn. Ɔl di wan dɛn we bin de fala Jizɔs, bin nid fɔ rɛdi fɔ ajɔst di tin dɛn we dɛn bin de du. Na fɔ dɛn kayn pipul dɛn ya Jizɔs bin se: “Mi mama ɛn mi brɔda dɛn na dɛn wan ya we yɛri Gɔd in wɔd ɛn du wetin i se.” (Lyuk 8:19-21; 18:28-30) Yu nɔ fil fayn fɔ no se Jizɔs rili lɛk di wan dɛn we de lɛf sɔntin biɛn fɔ fala am?

I BIN ƐP FRƆM DI TIN DƐN WE I GƐT

Joana ɛn bɔku ɔda uman dɛn bin pul pan “di tin dɛn we dɛn gɛt,” fɔ ɛp Jizɔs ɛn in 12 apɔsul dɛn. (Lyuk 8:3) Wan man bin rayt se: “Lyuk nɔ bin min se na di uman dɛn bin de kuk, was di pan dɛn, ɛn so dɛn klos dɛn. Sɔntɛm, na so dɛn bin de du . . . , bɔt nɔto dat Lyuk bin se.” I go mɔs bi se di uman dɛn bin de yuz dɛn yon mɔni, ɔ di tin dɛn we dɛn gɛt fɔ ɛp dɛn kɔmpin dɛn.

Jizɔs ɛn in apɔsul dɛn nɔ bin de du ɔda wok we dɛn bin de prich. So i go mɔs bi se dɛn nɔ bin gɛt bɛtɛ mɔni fɔ pe fɔ ɔl di it ɛn ɔda tin dɛn, ilɛksɛf na fɔ jɔs 20 pipul dɛn. Pan ɔl we dɛn uman ya bin de du gud to Jizɔs ɛn in apɔsul dɛn, Jizɔs ɛn in apɔsul dɛn bin stil de waka wit “mɔni bɔks.” Dat sho se dɛn nɔ bin de abop ɔltɛm pan pipul dɛn fɔ ɛp dɛn. (Jɔn 12:6; 13:28, 29) I go mɔs bi se Joana  ɛn di ɔda uman dɛn bin de gi mɔni fɔ ɛp fɔ pe fɔ di tin dɛn we dɛn nid.

Sɔm pipul dɛn kin tɔk se Ju uman dɛn nɔ kin gɛt mɔni ɔ prɔpati. Bɔt insay sɔm buk dɛn we dɛn bin rayt dɛn tɛm dɛn de, dɛn bin rayt se uman kin gɛt prɔpati difrɛn we dɛn: (1) i kin gɛt prɔpati if in papa nɔ bin gɛt bɔy pikin we i day, (2) i kin gɛt prɔpati if dɛn gi am, (3) i kin gɛt mɔni frɔm wetin in ɛn in man bin dɔn disayd se i go gɛt if dɛn dayvɔs, (4) i kin gɛt mɔni ɔ prɔpati frɔm wetin in man lɛf we i day, ɔ (5) i kin gɛt mɔni frɔm wetin i de du.

Wan dawt nɔ bin de fɔ se di wan dɛn we bin de fala Jizɔs, bin de gi wetin dɛn ebul fɔ gi. I go mɔs bi se, sɔm pan di wan dɛn we bin de fala Jizɔs, na bin uman dɛn we gɛt mɔni. Bikɔs Joana na bin Ɛrɔd in savant in wɛf, sɔm pipul dɛn tek am se i bin gɛt mɔni. Sɔntɛm, na pɔsin lɛk am bin gi Jizɔs wan dia klos we dɛn nɔ stich no say. Wan uman bin rayt se: “Fishaman dɛn wɛf dɛn nɔ go ebul fɔ gi pɔsin da kayn klos de.”—Jɔn 19:23, 24.

Di Baybul nɔ tɔk if Joana bin gi mɔni. Bɔt i bin du wetin i ebul fɔ du, ɛn dat na fayn lɛsin fɔ wi. I lɛf to wi fɔ gi ɔ fɔ disayd wetin wi want fɔ gi, fɔ ɛp fɔ mek Gɔd in wok go bifo. Wetin impɔtant to Gɔd, na fɔ mek wi du ɔl wetin wi ebul fɔ du, wit gladi at.—Mat. 6:33; Mak 14:8; 2 Kɔr. 9:7.

DI TƐM WE JIZƆS DAY ƐN AFTA DAT

I go mɔs bi se, Joana ɛn ɔda uman dɛn “we bin dɔn yus fɔ waka wit am ɛn ɛp am we i bin de na Galili, ɛn bɔku ɔda uman dɛn we dɔn kam togɛda wit am na Jerusɛlɛm,” bin de di tɛm we dɛn bin de kil Jizɔs. (Mak 15:41) We dɛn bin pul Jizɔs in bɔdi na di stik fɔ go bɛr am, “di uman dɛn we bin kam wit am frɔm Galili bin fala dɛn fɔ go luk di grev ɛn si aw dɛn le in bɔdi, ɛn dɛn go bak fɔ go mek spays ɛn pafyum ɔyl dɛn.” Lyuk bin se dɛn uman dɛn ya na bin, “Meri Magdalin, Joana, ɛn Meri we na Jems in mama.” Dɛn bin kam bak afta di sabat ɛn dɛn bin si enjɛl dɛn we bin tɛl dɛn se, Jizɔs dɔn gɛt layf bak.—Lyuk 23:55–24:10.

Joana ɛn ɔda uman dɛn we bin biliv bin du wetin dɛn ebul fɔ dɛn Masta

I go mɔs bi se, Joana na bin wan pan di pipul dɛn we bin de wit di disaypul dɛn ɛn wit Jizɔs in mama ɛn in brɔda dɛn. Dɛn ɔl bin gɛda na Jerusɛlɛm di de we dɛn kɔl Pɛntikɔst insay di ia 33. (Akt 1:12-14) Sɔntɛm, bikɔs Joana in man bin de wok fɔ Ɛrɔd Antipas, i go mɔs bi se na in bin tɛl Lyuk bɔt sɔm tin dɛn we bin de apin insay Ɛrɔd Antipas in os ɛn pan ɔl di wan dɛn we rayt di Baybul buk dɛn we na Matyu, Mak, Lyuk ɛn Jɔn, na Lyuk nɔmɔ kɔl dis uman in nem.—Lyuk 8:3; 9:7-9; 23:8-12; 24:10.

Di stori bɔt Joana gɛt fayn lɛsin we wi fɔ de tink bɔt. I bin du in bɛst fɔ ɛp Jizɔs. I go mɔs dɔn gladi if di mɔni dɛn we i bin de gi, bin ɛp Jizɔs, in 12 apɔsul dɛn, ɛn di ɔda disaypul dɛn we bin de travul wit dɛn fɔ go prich. Joana bin ɛp Jizɔs ɛn i nɔ bin kɔmɔt biɛn am we i bin de sɔfa. I go fayn lɛ Kristian uman dɛn falamakata Joana in ɛgzampul.