Go dayrɛkt to di men tin

Go dayrɛkt to di say we di difrɛn difrɛn atikul dɛn de

Wi Go Ebul Liv Klin Layf

Wi Go Ebul Liv Klin Layf

“Una klin una an, . . . ɛn una klin una at.”—JEMS 4:8.

1. Wetin bɔku pipul dɛn kin si as nɔmal tin?

BƆKU pipul dɛn nɔ lɛk fɔ liv klin layf. Wi de si dis klia wan na wi yon tɛm. Na bɔku say dɛn na di wɔl, na nɔmal tin fɔ bi omo ɔ fɔ du mami ɛn dadi biznɛs wit pɔsin we yu nɔ mared. Pipul dɛn kin sho dis bad layf we dɛn de advatayz sɔntin ɛn i kin de pan fim, buk, ɛn siŋ dɛn. (Sam 12:8) Mami ɛn dadi biznɛs di we aw Gɔd nɔ want dɔn so bɔku dat yu go de wɔnda, ‘I rili pɔsibul fɔ liv klin layf?’ Wi go se, Yɛs, i pɔsibul se tru Kristian dɛn go liv klin layf bikɔs Jiova go ɛp dɛn.—Rid Fɔs Lɛta Fɔ Tɛsalonayka 4:3-5.

2, 3. (a) Wetin mek wi nɔ fɔ de tink bɔt bad tin dɛn? (b) Wetin wi go tɔk bɔt na dis atikul?

2 Di fɔs tin we wi fɔ no na dat, if wi want fɔ liv klin layf, wi nɔ fɔ de tink bɔt mami ɛn dadi biznɛs di we aw Gɔd nɔ want. Jɔs lɛk we bet kin mek dɛn kech fish, na so di tink we wi de tink bɔt mami ɛn dadi biznɛs, go mek wi want fɔ du am, if wi nɔ lɛf fɔ tink bɔt am wantɛm wantɛm. Bikɔs wi nɔ pafɛkt i kin izi fɔ mek wi want fɔ du mami ɛn dadi  biznɛs. As tɛm de go, di mɔ we wi de tink bɔt mami ɛn dadi biznɛs, na di mɔ wi go want fɔ du am. Datɛnde, ivin pɔsin we de sav Jiova go du wetin i bin dɔn de tink bɔt if i gɛt di chans. Fɔ tru, “di tin we de na [pɔsin] in at . . . kin mek i sin.”—Rid Jems 1:14, 15.

3 Wi fɔ mɛmba se ilɛk na shɔt tɛm wi tink bɔt sɔntin we nɔ fayn, i kin mek wi sin siriɔs wan. Bɔt i fayn fɔ no se if wi nɔ de tink bɔt bad tin, wi nɔ go put an pan mami ɛn dadi biznɛs ɛn sɔfa fɔ dat! (Gal. 5:16) Lɛ wi tɔk bɔt tri tin dɛn we go ɛp wi nɔ fɔ de tink bɔt bad tin: (1) na wi padi biznɛs wit Jiova, (2) na di advays dɛn we de na in Wɔd, ɛn (3) na machɔ Kristian dɛn.

“UNA KAM NIA GƆD”

4. Wetin mek i impɔtant fɔ kam nia Jiova?

4 Di Baybul gi advays to di wan dɛn we want fɔ “kam nia Gɔd.” I se: “Una klin una an, . . . ɛn una klin una at.” (Jems 4:8) If wi valyu wi padi biznɛs wit Jiova, wi go tray tranga wan fɔ du wetin i want pan ɔltin we wi de du na layf, ivin di we aw wi de tink. If wi want fɔ gɛt “klin at,” wi fɔ de tink bɔt tin dɛn we klin, tin dɛn we gud, ɛn tin dɛn we go briŋ prez to Gɔd. (Sam 24:3, 4; 51:6; Fil. 4:8) Jiova no se wi nɔ pafɛkt ɛn i no se i pɔsibul fɔ lɛ wi tink bɔt bad tin. Bɔt wi no se Jiova in at go pwɛl if wi kɔntinyu fɔ tink bɔt bad tin dɛn ɛn nɔ tray fɔ du ɔl wetin wi ebul fɔ stɔp fɔ tink bɔt dɛn. (Jɛn. 6:5, 6) So lɛ wi du ɔl wetin wi ebul fɔ de tink bɔt tin dɛn we klin.

5, 6. Aw prea go ɛp wi fɔ lɛf fɔ tink bɔt bad tin dɛn?

5 Wan impɔtant we fɔ sho se wi rili abop pan Jiova na we wi de pre to am fɔ ɛp wi fɔ lɛf fɔ tink bɔt bad tin dɛn. We wi de pre to Jiova, wi de go nia am ɛn insɛf de kam nia wi. I de gi wi in oli spirit fri wan we go ɛp wi nɔ fɔ tink bɔt bad tin ɛn we go ɛp wi bak fɔ liv klin layf. So lɛ wi mek Gɔd no se wi rili want fɔ du wetin i want bay we wi de tink bɔt gud tin ɔltɛm. (Sam 19:14) I go fayn fɔ lɛ wi aks wisɛf dɛn kwɛstyɔn ya: Wi kin put wisɛf dɔŋ ɛn aks Jiova fɔ wach insay wi at ɛn pul ɛni “bad tin” we go mek wi sin? (Sam 139:23, 24) Wi kin pre to am ɔltɛm fɔ lɛ i ɛp wi fɔ tinap tranga wan we sɔntin tɛmpt wi fɔ du bad?—Mat. 6:13.

6 Di we aw dɛn mɛn wi ɔ di we aw wi bin de biev go dɔn mek wi lɛk fɔ du sɔm bad tin dɛn we Jiova et. Bɔt pan ɔl dis, Jiova kin ɛp wi fɔ chenj so dat wi go kɔntinyu fɔ sav am di rayt we. Kiŋ Devid bin no bɔt dis. Afta Devid bin dɔn du mami ɛn dadi biznɛs wit Batshiba, i beg Jiova se: “Gi mi at we klin, ɛn ɛp mi fɔ bigin du wetin yu want, so dat a go tinap tranga wan.” (Sam 51:10, 12) Bad tin kin de na wi at bikɔs wi nɔ pafɛkt, bɔt Jiova kin ɛp wi wit in spirit so dat wi go du wetin i want. Ivin if di bad tin dɛn we de na wi at bɔku pas di gud tin dɛn, Jiova kin ɛp wi fɔ obe in lɔ dɛn ɛn i kin mek wi kɔntinyu fɔ fala dɛn. I nɔ go mek ɛni bad tin kɔntrol wi.—Sam 119:133.

If bad tin bigin fɔ kam na wi at, wi fɔ pul am kɔmɔt de (Luk na paregraf 6)

“UNA FƆ DE DU WETIN GƆD IN WƆD SE”

7. Aw Gɔd in Wɔd go ɛp wi nɔ fɔ de tink bɔt bad tin?

7 Jiova kin yuz in Wɔd, di Baybul fɔ ansa wi prea dɛn. Di sɛns we de insay Gɔd in Wɔd “klin.” (Jems 3:17) We wi de rid di Baybul ɛvride ɛn tink gud wan  bɔt wetin wi de rid, i go ɛp wi nɔ fɔ de tink bɔt bad tin. (Sam 19:7, 11; 119:9, 11) Apat frɔm dat, di Baybul gɛt ɛgzampul ɛn advays dɛn we go ɛp wi nɔ fɔ de tink bɔt bad tin.

8, 9. (a) Wetin mek wan yɔŋ man bin du mami ɛn dadi biznɛs wit wan raregyal? (b) Tide if wi want fɔ fala di advays we de na Prɔvabs chapta 7, wetin wi nɔ fɔ du?

8 Prɔvabs 5:8 se: “Nɔ go nia [uman we lɛk fɔ du mami ɛn dadi biznɛs di we aw Gɔd nɔ want]; ɛn nɔ go nia in os.” Prɔvabs chapta 7 sho di bad tin we kin apin we pɔsin nɔ fala dis advays. Insay da chapta de, wan yɔŋ man go waka nia wan raregyal in os. Di ples bin dɔn bigin dak. Di uman kam mit am na wan kɔna na di strit ɛn i bin drɛs lɛk raregyal. Di uman ol di yɔŋ man ɛn kis am. I yuz in swit mɔt fɔ gɛt di yɔŋ man ɛn dɛn du mami ɛn dadi biznɛs. I go mɔs bi se dis yɔŋ man nɔ bin plan fɔ go du mami ɛn dadi biznɛs. Dis yɔŋ man nɔ bin gɛt sɛns ɛn i nɔ bin ebul disayd fɔ du di rayt tin. So i bin gɛt fɔ sɔfa bad fɔ wetin i du. If nɔmɔ i bin fɔ dɔn avɔyd dis uman, i nɔ bin fɔ dɔn gɛt dis prɔblɛm!—Prɔv. 7:6-27.

9 Fɔ se sɔntɛnde wisɛf nɔ kin disayd fɔ du di rayt tin bay we wi de du sɔntin we go mek wi bigin tink bɔt bad tin?  Fɔ ɛgzampul, na nɛt, tɛlivishɔn steshɔn dɛn kin sho bad bad tin dɛn. So i nɔ go fayn fɔ lɛ wi de chenj chenj di chanɛl dɛn jɔs fɔ si wetin dɛn de ple. Ɛn i nɔ go fayn fɔ klik Intanɛt link dɛn we wi nɔ no usay dɛn go kɛr wi go. I nɔ fayn bak fɔ go sɔnsay na di Intanɛt we go mek yu luk dɛn rud rud pikchɔ dɛn ɔ go sɔnsay we gɛt sɔntin fɔ du wit mami ɛn dadi biznɛs. We wi go na dɛn say dɛn de, i go mek wi want fɔ du bad tin ɛn i go mek i nɔ izi fɔ lɛ wi liv klin layf.

10. Wetin mek i nɔ fayn fɔ mek lɛk se yu lɛk pɔsin we yu nɔ rili lɛk am? (Luk di pikchɔ nia dis atikul in taytul.)

10 Wan ɔda we we di Baybul de ɛp wi na we i de advays wi aw uman fɔ trit man ɛn aw man fɔ trit uman. (Rid Fɔs Lɛta To Timoti 5:2.) Dis advays de mek wi no se i nɔ fayn fɔ mek lɛk se yu want pɔsin we yu nɔ rili want am. Sɔm pipul dɛn kin fil se we dɛn de mek mek dɛn bɔdi sɔm kayn spɛshal we ɛn wach pɔsin lɛk se dɛn lɛk am we dɛn nɔ rili lɛk am i nɔ bad wans nɔto tɔch dɛn de tɔch di pɔsin. Bɔt we wi de mek lɛk se wi lɛk pɔsin we wi nɔ rili lɛk am, ɔ we wi de ɛnkɔrej pɔsin we de du dis kayn tin, i kin mek wi bigin tink bɔt bad tin ɛn du mami ɛn dadi biznɛs. I dɔn bi trade, so i kin bi tide.

11. Us fayn ɛgzampul Josɛf sɛt?

11 We dis kayn tin bin apin to Josɛf, i bin du tin wit sɛns. Di tɛm we Pɔtifa in wɛf tray fɔ tɛmpt Josɛf fɔ du mami ɛn dadi biznɛs, i nɔ du am. Bɔt di uman nɔ bin kɔmɔt biɛn am. Ɛvride, i bin de tɛl Josɛf fɔ spɛn tɛm wit am. (Jɛn. 39:7, 8, 10) Wan man we stɔdi di Baybul gud gud wan bin se Pɔtifa in wɛf bin de tray fɔ tɔk se: “‘Lɛ wi jɔs spɛn smɔl tɛm togɛda.’ I bin de op se i go ebul mek [Josɛf] in fɔs du sɔntin fɔ sho se i lɛk am.” Bɔt Josɛf bin dɔn mekɔp in maynd se i nɔ go ɛva ɛnkɔrej am. I bin mek lɛ di uman no se i nɔ lɛk wetin i de du ɛn i nɔ bin de mek lɛk se i lɛk di uman. Dis bin ɛp Josɛf nɔ fɔ bigin tink bɔt bad tin na in at. We di uman tray fɔ fos Josɛf lɛ dɛn du mami ɛn dadi biznɛs, Josɛf nɔ gri. “I lɛf in klos na in an ɛn rɔn kɔmɔt na do.”—Jɛn. 39:12.

12. Aw wi no se wetin wi kin luk kin afɛkt wi at?

12 Di Baybul advays wi bak lɛ wi nɔ alaw wi yay fɔ mek wi du bad tin. We pɔsin nɔ kɔntrol in yay, i kin mek i want fɔ du mami ɛn dadi biznɛs. Jizɔs bin tɛl wi se “ɛnibɔdi we kɔntinyu fɔ luk uman te i gɛt filin fɔ am, dɔn du mami ɛn dadi biznɛs wit am na in at.” (Mat. 5:28) Yu mɛmba wetin bin apin to Kiŋ Devid? “We [Devid] de ɔp di os, i si wan uman de was.” (2 Sam. 11:2) I nɔ bin pul in yay de ɛn bigin tink bɔt ɔda tin. Dat bin mek i want ɔda man in wɛf ɛn du mami ɛn dadi biznɛs wit am.

13. Wetin mek wi fɔ ‘mek agrimɛnt wit wi yay’? Wetin dis min?

13 Fɔ lɛ wi nɔ de tink bɔt mami ɛn dadi biznɛs, wi fɔ ‘mek agrimɛnt wit wi yay,’ jɔs lɛk aw Job bin du. (Job 31:1, 7, 9) Wi fɔ mekɔp wi maynd fɔ kɔntrol wi yay ɛn wi nɔ fɔ luk ɔda pɔsin te wi gɛt filin fɔ am. Dis min se wi fɔ pul wi yay pan dɛn rud rud pikchɔ dɛn, ilɛksɛf na pan kɔmpyuta, saynbod, magazin dɛn, ɔ ɛni ɔdasay we dɛn de.

14. Aw wi go bɛnifit frɔm di advays we se wi fɔ liv klin layf?

14 If yu an de pan ɛniwan pan dɛn tin ya we wi dɔn tɔk bɔt, i go fayn mek yu  du sɔntin wantɛm wantɛm. Na fɔ fala di advays dɛn we de na Gɔd in Wɔd, we go ɛp yu fɔ avɔyd wetin bad ɛn liv klin layf.—Rid Jems 1:21-25.

“KƆL DI ƐLDA DƐN”

15. Wetin mek i fayn fɔ aks ɔda pɔsin fɔ ɛp wi if wi kin tink bɔt tin dɛn we nɔ fayn?

15 If i nɔ izi fɔ lɛ wi lɛf fɔ tink bɔt mami ɛn dadi biznɛs, i go fayn mek wi tɛl wi kɔmpin Kristian dɛn so dat dɛn go ɛp wi. Na tru se i nɔ kin izi fɔ tɛl ɔda pɔsin bɔt dɛn kayn prɔblɛm ya. Bɔt we wi tɛl machɔ Kristian wi prɔblɛm, i go ɛp wi fɔ no se di tin dɛn we wi de tink bɔt rili bad. (Prɔv. 18:1; Ibru 3:12, 13) We wi tɔk to Kristian we machɔ ɛn we de si tin di we aw Jiova de si am, i go ɛp wi fɔ no usay wi nid fɔ chenj. Dis go ɛp wi fɔ chenj ɛn Jiova go kɔntinyu fɔ lɛk wi.

16, 17. (a) Aw di ɛlda dɛn go ɛp di wan dɛn we i nɔ izi fɔ lɛ dɛn lɛf fɔ tink bɔt bad tin? Gi wan ɛgzampul. (b) Wetin mek i fayn fɔ mek di wan dɛn we de luk dɛn rud rud pikchɔ dɛn go to di ɛlda dɛn wantɛm wantɛm?

16 Na di ɛlda dɛn mɔ go ebul fɔ ɛp wi. (Rid Jems 5:13-15.) Fɔ lɔng tɛm, i nɔ bin izi fɔ mek wan yɔŋ man na Brazil lɛf fɔ tink bɔt bad tin. I bin se: “A bin no se di tin dɛn we a de tink bɔt nɔ de mek Jiova gladi, bɔt a bin de shem fɔ tɛl ɔda pipul dɛn bɔt wetin a de tink.” Wan ɛlda na in kɔngrigeshɔn we bisin bɔt am bin tray fɔ mek am padi ɛn i bin ɛnkɔrej am fɔ tɔk to di ɛlda dɛn so dat dɛn go ɛp am. Di yɔŋ man se: “A bin sɔprayz we di ɛlda dɛn trit mi fayn. Dɛn sho se dɛn ɔndastand mi ɛn dɛn bin trit mi fayn pas aw a bin fil se dɛn fɔ trit mi. Dɛn lisin gud wan we a de ɛksplen mi prɔblɛm dɛn. Dɛn yuz di Baybul fɔ ɛp mi fɔ no se Jiova stil lɛk mi, ɛn dɛn pre wit mi. Dat mek am izi fɔ mi fɔ fala di advays we dɛn gi mi frɔm di Baybul.” Afta lɔng tɛm dɔn pas, dis yɔŋ man bin go bifo pan Gɔd biznɛs, ɛn i tɔk se: “A dɔn kam fɔ no se i rili impɔtant fɔ mek ɔda pɔsin ɛp yu pas fɔ lɛ yu kip yu prɔblɛm dɛn to yusɛf.”

17 I rili fayn fɔ aks ɔda pɔsin fɔ ɛp yu if di men tin we mek yu de tink bɔt bad tin na bikɔs yu de wach dɛn rud rud pikchɔ dɛn. Di mɔ we yu westɛm fɔ aks pɔsin fɔ ɛp yu, na di mɔ di bad tin we yu de tink bɔt go de ‘bɔku, ɛn i go mek yu sin.’ Ɛn dis go ambɔg ɔda pipul dɛn ɛn briŋ badnem pan Jiova. Bɔku pan Jiova in savant dɛn we want fɔ du wetin i want ɛn we want fɔ de na di kɔngrigeshɔn dɔn gri fɔ mek di ɛlda dɛn ɛp dɛn.—Jems 1:15; Sam 141:5; Ibru 12:5, 6.

MEKƆP YU MAYND FƆ KƆNTINYU FƆ LIV KLIN LAYF

18. Wetin yu dɔn mekɔp yu maynd fɔ du?

18 As Setan in wɔl de go frɔm bad to wɔs pan mami ɛn dadi biznɛs, Jiova kin gladi we in savant dɛn de tray tranga wan fɔ tink bɔt gud tin ɛn fɔ liv klin layf. So lɛ wi ɔl mekɔp wi maynd fɔ kɔntinyu fɔ de nia Jiova ɛn tek di advays we de na in Wɔd ɛn in advays dɛn we wi kin gɛt na di kɔngrigeshɔn. If wi kɔntinyu fɔ liv klin layf, wi go gladi ɛn gɛt kolat rayt naw. (Sam 119:5, 6) Tumara bambay, we Setan nɔ go de igen, wi go gɛt di chans fɔ liv sote go na di wɔl di tɛm we natin nɔ go mek wi want fɔ du bad tin.