Go dayrɛkt to di men tin

Go dayrɛkt to di say we di difrɛn difrɛn atikul dɛn de

Una go De Wach—Setan Want fɔ Kil Una!

Una go De Wach—Setan Want fɔ Kil Una!

“[Una] go de wach! Una ɛnimi we na di Dɛbul, de waka lɛk layɔn we de ala lawd wan, de fɛn we fɔ it sɔmbɔdi.”—1 PIT. 5:8.

1. Ɛksplen aw wan spirit pɔsin kam fɔ bi Setan.

WAN spirit pɔsin bin de we bin de wɔship Jiova fayn fayn wan. Bɔt as tɛm de go, i bigin fɔ milɛ di wɔship we mɔtalman de wɔship Jiova. Bifo i stɔp fɔ tink bɔt dat, i kɔntinyu fɔ tink bɔt am te i sin. (Jems 1:14, 15) Dis spirit pɔsin na Setan, we “nɔ bin tinap tranga wan fɔ wetin tru.” I tɔn in bak pan Jiova ɛn i kam bi “di papa fɔ di wan dɛn we de lay.”—Jɔn 8:44.

2, 3. Wetin di wɔd “Setan,” “Dɛbul,” “snek,” ɛn “dragɔn” de tɛl wi bɔt Jiova in men ɛnimi?

2 We Setan tɔn in bak pan Jiova, i kam fɔ bi Jiova in men ɛnimi, ɛn Setan nɔ lɛk mɔtalman. Di taytul dɛn we Setan gɛt de sho di kayn bad pɔsin we i bi. Setan min “pɔsin we de agens ɔda pɔsin,” dis min se dis wikɛd spirit pɔsin nɔ de sɔpɔt di we aw Gɔd de rul, bifo dat, i et we Gɔd de rul ɛn i de du ɔlkayn tin fɔ lɛ Gɔd nɔ rul. Pantap dat, Setan want lɛ Jiova lɛf fɔ rul.

3 Insay Rɛvɛleshɔn 12:9, di Baybul kɔl Setan, Dɛbul.  Dɛbul min “pɔsin we de lay pan sɔmbɔdi fɔ pwɛl in nem.” Dis de mɛmba wi se Setan dɔn pwɛl Jiova in nem bay we i se Jiova de lay. We di Baybul kɔl Setan “da snek we bin de trade trade,” i de ɛp wi fɔ mɛmba di tɛm we Setan bin yuz wan snek na di gadin na Idɛn fɔ lay to Iv. We di Baybul se Setan na “di big dragɔn,” i de mek wi mɛmba wan fiaful animal. Dis we aw di Baybul kɔl Setan fit am bikɔs i de fɛn ɔlkayn we fɔ kil Jiova in pipul dɛn ɛn mek wetin Jiova want nɔ bi.

4. Wetin wi go tɔk bɔt insay dis atikul?

4 So wi dɔn si klia wan se Setan na di men pɔsin we want fɔ pwɛl wi padi biznɛs wit Jiova. Na dis mek di Baybul de wɔn wi se: “Una rɛdi ɔltɛm ɛn go de wach! Una ɛnimi we na di Dɛbul, de waka lɛk layɔn we de ala lawd wan, de fɛn we fɔ it sɔmbɔdi.” (1 Pit. 5:8) Fɔseka dis wɔnin, dis atikul go tɔk bɔt tri tin dɛn bɔt Setan. Ɛn i go ɛp wi fɔ no wetin mek i rili fayn fɔ tinap tranga wan agens dis ɛnimi we et Jiova ɛn In pipul dɛn.

SETAN PAWAFUL

5, 6. (a) Gi sɔm ɛgzampul dɛn we de sho se spirit pipul dɛn “gɛt pawa.” (b) Wetin di Baybul min we i se Setan “kin mek pɔsin day”?

5 Di enjɛl dɛn na spirit pipul dɛn ɛn dɛn ɔl “gɛt pawa.” (Sam 103:20) Dɛn pas mɔtalman fa fawe, dɛn gɛt sɛns ɛn trɛnk pas wi. Di enjɛl dɛn we fetful de yuz dɛn pawa di rayt we. Fɔ ɛgzampul, wan tɛm, wan pan Jiova in enjɛl dɛn kil 185,000 Asirian sojaman dɛn. Dis na tin we wan mɔtalman nɔ ebul du ɛn i nɔ go ivin izi fɔ lɛ wan ol ami du am. (2 Kiŋ 19:35) Wan ɔda tɛm, wan enjɛl bin yuz in sɛns ɛn pawa fɔ pul Jizɔs in apɔsul dɛn na jel. Dis enjɛl opin di domɔt, i mek lɛ di apɔsul dɛn kɔmɔt na do, ɛn lɔk di domɔt biɛn dɛn, pan ɔl we di wan dɛn we bin de gayd bin tinap nia de!—Akt 5:18-23.

6 We di fetful enjɛl dɛn de yuz dɛn pawa fɔ du wetin rayt, Setan in de yuz in pawa fɔ du wetin bad. Setan rili gɛt pawa ɛn i de mek bɔku pipul dɛn du bad. Di Baybul se na in “de rul dis wɔl” ɛn na in na “di gɔd we de na dis wɔl.” (Jɔn 12:31; 2 Kɔr. 4:4) Setan di Dɛbul “kin mek pɔsin day.” (Ibru 2:14) Dis nɔ min se na insɛf sɛf de kil ɔlman we de day. Bɔt i de mek pipul dɛn lɛk fɔ kil dɛn kɔmpin. Apat frɔm dat, bikɔs Iv bin biliv di lay we Setan bin lay, ɛn Adam insɛf jɔyn am fɔ tɔn in bak pan Gɔd, sin ɛn day de mit ɔlman. (Rom 5:12) So na dis mek di Baybul se Setan “kin mek pɔsin day.” Ɛn na in mek Jizɔs se Setan “na pɔsin we de kil.” (Jɔn 8:44) Setan na ɛnimi we rili pawaful!

7. Aw di dɛbul dɛn dɔn sho se dɛn pawaful?

7 We wi nɔ du wetin Setan want, wi nɔ jɔs de agens in wangren nɔmɔ, wi de agens ɔl di wan dɛn we de sɔpɔt am fɔ se Gɔd nɔ gɛt di rayt fɔ rul. Dis min se wi ivin de agens di ɔda wikɛd enjɛl dɛn we dɔn tɔn dɛn bak pan Gɔd, we dɛn de kɔl dɛbul. (Rɛv. 12:3, 4) Bɔku bɔku tɛm, di dɛbul dɛn dɔn sho se dɛn gɛt pawa pas mɔtalman fa fawe; dɛn dɔn tɔmɛnt bɔku pipul dɛn ɛn mek dɛn sɔfa. (Mat. 8:28-32; Mak 5:1-5) Nɔ ɛva tɛkɛ di pawa we dɛn wikɛd enjɛl ya gɛt ɔ di pawa we “di dɛbul dɛn edman” gɛt. (Mat. 9:34) If Jiova nɔ ɛp wi, wi nɔ go ɛva ebul fɔ win Setan.

 SETAN WIKƐD

8. (a) Wetin na di men tin we Setan want fɔ du? (Luk di pikchɔ nia dis atikul in taytul.) (b) Frɔm wetin yu dɔn si, aw pipul dɛn na di wɔl de sho se dɛn wikɛd lɛk Setan?

8 Di apɔsul Pita bin kɔmpia Setan to “layɔn we de ala lawd wan.” Wan buk se di Grik wɔd we dɛn yuz fɔ translet “ala lawd wan” min “animal we de ala lawd wan bikɔs i angri bad bad wan.” Dis jɔs de sho di kayn wikɛd pɔsin we Setan bi! Pan ɔl we Setan de rul di wan ol wɔl, i stil want fɔ mek mɔ pipul dɛn de ɔnda am. (1 Jɔn 5:19) Di pipul dɛn we de na di wɔl jɔs tan lɛk “af-af cham cham” to am. So Setan dɔn tɔn in atɛnshɔn to di anɔyntɛd dɛn ɛn di “ɔda ship dɛn” we tan lɛk “fud we de mek pɔsin bɛlful.” (Jɔn 10:16; Rɛv. 12:17) Di men tin we Setan want na fɔ kil Jiova in pipul dɛn. Di kayn bad bad tin dɛn we i dɔn du to Jizɔs in disaypul dɛn frɔm di tɛm we di apɔsul dɛn bin de te naw de sho se i rili wikɛd.

9, 10. (a) Aw Setan bin tray fɔ mek wetin Gɔd want nɔ bi to di Izrɛlayt dɛn? (Gi sɔm ɛgzampul dɛn.) (b) Wetin mek Setan bin de pe atɛnshɔn to di Izrɛlayt dɛn? (c) Aw yu tink se Setan kin fil we wan pan Jiova in savant dɛn kin sin siriɔs wan?

9 Fɔ lɛ wetin Gɔd want nɔ bi, Setan dɔn du ɔda tin dɛn we de sho se i wikɛd. We layɔn dɔn angri bad bad wan, i nɔ kin sɔri fɔ di animal we i kech. I nɔ kin sɔri fɔ di animal bifo i kil am ɛn i nɔ kin rigrɛt afta i kil am. Semweso, Setan nɔ kin sɔri fɔ pɔsin we i de tray fɔ pwɛl in padi biznɛs wit Jiova. Fɔ ɛgzampul, tink bɔt aw Setan go dɔn fil we di Izrɛlayt dɛn bin de du mami ɛn dadi biznɛs di we aw Jiova nɔ want ɛn we dɛn bin de milɛ sɔntin we nɔto dɛn yon. We yu rid bɔt di bad tin we bin apin to Zimray ɛn Geazi, yu de “si” we Setan de gladi bikɔs i dɔn win?—Nɔm. 25:6-8, 14, 15; 2 Kiŋ 5:20-27.

Setan kin gladi we wan pan Jiova in savant dɛn kin sin (Luk na paregraf 10)

10 Setan bin gɛt wan men rizin we mek i bin de pe atɛnshɔn to di Izrɛlayt dɛn we bin de trade. Wetin mek i bin de pe atɛnshɔn to dɛn? Na bikɔs na frɔm di  Izrɛlayt dɛn di Mɛsaya fɔ kɔmɔt ɛn na di Mɛsaya fɔ kil Setan ɛn sho se na Jiova gɛt di rayt fɔ rul. (Jɛn. 3:15) Setan nɔ bin want mek di Izrɛlayt dɛn go bifo, so i bin de du ɔlkayn tin fɔ mek dɛn sin. Nɔ fil se Setan bin fil sɔri fɔ Devid we i du mami ɛn dadi biznɛs wit ɔda pɔsin in wɛf ɛn nɔ fil se i bin sɔri fɔ Mozis we i du sɔntin we mek i nɔ bin go na di land we Jiova bin dɔn prɔmis dɛn. Bifo dat, Setan kin gladi we wan pan Gɔd in savant dɛn kin sin siriɔs wan. Infakt, na sɔm pan dɛn tin ya Setan kin yuz fɔ provok Jiova.—Prɔv. 27:11.

11. Wetin mek Setan bin put in atɛnshɔn pan Sera?

11 Setan bin rili et di famili we di Mɛsaya fɔ kɔmɔt. Fɔ ɛgzampul, tink bɔt wetin apin jɔs afta Gɔd tɛl Ebraam se i go mek i bi “wan big neshɔn.” (Jɛn. 12:1-3) We Ebraam ɛn Sera bin de na Ijipt, Fɛro mek dɛn briŋ Sera na in os, so dat i go bi in wɛf. Bɔt Jiova nɔ bin want lɛ dat bi, so i protɛkt Sera fɔ lɛ Fɛro nɔ ledɔm wit am. (Rid Jɛnɛsis 12:14-20.) Jɔs bifo dɛn bɔn Ayzak, dis sem kayn tin bin apin na Gira. (Jɛn. 20:1-7) Yu tink se na Setan bin de mek dɛn tin ya de apin? Fɔ se i bin de tink se Sera we bin dɔn lɛf di fayn fayn ples we i bin de na Ɔ ɛn kam liv na tɛnt, go milɛ di fayn ples we Fɛro ɛn Abimilɛk gɛt? Fɔ se Setan bin de tink se Sera go kɔmɔt biɛn in man ɛn Jiova ɛn go mared to ɔda man? Di Baybul nɔ tɛl wi, bɔt wi no se Setan bin fɔ dɔn gladi if Sera bin du sɔntin we go mek i nɔ fit fɔ bɔn di pikin we Gɔd bin dɔn prɔmis dɛn. Setan nɔ bin fɔ dɔn fil am atɔl if da gud uman de in mared, in gudnem, ɛn in padi biznɛs wit Jiova fɔ dɔn pwɛl. Setan rili wikɛd!

12, 13. (a) Aw Setan sho se i wikɛd afta dɛn bɔn Jizɔs? (b) Aw yu tink se Setan de fil bɔt di yɔŋ wan dɛn we lɛk Jiova ɛn we de tray tranga wan fɔ sav Am?

12 Afta Ebraam day, i tek lɔng lɔng tɛm bifo dɛn bɔn Jizɔs. Nɔ tink se Setan bin si Jizɔs as fayn yɔŋ bebi, we pɔsin go gladi fɔ ol ɛn ple wit, ɛn we impɔtant. Dis na bikɔs Setan bin no se na dis pikin go kam bi di Mɛsaya. Fɔ tru, na Jizɔs na Ebraam in men pikin, ɛn na in gɛt fɔ “pwɛl pwɛl ɔl di Dɛbul in wok dɛn.” (1 Jɔn 3:8) Yu tink se Setan bin de fil se na bad bad tin i go du if i kil yɔŋ bebi? Nɔ, Setan nɔ de tink ɛni gud tin na in at. Setan nɔ bin westɛm fɔ du sɔntin we Jizɔs bin smɔl. Aw?

13 Kiŋ Ɛrɔd bin vɛks bad bad wan we sɔm man dɛn we no bɔt di sta dɛn kam aks bɔt “di Ju pipul dɛn kiŋ we dɛn dɔn bɔn,” so i mekɔp in maynd fɔ kil di pikin. (Mat. 2:1-3, 13) Fɔ mek shɔ se dat apin, i pas lɔ se dɛn fɔ kil ɔl di bɔy pikin dɛn we ol tu ia te kam dɔŋ, na Bɛtliɛm ɛn di tɔŋ dɛn we de arawnd de. (Rid Matyu 2:13-18.) Ɛrɔd nɔ bin ebul fɔ kil Jizɔs, bɔt wetin dis de tɛl wi bɔt Setan? I de sho wi klia wan se Setan nɔ valyu mɔtalman layf atɔl. I nɔ de ivin sɔri fɔ pikin dɛn. Fɔ tru, Setan tan lɛk “layɔn we de ala lawd wan.” Nɔ ɛva tɛkɛ di kayn we aw Setan wikɛd!

SETAN DE FUL PIPUL DƐN

14, 15. Aw Setan dɔn “blaynd” di wan dɛn we nɔ biliv?

14 Setan no se na we i ful pipul dɛn na in go mek dɛn tɔn dɛn bak pan Jiova Gɔd we lɛk wi. (1 Jɔn 4:8) Bikɔs Setan de ful pipul dɛn, dat dɔn mek dɛn nɔ bisin fɔ “lan bɔt Gɔd.” (Mat. 5:3) I dɔn “blaynd  dɛn maynd, so dat di layt we na di gud nyus bɔt di Krays, we jɔs tan lɛk Gɔd in pikchɔ, nɔ go shayn.”—2 Kɔr. 4:4.

15 Wan pan di men tin dɛn we Setan de yuz fɔ ful pipul dɛn na lay lay rilijɔn. I kin rili gladi we i de si pipul dɛn de wɔship dɛn gret gret granpa dɛn, animal dɛn, ston, stik, ɛn ɔda tin dɛn, wans nɔto Jiova dɛn de wɔship. Ɛn Jiova se na in ‘nɔmɔ wi fɔ sav’! (Ɛks. 20:5) Ivin di wan dɛn we tink se dɛn de wɔship Gɔd di rayt we, stil biliv dɛn lay lay tichin dɛn ɛn dɛn kin put an pan sɛrimɔni dɛn we Gɔd nɔ want. Dɛn rili sɔri, lɛk di pipul dɛn we Jiova bin tɛl se: “Wetin mek una de kɔntinyu fɔ pe mɔni fɔ tin we nɔto bred, ɛn wetin mek una de spɛn fɔ sɔntin we nɔ de mek una satisfay? Una lisin gud wan to mi, ɛn it wetin gud, ɛn una go rili gladi fɔ wetin fayn.”—Ayz. 55:2.

16, 17. (a) Wetin mek Jizɔs bin tɛl Pita se: “Lɛf fɔ ambɔg mi, Setan”? (b) Aw Setan kin ful wi fɔ mek wi nɔ gɛt bɛtɛ zil igen?

16 Setan kin ivin ful Jiova in savant dɛn we gɛt zil. Fɔ ɛgzampul, tink bɔt wetin apin we Jizɔs tɛl in disaypul dɛn se sɔm pipul dɛn gɛt fɔ kil am. Di apɔsul Pita nɔ bin want lɛ bad tin apin to Jizɔs, so i kɛr am go na kɔna ɛn tɛl am se: “Tek am izi wit yusɛf, mi Masta; dɛn tin ya nɔ go apin to yu atɔl.” Jizɔs tɛl Pita se: “Lɛf fɔ ambɔg mi, Setan!” (Mat. 16:22, 23) Wetin mek Jizɔs kɔl Pita “Setan”? Na bikɔs Jizɔs bin no wetin gɛt fɔ apin. Di tɛm bin dɔn de kam we i fɔ sakrifays in layf fɔ mɔtalman ɛn sho se di Dɛbul na layman. Dat nɔto bin di tɛm fɔ lɛ Jizɔs “tek am izi” wit insɛf. Bɔt na dat Setan bin want lɛ i du.

17 As wi de nia di tɛm we dis wɔl fɔ dɔn, bɔku bad bad tin dɛn de apin. Setan want lɛ wi “tek am izi” bay we wi de pe atɛnshɔn fɔ go bifo na dis wɔl so dat wi nɔ go gɛt bɛtɛ zil igen fɔ du wetin Jiova want. Nɔ alaw dat fɔ apin to yu! Bifo dat, “go de wach.” (Mat. 24:42) Nɔ ɛva biliv Setan in lay lay tɔk fɔ se di ɛnd de fa fɔs ɔ i nɔ de kam atɔl atɔl.

18, 19. (a) Aw Setan kin tray fɔ ful wi ɛn mek wi tink se Jiova nɔ lɛk wi? (b) Aw Jiova de ɛp wi fɔ rɛdi ɛn de wach?

18 Ɔda we de bak we Setan kin tray fɔ ful wi. I kin want fɔ mek wi biliv se Gɔd nɔ lɛk wi ɛn i nɔ de fɔgiv wi sin dɛn. Na ɔl dis Setan de yuz fɔ ful pipul dɛn. Bɔt wet o, udat rili Jiova nɔ lɛk? Na Setan. Udat rili Jiova nɔ go fɔgiv? Na Setan bak. Bɔt di Baybul tɛl wi se: “Gɔd nɔto pɔsin we nɔ de du wetin rayt so i nɔ go fɔgɛt una wok ɛn di lɛk we una de sho se una lɛk in nem.” (Ibru 6:10) Jiova kin gladi we wi de tray fɔ du wetin i want, ɛn di sav we wi de sav am go bi fɔ natin. (Rid Fɔs Lɛta Fɔ Kɔrint 15:58.) So lɛ wi nɔ alaw Setan fɔ ful wi wit in lay lay tɔk.

19 As wi dɔn si, Setan pawaful, i wikɛd, ɛn i de ful pipul dɛn. Aw wi go ebul fɔ fɛt am ɛn win? Jiova nɔ lɛf wi so nɔmɔ. In Wɔd, di Baybul, de sho wi Setan in trik dɛn, so “wi sabi in kɔni kɔni trik dɛn.” (2 Kɔr. 2:11) We wi ɔndastand Setan in trik dɛn, dat go ɛp wi fɔ rɛdi ɔltɛm ɛn de wach. Bɔt nɔto we wi no Setan in trik dɛn nɔmɔ go ɛp wi. Di Baybul se: “Una nɔ du wetin di Dɛbul want, ɛn i go rɔnawe pan una.” (Jems 4:7) Di ɔda atikul go tɔk bɔt tri tin dɛn we go ɛp wi fɔ win Setan pan dis fɛt.