Go dayrɛkt to di men tin

Go dayrɛkt to di say we di difrɛn difrɛn atikul dɛn de

Dɛn “Si” di Tin dɛn we Gɔd Prɔmis

Dɛn “Si” di Tin dɛn we Gɔd Prɔmis

“Dɛn nɔ bin gɛt di tin dɛn we Gɔd prɔmis dɛn, bɔt dɛn bin si dɛn fa.”IBRU 11:13.

1. Us bɛnifit wi go gɛt we wi de imajin tin dɛn we wi nɔ de si? (Luk di pikchɔ nia dis atikul in taytul.)

JIOVA dɔn gi mɔtalman wan wɔndaful gift. Dat na fɔ ebul imajin sɔntin we wi nɔ si yet. Dis gift kin ɛp wi fɔ disayd fɔ du di rayt tin ɛn abop se bɛtɛ go kam. Jiova kin si wetin gɛt fɔ apin, ɛn i kin tɛl wi bɔt am insay di Baybul, bifo i apin. So wi kin ebul fɔ imajin wetin go apin. Infakt, di imajin we wi de imajin tin dɛn we wi nɔ de si de ɛp wi fɔ gɛt fet.—2 Kɔr. 4:18.

2, 3. (a) We wi de imajin di tin dɛn we wi nɔ si yet, aw dat go ɛp wi? (b) Us kwɛstyɔn dɛn wi go tɔk bɔt insay dis atikul?

2 Pɔsin kin imajin sɔntin we i nɔ ɛva si yet, bɔt dis nɔ min se di tin we i de imajin na sɔntin we go apin. Fɔ ɛgzampul, if smɔl pikin de imajin insɛf sidɔm pantap bɔtaflay we de flay wit am, dat na sɔntin we nɔ go ɛva bi. Bɔt we Ana bin de fɛn tɛm fɔ tink bɔt aw i go luk lɛk we i go kɛr Samiɛl fɔ go wok na di tabanakul, i bin gɛt gud rizin fɔ tink bɔt dat. Ana bin de tink bɔt dis bikɔs na dat i bin dɔn disayd fɔ du, ɛn dis bin ɛp am fɔ put ɔl in at pan wetin i dɔn disayd fɔ du. (1 Sam. 1:22) If wi de imajin di tin dɛn we Gɔd dɔn prɔmis  fɔ du, dat min se wi de tink bɔt sɔntin we gɛt fɔ rili apin.—2 Pit. 1:19-21.

3 Bɔku fetful pipul dɛn we bin de di tɛm we dɛn de rayt di Baybul bin de tink bɔt aw di tin dɛn we Gɔd dɔn prɔmis go luk lɛk. Us bɛnifit, dɛn pipul ya bin gɛt we dɛn de imajin di blɛsin dɛn we dɛn go gɛt tumara bambay? Ɛn aw wisɛf go bɛnifit we wi de tink bɔt di wɔndaful tin dɛn we Gɔd dɔn tɔk se go apin fɔ di wan dɛn we de obe am?

DƐN BIN DE GƐT MƆ FET WE DƐN DE TINK BƆT AW TUMARA BAMBAY GO TAN LƐK

4. Wetin mek Ebɛl bin de tink bɔt tumara bambay?

4 Yu tink se Ebɛl, we na di fɔs fetful mɔtalman, bin “si” di tin dɛn we Jiova bin prɔmis? Ebɛl bin no wetin Jiova tɛl di snek afta Adam ɛn Iv sin. Bɔt i nɔ bin no aw dis tin we Jiova tɔk go apin, we i se: “A go mek yu ɛn di uman et unasɛf ɛn yu pikin ɛn di uman in pikin go et dɛnsɛf. I go brus yu na yu ed, ɛn yu go brus am na in fut.” (Jɛn. 3:14, 15) Bɔt stil, i go mɔs bi se Ebɛl bin de tink bɔt dis prɔmis ɛn i no se dɛn gɛt fɔ “brus” sɔmbɔdi “na in fut” so dat mɔtalman go pafɛkt bak jɔs lɛk aw Adam ɛn Iv bin pafɛkt bifo dɛn sin. Ilɛk wetin Ebɛl bin de imajin bɔt aw tumara bambay go tan lɛk, i bin gɛt fet se di tin dɛn we Gɔd dɔn prɔmis go apin, ɛn dis bin mek Jiova gladi fɔ in sakrifays.—Rid Jɛnɛsis 4:3-5; Di Ibru Pipul Dɛn 11:4.

5. Wetin mek di tink we Inɔk bin de tink bɔt tumara bambay, go dɔn ɛnkɔrej am?

5 Wan ɔda pɔsin we bin fetful na Inɔk. Inɔk bin sho se i gɛt fet, pan ɔl we di pipul dɛn we i bin de wit nɔ bin lɛk Gɔd biznɛs ɛn dɛn bin de tɔk bad bad tin dɛn bɔt Gɔd. Di oli spirit bin mek Inɔk tɔk se Jiova go kam “wit in bɔku bɔku oli enjɛl dɛn fɔ kam jɔj dɛn ɔl, ɛn fɔ ol di wikɛd wan dɛn fɔ ɔl di bad bad tin dɛn we dɛn du, ɛn fɔ ɔl di bad bad tin dɛn we dɛn tɔk agens am.” (Jud 14, 15) Bikɔs Inɔk bin gɛt fet, i go dɔn tink bɔt aw di wɔl go tan lɛk we bad pipul dɛn nɔ go de igen.—Rid Di Ibru Pipul Dɛn 11:5, 6.

6. Wetin Noa go dɔn de tink bɔt afta di Ebi Ren?

6 Noa bin sev we da Ebi Ren bin kam bikɔs i bin gɛt fet. (Ibru 11:7) Afta di Ebi Ren, Noa bin sakrifays animal dɛn to Jiova ɛn dis sho se i gɛt fet. (Jɛn. 8:20) Jɔs lɛk Ebɛl, Noa bin biliv se tɛm go kam we sin ɛn day nɔ go de igen fɔ ambɔg mɔtalman. Afta da Ebi Ren, Nimrɔd bigin fɔ du wetin Jiova nɔ want, bɔt pan ɔl dis, Noa bin stil abop pan Jiova ɛn i bin gɛt fet. (Jɛn. 10:8-12) I go mɔs dɔn gladi we i de tink bɔt di tɛm we dɛn bad rula dɛn nɔ go de rul mɔtalman igen, ɛn di tɛm we sin ɛn day nɔ go de igen. Wisɛf ebul fɔ “si” da wɔndaful tɛm de, ɛn da tɛm de nɔ de fa igen!—Rom 6:23.

DƐN BIN DE IMAJIN DI TƐM WE GƆD GO DU WETIN I DƆN PRƆMIS

7. Wetin Ebraam, Ayzak, ɛn Jekɔb go dɔn de “si”?

7 Ebraam, Ayzak, ɛn Jekɔb go dɔn de tink bɔt di fayn fayn tin dɛn we Gɔd bin dɔn prɔmis se i go du fɔ dɛn tumara bambay. Jiova bin dɔn prɔmis dɛn se na dɛn pikin go mek ɔl di neshɔn dɛn we de na di wɔl gɛt blɛsin. (Jɛn. 22:18; 26:4; 28:14) Dɛn pikin dɛn go bɔku ɛn dɛn go de na di land we Gɔd bin dɔn prɔmis dɛn. (Jɛn. 15:5-7) Di fet we dɛn man ya bin gɛt bin mek dɛn de “si” dɛn pikin dɛn na di land. Frɔm we mɔtalman lɔs pafɛkt layf, Jiova dɔn de tɛl in fetful  savant dɛn se dɛn go gɛt di blɛsin dɛn we Adam bin dɔn lɔs.

8. Wetin bin ɛp Ebraam fɔ sho se i rili gɛt fet?

8 I go mɔs bi se di tink we Ebraam bin de tink bɔt wetin Gɔd dɔn prɔmis bin mek i ebul fɔ du tin dɛn we de sho se i gɛt fet. Di Baybul tɛl wi se pan ɔl we Ebraam ɛn Gɔd in ɔda fetful savant dɛn “nɔ bin gɛt di tin dɛn we Gɔd prɔmis dɛn” di tɛm we dɛn bin de na di wɔl, “dɛn bin si dɛn fa ɛn biliv.” (Rid Di Ibru Pipul Dɛn 11:8-13.) Ebraam bin gɛt bɔku tin dɛn we de sho se i go gɛt wetin i op fɔ, so i bin jɔs tan lɛk se i de si wetin i nɔ rili gɛt yet!

9. Aw di fet we Ebraam bin gɛt pan Gɔd in prɔmis dɛn bin bɛnifit am?

9 Di fet we Ebraam bin gɛt pan di tin dɛn we Gɔd dɔn prɔmis, bin mek i gɛt zil fɔ du wetin Gɔd want. Di fet we i bin gɛt bin mek i kɔmɔt na Ɔ ɛn i nɔ bin liv fɔ lɔng tɛm na ɛni siti na Kenan. Ebraam bin no se di siti dɛn nɔ go las bikɔs dɛn rula dɛn nɔ bin de sav Jiova. (Jɔs. 24:2) Te Ebraam day, i bin de “wet fɔ di siti we gɛt gud fawndeshɔn, we di Pɔsin we drɔ di plan ɛn bil am na Gɔd.” (Ibru 11:10) Ebraam “si” insɛf de liv sote go na di say usay Jiova de rul. Ebɛl, Inɔk, Noa, Ebraam, ɛn ɔda fetful savant dɛn bin biliv se di wan dɛn we dɔn day go gɛt layf bak ɛn dɛn bin de wet fɔ di tɛm we dɛn go liv na di wɔl ɔnda Gɔd in Kiŋdɔm, we na “di siti we gɛt gud fawndeshɔn.” Di tink we dɛn bin de tink bɔt dɛn blɛsin ya go dɔn mek dɛn gɛt mɔ fet pan Jiova.—Rid Di Ibru Pipul Dɛn 11:15, 16.

10. We Sera bin de tink bɔt aw tumara bambay go tan lɛk, aw dat bin ɛp am?

10 Tink bɔt Ebraam in wɛf, we na Sera. We i ol 90 ia, i nɔ bin stil gɛt pikin, bɔt bikɔs i bin de tink bɔt aw tumara bambay go tan lɛk, dat bin ɛp am fɔ du sɔntin we sho se i gɛt fet. I bin jɔs tan lɛk se i de si in pikin dɛn we dɛn de ɛnjɔy di blɛsin dɛn we Jiova bin dɔn prɔmis. (Ibru 11:11, 12) Wetin mek i bin shɔ se dat go bi? Na bikɔs Jiova bin dɔn tɛl in man se: “A go blɛs am ɛn a go mek i bɔn wan bɔy pikin fɔ yu; a go blɛs am ɛn a go mek i bi neshɔn dɛn; ɛn kiŋ dɛn go kɔmɔt frɔm am.” (Jɛn. 17:16) Afta Sera bɔn Ayzak, i bin gɛt gud rizin fɔ imajin se Gɔd go du ɔl di ɔda tin dɛn we i bin dɔn prɔmis Ebraam. Wisɛf go gɛt mɔ fet if wi de imajin di tin dɛn we Gɔd dɔn prɔmis wi!

I BIN DE TINK BƆT DI BLƐSIN

11, 12. Aw Mozis kam fɔ lɛk Jiova mɔ ɛn mɔ?

11 Mozis na wan ɔda pɔsin we bin sho se i gɛt fet pan Jiova. I bin kam fɔ lɛk Jiova mɔ ɛn mɔ. We Mozis bin yɔŋ, i bin de na Fɛro in os, so i bin fɔ izi fɔ mek i lɛk pawa ɛn jɛntri. Bɔt we Mozis bin de wit in rial mama ɛn papa, dɛn bin tich am bɔt Jiova ɛn dɛn bin tɛl am se Jiova want fɔ pul di Izrɛlayt dɛn pan di slev wok we dɛn bin de du ɛn gi dɛn di land we i bin dɔn prɔmis dɛn. (Jɛn. 13:14, 15; Ɛks. 2:5-10) If Mozis bin de tink bɔt di blɛsin dɛn we de bifo Gɔd in pipul dɛn, wetin yu tink se go dɔn de na in at, i go dɔn lɛk pawa ɔ i go dɔn lɛk Jiova?

12 Di Baybul tɛl wi se: “Bikɔs Mozis bin gɛt fet, we i dɔn big, i nɔ gri mek dɛn se na Fɛro in gyal pikin bɔn am, bifo dat, i bin disayd fɔ lɛ dɛn trit am bad wit Gɔd in pipul dɛn pas fɔ lɛ i ɛnjɔy insɛf fɔ shɔt tɛm pan sin, bikɔs i bin si di disgres we i go gɛt fɔseka Krays as jɛntri we pas di  jɛntri dɛn we de na Ijipt, i bin put ɔl in at pan di blɛsin we i go gɛt.”—Ibru 11:24-26.

13. We Mozis bin de tink gud wan bɔt di tin dɛn we Gɔd bin dɔn prɔmis, aw dat bin ɛp am?

13 As Mozis de tink gud wan bɔt wetin Jiova dɔn prɔmis fɔ du fɔ di Izrɛlayt dɛn, i kam fɔ lɛk Gɔd mɔ ɛn mɔ ɛn gɛt mɔ fet pan am. Jɔs lɛk ɔda pipul dɛn we de fred Gɔd, Mozis go dɔn de tink bɔt di tɛm we Jiova go pul mɔtalman pan day. (Job 14:14, 15; Ibru 11:17-19) No wɔnda we Mozis bin kam fɔ lɛk Gɔd we bin gɛt sɔri-at fɔ di Izrɛlayt dɛn ɛn fɔ ɔlman. Na fet ɛn lɔv bin mek Mozis yuz in ol layf fɔ sav Jiova. (Dyut. 6:4, 5) Ivin we Fɛro bin trɛtin Mozis se i go kil am, di fet we Mozis bin gɛt, di lɛk we i bin lɛk Gɔd, ɛn sɔntɛm di imajin we i bin de imajin di blɛsin dɛn we Gɔd bin dɔn prɔmis, ɛp am fɔ gɛt maynd fɔ tinap tranga wan.—Ɛks. 10:28, 29.

TINK BƆT DI TIN DƐN WE GƆD IN KIŊDƆM GO DU

14. Uskayn tin dɛn sɔm pipul dɛn kin tink bɔt we nɔ gɛt fɔ apin?

14 Bɔku pipul dɛn tide kin tink bɔt tin dɛn we nɔ gɛt fɔ apin tumara bambay. Fɔ ɛgzampul, sɔm pipul dɛn we po kin de imajin se dɛn gɛt fɔ jɛntri ɛn dɛn nɔ go gɛt natin fɔ wɔri bɔt, pan ɔl we mɔtalman layf “ful-ɔp wit soso trɔbul ɛn pwɛl at.” (Sam 90:10) Dɛn kin de imajin dɛnsɛf de liv ɔnda mɔtalman gɔvmɛnt ɛn nɔ gɛt ɛnitin fɔ wɔri bɔt. Bɔt di Baybul in se na Gɔd in Kiŋdɔm nɔmɔ go sɔlv mɔtalman prɔblɛm. (Dan. 2:44) Bɔku pipul dɛn fil se Gɔd nɔ gɛt fɔ dɔnawe wit dis wikɛd wɔl, bɔt di Baybul sho wi se na dat i gɛt fɔ du. (Zɛf. 1:18; 1 Jɔn 2:15-17) Di wan dɛn we nɔ de tink bɔt wetin Jiova gɛt fɔ du, de ful dɛnsɛf bikɔs dɛn de tink bɔt sɔntin we nɔ gɛt fɔ apin.

Yu de si yusɛf na di nyu wɔl? (Luk na paregraf 15)

15. (a) Us bɛnifit Kristian dɛn go gɛt we dɛn de tink bɔt di op we dɛn gɛt? (b) We Gɔd de du di tin dɛn we i dɔn prɔmis, wetin yu go want fɔ si ɔ du?

15 Wan tin we go ɛp Kristian dɛn na we dɛn de tink bɔt di op we dɛn gɛt, ilɛksɛf na ɛvin dɛn gɛt fɔ go ɔ na dis wɔl dɛn gɛt fɔ de. Yu de si yusɛf de ɛnjɔy di tin dɛn we Gɔd dɔn prɔmis? We yu de tink bɔt wetin yu go de du na Paradays we Gɔd insɛf de du di tin dɛn we i dɔn prɔmis, i go mek yu gladi. Sɔntɛm yu de “si” yusɛf de liv na dis wɔl sote go. Tink bɔt aw yu go jɔyn an wit ɔda pipul dɛn fɔ mek di wan ol wɔl bi Paradays. Ɔlman lɛk Jiova, jɔs lɛk aw yusɛf lɛk am. Yu gɛt wɛlbɔdi, yu gɛt trɛnk, ɛn yu nɔ de wɔri bɔt natin. Di wan dɛn we de bifo di wok de mek yu ɛnjɔy yu layf bikɔs dɛn rili bisin bɔt yu. Ɛn yu gladi fɔ du di tin dɛn we yu sabi bikɔs ɔltin we yu de du de bɛnifit ɔda pipul dɛn ɛn briŋ prez to Gɔd. Fɔ ɛgzampul, yu de ɛp di wan dɛn we jɔs gɛt layf bak fɔ no Jiova. (Jɔn 17:3; Akt 24:15) Ɔl dɛn tin ya nɔto drim. Na tin dɛn we di Baybul dɔn tɔk se gɛt fɔ apin tumara bambay.—Ayz. 11:9; 25:8; 33:24; 35:5-7; 65:22.

WETIN MEK I FAYN FƆ TƆK BƆT DI OP WE WI GƐT?

16, 17. Aw wi go bɛnifit we wi de tɔk bɔt di op we wi gɛt?

16 We wi de tɔk to ɔda Kristian dɛn bɔt wetin wi go lɛk fɔ du we Jiova de du di tin dɛn we i dɔn prɔmis, wi go ebul fɔ imajin aw Paradays go rili tan lɛk. Na tru se wi nɔn nɔ no di patikyula tin we wi go du na Paradays, bɔt we wi de tɔk bɔt di tin dɛn we wi go want fɔ du, wi go  ɛnkɔrej wisɛf ɛn sho se wi gɛt fet se di tin dɛn we Gɔd dɔn prɔmis go mɔs bi. We di apɔsul Pɔl bin go fɛn di brɔda dɛn na Rom, dɛn bin rili gladi we dɛn bin de ‘ɛnkɔrej dɛnsɛf.’ So wisɛf fɔ du dis sem tin naw we ɔlkayn bad tin de apin na di wɔl.—Rom 1:11, 12.

17 We wi de imajin aw tumara bambay gɛt fɔ tan lɛk, i kin ɛp wi bak nɔ fɔ tink bɔt wi prɔblɛm dɛn tumɔs. I go mɔs bi se di apɔsul Pita go dɔn de wɔri, so i bin aks Jizɔs se: “Luk! Wi dɔn lɛf ɔltin fɔ fala yu; wetin, naw, wi go gɛt?” Fɔ lɛ Jizɔs go ɛp Pita ɛn di ɔda wan dɛn we bin de de fɔ tink bɔt aw tumara bambay go tan lɛk, Jizɔs se: “Fɔ tru a de tɛl una se, we Gɔd de mek ɔltin nyu bak, di tɛm we mɔtalman Pikin go sidɔm na di say we kiŋ kin sidɔm fɔ rul, una we dɔn fala mi go sidɔm na 12 chia dɛn, fɔ jɔj di 12 trayb dɛn na Izrɛl. Ɛn ɛnibɔdi we dɔn lɛf os dɛn ɔ brɔda dɛn ɔ sista dɛn ɔ papa ɔ mama ɔ pikin dɛn ɔ land dɛn fɔseka mi nem go gɛt pas ɔndrɛd tɛm wetin i dɔn lɔs ɛn i go gɛt layf we go de sote go.” (Mat. 19:27-29) So Pita ɛn di ɔda disaypul dɛn go dɔn de imajin di wok we dɛn go du na di gɔvmɛnt we go rul di wan ol wɔl ɛn briŋ bɔku fayn fayn blɛsin dɛn to di wan dɛn we de obe Gɔd.

18. Us bɛnifit wi go gɛt we wi de tink bɔt aw Gɔd go du di tin dɛn we i dɔn prɔmis wi?

18 Frɔm trade trade, Jiova in savant dɛn dɔn bɛnifit we dɛn de tink bɔt aw Gɔd gɛt fɔ du di tin dɛn we i dɔn prɔmis. Ebɛl bin no bɔt di tin dɛn we Gɔd want fɔ du, so dis bin mek i ebul fɔ imajin aw tumara bambay go tan lɛk, i bin ebul fɔ sho se i gɛt fet, ɛn i bin biliv se i go gɛt wetin i abop pan. Ebraam bin sho se i gɛt fet bikɔs i bin “si” aw Gɔd gɛt fɔ du wetin i bin dɔn tɔk bɔt di “pikin” we i bin dɔn prɔmis se go kam. (Jɛn. 3:15) Mozis “bin put ɔl in at pan di blɛsin we i go gɛt,” ɛn dis bin ɛp am fɔ gɛt fet ɛn lɛk Jiova mɔ ɛn mɔ. (Ibru 11:26) Wi go rili lɛk Jiova ɛn gɛt mɔ fet if wi de imajin aw i gɛt fɔ du di tin dɛn we i dɔn prɔmis. Insay di nɛks atikul, wi go lan di bɛst we aw fɔ yuz dis gift we Gɔd dɔn gi wi.