Go dayrɛkt to di men tin

Go dayrɛkt to di say we di difrɛn difrɛn atikul dɛn de

 DI TƆPIK NA DI FRƆNT PEJ | YU TINK SE DI ƐND DƆN NIA?

“Di Ɛnd”—Wetin I Min?

“Di Ɛnd”—Wetin I Min?

We yu yɛri se “Di ɛnd dɔn nia!” wetin yu kin tink bɔt? Yu kin tink bɔt pɔsin we de prich ɔp pulpit, we de ala, chɛr in yay, ɛn muv muv in an dɛn wit in Baybul na in an? Ɔ yu kin tink bɔt wan ol pa we wɛr lɔng klos ɛn tay rop na in midul, tinap na wan kɔna na strit ɛn ol sɔntin na in an we gɛt mɛsej bɔt di wɔl in dɔn wan? We sɔm pipul dɛn tink bɔt dɛn tin ya, i kin mek dɛn wɔri, sɔm kin dawt, ɔ jɔs si am as sɔntin we fɔni.

Di Baybul se: “Di ɛnd go kam.” (Matyu 24:14) Di Baybul kɔl dis sem tin we go apin “da big de we Gɔd Ɔlmayti go kam wit” ɛn “Amagɛdɔn.” (Rɛvɛleshɔn 16:14, 16) Na tru se, bɔku rilijɔn dɛn gɛt dɛn yon we aw dɛn de ɛksplen bɔt di wɔl in dɔn wan, ɛn bɔku pipul dɛn kin tɔk fiaful tin dɛn we wi nɔ wande yɛri yet. Bɔt di Baybul tɛl wi klia wan bɔt di ɛnd. I tɛl wi wetin di ɛnd min ɛn wetin i nɔ min. Apat frɔm dat, i tɛl wi wetin wi go du fɔ sev! Fɔs, lɛ wi tɔk bɔt sɔm lay lay tin dɛn we pipul dɛn kin tɔk bɔt di ɛnd ɛn tɔk bak bɔt aw di ɛnd go rili bi. Insay di Baybul, wetin “di ɛnd” rili min?

 WETIN DI ƐND NƆ MIN?

  1. DI ƐND NƆ MIN SE GƆD GO PWƐL DI WƆL WIT FAYA.

    Di Baybul tɔk se: “[Gɔd] dɔn mek di wɔl pan in fawndeshɔn; i nɔ go kɔmɔt na in ples sote go.” (Sam 104:5) Dis skripchɔ ɛn ɔda wan dɛn de ɛp wi fɔ no se Gɔd nɔ go dɔnawe wit di wɔl ɛn i nɔ go ɛva alaw mɔtalman fɔ pwɛl di wɔl!—Ɛkliziastis 1:4; Ayzaya 45:18.

  2. DI ƐND NƆ GƐT FƆ KAM SO NƆMƆ LƐK DAT, I GƐT PATIKYULA TƐM WE I GO KAM.

    Di Baybul tɔk se di ɛnd gɛt tɛm we i go kam. Gɔd dɔn pik di patikyula tɛm we i go kam. Di Baybul se: “Nɔbɔdi nɔ no di de ɔ di awa, di enjɛl dɛn na ɛvin nɔ no ɛn di Pikin sɛf nɔ no, na di Papa nɔmɔ no. Una go de luk, una rɛdi ɔltɛm bikɔs una nɔ no di patikyula tɛm.” (Mak 13:32, 33) Dis dɔn sho wi klia wan se Gɔd (we na “di Papa”) dɔn pik “di patikyula tɛm” we i go mek di ɛnd kam.

  3. NƆTO MƆTALMAN Ɔ TIN DƐN WE DE KƆMƆT ƆP DI SKAY GO MEK DI ƐND KAM.

    Wetin go mek di ɛnd kam? Rɛvɛleshɔn 19:11 se: “A si ɛvin opin ɛn a si wan wayt ɔs! Ɛn dɛn kɔl di wan we sidɔm pan am Fetful ɛn Tru.” Vas 19 kɔntinyu fɔ tɔk se: “Ɛn a si di wayl animal ɛn di kiŋ dɛn na di wɔl ɛn dɛn ami dɛn gɛda togɛda fɔ fɛt di wan we sidɔm na di ɔs ɛn in ami.” (Rɛvɛleshɔn 19:11-21) Pan ɔl we sɔm tin dɛn na dis skripchɔ tinap fɔ sɔntin, wi ebul fɔ no se: Gɔd go sɛn in enjɛl dɛn fɔ kil ɔl in ɛnimi dɛn.

Di Baybul in mɛsej bɔt di wɔl in dɔn wan na gud nyus, nɔto bad nyus

WETIN DI ƐND MIN?

  1. MƆTALMAN GƆVMƐNT DƐN NƆ GO DE IGEN.

    Di Baybul tɔk se: “Di Gɔd we de na ɛvin, go mek wan kiŋdɔm [gɔvmɛnt] we nɔ go ɛva pwɛl. Ɛn dis kiŋdɔm nɔ go go to ɔda pipul dɛn. I go nyamanyama ɔl dɛn kiŋdɔm ya ɛn pul dɛn kɔmɔt, ɛn na in nɔmɔ go de sote go.” (Daniɛl 2:44) As wi bin dɔn si na pɔynt 3, dɛn gɛt fɔ  dɔnawe wit “di kiŋ dɛn na di wɔl ɛn dɛn ami dɛn,” we go dɔn “gɛda togɛda fɔ fɛt di wan we sidɔm na di ɔs ɛn in ami.”—Rɛvɛleshɔn 19:19.

  2. WƆ, FƐT-FƐT, ƐN TIN WE NƆ RAYT NƆ GO DE IGEN.

    “[Gɔd] de mek wɔ dɔn ɔlsay na di wɔl.” (Sam 46:9) “Na di wan dɛn nɔmɔ we de du wetin rayt go de na di wɔl, ɛn na di wan dɛn we nɔ gɛt wan bɔt go kɔntinyu fɔ de de. As fɔ di wikɛd wan dɛn, dɛn go pul dɛn kɔmɔt na di wɔl, ɛn dɛn go dɔnawe wit ɔl di wan dɛn we nɔ de waka stret.” (Prɔvabs 2:21, 22) “Luk! A de mek ɔltin nyu.”—Rɛvɛleshɔn 21:4, 5.

  3. RILIJƆN DƐN WE DE LAY PAN GƆD ƐN MƆTALMAN NƆ GO DE IGEN.

    “Di prɔfɛt dɛn de tɔk bɔt lay lay tin dɛn we nɔ gɛt fɔ apin, ɛn di prist dɛn de yuz dɛn pawa fɔ kɔntrol di pipul dɛn. . . . Bɔt wetin una go du we di ɛnd kam?” (Jɛrimaya 5:31) “Da de de, bɔku pipul dɛn go aks mi se: ‘Masta, Masta, nɔto yu nem wi bin de yuz fɔ tɔk se sɔntin go apin, nɔto yu nem wi bin de yuz fɔ pul dɛbul kɔmɔt pan pipul dɛn, ɛn nɔto yu nem wi bin de yuz fɔ du bɔku pawaful tin dɛn?’ Ɛn a go tɛl dɛn se: ‘A nɔ wande sabi una! Una kɔmɔt nia mi, una we bin de du wikɛd tin dɛn!’”—Matyu 7:21-23.

  4. PIPUL DƐN WE DE SƆPƆT DI BAD TIN DƐN WE DE APIN NA DI WƆL NƆ GO DE IGEN.

    Jizɔs Krays bin se: “Na dis na di rizin we mek dɛn go jɔj: di layt dɔn kam na di wɔl, bɔt mɔtalman dɔn lɛk di dak pas di layt, bikɔs dɛn de du wikɛd tin dɛn.” (Jɔn 3:19) Di Baybul tɔk se insay Noa in tɛm “Gɔd bin dɔnawe wit di wɔl we bin de da tɛm de wit bɔku bɔku wata. Na dis sem wɔd we Gɔd tɔk mek dɛn dɔn kip di ɛvin ɛn di wɔl we de naw fɔ bɔn na faya ɛn dɛn dɔn kip dɛn te jɔjmɛnt de ɛn te di tɛm we Gɔd go dɔnawe wit ɔl di pipul dɛn we nɔ de gri fɔ du wetin i want.”—Pita In Sɛkɔn Lɛta 3:5-7.

Wi notis se dɛn kɔmpia “jɔjmɛnt de” ɛn “di tɛm we Gɔd go dɔnawe wit ɔl di pipul dɛn we nɔ de gri fɔ du wetin i want” to “di wɔl” we bin de na Noa in tɛm. Us wɔl we Gɔd bin dɔnawe wit? Nɔto di grɔn Gɔd bin dɔnawe wit; na di “pipul dɛn we nɔ [bin] gri fɔ du wetin i want.” “Gɔd bin dɔnawe” wit in ɛnimi dɛn. We Gɔd in “jɔjmɛnt de” gɛt fɔ kam, na in ɛnimi dɛn go day. Bɔt Gɔd in padi dɛn go sev, jɔs lɛk Noa ɛn in famili.—Matyu 24:37-42.

Jɔs imajin aw di wɔl go fayn we Gɔd go dɔn pul ɔl di wikɛd pipul dɛn na di wɔl! So wi dɔn si klia wan se di Baybul in mɛsej bɔt di wɔl in dɔn wan na gud nyus, nɔto bad nyus. Bɔt stil, yu go de wɔnda: ‘Di Baybul tɛl wi ustɛm di wɔl go dɔn? Di tɛm dɔn nia? Aw a go ebul sev?’