Go dayrɛkt to di men tin

Go dayrɛkt to di say we di difrɛn difrɛn atikul dɛn de

Aw Yu Padi Biznɛs Wit Jiova fɔ Tan Lɛk?

Aw Yu Padi Biznɛs Wit Jiova fɔ Tan Lɛk?

“Una kam nia Gɔd ɛn i go kam nia una.”—JEMS 4:8.

1. Wetin mek wi fɔ tray fɔ mek wi padi biznɛs wit Jiova tayt?

YU DƆN gi yu layf to Jiova ɛn baptayz? If na so i bi, yu gɛt sɔntin we rili valyu, dat na yu padi biznɛs wit Gɔd. Bɔt Setan ɛn wi yon at we nɔ pafɛkt, want fɔ pwɛl wi padi biznɛs wit Jiova. Dis prɔblɛm de mit ɔlman we na Kristian. So, wi fɔ tray fɔ mek wi padi biznɛs wit Jiova tayt.

2. (a) Wetin na padi biznɛs? (Luk di futnot.) (b) Wetin wi fɔ du fɔ mek wi padi biznɛs wit Jiova tayt mɔ ɛn mɔ?

2 Aw yu padi biznɛs wit Jiova tan lɛk? Yu go lɛk fɔ mek i tayt mɔ ɛn mɔ? Jems 4:8 tɛl yu aw yu kin du dat.  I se: “Una kam nia Gɔd ɛn i go kam nia una.” Yu go dɔn notis se dis skripchɔ tɔk bɔt tu tin. * As wi de tray fɔ kam nia Gɔd, na so Gɔd insɛf go kam nia wi. Di mɔ we wi de go nia Jiova ɛn di mɔ we insɛf de kam nia wi, na di mɔ di padi biznɛs de tayt. Ɛn dis go mek wi ɛn Jiova bi tru tru padi. Ɛn wi padi biznɛs go so tayt dat wi go fil lɛk Jizɔs we bin tɔk se: “Di Wan we sɛn mi na rial Pɔsin, ɛn . . . mi no am.” (Jɔn 7:28, 29) Bɔt wetin yu go du fɔ mek yu kam nia Jiova mɔ ɛn mɔ?

Aw yu ɛn Gɔd go tɔk? (Luk na paregraf 3)

3. Aw yu go ebul fɔ tɔk to Jiova ɛn aw insɛf go ebul fɔ tɔk to yu?

3 Wan impɔtant tin we go ɛp yu fɔ kam nia Jiova na we yu de tɔk to am ɔltɛm. Aw yu go ebul fɔ tɔk to Gɔd? Wɛl, aw yu kin tɔk to yu padi we de fa say? Sɔntɛm una kin rayt lɛta to unasɛf ɛn tɔk na fon bɔku tɛm. Yu go tɔk to Jiova we yu de pre to am ɔltɛm. (Rid Sam 142:2.) Ɛn yu go alaw Jiova fɔ tɔk to yu we yu de rid di Baybul ɔltɛm ɛn tink gud wan bɔt wetin yu de rid. (Rid Ayzaya 30:20, 21.) Lɛ wi tɔk naw bɔt aw di tɔk we wi de tɔk to Jiova ɛn di tɔk we Jiova insɛf de tɔk to wi, go mek wi padi biznɛs tayt mɔ ɛn mɔ ɛn mek Jiova tan lɛk rial Padi to wi.

JIOVA DE TƆK TO YU WE YU RID DI BAYBUL

4, 5. Aw Jiova de yuz in Wɔd, di Baybul, fɔ tɔk to yu? Gi wan ɛgzampul.

4 Yu go mɔs gri se na Gɔd in wɔd de insay di Baybul ɛn di Baybul na fɔ ɔlman. Bɔt yu tink se di Baybul de sho yu aw yu go ebul fɔ go nia Jiova mɔ? Yɛs, i de sho yu. Aw i de du dat? As yu de rid ɛn stɔdi di Baybul ɔltɛm, tink bɔt wetin yu de rid ɛn tink bak bɔt aw yu go ebul fɔ du wetin yu dɔn rid. If yu du dat, yu de alaw Jiova fɔ yuz in Wɔd, di Baybul, fɔ tɔk to yu. Dis go mek una padi biznɛs tayt mɔ ɛn mɔ.—Ibru 4:12; Jems 1:23-25.

5 Fɔ ɛgzampul, rid ɛn tink gud wan bɔt wan advays we Jizɔs bin gi, we i se, “Una lɛf fɔ kip jɛntri fɔ unasɛf na dis wɔl.” If yu fil se yu dɔn put Gɔd in Kiŋdɔm fɔs na yu layf, yu go no se Jiova gladi fɔ yu. Bɔt if yu si se yu nid  fɔ liv simpul layf ɛn put yu atɛnshɔn pan Gɔd in Kiŋdɔm, Jiova dɔn sho yu say we yu fɔ du mɔ fɔ lɛ una padi biznɛs go tayt mɔ ɛn mɔ.—Mat. 6:19, 20.

6, 7. (a) We wi de stɔdi di Baybul, aw dat de afɛkt di we aw wi lɛk Jiova ɛn di we aw insɛf lɛk wi? (b) Wetin na di men rizin we mek wi fɔ stɔdi di Baybul?

6 We wi de stɔdi di Baybul, i nɔ jɔs de ɛp wi fɔ si say dɛn we wi nid fɔ du mɔ we wi de sav Jiova. I kin ɛp wi bak fɔ lɛk Jiova in fayn fayn kwaliti dɛn ɛn dis go mek wi lɛk am mɔ ɛn mɔ. Ɛn di mɔ we wi de lɛk Gɔd, na di mɔ insɛf de lɛk wi, ɛn dis de mek wi padi biznɛs wit am tayt.—Rid Fɔs Lɛta Fɔ Kɔrint 8:3.

7 Bɔt fɔ lɛ wi go kam nia Jiova, i rili impɔtant fɔ lɛ wi stɔdi di Baybul fɔ di rayt rizin. Jɔn 17:3 se: “Fɔ gɛt di layf we go de sote go, dɛn fɔ no yu, di wangren tru Gɔd, ɛn di wan we yu sɛn, Jizɔs Krays.” So, we wi de stɔdi di Baybul, nɔto fɔ lɛ wi jɔs sabi bɔku tin, bɔt na fɔ lɛ wi “no” Jiova mɔ.—Rid Ɛksodɔs 33:13; Sam 25:4.

8. (a) Wetin kin kam na wi maynd we wi rid bɔt wetin Jiova bin du Kiŋ Azaraya na 2 Kiŋ 15:1-5? (b) We wi no Jiova, aw dat kin mek wi nɔ dawt ɛnitin we i du?

8 As wi de kam fɔ no Jiova mɔ, wi nɔ go de wɔnda if di Baybul nɔ ɛksplen wetin mek Jiova du sɔntin na di Baybul. Fɔ ɛgzampul, aw yu fil bɔt di tin we Jiova du to Kiŋ Azaraya we bin de na Juda? (2 Kiŋ 15:1-5) Pan ɔl we “di pipul dɛn bin stil de sakrifays ɛn bɔn tin dɛn na di ay ples dɛn,” Azaraya “kɔntinyu fɔ du wetin rayt na Jiova in yay.” Bɔt stil, “Jiova bin mek di kiŋ sɔfa, ɛn i bin gɛt lɛprɔsi te i day.” Wetin mek? Di stori nɔ tɛl wi. Yu tink se dis fɔ mek wi fil bad ɔ mek wi bigin tink se Jiova pɔnish Azaraya fɔ natin? Wi nɔ go du dat if wi rili no aw Jiova de du tin. If wi no Jiova, wi go no bak se in na Pɔsin we de kɔrɛkt “di rayt we.” (Jɛr. 30:11) If wi no dis, i go mek wi biliv se na di rayt tin Jiova du, pan ɔl we wi nɔ no wetin mek i pɔnish Azaraya.

9. Wetin ɛp wi fɔ no di rizin we mek Jiova pɔnish Azaraya wit lɛprɔsi?

9 Ɔdasay de na di Baybul we tɛl wi mɔ bɔt Kiŋ Azaraya. Kiŋ Azaraya in ɔda nem na Kiŋ Uzaya. (2 Kiŋ 15:7, 32) Insay 2 Krɔnikul 26:3-5, 16-21, wi lan se pan ɔl we Uzaya bin de du wetin rayt na Jiova in yay, leta “i bigin mek prawd ɛn dis bin ambɔg am bad bad wan.” I disayd fɔ du sɔntin we na prist dɛn nɔmɔ gɛt di rayt fɔ du am. Eti-wan prist dɛn go mit am ɛn tray fɔ advays am. Wetin Uzaya du we dɛn advays am? I “vɛks” pan di prist dɛn. Dis tin we Uzaya du sho se i rili prawd. No wɔnda we Jiova gi am lɛprɔsi!

10. Wetin mek wi nɔ fɔ de tink se Jiova fɔ ɛksplen ɔltin we i de du? Wetin go ɛp wi fɔ biliv se Jiova de du wetin rayt ɔltɛm?

10 Wetin na di lɛsin fɔ wi? If di Baybul nɔ bin ɛksplen wetin mek Jiova pɔnish Azaraya, lɛk aw ɔda stori dɛn na di Baybul nɔ ɛksplen wetin mek Jiova du sɔntin, yu go de wɔnda if Gɔd de du wetin rayt? Ɔ yu go tink se bɔku tin dɛn de na di Baybul we de mek wi biliv se Jiova de du wetin rayt ɔltɛm? (Dyut. 32:4) As wi de no Jiova, na so  wi go de lɛk am mɔ ɛn lɛk di we aw i de du tin. Ɛn dis go mek wi nɔ de tink se i fɔ ɛksplen ɔltin we i de du. Wan tin we yu fɔ no na dat di mɔ we yu de stɔdi ɛn tink gud wan bɔt wetin yu de rid na di Baybul, na di mɔ yu go de lɛk Jiova. (Sam 77:12, 13) Dis go mek yu padi biznɛs wit Jiova tayt mɔ ɛn mɔ, ɛn yu go de si Jiova as rial Pɔsin.

YU DE TƆK TO JIOVA WE YU DE PRE TO AM

11-13. Wetin mek yu biliv se Jiova de lisin to wi prea dɛn? (Luk di pikchɔ nia dis atikul in taytul.)

11 We wi de pre to Jiova, wi de kam nia am mɔ. Wi de prez am, tɛl am tɛnki, ɛn aks am fɔ sho wi aw fɔ waka na layf. (Sam 32:8) Bɔt fɔ lɛ yu padi biznɛs wit Jiova go go bifo, yu fɔ biliv se we yu pre to am, i de yɛri yu.

12 Sɔm pipul dɛn fil se prea na sɔntin we jɔs de mek wi fil fayn. Dɛn kin se if yu tink se Gɔd dɔn ansa yu prea na bikɔs yu dɔn tink gud wan bɔt yu prɔblɛm, ɛn fɛn we fɔ sɔlv am. Apat frɔm dɛn bɛnifit ya we pɔsin kin gɛt, aw yu go ebul fɔ no se Jiova de rili lisin to yu we yu de pre frɔm yu at?

13 Tink bɔt dis: Bifo Jizɔs bin kam na di wɔl, i bin de si we Jiova de ansa In savant dɛn prea. Dɔn, di tɛm we Jizɔs bin de na dis wɔl, i bin de pre to in Papa we de na ɛvin fɔ tɛl am bɔt aw i de fil. Yu tink se i bin fɔ dɔn du dat, ɛn ivin pre wan ol nɛt if i bin tink se Jiova nɔ de lisin to prea? (Lyuk 6:12; 22:40-46) Yu tink se i bin fɔ dɔn tich in disaypul dɛn fɔ pre if i tink se prea na fɔ jɔs mek wi fil fayn? Nɔ, i nɔ bin fɔ dɔn du dat. So wi dɔn si klia wan se Jizɔs bin no se Jiova de ansa prea. Wan tɛm, Jizɔs bin se: “Papa, a de tɛl yu tɛnki fɔ we yu dɔn yɛri mi. Fɔ tru, a no se yu kin yɛri mi ɔltɛm.” So wisɛf fɔ biliv se Jiova na di “Wan we de yɛri prea.”—Jɔn 11:41, 42; Sam 65:2.

14, 15. (a) Aw wi go bɛnifit we wi aks Jiova fɔ patikyula tin we wi de pre? (b) Aw prea ɛp wan sista fɔ mek in padi biznɛs wit Jiova tayt?

14 We yu aks Jiova fɔ patikyula tin  we yu de pre to am, yu go ebul fɔ no we Jiova ansa yu prea, pan ɔl we yu nɔ go si dat klia wan. We Jiova de ansa yu prea, dat go mek yu si am as Pɔsin we rial. Apat frɔm dat, di mɔ we yu tɛl Jiova aw yu de fil, na di mɔ i go kam nia yu.

15 Lɛ wi tɔk bɔt wan sista we nem Kati. * I nɔ bin de ɛnjɔy di prichin wok, pan ɔl we i bin de go fil savis ɔltɛm. I bin se: “A nɔ bin lɛk fil savis. A nɔ bin lɛk am atɔl. We a lɛf fɔ wok, wan ɛlda bin ɛnkɔrej mi fɔ rɛgyula payɔnia; i bin ivin gi mi di fɔm. So a bin disayd fɔ payɔnia, bɔt a bin de pre to Jiova ɛvride fɔ lɛ i ɛp mi fɔ lɛk fil savis.” Yu tink se Jiova bin ansa in prea? I se: “Na di tri ia dis naw we a de payɔnia. Bikɔs a de spɛn mɔ tɛm na fil savis ɛn lan frɔm ɔda sista dɛn, a dɔn no aw fɔ prich mɔ. Naw a rili lɛk fil savis. Apat frɔm dat, mi padi biznɛs wit Jiova dɔn tayt pas aw i bin de trade.” Fɔ tru, di pre we Kati bin de pre to Jiova ɛp am fɔ kam nia Jiova mɔ.

WETIN YU FƆ DU?

16, 17. (a) Wetin wi fɔ du fɔ mek wi padi biznɛs wit Jiova tayt mɔ ɛn mɔ? (b) Wetin wi go tɔk bɔt insay di nɛks atikul?

16 Fɔ mek tayt padi biznɛs wit Jiova na sɔntin we wi gɛt fɔ du sote go. Wi fɔ tray fɔ go nia Jiova if wi want lɛ i kam nia wi. So lɛ wi kɔntinyu fɔ tɔk to Jiova ɔltɛm bay we wi de stɔdi di Baybul ɛn pre. If wi de du dat, wi padi biznɛs wit Jiova go tayt mɔ ɛn mɔ ɛn wi go ebul fɔ bia di prɔblɛm dɛn we de mit wi.

Fɔ mek tayt padi biznɛs wit Jiova na sɔntin we wi gɛt fɔ du sote go (Luk na paregraf 16, 17)

17 Bɔt sɔntɛnde wi kin gɛt prɔblɛm dɛn we kin mɔna wi, pan ɔl we wi de pre. Dis kin bigin mek wi dawt Jiova. Wi kin bigin wɔnda if Jiova rili de yɛri wi prea ɔ if Jiova stil na wi padi. Wetin wi go du we dɛn kayn tin ya mit wi ɛn stil biliv se Gɔd na wi padi? Di nɛks atikul go tɔk bɔt dis.

^ par. 2 Padi biznɛs na we tu pipul dɛn lɛk dɛnsɛf ɛn we dɛn ɔl tu de du sɔntin fɔ mek di padi biznɛs go bifo.

^ par. 15 Nɔto in rial nem.