Go dayrɛkt to di men tin

Go dayrɛkt to di say we di difrɛn difrɛn atikul dɛn de

Abop pan Jiova Ɔltɛm!

Abop pan Jiova Ɔltɛm!

“Pipul dɛn, una abop pan am ɔltɛm.”—SAM 62:8.

1-3. Wetin bin ɛp Pɔl fɔ abop pan Jiova mɔ? (Luk di pikchɔ nia dis atikul in taytul.)

I NƆ bin izi fɔ bi Kristian na Rom. Insay di ia 64 afta Krays, di Roman dɛn blem di Kristian dɛn se na dɛn sɛt faya na di siti, ɛn dɛn se dɛn nɔ lɛk dɛn kɔmpin mɔtalman. Di Roman pipul dɛn bin et di Kristian dɛn. If yu na bin Kristian dɛn tɛm dɛn de, sɔntɛm, ɛni de, dɛn go arɛst yu ɛn pɔnish yu bad bad wan. Dɛn bin de mek animal dɛn kil sɔm pan wi brɔda ɛn sista dɛn ɔ dɛn bin de nel dɛn na tik ɛn bɔn dɛn layf layf wan fɔ layt di ples na nɛt.

2 I go mɔs bi se na insay dɛn tɛm ya, dɛn bin put di apɔsul Pɔl na prizin insay Rom fɔ di sɛkɔn tɛm. Yu tink se ɔda Kristian dɛn go kam fɔ ɛp am? Pɔl go dɔn de wɔri bɔt dat, na in mek i rayt to Timoti se: “Nɔbɔdi nɔ kam fɔ sɔpɔt mi. Dɛn ɔl lɛf mi. Lɛ Gɔd nɔ ol dɛn fɔ dat.” Bɔt pan ɔl dis, Pɔl bin no se i gɛt Pɔsin we de ɛp am. I bin rayt se: “Bɔt di Masta bin de nia mi ɛn i gi mi pawa.” Fɔ tru, Jizɔs bin ɛp Pɔl. Aw  dis bin ɛp Pɔl? I bin rayt se: “I bin sev mi frɔm di layɔn in mɔt.”—2 Tim. 4:16, 17. *

3 We Pɔl mɛmba aw Jiova bin ɛp am we dɛn prɔblɛm ya bin de mit am, dat bin mek i biliv se Jiova go ɛp am fɔ bia di prɔblɛm we de mit am naw ɔ ɛni prɔblɛm we go mit am tumara bambay. Infakt, i bin tɔk se: “Di Masta go sev mi frɔm ɛni bad tin.” (2 Tim. 4:18) Pɔl bin dɔn lan se pan ɔl we in brɔda ɛn sista dɛn nɔ go ebul ɛp am pan ɔltin, Jiova ɛn Jizɔs go de fɔ ɛp am ɔltɛm.

YU GƐT CHANS FƆ “ABOP PAN JIOVA”

4, 5. (a) Udat de fɔ ɛp wi ɔltɛm? (b) Aw yu go mek yu padi biznɛs wit Jiova tayt mɔ ɛn mɔ?

4 Yu dɔn ɛva gɛt prɔblɛm we de mɔna yu ɛn yu fil se nɔbɔdi nɔ de fɔ ɛp yu sɔlv am? I kin bi se yu nɔ gɛt wok, sɔm pan yu skulmet dɛn want lɛ yu du bad, yu gɛt sik we de mɔna yu, ɔ ɔda prɔblɛm dɛn de mit yu. Sɔntɛm yu aks pipul dɛn fɔ ɛp yu, bɔt nɔbɔdi nɔ ɛp yu di we aw yu rili want. Fɔ tru, sɔm prɔblɛm dɛn de we wi kɔmpin mɔtalman nɔ go ebul fɔ sɔlv. We dɛn kayn tin ya apin, yu tink se di advays we di Baybul gi, we i se wi fɔ “abop pan Jiova,” nɔto bɛtɛ advays? (Prɔv. 3:5, 6) I mek sɛns fɔ abop pan Jiova? Yɛs, i rili mek sɛns! Bɔku ɛgzampul dɛn de na di Baybul we mek wi biliv se Jiova de rili ɛp in pipul dɛn we dɛn gɛt prɔblɛm.

5 So bifo wi kip grɔj na wi at we i luk lɛk se nɔbɔdi nɔ de ɛp wi, i go fayn lɛ wi si di prɔblɛm dɛn we de mit wi lɛk aw di apɔsul Pɔl bin de si am. I bin de si am se dɛn prɔblɛm dɛn ya de gi am chans fɔ abop pan Jiova ɛn si aw Jiova de sho se i bisin bɔt am. Dis go mek yu abop pan Jiova mɔ ɛn mek yu padi biznɛs wit am tayt mɔ ɛn mɔ.

IF WI ABOP PAN JIOVA, WI GO GƐT TAYT PADI BIZNƐS WIT AM

6. Wetin mek i nɔ kin izi fɔ mek wi abop pan Jiova we wi gɛt prɔblɛm?

6 Yu tink se yu go ebul pre to Jiova bɔt yu prɔblɛm ɛn gɛt kolat, bikɔs yu no se yu dɔn du wetin yu ebul fɔ du ɛn lɛf di balans to Jiova? Yɛs, yu go ebul! (Rid Sam 62:8; Pita In Fɔs Lɛta 5:7.) Fɔ lɛ yu padi biznɛs wit Jiova go tayt, i rili impɔtant fɔ abop pan am. Bɔt i nɔ kin izi fɔ biliv se Jiova go du ɔl wetin yu want. Wetin mek? Wan rizin na dat, nɔto ɔltɛm Jiova kin ansa wi prea wantɛm wantɛm.—Sam 13:1, 2; 74:10; 89:46; 90:13; Aba. 1:2.

7. Wetin mek Jiova nɔ kin ansa ɔl wi prea dɛn wantɛm wantɛm?

7 Wetin mek Jiova nɔ kin ansa ɔl wi prea dɛn wantɛm wantɛm? Mɛmba se wi padi biznɛs wit Jiova tan lɛk pikin ɛn in papa. (Sam 103:13) Pikin nɔ fɔ fil se in mama ɛn papa fɔ gi am ɛnitin we i aks fɔ wantɛm wantɛm. Sɔm tin dɛn we di pikin kin want na fɔ shɔt tɛm nɔmɔ, leta i nɔ kin want am igen. Ɔda tin dɛn kin de we di pikin want, bɔt in mama ɛn papa kin wet te di rayt tɛm rich bifo dɛn du wetin di pikin want. Bɔt stil, sɔm tin dɛn de we di pikin want we nɔ go bɛnifit am ɔ ivin di wan dɛn we de nia am. Apat frɔm dat, fɔ gi pikin wetin i aks fɔ wantɛm wantɛm go mek yu bi di slev ɛn di pikin bi yu masta. Semweso, Jiova kin mek sɔm tɛm pas bifo wi si se  i dɔn ansa wi prea. Jiova kin du dis fɔ wi yon bɛtɛ wan. Bikɔs na in mek wi, ɛn i lɛk wi, na in nɔmɔ gɛt di rayt fɔ du so. If Jiova de du wetin wi want wantɛm wantɛm, i go mek wi padi biznɛs wit am nɔ go bifo.—Luk Ayzaya 29:16; 45:9.

8. We wi nɔ ebul fɔ bia sɔntin, wetin Jiova dɔn prɔmis fɔ du fɔ wi?

8 Wan ɔda tin na dat, Jiova no wetin wi ebul fɔ du ɛn wetin wi nɔ ebul fɔ du. (Sam 103:14) So na dat mek i nɔ de lɛf wi to wisɛf we wi gɛt prɔblɛm; i de ɛp wi lɛk aw papa kin ɛp in pikin. Bɔt sɔm tɛm dɛn de we wi kin fil se wi nɔ go ebul fɔ bia igen wit wi prɔblɛm. Bɔt Jiova prɔmis wi se i nɔ go ɛva alaw in savant dɛn fɔ sɔfa pas wetin dɛn nɔ ebul fɔ bia. I go “mek we fɔ lɛ [dɛn] go ebul fɔ bia am.” (Rid Fɔs Lɛta Fɔ Kɔrint 10:13.) So wi fɔ biliv se Jiova no wetin wi ebul fɔ bia.

9. Wetin wi fɔ du if Jiova nɔ ansa wi prea wantɛm wantɛm?

9 We wi nɔ gɛt wetin wi de pre fɔ wantɛm wantɛm, lɛ wi wet fɔ di Wan we no di rayt tɛm fɔ ɛp wi. Lɛ wi mɛmba se insɛf de peshɛnt fɔ ɛp wi bikɔs i rili want fɔ ɛp wi. “Jiova de peshɛnt wet fɔ sho se i lɛk una. Ɛn i go grap fɔ sɔri fɔ una, bikɔs Jiova na Gɔd we de du tin tret. Ɔl di wan dɛn we de wet fɔ am go gladi.”—Ayz. 30:18.

“DI LAYƆN IN MƆT”

10-12. (a) Wetin mek i nɔ kin izi fɔ Kristian we de kia fɔ in fambul we sik bad bad wan? (b) We wi abop pan Jiova we tin nɔ izi, aw dat kin afɛkt wi padi biznɛs wit am? Gi wan ɛgzampul.

10 We wi gɛt prɔblɛm we de rili mɔna wi, wi kin fil lɛk aw di apɔsul Pɔl bin fil. I kin tan lɛk se yu de nia ɔ insay “di layɔn in mɔt.” Dɛn tɛm dɛn ya, i nɔ kin izi fɔ abop pan Jiova, bɔt na da tɛm de wi fɔ abop pan am mɔ. Fɔ ɛgzampul, lɛ wi se yu de mɛn pɔsin we sik bad bad wan na yu famili. Sɔntɛm yu go dɔn pre fɔ mek Jiova gi yu sɛns ɛn trɛnk. * Dis go mek yu gɛt smɔl kolat we yu no se Jiova in yay de pan yu. I go ɛp yu fɔ bia ɛn kɔntinyu fɔ fetful to am.—Sam 32:8.

11 I kin luk lɛk se Jiova nɔ de ɛp yu. Sɔntɛm wan dɔktɔ go tɔk dis ɛn di ɔda wan go se difrɛn tin. Ɔ yu fambul dɛn we yu bin fil se go ɛnkɔrej yu, go de mek tin nɔ izi fɔ yu. Kɔntinyu fɔ abop pan Jiova fɔ ɛp yu. Kɔntinyu fɔ de nia Jiova. (Rid 1 Samiɛl 30:3, 6.) Leta we yu si aw Jiova dɔn ɛp yu, yu padi biznɛs wit am go tayt mɔ ɛn mɔ.

12 Wan sista we nem Linda * bin kam fɔ no se dis na tru. Fɔ lɔng tɛm, i bin dɔn de kia fɔ in mama ɛn papa we bin sik bifo dɛn day. Linda bin se: “We wi bin gɛt dis prɔblɛm, mi, mi man, ɛn mi brɔda, nɔ bin de rili no wetin fɔ du. Sɔntɛnde wi nɔ kin ebul fɔ du natin. Bɔt naw, wi dɔn kam fɔ si aw Jiova bin de ɛp wi. I bin de kɔrej wi ɛn gi wi di tin dɛn we wi nid, ivin we i kin tan lɛk se wi nɔ no wetin fɔ du.”

13. Aw di abop we wan sista bin abop pan Jiova bin ɛp am we i gɛt difrɛn prɔblɛm dɛn we bin de mit am?

13 We wi rili abop pan Jiova, dat go ɛp wi we wi gɛt siriɔs prɔblɛm. Na dis bin ɛp wan wi sista we nem Ronda, we in man nɔto Witnɛs. Di tɛm we in man bin  want fɔ dayvɔs am, in brɔda kam gɛt wan sik we dɛn kɔl, lupɔs. Dis na bad bad sik we kin kil pɔsin. Afta sɔm tɛm, in brɔda in wɛf day. We Ronda dɔn de fɔgɛt bɔt dɛn prɔblɛm ya, i bigin fɔ rɛgyula payɔnia. I nɔ tu te, in mama sɛf day. Wetin ɛp Ronda fɔ bia? I tɔk se: “A bin de pre to Jiova ɛvride ilɛksɛf na smɔl tin a want disayd fɔ du. We a bin de du dis, Jiova kam fɔ bi rial Pɔsin to mi. I ɛp mi fɔ abop pan am ɛn i ɛp mi bak nɔ fɔ abop pan misɛf ɔ ɔda pipul dɛn. Jiova bin rili ɛp mi bikɔs i bin de gi mi ɔl wetin a nid. Ɛn dis bin mek a no se a de du wetin Jiova want.”

Ivin insay di famili, prɔblɛm dɛn kin kam we kin want fɔ ambɔg wi padi biznɛs wit Jiova (Luk na paregraf 14 to 16)

14. Aw di wan dɛn we gɛt fambul we disfɛloship go sho se dɛn abop pan Jiova?

14 Lɛ wi tɔk bɔt wan ɔda ɛgzampul. Lɛ wi se sɔmbɔdi na yu famili disfɛloship. Frɔm wetin yu dɔn lan na di Baybul, yu no aw fɔ trit pɔsin we disfɛloship. (1 Kɔr. 5:11; 2 Jɔn 10) Bɔt bikɔs yu lɛk di pɔsin, dis kin mek i nɔ izi fɔ fala wetin di Baybul se bɔt aw fɔ trit pɔsin we disfɛloship. * Yu go abop pan yu Papa we de na ɛvin fɔ ɛp yu so dat yu go fala wetin di Baybul se bɔt aw fɔ trit pɔsin we disfɛloship? Yu nɔ tink se na chans yu dɔn gɛt fɔ mek yu padi biznɛs wit Jiova go bifo mɔ ɛn mɔ bay we yu de kam nia am?

15. Wetin mek Adam nɔ bin du wetin Jiova bin tɛl am na Idɛn?

15 Naw, lɛ wi tɔk smɔl bɔt di fɔs man,  we na Adam. Yu tink se Adam bin rili biliv se ilɛksɛf i nɔ obe Jiova, i go stil kɔntinyu fɔ liv? Nɔ, i nɔ bin biliv dat, bikɔs di Baybul tɛl wi se nɔto Adam “dɛn bin ful.” (1 Tim. 2:14) Wetin mek naw i nɔ bin obe? Adam bin it di frut we Iv gi am bikɔs i bin lɛk in wɛf. Bifo i lisin to Gɔd, i bin lisin to in wɛf.—Jɛn. 3:6, 17.

16. Udat wi fɔ lɛk mɔ? Wetin du?

16 Dis min se wi nɔ fɔ lɛk wi famili? Nɔ, wi fɔ lɛk dɛn! Bɔt di Pɔsin we wi fɔ lɛk mɔ na Jiova. (Rid Matyu 22:37, 38.) Ɛn we wi fala wetin di Baybul se i go rili ɛp wi fambul dɛn, ilɛksɛf dɛn de sav Jiova naw ɔ dɛn nɔ de sav am. So kɔntinyu fɔ du wetin go mek yu lɛk Jiova mɔ ɛn mɔ ɛn wetin go mek yu abop pan am. If yu de wɔri bɔt pɔsin na yu famili we disfɛloship, pre to Jiova ɛn tɛl am aw yu de fil. * (Rom 12:12; Fil. 4:6, 7) Yuz dis tɛm we yu at pwɛl fɔ mek yu padi biznɛs wit Jiova tayt mɔ ɛn mɔ. Dis go ɛp yu fɔ abop pan Jiova fɔ ɛp yu.

WE WI DE WET

Sho se yu abop pan Jiova bay we yu de du di prichin wok wit zil (Luk na paregraf 17)

17. We wi bizi pan di prichin wok, aw dat de sho se wi abop pan Jiova?

17 Wetin mek Jiova bin sev Pɔl “frɔm di layɔn in mɔt?” Pɔl gi di ansa. I se: “So dat i go yuz mi fɔ mek di prichin wok go bifo ɛn mek ɔl di neshɔn dɛn yɛri.” (2 Tim. 4:17) Jɔs lɛk Pɔl, wisɛf bizi de du di prichin wok. Wi biliv se Jiova go mek wi “gɛt ɔl dɛn ɔda tin” dɛn we wi nid. (Mat. 6:33) As pipul dɛn we de prich bɔt di Kiŋdɔm, Jiova dɔn “gi wi di gud nyus,” ɛn i de si wi as pipul dɛn we “de wok togɛda” wit am. (1 Tɛsa. 2:4; 1 Kɔr. 3:9) If wi kɔntinyu fɔ du dis wok we Gɔd dɔn gi wi, dat go mek am izi fɔ wi fɔ wet te Jiova ansa wi prea.

18. Aw wi go sho se wi abop pan Jiova ɛn mek wi padi biznɛs wit am tayt mɔ ɛn mɔ?

18 So lɛ wi yuz dis tɛm fɔ mek wi padi biznɛs wit Jiova go bifo mɔ ɛn mɔ. If wi gɛt ɛni prɔblɛm we de mek wi de wɔri, lɛ wi yuz am fɔ kam nia Jiova. Lɛ wi de stɔdi Gɔd in Wɔd gud gud wan, pre to am ɔltɛm, ɛn kɔntinyu fɔ du di tin dɛn we Gɔd want. If wi du ɔl dɛn tin ya, dat de sho se wi abop pan Jiova, ɛn i go ɛp wi fɔ bia wit wi prɔblɛm dɛn naw ɛn ɛni ɔda tin we go mit wi tumara bambay.

^ par. 2 Sɔntɛm “di layɔn in mɔt” we dɛn sev Pɔl frɔm go dɔn bi tru tru layɔn ɔ layɔn we min sɔntin.

^ par. 10 Dɛn dɔn rayt sɔm atikul dɛn fɔ ɛp Kristian dɛn fɔ bia we dɛn sik ɛn fɔ ɛp di wan dɛn we de kia fɔ dɛn. Rid di Fɛbwari 8, 1994; Fɛbwari 8, 1997; Me 22, 2000; ɛn Janwari 22, 2001, atikul dɛn na di Awake! magazin.

^ par. 12 Dɛn dɔn chenj di nem dɛn na dis atikul.

^ par. 14 Rid di atikul we se “Why Disfellowshipping Is a Loving Provision.” I de insay di Epril 15, Wachtawa.

^ par. 16 Dɛn dɔn rayt bɔku atikul dɛn fɔ ɛp di wan dɛn we dɛn fambul dɔn lɛf fɔ sav Jiova. Rid di Sɛptɛmba 1, 2006, Wachtawa, pej 17 to pej 21, ɛn di Janwari 15, 2007, Wachtawa, pej 17 to pej 20.