Go dayrɛkt to di men tin

Go dayrɛkt to di say we di difrɛn difrɛn atikul dɛn de

Sɔpɔt Krays in Brɔda Dɛn

Sɔpɔt Krays in Brɔda Dɛn

“Wans una du am to di las wan pan dɛn mi brɔda ya, una dɔn du am to mi.”—MAT. 25:40.

1, 2. (a) Us parebul dɛn Jizɔs tɔk bɔt to in tayt padi dɛn? (Luk di pikchɔ nia dis atikul in taytul.) (b) Wetin wi nid fɔ no bɔt di parebul we Jizɔs pul bɔt di ship ɛn di got?

JIZƆS bin de tɔk to in tayt padi dɛn we na Pita, Andru, Jems, ɛn Jɔn. Dɛn jɔs dɔn yɛri we Jizɔs pul di parebul bɔt di slev we fetful ɛn gɛt sɛns, di tɛn vajin dɛn, ɛn di talɛnt. Bifo Jizɔs dɔn fɔ tɔk, i pul wan ɔda parebul fɔ dɛn. I tɔk bɔt di tɛm we “mɔtalman Pikin” go jɔj “ɔl di neshɔn dɛn.” I go mɔs bi se Jizɔs in disaypul dɛn bin want fɔ no mɔ bɔt dis parebul! Insay dis parebul, Jizɔs tɔk mɔ bɔt tu grup, wan grup na ship ɛn di ɔda wan na got. Ɛn i tɔk bak bɔt wan ɔda grup we impɔtant. I se dis grup na ‘brɔda dɛn’ to “di Kiŋ.”—Rid Matyu 25:31-46.

2 I dɔn te we Jiova in pipul dɛn want fɔ ɔndastand dis parebul. Wetin mek? Bikɔs insay dis parebul, Jizɔs bin tɔk bɔt wetin gɛt fɔ apin to pipul dɛn. I sho wetin mek sɔm pipul dɛn go gɛt layf we go de sote go ɛn wetin mek sɔm pipul dɛn go day ɛn nɔ gɛt layf igen igen. Fɔ lɛ wi gɛt layf we go de sote go, wi fɔ ɔndastand dis parebul we Jizɔs pul ɛn fala di advays we de insay de. Insay dis atikul, wi go tɔk  bɔt dɛn kwɛstyɔn ya: Aw Jiova dɔn tek tɛm ajɔst di we aw wi ɔndastand di parebul? Wetin mek wi go se di parebul de sho se di prichin wok impɔtant? Udat gɛt di wok fɔ prich di gud nyus? Wetin mek na naw wi fɔ sɔpɔt “di Kiŋ” ɛn di wan dɛn we i de kɔl in ‘brɔda dɛn’?

JIOVA DƆN ƐP WI FƆ ƆNDASTAND DI PAREBUL KLIA WAN

3, 4. (a) Wetin na di men tin dɛn we wi fɔ no fɔ ɔndastand di parebul bɔt di ship ɛn di got? (b) Insay 1881, aw Zion’s Watch Tower bin ɛksplen dis parebul?

3 Fɔ lɛ wi ɔndastand di parebul bɔt di ship ɛn di got, wi nid fɔ no tri men tin dɛn na di parebul: (1) udat dɛn de na di parebul, (2) di tɛm we dɛn gɛt fɔ jɔj, ɛn (3) di rizin we go mek pɔsin bi ship ɔ got.

4 Insay 1881, Zion’s Watch Tower bin sho se “mɔtalman Pikin,” we dɛn kin kɔl bak “di Kiŋ,” na Jizɔs. Ɛn i ɛksplen se di Kiŋ in ‘brɔda dɛn’ na di wan dɛn we gɛt fɔ rul wit Krays ɛn ɔl di pipul dɛn we go de na dis wɔl we dɛn go dɔn pafɛkt. Di Wach Tawa bin tɔk se dɛn go put di ship dɛn wansay ɛn put di got dɛn ɔdasay di tɛm we Krays go de Rul fɔ Wan Tawzin Ia. Ɛn pipul dɛn go bi ship if dɛn falamakata Gɔd fɔ sho lɔv.

5. Aw wi bin ɔndastand dis parebul insay dɛn 1920?

5 Insay dɛn 1920, Jiova ɛp in pipul dɛn fɔ ɔndastand dis parebul mɔ. Di Ɔktoba 15, 1923, Wach Tawa bin tɔk bak se “mɔtalman Pikin” na Jizɔs. Bɔt i yuz sɔm vas dɛn na di Baybul fɔ sho udat na Krays in brɔda dɛn. I se Krays in brɔda dɛn na di wan dɛn we gɛt fɔ rul wit am na ɛvin, ɛn di ship dɛn na di wan dɛn we Krays gɛt fɔ rul na dis wɔl. Ustɛm dɛn gɛt fɔ put di ship dɛn wansay ɛn put di got dɛn ɔdasay? Di atikul tɔk se Krays in brɔda dɛn go de rul wit am na ɛvin insay di Wan Tawzin Ia, so di wan dɛn we gɛt fɔ de na dis wɔl nɔ go ebul fɔ ɛp dɛn ɔ lɛf fɔ sɔpɔt dɛn. So Jizɔs gɛt fɔ put di ship dɛn wansay ɛn put di got dɛn ɔdasay bifo di Wan Tawzin Ia Rul bigin. Di atikul bin sho di rizin we go mek pɔsin bi ship. I bin se pipul dɛn go bi ship if dɛn biliv se Jizɔs na dɛn Masta ɛn dɛn biliv se di Kiŋdɔm go mek tin bɛtɛ na di wɔl.

6. Insay dɛn 1990, aw wi bin ɔndastand di parebul bɔt di ship ɛn di got?

6 Bikɔs Jiova in pipul dɛn bin ɔndastand am dis we, dɛn bin fil se Jizɔs go jɔj pipul dɛn as ship ɔ got te to di tɛm we di wɔl go want fɔ dɔn. Aw pɔsin go no udat na ship ɛn udat na got? If pɔsin lisin to di gud nyus, in na ship, bɔt if i nɔ lisin, in na got. Bɔt insay dɛn 1990, wi bin ajɔst di we aw wi ɔndastand di parebul. Tu atikul dɛn we de insay di Ɔktoba 15, 1995, Wachtawa bin sho aw di tin dɛn we Jizɔs bin tɔk na Matyu 24:29-31 (rid) ɛn Matyu 25:31, 32 (rid) * fiba. Di fɔs atikul bin se: “Dɛn go jɔj di ship ɛn di got dɛn tumara bambay.” Us patikyula tɛm? “I go apin afta da ‘big trɔbul’ bigin, we Matyu 24:29, 30 tɔk bɔt ɛn we mɔtalman Pikin ‘go kam wit glori.’ . . . Dɔn, we dis wikɛd wɔl go want dɔn, Jizɔs go jɔj pipul dɛn.”

7. Aw wi dɔn ɔndastand dis parebul naw?

7 Tide, wi dɔn ɔndastand di parebul bɔt di ship ɛn got klia wan. Udat dɛn de  na di parebul? Insay di parebul, Jizɔs na “mɔtalman Pikin” ɛn na in bak na di Kiŋ. Di Kiŋ in ‘brɔda dɛn’ na anɔyntɛd man ɛn uman dɛn we go rul wit Krays na ɛvin. (Rom 8:16, 17) “Di ship” ɛn “di got dɛn,” na pipul dɛn we de na ɔl di neshɔn dɛn na di wɔl. Jiova nɔ anɔynt dɛn wit oli spirit. Ustɛm di jɔjmɛnt go bigin? Di jɔjmɛnt go bigin we da big trɔbul go want fɔ dɔn. Dis big trɔbul go bigin jisnɔ. Us rizin go mek Jizɔs jɔj pipul dɛn as ship ɔ got? Jizɔs go jɔj pipul dɛn as ship ɔ got bay aw dɛn trit in anɔyntɛd brɔda dɛn we de na di wɔl. I nɔ de fa igen, di wɔl de kam dɔn, so wi gladi we Jiova dɔn ɛp wi smɔl smɔl fɔ ɔndastand dis parebul ɛn di ɔda wan dɛn we de na Matyu chapta 24 ɛn 25!

AW DI PAREBUL DE SHO SE DI PRICHIN WOK IMPƆTANT?

8, 9. Wetin mek Jizɔs se di ship dɛn “de du wetin rayt”?

8 Insay di parebul bɔt di ship ɛn di got, Jizɔs nɔ tɔk klia wan bɔt di prichin wok. So, wetin mek naw, wi go se dis parebul de sho se di prichin wok impɔtant?

9 Fɔs, mɛmba se Jizɔs bin de yuz parebul fɔ tich. So we i bin de tɔk se i go put di ship dɛn wansay ɛn put di got dɛn ɔdasay, nɔto tru tru ship ɛn got i bin de tɔk bɔt. Semweso, i nɔ bin de tɔk se di wan dɛn we i go jɔj as ship, fɔ gi it ɛn klos to in brɔda dɛn, ɔ kia fɔ in brɔda dɛn we dɛn sik, ɔ go fɛn dɛn na prizin. Bifo dat, i bin de sho di kayn we we di pipul dɛn we i go jɔj as ship go trit in brɔda dɛn. I se di ship dɛn “de du wetin rayt” bikɔs dɛn no se i gɛt brɔda dɛn we stil de na di wɔl, ɛn di ship dɛn de sɔpɔt di anɔyntɛd dɛn insay dis las dez we tin nɔ izi.—Mat. 10:40-42; 25:40, 46; 2 Tim. 3:1-5.

10. Aw di ship dɛn go sho se dɛn lɛk Krays in brɔda dɛn?

10 Sɛkɔn, i go fayn lɛ wi luk arawnd di skripchɔ usay Jizɔs tɔk bɔt di parebul bɔt di ship ɛn di got. Jizɔs bin de tɔk bɔt di sayn we go sho se i de rul as kiŋ ɛn di wɔl want dɔn. (Mat. 24:3) We Jizɔs bin de tɔk bɔt di sayn, i bin se “dɛn go prich dis gud nyus bɔt di Kiŋdɔm ɔlsay na di wɔl.” (Mat. 24:14) Ɛn bifo i tɔk bɔt di parebul bɔt di ship ɛn di got, i bin dɔn tɔk bɔt di parebul bɔt di talɛnt. As wi bin dɔn tɔk na di las atikul, Jizɔs bin pul di parebul bɔt di talɛnt fɔ tɛl in anɔyntɛd disaypul dɛn, we na in ‘brɔda dɛn,’ se dɛn fɔ du di prichin wok wit zil. Bɔt Jizɔs in anɔyntɛd brɔda dɛn we lɛf na dis wɔl nɔ bɔku, so dɛn gɛt bɔku bɔku wok fɔ du, dat na fɔ prich di gud nyus to “ɔl di neshɔn dɛn” bifo di ɛnd kam. Di parebul bɔt di ship ɛn di got sho se di anɔyntɛd dɛn go gɛt pipul dɛn we go ɛp dɛn. So wan impɔtant we we di wan dɛn we Krays go jɔj as ship go sho se dɛn lɛk Krays in brɔda dɛn na we dɛn de sɔpɔt dɛn fɔ du di prichin wok. So, wetin-ɛn-wetin wi go du fɔ sɔpɔt dɛn? Na fɔ jɔs gi dɛn wetin dɛn nid ɛn ɛnkɔrɛj dɛn, ɔ wi fɔ du mɔ?

UDAT DƐN FƆ PRICH?

11. Us kwɛstyɔn wi go aks? Wetin mek wi fɔ aks dis kwɛstyɔn?

11 Tide, bɔku pan di et milyɔn disaypul dɛn we Jizɔs gɛt nɔto anɔyntɛd Kristian dɛn. Jizɔs nɔ gi dɛn di talɛnt we i bin gi in anɔyntɛd slev dɛn. (Mat. 25:14-18) So di kwɛstyɔn we wi go  aks naw na, ‘Yu tink se di wan dɛn we Jiova nɔ anɔynt wit in oil spirit fɔ du di prichin wok?’ Lɛ wi tɔk bɔt sɔm rizin dɛn we mek dɛn fɔ du dat.

12. Wetin wi lan frɔm di tin dɛn we Jizɔs tɔk na Matyu 28:19, 20?

12 Jizɔs bin tɛl ɔl in disaypul dɛn fɔ prich. Afta Jizɔs bin dɔn gɛt layf bak, i bin tɛl di wan dɛn we de fala am fɔ mek pipul dɛn bi in disaypul ɛn tich dɛn fɔ du “ɔl di tin dɛn” we i dɔn tɛl dɛn fɔ du. Wan pan di tin dɛn we i bin tɛl dɛn fɔ du na di prichin wok. (Rid Matyu 28:19, 20.) So ɔl Krays in disaypul dɛn fɔ prich, ilɛksɛf dɛn gɛt di op fɔ rul na ɛvin ɔ fɔ de na dis wɔl.—Akt 10:42.

13. Wetin di vishɔn we Jɔn bin si ɛp wi fɔ ɔndastand?

13 Di Baybul buk we nem Rɛvɛleshɔn sho se di anɔyntɛd Kristian dɛn ɛn ɔda Kristian dɛn we nɔto anɔyntɛd go du di prichin wok. Jizɔs bin sho di apɔsul Jɔn wan vishɔn bɔt “di yawo,” we na di 144,000 anɔyntɛd Kristian dɛn we gɛt fɔ rul wit Krays na ɛvin. Insay da vishɔn de, di anɔyntɛd Kristian dɛn kɔl pipul dɛn we “want wata we de gi layf” fɔ “kam tek am fɔ fri.” (Rɛv. 14:1, 3; 22:17) Dis wata na di sakrifays we Jiova mek Jizɔs kam sakrifays in pafɛkt layf fɔ pul mɔtalman pan sin ɛn day. (Mat. 20:28; Jɔn 3:16; 1 Jɔn 4:9, 10) Jizɔs Krays in day na di men tin we wi de prich bɔt, ɛn na di anɔyntɛd Kristian dɛn de bifo fɔ ɛp pipul dɛn fɔ no bɔt am ɛn fɔ no di bɛnifit dɛn we dɛn go gɛt frɔm Jizɔs in sakrifays. (1 Kɔr. 1:23) Bɔt insay di vishɔn, Jɔn si we dɛn de tɛl ɔda pipul dɛn, we nɔto Jizɔs in yawo fɔ kɔl ɔda pipul dɛn fɔ “Kam!” Dɛn obe ɛn tɛl ɔda pipul dɛn fɔ kam tek wata we de gi layf. Dis sɛkɔn grup na di wan dɛn we gɛt di  op fɔ liv na dis wɔl. So dis vishɔn dɔn ɛp wi fɔ no klia wan se, ɔlman we gri fɔ “kam,” gɛt di wok fɔ prich to ɔda pipul dɛn.

14. Wetin i min fɔ obe “Krays in lɔ”?

14 Ɔl di wan dɛn we de ɔnda “Krays in lɔ,” fɔ prich. (Gal. 6:2) Jiova gi ɔl in pipul di sem lɔ dɛn. Fɔ ɛgzampul, i tɛl di Izrɛlayt dɛn se: “Na wan lɔ go de fɔ di Izrɛlayt dɛn ɛn di wan dɛn we nɔto Izrɛlayt we de wit una.” (Ɛks. 12:49; Lɛv. 24:22) Kristian dɛn nɔ de ɔnda di Lɔ we Gɔd bin gi Mozis. Bɔt wi ɔl de ɔnda “Krays in lɔ,” ilɛksɛf wi na anɔyntɛd ɔ wi nɔto anɔyntɛd. Dis lɔ na ɔl di tin dɛn we Jizɔs bin tich. Wan men tin we Jizɔs bin tɛl in disaypul dɛn na dat dɛn fɔ lɛk ɔda pipul dɛn. (Jɔn 13:35; Jems 2:8) Ɛn wan men we we wi go sho se wi lɛk Gɔd, wi lɛk Krays, ɛn wi kɔmpin mɔtalman dɛn na we wi de prich di gud nyus bɔt di Kiŋdɔm.—Jɔn 15:10; Akt 1:8.

15. Wetin mek wi go se Jizɔs bin gi di prichin wok to ɔl in disaypul dɛn?

15 Wetin Jizɔs bin tɔk to wan smɔl grup kin min se i tɔk am bak to bɔku pipul dɛn. Fɔ ɛgzampul, Jizɔs bin mek wan agrimɛnt wit in 11 disaypul dɛn se dɛn go rul wit am na in Kiŋdɔm, bɔt da agrimɛnt de nɔto fɔ dɛn nɔmɔ, na fɔ ɔl di 144,000. (Lyuk 22:29, 30; Rɛv. 5:10; 7:4-8) Semweso, di tɛm we Jizɔs bin gɛt layf bak, i bin tɛl sɔm pan in disaypul dɛn fɔ prich. (Akt 10:40-42; 1 Kɔr. 15:6) Bɔt ɔl in disaypul dɛn we bin de insay di apɔsul dɛn tɛm bin no se dis tin we Jizɔs bin tɔk na fɔ dɛn ɔl, pan ɔl we dɛn nɔ bin de de we i tɔk am. (Akt 8:4; 1 Pit. 1:8) Tide sɛf, Jizɔs nɔ bin go mit ɛni wan pan di et milyɔn Witnɛs dɛn ɛn tɛl dɛn se mek dɛn prich. Bɔt dɛn ɔl no se dɛn fɔ sho se dɛn biliv Krays ɛn wan we fɔ sho se dɛn biliv Krays na we dɛn tɔk bɔt wetin dɛn biliv to ɔda pipul dɛn.—Jems 2:18.

NAW NA DI TƐM FƆ SƆPƆT JIZƆS IN BRƆDA DƐN

16-18. Aw di wan dɛn we gɛt fɔ bi Krays in ship fɔ sɔpɔt in brɔda dɛn? Wetin mek na naw dɛn fɔ du am?

16 Setan de fɛt wɔ wit Krays in anɔyntɛd brɔda dɛn we stil de na dis wɔl, ɛn i go mek di wɔ tɛns mɔ ɛn mɔ bikɔs “na shɔt tɛm lɛf fɔ am.” (Rɛv. 12:9, 12, 17) Pan ɔl we di anɔyntɛd Kristian dɛn gɛt fɔ bia bɔku tin, dɛn stil de bifo fɔ prich di gud nyus ɔlsay na di wɔl. Tide, bɔku pipul dɛn dɔn yɛri di gud nyus pas ɛni ɔda tɛm. Wi no se Jizɔs de wit dɛn ɛn i de ɛp dɛn as dɛn de du di prichin wok.—Mat. 28:20.

17 Di wan dɛn we gɛt fɔ bi Jizɔs in ship dɛn de si am as big big ɔnɔ fɔ sɔpɔt Krays in brɔda dɛn fɔ du di prichin wok ɛn dɛn de sɔpɔt dɛn bak fɔ du ɔda tin dɛn. Fɔ ɛgzampul, dɛn de gi mɔni ɛn ɛp fɔ bil Kiŋdɔm Ɔl dɛn, Asɛmbli Ɔl dɛn, ɛn branch ɔfis dɛn, ɛn dɛn de obe di wan dɛn we “di slev we fetful ɛn gɛt sɛns” dɔn put oba dɛn.—Mat. 24:45-47; Ibru 13:17.

Di wan dɛn we tan lɛk ship de ɛp Krays in brɔda dɛn difrɛn difrɛn we dɛn (Luk na paregraf 17)

18 I nɔ go te igen, di enjɛl dɛn go lɛf da big big briz we go mek da big trɔbul bigin. Da big trɔbul go bigin afta Krays in brɔda dɛn we stil de na dis wɔl gɛt dɛn las stamp. (Rɛv. 7:1-3) Bifo Amagɛdɔn bigin, anɔyntɛd Kristian dɛn we stil de na di wɔl go dɔn go na ɛvin. (Mat. 13:41-43) So, naw na di tɛm fɔ lɛ ɔl di wan dɛn we want fɔ mek Krays jɔj dɛn as ship sɔpɔt in brɔda dɛn gud gud wan.

^ par. 6 Fɔ no mɔ bɔt dis parebul, rid di atikul we gɛt di taytul “How Will You Stand Before the Judgment Seat?” ɛn “What Future for the Sheep and the Goats?” insay di Ɔktoba 15, 1995, Wachtawa.