Go dayrɛkt to di men tin

Go dayrɛkt to di say we di difrɛn difrɛn atikul dɛn de

Yu “Go De Wach”?

Yu “Go De Wach”?

“Una go de wach bikɔs una nɔ no di de ɔ di awa.”—MAT. 25:13.

1, 2. (a) Wetin Jizɔs bin tɔk bɔt di las dez? (b) Us kwɛstyɔn dɛn wi de kam tɔk bɔt?

IMAJIN yu sidɔm ɔp Mawnt Ɔliv, yu de si di tɛmpul na Jerusɛlɛm, as Jizɔs de tɔk bɔt sɔntin we gɛt fɔ apin. Pita, Andru, Jems, ɛn Jɔn de lisin to Jizɔs gud gud wan we i de tɔk bɔt sɔntin we gɛt fɔ tek lɔng lɔng tɛm bifo i apin. I tɛl dɛn bɔku tin we gɛt fɔ apin insay di las dez na dis wikɛd wɔl. Na insay di las dez Jizɔs go de rul na Gɔd in Kiŋdɔm. I tɛl dɛn se na insay dis tɛm, in “slev we fetful ɛn gɛt sɛns” go wok fɔ am na di wɔl, dɛn go tich in savant dɛn plɛnti tin dɛn bɔt Gɔd di rayt tɛm we dɛn nid am.—Mat. 24:45-47.

2 Afta Jizɔs bin dɔn tɔk bɔt dɛn tin ya, i bin pul wan parebul bɔt di tɛn vajin dɛn. (Rid Matyu 25:1-13.) Lɛ wi tɔk bɔt tri kwɛstyɔn dɛn we gɛt sɔntin fɔ du wit dis parebul. (1) Wetin na di men tin we di parebul de tɔk bɔt? (2) Aw di anɔyntɛd Kristian dɛn we fetful dɔn fala di advays dɛn we de na di parebul, ɛn wetin go apin we dɛn fala dɛn advays ya? (3) Aw wi ɔl go bɛnifit frɔm Jizɔs in parebul?

 WETIN NA DI MEN TIN WE DI PAREBUL DE TƆK BƆT?

3. Trade, aw wi buk ɛn magazin dɛn bin de ɛksplen di parebul bɔt di tɛn vajin dɛn? Wetin bin apin we dɛn de ɛksplen am da we de?

3 As wi bin dɔn tɔk insay di las atikul, we di fetful slev de tɔk naw bɔt sɔm parebul ɛn stori dɛn, dɛn nɔ de tɔk tumɔs bɔt udat dis pɔsin tinap fɔ ɔ wetin di tin dɛn we de insay di parebul min, bɔt we dɛn de ɛksplen dɛn parebul ya, dɛn de tɔk mɔ bɔt di lɛsin dɛn we wi kin lan frɔm dɛn. Trade, wi buk ɛn magazin dɛn bin de tɔk se ɔl di smɔl smɔl tin dɛn we de insay Jizɔs in parebul bɔt di tɛn vajin dɛn gɛt minin, lɛk di lamp dɛn, di ɔyl, di bɔtul dɛn, ɛn bɔku ɔda tin dɛn we de insay di parebul. Fɔ se wi bin de pe atɛnshɔn pan dɛn smɔl smɔl tin ya te wi dɔn fɔgɛt bɔt di men tin we di parebul de tɔk bɔt? As wi gɛt fɔ lan, wi go kam fɔ si se i rili impɔtant fɔ no di ansa.

4. Insay di parebul, aw wi go ebul fɔ no udat na (a) di ɔkɔ? (b) di vajin dɛn?

4 Lɛ wi tɔk bɔt di men tin we Jizɔs bin tɔk bɔt insay dis parebul. Fɔs, lɛ wi tray fɔ no di men pipul dɛn na di parebul. Udat na di ɔkɔ? Na Jizɔs na di ɔkɔ. Aw wi no dat? Wi no dis bikɔs wan ɔda tɛm we i bin de tɔk, i bin se in na di ɔkɔ! (Lyuk 5:34, 35) Udat na di vajin dɛn? Insay di parebul, Jizɔs bin se di vajin dɛn fɔ rɛdi dɛnsɛf, ɛn dɛn lamp dɛn fɔ layt we di ɔkɔ kam. Jizɔs bin tɛl in “ship dɛn we nɔ bɔku” dis sem tin. Di “ship dɛn we nɔ bɔku” na in anɔyntɛd brɔda dɛn. I bin tɛl dɛn se: “Una drɛs ɛn rɛdi ɛn una lamp fɔ layt ɔltɛm, ɛn una fɔ tan lɛk man dɛn we de wet fɔ dɛn masta we go pan mared.” (Lyuk 12:32, 35, 36) Apat frɔm dat, di oli spirit bin mek di apɔsul Pɔl ɛn Jɔn rayt se di anɔyntɛd dɛn we de fala Krays tan lɛk vajin dɛn we nɔ wande gɛt biznɛs wit man. (2 Kɔr. 11:2; Rɛv. 14:4) So wi dɔn si klia wan se Jizɔs bin want lɛ wi si in parebul insay Matyu 25:1-13 as wɔnin ɛn advays to in anɔyntɛd brɔda dɛn.

5. Aw Jizɔs bin sho di tɛm we in parebul go apin?

5 Naw, lɛ wi tɔk bɔt di tɛm we Jizɔs bin se di parebul go apin. Jizɔs bin tɔk sɔntin na di las pat na di parebul we ɛp wi fɔ no ustɛm di parebul go apin. I bin tɔk bɔt di tɛm we “di ɔkɔ kam.” (Mat. 25:10) As wi bin dɔn tɔk insay di Julay 15, 2013, Wachtawa (Inglish), we Jizɔs bin de tɔk na Matyu chapta 24 ɛn 25, i tɔk et tɛm bɔt in “kam wan”; ɔl di say dɛn we i tɔk bɔt in kam wan, i bin yuz difrɛn Grik wɔd dɛn we gɛt di sem minin. We Jizɔs bin de tɔk na ɔl dɛn say ya bɔt in kam wan, i bin de tɔk bɔt di tɛm we da big trɔbul go kam. Na insay da tɛm de Jizɔs go kam fɔ jɔj ɛn pul ɔl di bad bad tin dɛn we de apin na dis wɔl. So wi dɔn si klia wan se dis parebul go apin insay di las dez, bɔt di tɛm mɔ we i go apin, na we da big trɔbul go de na di wɔl.

6. Frɔm wetin Jizɔs bin dɔn tɔk bɔt fɔs, wetin na di men tin na di parebul?

6 Wetin na di men tin we di parebul de tɔk bɔt? I go fayn lɛ wi mɛmba wetin Jizɔs bin tɔk jɔs bifo i pul dis parebul. Jizɔs bin jɔs dɔn tɔk bɔt “di slev we fetful ɛn gɛt sɛns.” Dis slev go bi wan smɔl grup we go de bifo Krays in disaypul dɛn insay di las dez. Na anɔyntɛd brɔda dɛn go de na dis smɔl grup. Jizɔs wɔn dɛn man ya se dɛn fɔ kɔntinyu fɔ fetful. Afta dat, i pul dis parebul fɔ wɔn ɔl di wan dɛn we go bi in anɔyntɛd disaypul dɛn insay di las dez. I tɛl dɛn se dɛn fɔ “de wach” so dat dɛn nɔ go lɔs di wɔndaful blɛsin we dɛn fɔ gɛt. (Mat. 25:13) Lɛ wi tɔk naw bɔt di parebul  ɛn si aw di anɔyntɛd dɛn dɔn fala di advays we de insay de.

AW DI ANƆYNTƐD DƐN DƆN FALA DI ADVAYS WE DE INSAY DI PAREBUL?

7, 8. (a) Us tu tin bin ɛp di vajin dɛn we gɛt sɛns? (b) Aw di anɔyntɛd Kristian dɛn dɔn sho se dɛn rɛdi?

7 Insay Jizɔs in parebul, di vajin dɛn we nɔ gɛt sɛns nɔ bin rɛdi fɔ di ɔkɔ in kam wan, bɔt di vajin dɛn we gɛt sɛns bin rɛdi. Wetin bin ɛp dɛn? Na tu tin bin ɛp dɛn: dɛn bin pripia ɛn dɛn bin de wach. Insay di parebul, ɔl di vajin dɛn fɔ de wach ol nɛt te di ɔkɔ kam, dɛn fɔ layt dɛn lamp dɛn ɛn dɛn fɔ mek shɔ se dɛn nɔ slip. Di fayv vajin dɛn we nɔ gɛt sɛns nɔ bin pripia, bɔt di fayv vajin dɛn we gɛt sɛns bin pripia, dɛn bin kam wit dɛn lamp ɛn dɛn ivin kam wit mɔ ɔyl na bɔtul. Yu tink se di fetful anɔyntɛd Kristian dɛnsɛf pripia?

8 Yɛs, dɛn pripia! Insay di las dez, anɔyntɛd Kristian dɛn dɔn du di sem tin we di vajin dɛn we gɛt sɛns bin du, dɛn dɔn rɛdi fɔ du dɛn wok te ɔltin dɔn. Dɛn no se dɛn gɛt fɔ lɛf bɔku tin we de na Setan in wɔl so dat dɛn go ebul fɔ du di wok we Jiova dɔn gi dɛn, bɔt dɛn stil rɛdi fɔ lɛf dɛn tin ya. Dɛn de sav Jiova wit ɔl dɛn at, nɔto bikɔs dɛn no se di ɛnd de kam, bɔt na bikɔs dɛn lɛk Jiova ɛn in Pikin. Dɛn de du wetin Jiova want ɔltɛm, ɛn dɛn nɔ de liv dɛn layf di we aw di pipul dɛn na di wɔl de liv. Dɛn nɔ de tray fɔ gɛt bɔku prɔpati fɔ dɛnsɛf, ɔ du mami ɛn dadi biznɛs di we aw Gɔd nɔ want, ɛn dɛn nɔ de tink bɔt dɛnsɛf nɔmɔ lɛk aw pipul dɛn na di wɔl de du. So dis de sho se dɛn rɛdi, dɛn de shayn na di wɔl, dɛn de wet, ɛn dɛn nɔ de wɔri ilɛksɛf di Ɔkɔ nɔ kam kwik.—Fil. 2:15.

9. (a) Us wɔnin Jizɔs bin gi to di wan dɛn we go want fil fɔ slip? (b) Wetin di anɔyntɛd dɛn dɔn du we dɛn yɛri sɔmbɔdi se: “Luk di ɔkɔ”? (Luk di futnot.)

9 Di sɛkɔn tin we bin ɛp di vajin dɛn we gɛt sɛns na bikɔs dɛn bin de wach. I pɔsibul fɔ lɛ ɛni wan pan di anɔyntɛd Kristian dɛn fil fɔ slip we dɛn de wet fɔ di Ɔkɔ? Yɛs, i pɔsibul. Insay di parebul, Jizɔs bin se di tɛn vajin dɛn “ɔl fil fɔ slip ɛn dɛn slip” we i bin tan lɛk se di ɔkɔ nɔ de kam kwik. Jizɔs bin no se ivin pɔsin we kin want fɔ du di rayt tin nɔ kin ebul fɔ du am bikɔs i nɔ pafɛkt. Bikɔs Jizɔs bin tɔk se di vajin dɛn bin slip, di anɔyntɛd Kristian dɛn bin si am as wɔnin ɛn dis de ɛp dɛn fɔ rɛdi ɛn wach ɔltɛm. Insay di parebul, ɔl di vajin dɛn bin wek we dɛn yɛri we sɔmbɔdi tɔk se: “Luk di ɔkɔ!” Bɔt na di vajin dɛn nɔmɔ we gɛt sɛns bin rɛdi fɔ di ɔkɔ in kam wan. (Mat. 25:5, 6; 26:41) Wetin wi go se bɔt di fetful anɔyntɛd Kristian dɛn tide? Insay di las dez, dɛn dɔn rɛdi bikɔs dɛn dɔn si bɔku tin dɛn we ɛp dɛn fɔ no klia wan se i nɔ go te igen di Ɔkɔ go kam. I tan lɛk se dɛnsɛf dɔn yɛri we sɔmbɔdi de tɔk se: “Luk di ɔkɔ.” Dɛn dɔn de wach ɛn dɛn rɛdi fɔ di Ɔkɔ in kam wan. * Bɔt di las pat na di parebul de tɔk mɔ bɔt wan patikyula tɛm. Aw wi no dat?

BƐNIFIT DE FƆ DI WAN WE GƐT SƐNS BƆT DI WAN WE FUL I GO PƆNISH AM

10. We di vajin dɛn we nɔ gɛt sɛns bin tɔk to di vajin dɛn we gɛt sɛns, us kwɛstyɔn dis de mek wi aks?

10 Sɔntɛm di say we at fɔ ɔndastand na  di parebul na di las say, usay di vajin dɛn we nɔ gɛt sɛns bin de tɔk to di vajin dɛn we gɛt sɛns. (Rid Matyu 25:8, 9.) Dis tɔk we dɛn bin tɔk de mek wi aks dis kwɛstyɔn: “Ustɛm di anɔyntɛd Kristian dɛn nɔ go gri fɔ ɛp sɔmbɔdi we nid pɔsin fɔ ɛp am?” Fɔ lɛ wi go ebul fɔ ɔndastand, lɛ wi mɛmba di tɛm we di parebul go apin. Mɛmba se wi bin dɔn kam fɔ ɔndastand se di Ɔkɔ, we na Jizɔs, go kam fɔ jɔj di wɔl di tɛm we da big trɔbul go want fɔ dɔn. So i go mɔs bi se di aks we di vajin dɛn we nɔ gɛt sɛns aks di vajin dɛn we gɛt sɛns fɔ ɛp dɛn go apin jɔs bifo da big trɔbul want fɔ dɔn. Wetin mek wi se so? Na bikɔs bay da tɛm de di anɔyntɛd dɛn go dɔn gɛt dɛn las stamp.

11. (a) Wetin go apin jɔs bifo da big trɔbul bigin? (b) Wetin i min we di vajin dɛn we gɛt sɛns tɛl di vajin dɛn we nɔ gɛt sɛns fɔ go to di wan dɛn we de sɛl ɔyl?

11 So, bifo da big trɔbul bigin, ɔl di anɔyntɛd Kristian dɛn go dɔn gɛt dɛn las stamp. (Rɛv. 7:1-4) Frɔm da tɛm de, natin nɔ go mek dɛn nɔ go na ɛvin. Bɔt tink bɔt di tɛm we go pas bifo da big trɔbul bigin. Wetin go apin to anɔyntɛd Kristian dɛn we lɛf fɔ du wetin Jiova want? Dɛn nɔ go go na ɛvin. Dɛn nɔ go gɛt dɛn las stamp bifo da big trɔbul bigin. Da tɛm de, Jiova go anɔynt ɔda fetful pipul dɛn wit in oli spirit fɔ tek dɛn ples. We da big trɔbul go bigin, di anɔyntɛd dɛn we lɛf fɔ du wetin Jiova want go sɔprayz we Jiova go dɔnawe wit ɔl dɛn lay lay rilijɔn dɛn. Na da tɛm de dɛn go no se dɛn nɔ bin rɛdi fɔ di Ɔkɔ in kam wan. Da tɛm de, wetin go apin if dɛn aks fɔ lɛ dɛn ɛp dɛn? Jizɔs in parebul gi wi di ansa. Di vajin dɛn we gɛt sɛns nɔ bin gri fɔ gi dɛn ɔyl to di vajin dɛn we nɔ gɛt sɛns, dɛn tɛl dɛn se lɛ dɛn go to di wan dɛn we de sɛl ɔyl. Mɛmba se na bin “midul midulnɛt.” Yu tink se dɛn go ebul fɔ fɛn pipul dɛn we de sɛl ɔyl da awa de? Nɔ, dɛn nɔ go ebul bikɔs di tɛm dɔn let.

12. (a) Di tɛm we da big trɔbul go dɔn bigin, di fetful anɔyntɛd Kristian dɛn go ebul fɔ ɛp ɛni anɔyntɛd we go lɛf fɔ du wetin Jiova want bifo i gɛt di las stamp? Wetin mek? (b) Wetin go apin to di wan dɛn we tan lɛk dɛn vajin dɛn we nɔ gɛt sɛns?

12 Semweso, di tɛm we da big trɔbul go dɔn bigin, di anɔyntɛd Kristian dɛn we fetful nɔ go ebul fɔ ɛp ɛnibɔdi we lɛf fɔ du wetin Jiova want. Dɛn nɔ go gɛt nɔbɔdi fɔ ɛp dɛn. I go dɔn let. Wetin go apin to dɛn? Jizɔs bin ɛksplen wetin bin apin we di vajin dɛn we nɔ gɛt sɛns go fɔ go bay ɔyl. I se: “Di ɔkɔ kam. Di vajin dɛn we bin rɛdi, go wit am insay di mared pati, ɛn di domɔt lɔk.” We Krays go kam wit in pawa di tɛm we da big trɔbul go want dɔn, i go kɛr ɔl di fetful anɔyntɛd Kristian dɛn na ɛvin. (Mat. 24:31; 25:10; Jɔn 14:1-3; 1 Tɛsa. 4:17) Da tɛm de, di domɔt go lɔk pan di anɔyntɛd Kristian dɛn we nɔ fetful, dɛn go fiba di vajin dɛn we nɔ gɛt sɛns, we bin de kray se: “Sa, Sa, opin fɔ wi!” Bɔt Jizɔs go gi dɛn di sem ansa we i go gi ɔl di wan dɛn we tan lɛk got. I go tɛl dɛn se: “Fɔ tru, a nɔ no una.” I go rili sɔri!—Mat. 7:21-23; 25:11, 12.

13. (a) Wetin mek wi nɔ go se bɔku pan Krays in anɔyntɛd brɔda dɛn go lɛf fɔ du wetin Jiova want? (b) Wetin mek wi go se di wɔnin we Jizɔs gi dɛn de sho se i biliv se dɛn go du di rayt tin? (Luk di pikchɔ nia dis atikul in taytul.)

13 Frɔm ɔl wetin wi dɔn tɔk, wetin wi go se? Fɔ se Jizɔs bin de tɔk se bɔku pan in anɔyntɛd savant dɛn nɔ go fetful ɛn Jiova go mek ɔda pɔsin tek dɛn ples? Nɔ, nɔto dat i bin de tray fɔ tɔk. Mɛmba se, i  bin jɔs dɔn wɔn in “slev we fetful ɛn gɛt sɛns” se dɛn nɔ fɔ ɛva tɔn to wikɛd slev. Dis nɔ min se i bin de tink se dat go apin. Semweso, dis parebul gɛt siriɔs wɔnin. Insay di parebul, fayv vajin bin gɛt sɛns ɛn fayv nɔ bin gɛt sɛns. I nɔ min se bikɔs fayv bin gɛt sɛns ɛn fayv nɔ bin gɛt sɛns, so af pan di anɔyntɛd Kristian dɛn go lɛf fɔ du wetin Jiova want. I jɔs de sho se ɔl di anɔyntɛd dɛn go disayd fɔ dɛnsɛf if dɛn go kɔntinyu fɔ du wetin Jiova want ɔ dɛn nɔ go kɔntinyu. Di oli spirit bin ɛp di apɔsul Pɔl fɔ tɔk dis sem tin we i bin de rayt to in kɔmpin anɔyntɛd Kristian dɛn. (Rid Di Ibru Pipul Dɛn 6:4-9; luk Dyutɔrɔnɔmi 30:19.) Pɔl bin wɔn dɛn siriɔs wan, bɔt afta dat, i bin tɔk sɔntin fɔ sho se i rili biliv se “bɛtɛ tin” de bifo in brɔda ɛn sista dɛn. Semweso, di advays we Jizɔs gi na di parebul de sho se i lɛk di anɔyntɛd dɛn ɛn i biliv se dɛn go du wetin rayt. Krays no se ɔl in anɔyntɛd savant dɛn ebul fɔ du wetin Jiova want ɛn gɛt di blɛsin!

AW KRAYS IN “ƆDA SHIP DƐN” GO BƐNIFIT?

14. Wetin mek di “ɔda ship” dɛnsɛf go bɛnifit frɔm di parebul bɔt di tɛn vajin dɛn?

14 Bikɔs Jizɔs Krays bin se di parebul bɔt di tɛn vajin dɛn gɛt sɔntin fɔ du wit in anɔyntɛd disaypul dɛn, dat min se dis parebul nɔ gɛt ɛni bɛnifit fɔ Krays in “ɔda ship dɛn”? (Jɔn 10:16) Nɔ, i gɛt bɛnifit fɔ dɛn! Mɛmba di men tin we di parebul de tɔk bɔt. Jizɔs bin tɔk klia wan se: “Una go de wach.” Na to di anɔyntɛd dɛn nɔmɔ Jizɔs bin de tɔk? Wan tɛm, Jizɔs bin tɔk se: “Wetin a de tɛl una, na in a de tɛl ɔlman: Una go de wach.” (Mak 13:37) Jizɔs want mek ɔl di wan dɛn we de fala am rɛdi dɛnsɛf fɔ du wetin rayt ɛn dɛn ɔl fɔ de wach. So ɔlman we na Kristian de fala di anɔyntɛd dɛn gud ɛgzampul ɛn dɛn de put di prichin wok fɔs na dɛn layf jɔs lɛk aw di anɔyntɛd dɛn de du. I fayn bak fɔ lɛ wi mɛmba se di vajin dɛn we nɔ gɛt sɛns bin aks di vajin dɛn we gɛt sɛns fɔ tɔn ɔyl fɔ dɛn. Bɔt wi no se dɛn nɔ bin du am. So dis de mɛmba wi se nɔbɔdi nɔ go ebul fetful fɔ wi, ɔ de na di trut fɔ wi, ɔ wach fɔ wi. Wi ɔl gɛt fɔ ansa to di Jɔj we Jiova dɔn put fɔ jɔj wi. So wi fɔ rɛdi bikɔs i de kam jisnɔ!

Di tɛl we dɛn tɛl di vajin dɛn we nɔ gɛt sɛns fɔ go bay ɔyl de sho se nɔbɔdi nɔ go fetful fɔ wi ɔ wach fɔ wi

15. Wetin mek ɔlman we na tru Kristian gladi fɔ Krays in mared?

15 Ɔlman we na Kristian kin bɛnifit bak frɔm di men tin we apin na Jizɔs in parebul. Udat pan wi nɔ gladi fɔ di mared we gɛt fɔ bi? Di anɔyntɛd dɛn go de na ɛvin, ɛn afta Amagɛdɔn, dɛn go bi Krays in yawo. (Rɛv. 19:7-9) Ɔlman we go de na di wɔl da tɛm de go bɛnifit frɔm dis mared we go bi na ɛvin, bikɔs dis mared go mek wan pafɛkt gɔvmɛnt we go rul ɔlman. Ilɛksɛf di op we wi gɛt na fɔ go na ɛvin ɔ na fɔ de na dis wɔl, lɛ wi ɔl tray fɔ du di tin dɛn we wi dɔn lan na di parebul bɔt di tɛn vajin dɛn. Lɛ wi rɛdi wisɛf, lɛ wi kɔntinyu fɔ tinap tranga wan, ɛn lɛ wi de wach ɔltɛm, so dat wi go ɛnjɔy di fayn fayn tin dɛn we Jiova dɔn kip fɔ wi!

^ par. 9 Insay di parebul, afta sɔmbɔdi se, “Luk di ɔkɔ!” (vas 6), i bin tek sɔm tɛm bifo di ɔkɔ rili kam (vas 10). Insay di las dez, di anɔyntɛd Kristian dɛn we rɛdi dɔn si ɔl di sayn dɛn we de sho se Jizɔs dɔn bigin fɔ rul na in Kiŋdɔm. So dɛn fɔ kɔntinyu fɔ de wach te i kam.