Go dayrɛkt to di men tin

Go dayrɛkt to di say we di difrɛn difrɛn atikul dɛn de

 DI TƆPIK NA DI FRƆNT PEJ | WETIN JIZƆS SEV WI FRƆM?

Wetin Mek Wi Nid Pɔsin fɔ Sev Wi?

Wetin Mek Wi Nid Pɔsin fɔ Sev Wi?

“Ɛni mɔtalman we na uman bɔn am, i nɔ de liv lɔng ɛn i kin gɛt bɔku prɔblɛm we de mit am. I kin frɛsh lɛk flawa bɔt leta i kin wida; i kin lɔs kwik kwik wan lɛk shado.” —Job 14:1, 2.

I dɔn te we pipul dɛn de tink bɔt aw layf go tan lɛk we dɛn nɔ go de sik, ol, ɛn day igen. Bɔt i sɔri fɔ no se wi na mɔtalman, wi de day. I dɔn pas tri tawzin ia we Job bin tɔk dɛn wɔd ya we wi jɔs rid ɔp, bɔt te tide wi de si se wetin Job bin tɔk na tru.

Ɔlman na di wɔl want fɔ liv sote go. Di Baybul tɛl wi se Gɔd dɔn put sɔntin na wi at we de mek wi want fɔ liv sote go ɛn i dɔn ɛp wi fɔ ɔndastand wetin i min fɔ liv sote go. (Ɛkliziastis 3:11) If na so i bi, i mek sɛns to yu fɔ lɛ Gɔd put dat na wi at ɛn nɔ ebul fɔ mek dat apin? If yu ansa na nɔ, yu kɔrɛkt. Gɔd in Wɔd tɔk se day na ɛnimi ɛn i prɔmis se day nɔ go “de igen.”—Fɔs Lɛta Fɔ Kɔrint 15:26.

Nɔbɔdi nɔ de we go se day nɔto ɛnimi. Ɛnibɔdi we gɛt sɛns go gri se day na ɛnimi. We bad tin kin want fɔ mit wi, wi kin balans, wi kin ayd, ɛn sɔm tɛm de wi kin rɔn fɔ wi layf. We wi kin sik, wi kin tray fɔ wɛl kwik kwik wan. Wi kin avɔyd ɛnitin we go mek wi day.

Ɛni rizin de we mek wi fɔ biliv se dis ɛnimi we na day nɔ go de igen? Yɛs, rizin de fɔ mek wi biliv. Jiova Gɔd, we mek mɔtalman nɔ mek dɛn fɔ lɛ dɛn liv fɔ sɔm tɛm ɛn day. Gɔd nɔ bin mek mɔtalman fɔ day. I bin want mɔtalman fɔ liv sote go na dis wɔl, ɛn wetin Gɔd want go mɔs bi.—Ayzaya 55:11.

Aw Gɔd go mek day nɔ de igen? I dɔn te we mɔtalman de tray fɔ mek day nɔ de igen, bɔt dɛn nɔ ebul. Ɛn te tide dɛn de tray. Sayɛnsman dɛn dɔn mek maklet ɛn ɔda mɛrɛsin dɛn we dɔn ɛp fɔ ridyus sɔm sik dɛn. Dɛn dɔn stɔdi gud gud wan bɔt di difrɛn tin dɛn we gɛt layf. Tide, na bɔku say dɛn na di wɔl, pipul dɛn de liv lɔng pas aw pipul dɛn bin de liv insay di ɔndrɛd ia we dɔn pas. Bɔt stil, dɛn nɔ ebul fɔ mek day nɔ de igen. Di Baybul se: “Dɛn ɔl de go bak na di dɔti.”—Ɛkliziastis 3:20.

Di gud nyus na dat wi nɔ gɛt fɔ abop pan mɔtalman fɔ sɔlv dis prɔblɛm fɔ wi. Jiova Gɔd dɔn mek we fɔ pul wi kɔmɔt pan day, ɛn di pɔsin we Jiova yuz na Jizɔs Krays.