Go dayrɛkt to di men tin

Go dayrɛkt to di say we di difrɛn difrɛn atikul dɛn de

Kɔntinyu fɔ Prich wit Zil

Kɔntinyu fɔ Prich wit Zil

NO WOK nɔ de na di wɔl we impɔtant pas fɔ prich di gud nyus. As wan pan Jiova in savant dɛn, yu mɔs de si am as big big ɔnɔ we yu de prich. Bɔt yu go mɔs gri se wan wan tɛm, sɔntin kin apin to payɔnia ɛn pɔblisha dɛn we kin mek i nɔ izi fɔ lɛ dɛn kɔntinyu fɔ gɛt zil fɔ du di prichin wok.

Wetin go ɛp yu fɔ kɔntinyu fɔ prich wit zil?

I nɔ kin izi fɔ mek sɔm pɔblisha dɛn si pɔsin fɔ tɔk to we dɛn de prich frɔm os to os. Infakt, bɔku pipul dɛn nɔ kin ivin de na os. We wi kin mit pipul dɛn, dɛn nɔ kin want fɔ yɛri wetin wi go tɔk ɛn dɛn kin ivin trit wi bad. Ɔda pɔblisha dɛn nɔ kin no wetin fɔ du bikɔs di eria usay dɛn kɔngrigeshɔn fɔ prich, big ɛn bɔku pipul dɛn de de we want fɔ no mɔ, bɔt dɛn kin fred se dɛn nɔ go ɛva ebul fɔ prich to ɔl dɛn pipul dɛn de. Ɛn sɔm pɔblisha dɛn dɔn de prich fɔ lɔng tɛm naw pas aw dɛn bin fil se dɛn fɔ prich ɛn dis dɔn pwɛl dɛn at.

Yu tink se wi fɔ sɔprayz fɔ no se Jiova in savant dɛn kin gɛt prɔblɛm dɛn we kin mek dɛn nɔ gɛt bɛtɛ zil fɔ prich? Nɔ, wi nɔ fɔ sɔprayz bikɔs na “di wikɛd wan,” we na Setan, na in de kɔntrol di wɔl, so wi nɔ fɔ fil se i go izi fɔ tɔk bɔt Gɔd in wɔd we go sev pipul dɛn layf.—1 Jɔn 5:19.

Ilɛk wetin apin to yu we yu de prich di gud nyus, mɛmba se Jiova go ɛp yu fɔ bia. Wetin yu fɔ du we go ɛp yu fɔ gɛt mɔ zil we yu de du di prichin wok? Lɛ wi lan bɔt sɔm tin dɛn we go ɛp wi.

ƐP DI WAN DƐN WE JƆS BIGIN PRICH

Ɛvri ia, bɔku pipul dɛn de baptayz as Jiova Witnɛs. If i nɔ tu te yet we yu baptayz, yu go mɔs bɛnifit we yu de lan frɔm di wan dɛn we  dɔn prich fɔ lɔng tɛm pas yu. Ɛn if yu dɔn de prich fɔ lɔng tɛm, yu nɔ tink se i go fayn fɔ ɛp di nyu wan dɛn? Yusɛf go bɛnifit we yu de du dat.

Jizɔs bin no se in disaypul dɛn nid advays so dat dɛn go ebul fɔ prich, ɛn i bin sho dɛn aw fɔ du di prichin wok. (Lyuk 8:1) Tide bak, nid de fɔ tren ɔda pipul dɛn so dat dɛn go ebul fɔ prich fayn.

Wi nɔ fɔ de tink se jɔs bikɔs nyu pɔblisha de go fil savis, i go sabi fɔ prich. I nid ticha we lɛk am ɛn we go peshɛnt fɔ sho am wetin fɔ du. Wi fɔ tren am (1) fɔ pripia ɛn praktis wetin i want fɔ go tɔk na fil savis, (2) fɔ tɔk to pɔsin we i mit na os ɔ pɔsin we de pas na strit, (3) fɔ gi buk ɛn magazin to pipul dɛn, (4) fɔ go bak to pɔsin we want fɔ no mɔ, ɛn (5) fɔ stat Baybul stɔdi. If yu du ɔl dɛn tin ya, di pɔsin we yu de ɛp go mɔs bɛnifit we i de wach ɛn falamakata di kayn we aw yu de ɛp am fɔ du di prichin wok. (Lyuk 6:40) Di nyu pɔblisha go mɔs gladi if i gɛt pɔsin we de lisin to am ɛn ɛp am. I go bɛnifit bak if yu tɛl am tɛnki ɛn tɛl am tin dɛn we go ɛp am fɔ du mɔ.—Ɛkli. 4:9, 10.

GO DE TƆK TO DI PƆSIN WE YU DE PRICH WIT

Pan ɔl we yu go dɔn tray ɔlkayn we fɔ tɔk to di pipul dɛn we yu de mit na os, sɔntɛnde di bɛst pɔsin we yu kin ebul tɔk to na di pɔsin we yu de prich wit. Mɛmba se Jizɔs bin sɛn in disaypul dɛn “tu tu” fɔ go prich. (Lyuk 10:1) As dɛn de prich togɛda, dɛn go de ɛnkɔrej dɛnsɛf. So di tɛm we yu ɛn ɔda pɔblisha de spɛn togɛda na fil savis na fayn tɛm fɔ ‘ɛnkɔrej unasɛf.’—Rom 1:12.

Wetin na sɔm tin dɛn we una kin tɔk bɔt? Ɛni wan pan una dɔn gɛt ɛkspiriɛns dis biɛn tɛm we dɔn ɛnkɔrej una? Yu dɔn lan wan fayn pɔynt we yu de du yu pasɔnal stɔdi ɔ famili stɔdi? Yu bɛnifit frɔm sɔntin we yu yɛri na mitin? Sɔntɛnde di pɔblisha we yu de prich wit nɔto yu ɛn in kin prich ɔltɛm. Yu no aw i lan di trut? Wetin bin mek i biliv gud gud wan se na Jiova in ɔganayzeshɔn dis? Us wok i de du na di kɔngrigeshɔn ɔ us ɛkspiriɛns i dɔn gɛt? Sɔntɛm yu kin tɛl am bɔt yu yon ɛkspiriɛns. Ilɛk wetin apin na fil savis, di prich we yu prich wit ɔda pɔblisha kin gi una chans fɔ “ɛp unasɛf.”—1 Tɛsa. 5:11.

 NƆ LƐF FƆ STƆDI GUD GUD WAN

Wan impɔtant tin we go ɛp wi fɔ kɔntinyu fɔ gɛt zil fɔ di prichin wok na we wi nɔ lɛf fɔ stɔdi gud gud wan. “Di slev we fetful ɛn gɛt sɛns” dɔn gi wi bɔku tin dɛn we go ɛp wi fɔ no difrɛn difrɛn tɔpik dɛn. (Mat. 24:45) So yu gɛt bɔku tɔpik dɛn we yu go ebul fɔ stɔdi. Lɛ wi tɔk smɔl bɔt sɔm tɔpik dɛn we yu kin lan mɔ bɔt we yu de du yu pasɔnal stɔdi: Wetin mek i rili impɔtant fɔ prich bɔt di Kiŋdɔm? Sɔm rizin dɛn de na di bɔks we de na pej 28.

If yu tink bɔt di pɔynt dɛn we de na di bɔks, dat go ɛp yu fɔ kɔntinyu fɔ prich wit zil. Yu nɔ tink se i go fayn fɔ stɔdi mɔ so dat yu go gɛt ɔda rizin dɛn we mek yu fɔ prich? Dɔn tink gud wan bɔt di rizin dɛn ɛn di skripchɔ dɛn we sɔpɔt dɛn. We yu du dat, yu go mɔs gɛt mɔ zil fɔ di prichin wok.

LISIN TO ADVAYS

Jiova in ɔganayzeshɔn de gi wi advays dɛn ɔltɛm we go ɛp wi fɔ du mɔ na di prichin wok. Apat frɔm we wi de prich frɔm os to os, wi kin rayt lɛta to pipul dɛn, kɔl dɛn na fon, prich to dɛn na strit, ɔ say usay bɔku pipul dɛn kin de, ɛn na say dɛn usay pipul dɛn kin du biznɛs. Wi kin tray bak fɔ arenj di tin dɛn we wi de du so dat wi go ebul fɔ prich na eria dɛn we dɛn nɔ kin prich fast fast.

Yu kin lisin to dɛn advays ya? Yu dɔn tray fɔ fala sɔm pan dɛn advays ya? Bɔku pan di wan dɛn we dɔn fala dɛn advays ya kin gladi we dɛn du so. Lɛ wi tɔk bɔt tri ɛgzampul dɛn.

 Di fɔs ɛgzampul na bɔt sɔntin we bin de insay wan pan Wi Kiŋdɔm Ministri dɛn we de tɔk bɔt aw fɔ stat Baybul stɔdi. I mek wan sista we nem Epril aks tri pan in wokmet dɛn if dɛn want fɔ stɔdi di Baybul. I bin sɔprayz ɛn gladi we dɛn ɔl tri gri fɔ stɔdi ɛn bigin fɔ atɛnd di mitin dɛn.

Di sɛkɔn ɛgzampul gɛt fɔ du wit aw wi fɔ gi wi magazin dɛn. Dɛn bin dɔn ɛnkɔrej wi fɔ fɛn pipul dɛn we go lɛk fɔ rid sɔm patikyula atikul dɛn we de na wi magazin dɛn. Wan sakit ovasia na Amɛrika bin tɔk se i bin gi wan Awake! atikul we de tɔk bɔt taya dɛn, to di maneja dɛn na ɔl di taya shɔp dɛn na wan eria. In ɛn in wɛf bin gi wan atikul we gɛt di taytul “Understanding Your Doctor” to lɛk 100 dɔktɔ dɛn so na di sakit. I kɔntinyu fɔ tɔk se: “Dɛn tin ya we wi kin du, dɔn rili ɛp fɔ mek pipul dɛn sabi wi ɛn wi buk ɛn magazin dɛn. Afta wi dɔn mek padi wit di pipul dɛn na dɛn ples ya, wi kin ebul fɔ go de ɛn si dɛn fast fast.”

Di tɔd ɛgzampul na bɔt aw fɔ prich na fon. Wan sista we nem Judi bin rayt to di wɔl ɛdkwata fɔ tɛl dɛn tɛnki fɔ we dɛn ɛnkɔrej wi fɔ yuz fon fɔ prich. I bin tɔk se in mama we ol 86 ia, we nɔ gɛt bɛtɛ wɛlbɔdi bin de yuz dis kayn we fɔ prich, ɛn i bin gladi bikɔs i ebul fɔ yuz fon fɔ stɔdi di Baybul wit wan ɔda pɔsin we ol 92 ia!

Di advays dɛn we wi kin gɛt bɔt aw fɔ prich kin rili ɛp wi. Yuz dɛn! Dɛn go ɛp yu fɔ kɔntinyu fɔ gladi ɛn gɛt zil we yu de prich.

PLAN FƆ DU DI TIN DƐN WE YU NO SE YU GO EBUL FƆ DU

Nɔto di bɔku magazin dɛn we yu de gi ɔ di bɔku Baybul stɔdi dɛn we yu gɛt ɔ ɔmɔs pipul dɛn yu dɔn ɛp fɔ sav Jiova, de sho se yu dɔn du wɛl na di prichin wok. Tink bɔt dis: Apat frɔm di wan dɛn we de na Noa in famili, ɔmɔs pipul dɛn Noa bin ebul fɔ ɛp fɔ kam sav Jiova? Bɔt in na bin pɔsin we bin du wɛl na di prichin wok. Wetin impɔtant na fɔ sav Jiova fetful wan.—1 Kɔr. 4:2.

Bɔku pɔblisha dɛn dɔn si se fɔ mek dɛn gɛt zil fɔ ebul prich, dɛn fɔ plan fɔ du tin dɛn we dɛn ebul fɔ du. Wetin na sɔm pan dɛn tin ya? Sɔm pan dɛn de na di bɔks we de dɔŋ ya.

Mek lɛ Jiova ɛp yu fɔ fɛn we dɛn we go mek yu du wɛl na di prichin wok ɛn fɔ mek yu gladi. We yu ebul fɔ du di tin dɛn we yu plan, yu go gladi bikɔs yu dɔn du ɔl wetin yu ebul fɔ du fɔ prich di gud nyus.

Na tru se i nɔ izi fɔ prich di gud nyus. Bɔt tin dɛn de we yu go du we go mek yu gɛt zil fɔ du di prichin wok. Ɛnkɔrej di pɔsin we yu de prich wit, nɔ lɛf fɔ stɔdi gud gud wan, du wetin di slev we fetful ɛn we gɛt sɛns de tɛl yu fɔ du, ɛn plan fɔ du di tin dɛn we yu no se yu go ebul fɔ du. Pantap dat, nɔ fɔgɛt se Jiova dɔn gi yu di ɔnɔ we pas ɔl, dat na fɔ bi in Witnɛs ɛn prich di gud nyus. (Ayz. 43:10) Yu go rili gladi we yu de kɔntinyu fɔ prich wit zil!