Go dayrɛkt to di men tin

Go dayrɛkt to di say we di difrɛn difrɛn atikul dɛn de

Lɛ Wi Falamakata Jizɔs We Bin Ɔmbul ɛn Gɛt Sɔri-at

Lɛ Wi Falamakata Jizɔs We Bin Ɔmbul ɛn Gɛt Sɔri-at

“Krays dɔn sɔfa fɔ una, i dɔn lɛf ɛgzampul fɔ una, so dat una go fala in fut mak gud gud wan.”—1 PIT. 2:21.

1. We wi de falamakata Jizɔs, aw dat go ɛp wi fɔ kam nia Jiova mɔ ɛn mɔ?

WI KIN tray fɔ falamakata di wan dɛn we wi kin kɔle. Pan ɔl di pipul dɛn we dɔn liv na dis wɔl, no wan nɔ de we fit fɔ falamakata rich Jizɔs Krays. Wetin mek wi se so? Na bikɔs Jizɔs insɛf bin tɔk se: “Ɛnibɔdi we dɔn si mi, dɔn si di Papa.” (Jɔn 14:9) Jizɔs bin falamakata in Papa pafɛkt wan. So we yu wach di Pikin, i jɔs tan lɛk se yu de si di Papa. Na dis mek as wi de falamakata Jizɔs, wi de kam nia Jiova mɔ ɛn mɔ, we na di Pɔsin we pas ɔlman na di wɔl. Wi go gɛt bɔku bɔku bɛnifit we wi de falamakata Jizɔs!

2, 3. (a) Wetin mek Jiova bin mek dɛn rayt bɔt in Pikin? Wetin Jiova want lɛ wi du? (b) Wetin wi go tɔk bɔt insay dis atikul ɛn di nɛks atikul?

2 Aw wi go ebul fɔ no uskayn pɔsin we Jizɔs bi? Wi tɛl Jiova tɛnki we i mek dɛn rayt bɔt Jizɔs. Jiova mek dɛn rayt bɔt am na di Baybul bikɔs i want lɛ wi sabi in Pikin so dat wi go ebul fɔ falamakata am. (Rid Pita In Fɔs Lɛta 2:21.)  Di Baybul kɔmpia di ɛgzampul we Jizɔs lɛf fɔ wi to “fut mak” we pɔsin go lɛf biɛn we i de waka. So Jiova want lɛ wi waka biɛn Jizɔs ɛn fala in fut mak, we min se wi fɔ falamakata Jizɔs pan ɔltin we i bin de du. Na tru se, Jizɔs bin lɛf pafɛkt ɛgzampul fɔ wi, bɔt wi nɔ pafɛkt atɔl. So Jiova nɔ de tink se wi fɔ falamakata Jizɔs pafɛkt wan. Bifo dat, di Papa want lɛ wi du wi bɛst fɔ falamakata in Pikin gud gud wan.

3 So naw lɛ wi kam tɔk bɔt sɔm fayn fayn kwaliti dɛn we Jizɔs gɛt. Insay dis atikul, wi go tɔk bɔt aw Jizɔs ɔmbul, ɛn wi go tɔk bɔt di sɔri-at we i gɛt. Insay di nɛks atikul, wi go tɔk bɔt di we aw Jizɔs bin gɛt maynd ɛn di we aw i bin de tink gud wan ɛn du di rayt tin. We wi de tɔk bɔt dɛn kwaliti ya, wi go ansa dɛn tri kwɛstyɔn ya: Wetin dis kwaliti min? Aw Jizɔs bin sho dis kwaliti? Aw wi go falamakata am?

JIZƆS ƆMBUL

4. Wetin i min fɔ bi ɔmbul?

4 Wetin i min fɔ bi ɔmbul? Bɔku pipul dɛn prawd na di wɔl tide, so dɛn kin fil se ɔmbul pɔsin na pɔsin we wik ɛn i nɔ biliv insɛf. Bɔt nɔto so i bi atɔl. Pɔsin we ɔmbul nɔto pɔsin we wik, infakt, na pɔsin we gɛt maynd. Ɔmbul pɔsin “na pɔsin we nɔ prawd ɛn we nɔ de fil big bɔt insɛf.” (Fil. 2:3) Pɔsin we ɔmbul na pɔsin we nɔ de tink se i bɛtɛ pas ɔda pɔsin. Wan Baybul dikshɔnari se: “Pɔsin we ɔmbul na pɔsin we no aw smɔl i rili bi bifo Gɔd.” If wi rili ɔmbul bifo Gɔd, wi nɔ go de tink se wi de pantap ɔda pipul dɛn. (Rom 12:3) I nɔ izi fɔ lɛ mɔtalman we nɔ pafɛkt, ɔmbul. Bɔt wi go lan fɔ bi ɔmbul we wi de tink bɔt aw Gɔd pas ɔlman ɛn tray fɔ falamakata in Pikin.

5, 6. (a) Udat na Maykɛl, we na di chif fɔ di enjɛl dɛn? (b) Aw Maykɛl bin sho se i ɔmbul?

5 Aw Jizɔs bin sho se i ɔmbul? I dɔn te we Gɔd in Pikin de sho se i ɔmbul; i bin ɔmbul na ɛvin ɛn i bin ɔmbul we i kam na dis wɔl as pafɛkt mɔtalman. Lɛ wi tɔk bɔt sɔm ɛgzampul dɛn.

6 Di we aw i de biev. Wan pan di man dɛn we rayt di Baybul, we na Jud, bin tɔk bɔt Jizɔs in ɛgzampul we i bin de na ɛvin. (Rid Jud In Lɛta 9.) Jizɔs, we na Maykɛl, na in na di chif fɔ ɔl di enjɛl dɛn. I bin “gɛt cham-mɔt wit di Dɛbul” ɛn dɛn “bin de agyu.” Di cham-mɔt we dɛn bin gɛt na bɔt Mozis in bɔdi. Mɛmba se afta Mozis day, Jiova bɛr in bɔdi na wan say we nɔbɔdi nɔ no. (Dyut. 34:5, 6) Sɔntɛm, di Dɛbul bin want fɔ yuz Mozis in bɔdi fɔ mek lay lay wɔship go bifo. I nɔ mata us plan we di Dɛbul bin gɛt, Maykɛl bin gɛt di maynd fɔ stɔp am. Wan buk se di Grik wɔd fɔ “cham-mɔt” ɛn “agyu” na wɔd dɛn we dɛn “kin yuz we sɔmbɔdi gɛt kes na kɔt” ɛn dɛn sho “se Maykɛl ‘chalenj di Dɛbul se i nɔ gɛt rayt’ fɔ tek Mozis in bɔdi.” Bɔt di Chif Enjɛl bin no se nɔto in gɛt di rayt fɔ jɔj am. So, i kɛr di kes go to Jiova, we na di Jɔj we pas ɔl. Maykɛl bin no usay in pawa stɔp, so i nɔ bin du wetin i no se i nɔ gɛt rayt fɔ du, pan ɔl we Setan bin mɔna am. We Maykɛl du dis, i sho se i rili ɔmbul!

7. Aw Jizɔs bin sho se i ɔmbul we i kam pan di we aw i bin de tɔk ɛn du tin?

7 Di tɛm we Jizɔs bin de prich na di wɔl, i bin sho se i ɔmbul bay di we aw i  bin de tɔk ɛn du tin. Di we aw i bin de tɔk. I nɔ bin de ɛva mek pipul dɛn pe atɛnshɔn to am tumɔs. Bifo dat, i bin de gi ɔl di prez to in Papa. (Mak 10:17, 18; Jɔn 7:16) I nɔ bin de ɛva tɔk pan in disaypul dɛn ɔ mek dɛn fil se dɛn nɔ bɛtɛ. Bifo dat, i bin de rɛspɛkt dɛn, prez dɛn we dɛn du gud tin, ɛn sho se i biliv dɛn. (Lyuk 22:31, 32; Jɔn 1:47) Di tin dɛn we i bin de du. Jizɔs bin disayd fɔ liv simpul layf ɛn i nɔ bin tray fɔ gɛt bɔku prɔpati. (Mat. 8:20) I bin rɛdi fɔ du wok we pipul dɛn bin de luk wit bad yay. (Jɔn 13:3-15) Wan men tin we bin sho se i ɔmbul na we i bin de obe. (Rid Lɛta Fɔ Filipay 2:5-8.) I nɔ bin tan lɛk dɛn prawd pipul dɛn we nɔ bin de gri fɔ obe. Jizɔs bin sho se i ɔmbul we i bin du wetin Gɔd want, i ivin “obe te i sɔfa ɛn day.” So wi dɔn si klia wan se Jizɔs, we na mɔtalman Pikin, bin “ɔmbul.”—Mat. 11:29.

SHO SE YU ƆMBUL LƐK JIZƆS

8, 9. Aw wi go sho se wi ɔmbul?

8 Aw wi go sho se wi ɔmbul lɛk Jizɔs? Di we aw wi de biev. If wi na pɔsin we ɔmbul, wi nɔ go du wetin wi no se wi nɔ gɛt rayt fɔ du. If wi no se wi nɔ gɛt rayt fɔ jɔj ɔda pipul dɛn, wi nɔ go kwik fɔ tɔk bɔt di mistek dɛn we dɛn de mek ɔ tray fɔ fɛn fɔlt pan dɛn ɔ bigin de dawt dɛn. (Lyuk 6:37; Jems 4:12) If wi na pɔsin we ɔmbul, wi nɔ go de sho se wi de du wetin “rayt tumɔs,” ɛn wi nɔ go de luk di wan dɛn we nɔ ebul fɔ du di tin dɛn we wi sabi, wit bad yay. Ɛn wi nɔ go ivin du dat to di wan dɛn we nɔ gɛt di spɛshal wok we wi de du. (Ɛkli. 7:16) Ɛlda dɛn we ɔmbul nɔ de fil se dɛn bɛtɛ pas dɛn kɔmpin Kristian dɛn. Bifo dat, di ɛlda dɛn no se “ɔda pipul dɛn impɔtant pas” dɛn, ɛn dɛn de put dɛnsɛf dɔŋ.—Fil. 2:3; Lyuk 9:48.

9 Lɛ wi tɔk bɔt wan brɔda we nem W. J. Tɔn. Brɔda Tɔn na bin pilgrim, we wi de kɔl naw travlin ovasia. I bigin dis wok insay 1894. Afta i dɔn bi travlin ovasia fɔ lɔng tɛm, dɛn bin kɔl am na Kiŋdɔm Fam insay Nyu Yɔk fɔ kam wok usay dɛn de mɛn fɔl dɛn. I bin tɔk se: “Ɛnitɛm we a kin bigin tink tumɔs bɔt misɛf, a kin tɛl misɛf se: ‘Yu smɔl smɔl dɔti, wetin yu gɛt we fɔ mek yu prawd?’” (Rid Ayzaya 40:12-15.) Dis tin we di brɔda bin de du sho se i rili ɔmbul!

10. Aw wi go sho se wi ɔmbul we i kam pan di we aw wi de tɔk ɛn du tin?

10 Di we aw wi de tɔk. If wi rili ɔmbul, di we aw wi de tɔk go sho dat. (Lyuk 6:45) We wi de tɔk wit ɔda pipul dɛn, wi nɔ fɔ tɔk tumɔs bɔt di tin dɛn we wi dɔn du ɛn di spɛshal wok dɛn we wi gɛt. (Prɔv. 27:2) Bifo dat, wi fɔ de luk fɔ di gud tin dɛn we wi brɔda ɛn sista dɛn de du ɛn tɛl dɛn tɛnki fɔ di fayn kwaliti dɛn we dɛn gɛt. Ɛn wi fɔ tɛl dɛn tɛnki bak fɔ di tin dɛn we dɛn sabi fɔ du, ɛn di tin dɛn we dɛn dɔn du. (Prɔv. 15:23) Di tin dɛn we wi de du. Kristian dɛn we ɔmbul nɔ de tray fɔ mek nem fɔ dɛnsɛf na dis wɔl. Bifo dat, dɛn de liv simpul layf ɛn du wok we sɔm pipul dɛn de wach wit bad yay so dat dɛn go gɛt mɔ tɛm fɔ sav Jiova. (1 Tim. 6:6, 8) Di men tin we go sho se wi ɔmbul na we wi de obe. If wi ɔmbul, wi go du wetin Jiova in ɔganayzeshɔn de tɛl wi ɛn wi go “obe di wan dɛn we de bifo” na di kɔngrigeshɔn.—Ibru 13:17.

 JIZƆS GƐT SƆRI-AT

11. Ɛksplen wetin i min fɔ gɛt sɔri-at.

11 Wetin i min fɔ gɛt sɔri-at? “Sɔri-at” na “we yu de sho se yu de fil am fɔ ɔda pɔsin.” Di Baybul tɔk se Jiova ɛn Jizɔs gɛt sɔri-at ɛn lɔv. (Lyuk 1:78; 2 Kɔr. 1:3; Fil. 1:8) Wan buk we de tɔk bɔt di Baybul bin se we di Baybul se wi fɔ gɛt sɔri-at, “i nɔ jɔs min se wi fɔ fil sɔri fɔ ɔda pipul dɛn we nid pɔsin fɔ ɛp dɛn. Bɔt i min se wi fɔ du sɔntin we go ɛp fɔ chenj dɛn layf.” Sɔri-at na tin we kin mek yu du sɔntin fɔ ɛp ɔda pipul dɛn.

12. Wetin sho se Jizɔs bin gɛt sɔri-at fɔ pipul dɛn? Wetin i bin du fɔ sho se i gɛt sɔri-at?

12 Aw Jizɔs bin sho se i gɛt sɔri-at? I bin de fil fɔ pipul dɛn ɛn sho dat bay di tin dɛn we i de du. Jizɔs bin gɛt sɔri-at fɔ pipul dɛn. We Jizɔs bin si in padi Meri ɛn di wan dɛn we de wit am de kray bikɔs in brɔda, Lazarɔs, dɔn day, Jizɔs insɛf bin “kray” bifo dɛn. (Rid Jɔn 11:32-35.) Bɔt nɔto dat nɔmɔ i bin du, i bin fil sɔri fɔ dɛn ɛn gi Lazarɔs layf bak, jɔs lɛk aw i bin sɔri fɔ da uman we in man bin dɔn day ɛn gi in pikin layf bak. (Lyuk 7:11-15; Jɔn 11:38-44) We Jizɔs du dis, i gi Lazarɔs di chans fɔ go na ɛvin. Bifo Jizɔs gi Lazarɔs layf bak, i bin fil “sɔri” fɔ bɔku bɔku pipul dɛn we bin kam to am. Bikɔs i bin gɛt sɔri-at, “i bigin fɔ lan dɛn plɛnti tin.” (Mak 6:34; Krio Fɔs Oli Baybul) Dis tich we Jizɔs bin tich dɛn, go mɔs dɔn chenj dɛn layf, if dɛn bin du wetin i tɛl dɛn! Wi dɔn si klia wan se Jizɔs nɔ bin jɔs de fil sɔri fɔ pipul dɛn nɔmɔ, bɔt i bin de du sɔntin fɔ ɛp dɛn.—Mat. 15:32-38; 20:29-34; Mak 1:40-42.

13. Aw Jizɔs bin de sho se i gɛt sɔri-at we i de tɔk to pipul dɛn? (Luk di pikchɔ nia dis atikul in taytul.)

13 Di we aw i bin de tɔk bin de sho se i gɛt sɔri-at. Di sɔri-at we Jizɔs bin gɛt bin mek i de tɔk fayn to pipul dɛn, mɔ di wan dɛn we dɛn at pwɛl. Di apɔsul Matyu bin tɔk bɔt wetin Ayzaya bin se Jizɔs nɔ go du. I bin se: “I nɔ go rut gras we dɔn wik, ɛn i nɔ go ɔt ɛni wik we want dɔn.” (Ayz. 42:3; Mat. 12:20) Di we aw Jizɔs bin de tɔk bin de ɛp di wan dɛn we tan lɛk “gras we dɔn wik” ɛn di wan dɛn we tan lɛk “wik we want dɔn” na lamp. Di gud nyus we i bin de prich bin de gi op to pipul dɛn ɛn i bin de “kɔrej di wan dɛn we dɛn at pwɛl.” (Ayz. 61:1) I bin de kɔl di wan dɛn we de “wok tranga tranga wan ɛn we tot ebi ebi lod” fɔ kam to am. I tɛl dɛn se if dɛn kam to am, dɛn go “fil fayn.” (Mat. 11:28-30) I bin de tɛl di wan dɛn we de fala am se Gɔd gɛt sɔri-at fɔ ɔl di wan dɛn we de wɔship am, ivin di “smɔl wan” dɛn we pipul dɛn na di wɔl kin luk lɛk se dɛn nɔ impɔtant.—Mat. 18:12-14; Lyuk 12:6, 7.

SHO SE YU GƐT SƆRI-AT LƐK JIZƆS

14. Aw wi go sho se wi gɛt sɔri-at fɔ pipul dɛn?

14 Aw wi go sho se wi gɛt sɔri-at lɛk Jizɔs? Fil sɔri fɔ pipul dɛn. Nɔto ɔltɛm wi kin fil sɔri fɔ pipul dɛn, bɔt di Baybul ɛnkɔrej wi fɔ de fil sɔri fɔ pipul dɛn. Di Baybul se ɔlman we na Kristian fɔ ‘lɛk dɛnsɛf ɛn gɛt sɔri-at fɔ dɛnsɛf.’ Dis na wan pan di kwaliti dɛn we Kristian dɛn fɔ gɛt. (Rid Lɛta Fɔ Kɔlɔse 3:9, 10, 12.) Aw yu go sho se yu gɛt sɔri-at fɔ pipul dɛn? Sho se yu rili lɛk ɔda pipul dɛn. (2 Kɔr. 6:11-13) Tek tɛm fɔ lisin we sɔmbɔdi de tɛl yu aw i de fil ɛn wetin de wɔri am. (Jems 1:19) Tink gud wan ɛn aks yusɛf dɛn kwɛstyɔn ya: ‘If na mi dis tin bin de apin to, aw a go fil? Wetin a go nid?’—1 Pit. 3:8.

15. Wetin wi go du fɔ ɛp di wan dɛn we tan lɛk “gras we dɔn wik” ɔ lɛk “wik we want dɔn” na lamp?

 15 Di tin dɛn we wi de du fɔ sho se wi gɛt sɔri-at. Sɔri-at de mek wi want fɔ ɛp ɔda pipul dɛn, mɔ di wan dɛn we tan lɛk “gras we dɔn wik” ɔ lɛk “wik we want dɔn” na lamp. Aw wi go ebul fɔ ɛp dɛn? Lɛta Fɔ Rom 12:15 se: “Kray wit di wan dɛn we de kray.” Pipul dɛn we dɛn at kin pwɛl kin want mek wi sho dɛn se wi de sɔri fɔ dɛn, nɔto fɔ lɛ wi jɔs de ansa dɛn kwɛstyɔn dɛn nɔmɔ. Wan sista we sɔm brɔda ɛn sista dɛn bin kɔrej we in gyal pikin day, bin tɔk se: “A bin fil fayn we mi padi dɛn bin kam ɛn kray wit mi.” Wi kin sho bak se wi gɛt sɔri-at we wi de du gud tin dɛn to ɔda pipul dɛn. Yu no ɛni sista we in man dɔn day, we nid pɔsin fɔ mek sɔm say dɛn na in os we dɔn pwɛl? Ɛni ol Kristian de we nid transpɔt fɔ go mitin, fɔ go fil savis, ɔ fɔ go to dɔktɔ? Ilɛksɛf na smɔl gud tin yu du, i go min big tin to yu kɔmpin Kristian we nid pɔsin fɔ ɛp am. (1 Jɔn 3:17, 18) Di men tin we go sho se wi bisin bɔt ɔda pipul dɛn na we wi de du wi bɛst fɔ prich di gud nyus. Na di bɛst we dis fɔ ɛp pipul dɛn we rili want fɔ no bɔt Gɔd!

Yu rili bisin bɔt yu kɔmpin Kristian dɛn? (Luk na paregraf 15)

16. Wetin wi go se fɔ ɛnkɔrej di wan dɛn we dɛn at pwɛl?

16 Di we aw wi de tɔk fɔ sho se wi gɛt sɔri-at. If wi gɛt sɔri-at fɔ ɔda pipul dɛn, wi go “tɔk fayn to di wan dɛn we dɛn at pwɛl.” (1 Tɛsa. 5:14) Wetin wi go se fɔ ɛnkɔrɛj dɛn kayn pipul ya? Wi go mek dɛn fil fayn we wi de sho se wi rili kia fɔ dɛn ɛn bisin bɔt dɛn. Wi kin tɛl dɛn tɛnki ɛn ɛp dɛn fɔ si se dɛn gɛt gud kwaliti dɛn. Wi kin mɛmba dɛn se Jiova dɔn briŋ dɛn to in Pikin, so dɛn valyu na Jiova in yay. (Jɔn 6:44) Wi kin tɛl dɛn bak se Jiova rili kia fɔ in savant dɛn “we dɛn at rili pwɛl.” (Sam 34:18) Di fayn fayn wɔd dɛn we wi de tɔk go ɛp di wan dɛn we dɛn at pwɛl.—Prɔv. 16:24.

17, 18. (a) Aw Jiova want mek ɛlda dɛn trit in ship dɛn? (b) Wetin wi go tɔk bɔt insay di nɛks atikul?

17 Ɛlda dɛn, Jiova want lɛ una trit in ship dɛn fayn ɛn gɛt sɔri-at fɔ dɛn. (Akt 20:28, 29) Una mɛmba se na una wok fɔ tich di ship dɛn, ɛnkɔrej dɛn, ɛn mek dɛn fil fayn. (Ayz. 32:1, 2; 1 Pit. 5:2-4) So, ɛlda we gɛt sɔri-at nɔ fɔ tray fɔ kɔntrol di ship dɛn, bigin fɔ put lɔ pan dɛn, ɔ fos dɛn fɔ du sɔntin we dɛn nɔ ebul fɔ du. Bifo dat, dɛn de tray fɔ mek di ship dɛn gladi, ɛn biliv se di lɔv we dɛn gɛt fɔ Jiova go mek dɛn du dɛn bɛst fɔ sav am.—Mat. 22:37.

18 We wi de tink gud wan bɔt di we aw Jizɔs ɔmbul ɛn di we aw i gɛt sɔri-at, i go rili ɛp wi fɔ kɔntinyu fɔ falamakata am. Insay di nɛks atikul, wi go tɔk bɔt tu ɔda fayn fayn kwaliti dɛn we Jizɔs gɛt. I bin gɛt maynd ɛn i bin de tink ɛn du tin di rayt we.