Go dayrɛkt to di men tin

Go dayrɛkt to di say we di difrɛn difrɛn atikul dɛn de

 DI TƆPIK NA DI FRƆNT PEJ | AW FƆ ƐNJƆY YU WOK?

Aw fɔ Ɛnjɔy Yu Wok?

Aw fɔ Ɛnjɔy Yu Wok?

“Lɛ ɔlman it ɛn drink ɛn ɛnjɔy dɛnsɛf fɔ ɔl di tranga wok we dɛn de du. Dis na gift frɔm Gɔd.” (Ɛkliziastis 3:13) If Gɔd want fɔ mek wi ɛnjɔy wi wok, yu nɔ tink se i mek sɛns fɔ mek i sho wi wetin wi go du fɔ mek wi gladi? (Ayzaya 48:17) Wi gladi we i de yuz in Wɔd, di Baybul, fɔ du dat. Tink bɔt dɛn Baybul advays ya we go mek yu gladi fɔ di wok we yu de du.

TINK DI RAYT WE BƆT WOK

Ilɛksɛf yu de yuz yu ed ɔ yu an fɔ wok, ɔ yu de yuz ɔl tu, no se “bɛnifit de we pɔsin de du ɛnikayn tranga wok.” (Prɔvabs 14:23) Us bɛnifit yu go gɛt? Wan bɛnifit na dat, yu go ebul fɔ gɛt di tin dɛn we yu nid. Na tru se Gɔd dɔn prɔmis fɔ gi di wan dɛn we de wɔship am di rayt we, di tin dɛn we dɛn nid. (Matyu 6:31, 32) Bɔt i want wi fɔ du wi bɛst fɔ wok tranga wan fɔ gɛt mɔni di rayt we.—Sɛkɛn Lɛta Fɔ Tɛsalonayka 3:10.

Wi want fɔ si wi wok as tin we de mek wi gɛt wetin wi want. Pipul dɛn go rɛspɛkt yu we yu de wok ɛn du tin fɔ yusɛf. Jɔshwa we ol 25 ia bin se: “Na big tin fɔ mek wi wok ɛn du tin fɔ wisɛf. If yu ebul pe fɔ wetin yu nid, dat min se yu wok de du wetin wok fɔ du fɔ pɔsin.”

Apat frɔm dat, pɔsin we de wok tranga wan kin gɛt rɛspɛkt fɔ insɛf. Bɔt i nɔ rili izi fɔ wok tranga wan. We wi tren wisɛf fɔ kɔntinyu fɔ du wi wok, ilɛksɛf wi nɔ de ɛnjɔy fɔ du am ɔ i at fɔ du, wi go gladi fɔ no se wi rili dɔn du fayn tin. Ɛn dis go mek wi lɛf fɔ balans tranga wok. (Prɔvabs 26:14) So wok kin mek wi rili gɛt gladi at. Erɔn we wi bin dɔn tɔk bɔt insay di las atikul, bin tɔk se: “A lɛk aw a kin fil we a dɔn wok ol de. Sɔntɛnde, a kin taya ɛn ɔda pipul dɛn nɔ kin ivin notis di wok we a de du, bɔt a no se a dɔn du sɔntin.”

 TRAY FƆ SABI YU WOK GUD GUD WAN

Di Baybul tɔk fayn bɔt man we “sabi du in wok” ɛn uman we “kin gladi fɔ wok wit in an.” (Prɔvabs 22:29; 31:13) Na tru se nɔto wantɛm wantɛm pɔsin kin sabi du sɔntin. Ɛn na wan wan pipul dɛn kin ɛnjɔy fɔ du sɔntin we dɛn nɔ sabi fɔ du. Sɔntɛm, na dat mek bɔku pipul dɛn nɔ de ɛnjɔy dɛn wok; dɛn nɔ de put ɔl dɛn at pan dɛn wok.

Pɔsin go ɛnjɔy fɔ du ɛnikayn wok if i tink di rayt we bɔt di wok, dis min se i fɔ put ɔl in atɛnshɔn fɔ lan aw fɔ du di wok fayn fayn wan. Wiliam we ol 24 ia bin tɔk se: “We yu du yu bɛst pan ɛni wok we yu de du ɛn yu si di bɛnifit, dat go mek yu gladi. Yu nɔ go ɛva fil da kayn we de if yu tek shɔtkɔt ɔ if yu nɔ de wok bɛtɛ.”

TINK BƆT AW YU WOK GO BƐNIFIT ƆDA PIPUL DƐN

Nɔto di mɔni nɔmɔ we dɛn de pe yu, yu fɔ de tink bɔt. Bifo dat, aks yusɛf dɛn kwɛstyɔn ya: ‘Wetin mek dis wok impɔtant? Wetin go apin if a nɔ du am? Wetin go apin if a nɔ du am fayn? Aw mi wok de bɛnifit ɔda pipul dɛn?’

I fayn fɔ rili tink bɔt di las kwɛstyɔn bikɔs yu go gladi fɔ si aw yu wok de bɛnifit ɔda pipul dɛn. Jizɔs insɛf bin tɔk se: “Di pɔsin we de gi go gladi pas di pɔsin we dɛn gi.” (Di Apɔsul Dɛn Wok [Akt] 20:35) Apat frɔm di wan dɛn we de bɛnifit frɔm di wok we wi de du, lɛk wi kɔstɔma dɛn ɔ di wan dɛn we wi de wok fɔ, ɔda pipul dɛn de we de bɛnifit frɔm wi wok. Dɛn wan ya kin bi pipul dɛn we de na yu famili ɛn di wan dɛn we nɔ gɛt.

Pipul dɛn we de na yu famili. We papa de wok tranga wan fɔ sɔpɔt in famili, i de bɛnifit dɛn tu we. Fɔs, i de mek shɔ se dɛn gɛt di tin dɛn we impɔtant na layf, lɛk tin fɔ it, klos fɔ wɛr, ɛn say fɔ slip. We i du dis, i de sho se i de du di wok we Gɔd gi am fɔ du, dat na fɔ “kia fɔ di wan dɛn we na in yon.” (Fɔs Lɛta To Timoti 5:8) Sɛkɔn, i de sho in famili se i impɔtant fɔ wok tranga wan. Shen we wi tɔk bɔt insay di las atikul bin se: “Mi papa na gud ɛgzampul we i kam pan wok. I ɔnɛs ɛn na pɔsin we de wok tranga wan. Na kapɛnta wok i bin de du mɔ. A dɔn lan frɔm in ɛgzampul fɔ se i impɔtant fɔ wok wit mi an ɛn fɔ mek tin dɛn we go bɛnifit ɔda pipul dɛn.”

Di wan dɛn we nɔ gɛt. Di apɔsul Pɔl bin advays Kristian dɛn fɔ “wok tranga wan . . . so dat [dɛn] go gɛt sɔntin fɔ gi to pɔsin we nɔ gɛt.” (Lɛta Fɔ Ɛfisɔs 4:28) Fɔ tru, if wi wok tranga wan fɔ kia fɔ wisɛf ɛn wi famili, wi go ebul fɔ ɛp di wan dɛn we nɔ gɛt. (Prɔvabs 3:27) So we wi wok tranga wan, dat de mek wi gɛt di kayn gladi at we pɔsin de gɛt we i de gi.

DU MƆ PAS WETIN DƐN TƐL YU FƆ DU

We Jizɔs bin de tɔk to pipul dɛn ɔp wan mawnten, i bin se: “If sɔmbɔdi we gɛt pawa fos yu fɔ go wit am fɔ wan mayl, go wit am fɔ  tu mayl.” (Matyu 5:41) Aw yu go ebul fɔ du wetin dis advays se we i kam pan yu wok? Bifo yu jɔs du smɔl wok, na fɔ luk fɔ we dɛn we yu go du pas wetin dɛn aks yu fɔ du. Plan gud wan ɛn tray fɔ du yu wok fayn ɛn kwik pas aw pɔsin go tink se yu fɔ du am. Ɛnjɔy fɔ du ivin di smɔl smɔl tin dɛn pan yu wok.

We yu wok pas aw yu fɔ wok, yu go mɔs ɛnjɔy yu wok. Wetin du? Na bikɔs na yu de kɔntrol wetin yu de du. Yu de du mɔ bikɔs yu want fɔ du am, nɔto bikɔs pɔsin fos yu fɔ du am. (Faylimɔn 14) I go fayn lɛ wi tink bɔt di advays we de na Prɔvabs 12:24, we se: “Di pɔsin we de wok tranga wan go rul, bɔt di pɔsin we aydul, dɛn go mek i du lebra wok.” Na tru se sɔm pan wi nɔ go ɛva du lebra wok ɔ slev wok. Bɔt pɔsin we de du wetin nɔmɔ dɛn tɛl am fɔ du kin fil se in na slev, bikɔs ɔltɛm pas dɛn tɛl am sɔntin bifo i du am. Bɔt di pɔsin we de du pas wetin dɛn tɛl am fɔ du, bikɔs i want fɔ du am, kin si am se na in de kɔntrol in layf. Na in de tɛl insɛf wetin fɔ du.

YU FƆ SABI USTƐM FƆ DU YU WOK ƐN USTƐM FƆ DU ƆDA TIN DƐN

Fɔ wok tranga wan na fayn tin, bɔt nɔto dat nɔmɔ wi fɔ du na layf, ɔda tin dɛn de we impɔtant pas wok. Na tru se, di Baybul ɛnkɔrej wi fɔ wok tranga wan. (Prɔvabs 13:4) Bɔt i nɔ min se pɔsin fɔ wok pasmak. Ɛkliziastis 4:6 se: “Wan mɔndɔ rɛst bɛtɛ pas tu mɔndɔ tranga wok we tan lɛk yu de rɔnata briz.” Wetin dis min? Pɔsin we de wok pasmak nɔ de ɛva ɛnjɔy wetin i de wok fɔ, if di wok de tek ɔl in tɛm ɛn trɛnk. I go tan lɛk se i de wok fɔ natin, lɛk we pɔsin “de rɔnata briz.”

Di Baybul go ɛp wi fɔ tink di rayt we bɔt di wok we wi de du. Pan ɔl we i se wi fɔ tray fɔ sabi wi wok gud gud wan, i advays wi bak fɔ “mek shɔ bɔt di tin dɛn we rili impɔtant.” (Lɛta Fɔ Filipay 1:10) Wetin na di tin dɛn we rili impɔtant? Di impɔtant tin dɛn na lɛk fɔ spɛn tɛm wit yu famili ɔ padi dɛn. Di tin we impɔtant pas ɔl, na fɔ du tin we gɛt fɔ du wit Gɔd biznɛs, lɛk fɔ rid ɛn tink gud wan bɔt Gɔd in Wɔd.

Di wan dɛn we no aw fɔ du tin di rayt tɛm kin ɛnjɔy fɔ du dɛn wok mɔ. Wiliam we wi bin dɔn tɔk bɔt bin se: “Wan mi bɔs we a bin de wok fɔ na gud ɛgzampul we i kam pan pɔsin we sabi ustɛm fɔ du in wok ɛn ustɛm fɔ du ɔda tin dɛn. I de wok tranga wan ɛn gɛt gud padi biznɛs wit di pipul dɛn we i de wok fɔ. Dɛn lɛk am bikɔs i de wok fayn. Bɔt we i ɔf, i kin fɔgɛt bɔt in wok ɛn pe atɛnshɔn to in famili ɛn Gɔd biznɛs. Ɛn yu no wetin? In na wan pan di pipul dɛn we a sabi we rili gladi!”