Go dayrɛkt to di men tin

Go dayrɛkt to di say we di difrɛn difrɛn atikul dɛn de

Tɛl Jiova Tɛnki ɛn I Go Blɛs Yu

Tɛl Jiova Tɛnki ɛn I Go Blɛs Yu

“Tɛl Jiova tɛnki, bikɔs i gud.”—SAM 106:1.

1. Wetin mek Jiova fit fɔ lɛ wi tɛl am tɛnki?

NA Jiova de gi wi “ɔl gud gift ɛn ɔl pafɛkt prɛsɛnt,” so i fit fɔ lɛ wi tɛl am tɛnki. (Jems 1:17) Jiova tan lɛk shɛpad we lɛk in ship dɛn; i de gi wi ɔl wetin wi nid ɛn i de ɛp wi fɔ no am. (Sam 23:1-3) I dɔn sho se i tan lɛk “ples fɔ ayd” ɛn i kin “gi wi trɛnk,” mɔ we wi kin gɛt prɔblɛm dɛn we de mɔna wi! (Sam 46:1) So wi gɛt bɔku bɔku rizin we mek wi gri wit wetin wan pan di man dɛn we rayt di Sam buk bin tɔk, we i se: “Tɛl Jiova tɛnki, bikɔs i gud; in lɔv go de sote go.”—Sam 106:1.

Wi iatɛks fɔ 2015: “Tɛl Jiova tɛnki, bikɔs i gud.”—Sam 106:1

2, 3. (a) Wetin na di prɔblɛm dɛn we wi go gɛt if wi nɔ tek wi blɛsin dɛn mek ɛnitin? (b) Us kwɛstyɔn dɛn wi go tɔk bɔt na dis atikul?

2 Wetin mek i fayn fɔ lɛ wi de tɛl tɛnki? Na bikɔs di Baybul bin dɔn tɔk se pipul dɛn nɔ go gɛt wan tɛnki we di wɔl want dɔn. (2 Tim. 3:2) Bɔku pipul dɛn nɔ kin tek dɛn blɛsin dɛn mek ɛnitin. Bikɔs biznɛsman dɛn kin advatayz wetin dɛn de sɛl, dis dɔn mek pipul dɛn nɔ de satisfay wit wetin dɛn gɛt ɛn bɔku bɔku pipul dɛn kin tray fɔ bay plɛnti  tin dɛn. If wi nɔ tek tɛm, wisɛf nɔ go de satisfay wit wetin wi gɛt. Jɔs lɛk di Izrɛlayt dɛn we bin de trade, wisɛf nɔ go valyu di fayn padi biznɛs we wi gɛt wit Jiova ɛn wi nɔ go gɛt wan tɛnki fɔ di blɛsin dɛn we i dɔn gi wi.—Sam 106:7, 11-13.

3 Tink bɔt wetin kin apin we prɔblɛm dɛn kin mit wi. Dɛn tɛm dɛn de, wi prɔblɛm dɛn kin so mɔna wi dat wi kin fɔgɛt bɔt di blɛsin dɛn we wi gɛt. (Sam 116:3) So, wetin go ɛp wi fɔ de tɛl tɛnki ɔltɛm? Wetin go ɛp wi fɔ tink di rayt we, pan ɔl we wi gɛt prɔblɛm dɛn we de mɔna wi? Lɛ wi fɛn di ansa.

“O JIOVA MI GƆD, YU DƆN DU BƆKU TIN DƐN”

4. Wetin go ɛp wi fɔ sho se wi gɛt tɛnki?

4 Fɔ lɛ wi go sho se wi gɛt tɛnki, wi fɔ no di blɛsin dɛn we Jiova dɔn gi wi, wi fɔ de tink bɔt dɛn, ɛn wi fɔ de tink gud wan bɔt di lɔv we i gɛt fɔ wi. We wan pan di man dɛn we rayt di Sam buk bin du dis, i bin sɔprayz fɔ no bɔt di bɔku bɔku wɔndaful tin dɛn we Jiova dɔn du.—Rid Sam 40:5; 107:43.

5. Aw di apɔsul Pɔl in ɛgzampul go ɛp wi fɔ gɛt tɛnki?

5 Di apɔsul Pɔl in ɛgzampul go ɛp wi fɔ gɛt tɛnki. I bin de tink gud wan bɔt di blɛsin dɛn we i gɛt, so i bin de tɛl tɛnki ɔltɛm. Pɔl bin rili no se in na pɔsin we bin “de tɔk bad bad tin dɛn,” i bin de “mek pipul dɛn sɔfa,” ɛn i “bin prawd.” So i bin tɛl Gɔd ɛn Krays tɛnki we dɛn bin sɔri fɔ am ɛn gi am di prichin wok fɔ du, pan ɔl we i bin dɔn du bɔku bad bad tin dɛn. (Rid Fɔs Lɛta To Timoti 1:12-14.) Pɔl bin rili valyu in kɔmpin Kristian dɛn bak ɛn i bin de tɛl Jiova tɛnki ɔltɛm fɔ di fayn kwaliti dɛn we dɛn gɛt ɛn fɔ we dɛn bin de sav Jiova fetful wan. (Fil. 1:3-5, 7; 1 Tɛsa. 1:2, 3) We bad bad tin dɛn bin de mit Pɔl, i nɔ bin de westɛm fɔ tɛl Jiova tɛnki fɔ di ɛp we in kɔmpin Kristian dɛn bin de ɛp am. (Akt 28:15; 2 Kɔr. 7:5-7) Na dis mek wi nɔ go sɔprayz we Pɔl bin de ɛnkɔrej in kɔmpin Kristian dɛn fɔ du di sem tin. I bin tɛl dɛn se: “Una fɔ sho se una gɛt tɛnki . . . ɛn ɛnkɔrej unasɛf wit sam dɛn. Una go de prez Gɔd, ɛn siŋ dɛn Gɔd siŋ dɛn fɔ sho se una gɛt tɛnki.”—Kɔl. 3:15-17.

WE WI TINK GUD WAN ƐN PRE, DAT KIN ƐP WI FƆ TƐL TƐNKI

6. Us patikyula tin yu go want fɔ tɛl Jiova tɛnki fɔ?

6 Aw wi go falamakata Pɔl fɔ tɛl tɛnki ɔltɛm? Wi fɔ de tink gud wan bɔt di tin dɛn we Jiova dɔn du fɔ wi. (Sam 116:12) Wetin yu go se if dɛn aks yu dis kwɛstyɔn, ‘Us blɛsin dɛn we Jiova dɔn gi yu we yu rili gladi fɔ?’ Yu go se na di padi biznɛs we yu gɛt wit Jiova? Ɔ na di fɔgiv we Jiova de fɔgiv yu sin dɛn bikɔs yu gɛt fet pan Krays in day wan? Yu go kɔl di brɔda ɛn sista dɛn we dɔn ɛp yu we yu bin gɛt prɔblɛm dɛn? Yu go mɔs kɔl yu wɛf, yu man, ɔ yu pikin dɛn. We wi tek tɛm fɔ tink bɔt ɔl di fayn fayn blɛsin dɛn we Jiova dɔn gi wi, wi go gladi ɛn dat go mek wi tɛl Jiova tɛnki ɛvride.—Rid Sam 92:1, 2.

7. (a) Wetin mek wi fɔ tɛl Jiova tɛnki we wi de pre? (b) Us bɛnifit yu go gɛt we yu de tɛl Jiova tɛnki we yu de pre?

7 We wi de tink bɔt di blɛsin dɛn we wi gɛt, i kin mek wi pre to Jiova ɛn tɛl am tɛnki. (Sam 95:2; 100:4, 5) Bɔku pipul dɛn kin fil se prea na jɔs fɔ aks  Gɔd fɔ wetin dɛn want. Bɔt wi no se Jiova kin gladi we wi kin tɛl am tɛnki fɔ wetin wi gɛt. Di Baybul gɛt plɛnti prea dɛn we pipul dɛn bin pre fɔ tɛl Jiova tɛnki. Sɔm pan dɛn pipul ya we bin pre fɔ tɛl Jiova tɛnki na Ana ɛn Ɛzikaya. (1 Sam. 2:1-10; Ayz. 38:9-20) So i go fayn fɔ lɛ wi de falamakata dɛn fetful pipul ya we bin de tɛl Jiova tɛnki. Lɛ wi de pre to Jiova ɛn tɛl am tɛnki fɔ di blɛsin dɛn we wi gɛt. (1 Tɛsa. 5:17, 18) Yu go gɛt bɔku bɛnifit dɛn we yu de du so. Yu go fil fayn, yu go lɛk Jiova mɔ, ɛn yu go kam nia am mɔ ɛn mɔ.—Jems 4:8.

Us blɛsin dɛn we Jiova dɔn gi yu we yu rili gladi fɔ? (Luk na paregraf 6 ɛn 7)

8. Wetin go mek wi lɛf fɔ tɛl Jiova tɛnki fɔ ɔl wetin i dɔn du fɔ wi?

8 Wetin mek wi fɔ tek tɛm so dat wi nɔ go lɛf fɔ tɛl Jiova tɛnki fɔ ɔl di gud tin dɛn we i de du fɔ wi? Wi fɔ tek tɛm bikɔs wi nɔ pafɛkt, ɛn dis kin mek i izi fɔ lɛ wi fɔgɛt fɔ tɛl tɛnki. Tink bɔt wi fɔstɛm mama ɛn papa dɛn, we na Adam ɛn Iv. Gɔd bin put dɛn na wan fayn fayn gadin. Gɔd bin de gi dɛn ɔl wetin dɛn nid, dɛn bin gɛt di chans fɔ de sote go ɛn dɛn nɔ bin fɔ gɛt wan prɔblɛm. (Jɛn. 1:28) Bɔt dɛn nɔ bin satisfay wit ɔl dɛn blɛsin ya. Dɛn bin want mɔ ɛn dis bin mek dɛn lɔs ɔltin. (Jɛn. 3:6, 7, 17-19) Tide, wi de wit pipul dɛn we nɔ gɛt wan tɛnki, so if wi nɔ tek tɛm wisɛf go lɛf fɔ tɛl Jiova tɛnki fɔ ɔl di tin dɛn we i dɔn du fɔ wi. Wi go bigin fɔ fil se wi padi biznɛs wit Jiova nɔ min natin. Sɔntɛm wi nɔ go gladi igen fɔ di big big ɔnɔ we wi gɛt fɔ de na Jiova in ɔganayzeshɔn. Ɛn wi go bigin de pe atɛnshɔn pan di tin dɛn we de na dis wɔl we go dɔn jisnɔ. (1 Jɔn 2:15-17) Fɔ lɛ dɛn kayn tin ya nɔ apin to wi, wi fɔ de tink gud wan bɔt di blɛsin dɛn we wi gɛt ɛn tɛl Jiova tɛnki ɔltɛm we i mek wi bi wan pan in pipul dɛn.—Rid Sam 27:4.

WETIN GO ƐP WI FƆ BIA WE WI GƐT PRƆBLƐM?

9. We bad tin dɛn apin to wi, wetin mek wi fɔ de tink bɔt wi blɛsin dɛn?

9 Wan tin we go ɛp wi fɔ bia we wi gɛt prɔblɛm na we wi de tɛl Jiova tɛnki. Wi at kin pwɛl bad we prɔblɛm dɛn kin mit wi jɔs lɛk dat, prɔblɛm dɛn lɛk, we wi gɛt sik we de mɔna wi, we sɔmbɔdi we  wi lɛk day, we flɔd ɛn atkwek kin apin, ɛn we di pɔsin we wi mared to lɛf wi ɛn go du mami ɛn dadi biznɛs wit ɔda pɔsin. We dɛn kayn prɔblɛm ya mit wi, wi go gɛt kɔrej ɛn ebul fɔ tinap tranga wan if wi de tink bɔt wi blɛsin dɛn. Naw lɛ wi kam tɔk bɔt sɔm prɔblɛm dɛn we dɔn mit sɔm pipul dɛn.

10. We Irina kin tink bɔt in blɛsin dɛn, aw dat dɔn ɛp am?

10 Wan rɛgyula payɔnia na Amɛrika, we nem Irina * bin mared to wan ɛlda. Bɔt di ɛlda bin du mami ɛn dadi biznɛs wit ɔda uman ɛn i bin lɛf Irina ɛn di pikin dɛn. Wetin ɛp Irina fɔ kɔntinyu fɔ sav Jiova fetful wan? I tɔk se: “A gladi we Jiova de kia fɔ mi. We a kin tink bɔt mi blɛsin dɛn ɛvride, a kin si se na ɔnɔ a gɛt fɔ lɛ wi Papa na ɛvin no mi ɛn de protɛkt mi. A no se i nɔ go ɛva lɛf mi.” Pan ɔl we bɔku prɔblɛm dɔn mit Irina, i kin gladi ɔltɛm ɛn dat de ɛp am. Ɛn Irina in ɛgzampul kin ɛnkɔrej ɔda pipul dɛn.

11. We Yɔŋ-suk gɛt lɔng kansa, wetin bin ɛp am fɔ bia?

11 Wan sista na Eshia we nem Yɔŋ-suk, bin payɔnia wit in man fɔ lɛk 20 ia so. Bɔt wan de, dɔktɔ tɛl am se i gɛt lɔng kansa ɛn i tɛl am bak se na tri to siks mɔnt i go liv fɔ. Bɔku prɔblɛm dɛn bin dɔn mit in ɛn in man, sɔm dɛn kin big ɛn sɔm dɛn kin smɔl, bɔt dɛn nɔ bin de fil se dɛn go ɛva gɛt prɔblɛm wit dɛn wɛlbɔdi wan. Yɔŋ-suk se: “Dis wɛlbɔdi prɔblɛm bin ambɔg mi bad. A bin de fil se a dɔn lɔs ɔltin ɛn a bin de fred bad.” Wetin dɔn ɛp Yɔŋ-suk fɔ bia dis prɔblɛm? I tɔk se: “Ɛvri nɛt bifo a go slip, a kin go na di viranda we de ɔp wi os ɛn pre lawd wan to Jiova fɔ tɛl am tɛnki fɔ fayv tin dɛn we a gladi fɔ da de de. Dis kin mek a fil fayn, ɛn a kin want fɔ sho se a lɛk Jiova.” Aw Yɔŋ-suk dɔn bɛnifit we i kin pre na nɛt? I tɔk se: “A dɔn kam fɔ no se Jiova kin ɛp wi we wi gɛt prɔblɛm dɛn we de mɔna wi ɛn di blɛsin dɛn we wi gɛt bɔku pas wi prɔblɛm dɛn fa fawe.”

Shɛril ɛn in brɔda we bin sev. In brɔda nem Jɔn (Luk na paregraf 13)

12. Wetin bin ɛp Jesin fɔ bia we in wɛf day?

12 Wan brɔda we nem Jesin, de sav na wan branch ɔfis na Afrika. I dɔn pas 30 ia we i de yuz ɔl in tɛm fɔ sav Jiova. I tɔk se: “I dɔn pas sɛvin ia naw we mi wɛf day, ɛn a bin fil am bad. We a kin tink bɔt aw mi wɛf bin de sɔfa we i gɛt kansa, dat kin mek mi at pwɛl.” Wetin dɔn ɛp Jesin fɔ bia? I se: “Wan de, a bin de tink bɔt wan tɛm we mi ɛn mi wɛf bin de spɛn tɛm togɛda ɛn ɛnjɔy wisɛf, ɛn a pre to Jiova ɛn tɛl am tɛnki fɔ we a mɛmba dat. A fil fayn ɛn afta dat a bigin fɔ tɛl Jiova tɛnki ɔltɛm fɔ dɛn fayn tin ya we a de mɛmba. Dis tɛnki we a de tɛl Jiova ɔltɛm dɔn rili ɛp mi. A stil de fil am we mi wɛf day, bɔt we a kin tɛl Jiova tɛnki fɔ di gud mared we a bin gɛt ɛn di ɔnɔ we a gɛt fɔ sav am wit sɔmbɔdi we bin rili lɛk am dɔn ɛp mi fɔ bia.”

“A rili gladi we Jiova na mi Gɔd.”—Shɛril

13. Wetin bin ɛp Shɛril fɔ bia we bɔku pipul dɛn na in famili bin day?

13 Insay 2013, wan big big briz ɛn ebi ebi ren bin kam na di Filipins. We dat bin apin, wan gyal pikin we nem Shɛril, ɛn we ol 13 ia bin lɔs ɔltin we i gɛt. I se: “Di os we wi bin de bin pwɛl ɛn a lɔs bɔku pipul dɛn na mi famili.” In mama, in papa, ɛn tri pan in smɔl wan dɛn bin day we da big big briz bin blo. Wetin dɔn ɛp Shɛril fɔ lɛ in at nɔ pwɛl pasmak?  I de tɛl Jiova tɛnki ɛn i de tink bɔt di blɛsin dɛn we i stil gɛt. I se: “A si ɔl wetin di brɔda ɛn sista dɛn du fɔ ɛp ɛn kɔrɛj di wan dɛn we bin nid pɔsin fɔ ɛp dɛn. A bin no se ɔl di brɔda dɛn na di wɔl bin de pre fɔ mi.” I tɔk bak se: “A rili gladi we Jiova na mi Gɔd. I de gi wi wetin wi nid ɔltɛm.” Fɔ tru, we wi de tink bɔt wi blɛsin dɛn, i de ɛp wi fɔ bia we wi at pwɛl. If wi gɛt tɛnki, i go ɛp wi fɔ bia ilɛksɛf ɛnikayn prɔblɛm mit wi.—Ɛfi. 5:20; rid Lɛta Fɔ Filipay 4:6, 7.

“A GO STIL GLADI BIKƆS A GƐT JIOVA”

14. Us wɔndaful op we wi gɛt? (Luk di pikchɔ nia dis atikul in taytul.)

14 Jiova in pipul dɛn we bin de trade trade bin de gladi fɔ di blɛsin dɛn we dɛn gɛt. Fɔ ɛgzampul, afta Jiova bin sev di Izrɛlayt dɛn frɔm Fɛro ɛn in sojaman dɛn na di Rɛd Si, di Izrɛlayt dɛn bin gladi ɛn dɛn bin siŋ fɔ prez Jiova ɛn tɛl am tɛnki. (Ɛks. 15:1-21) Tide, wan pan di blɛsin dɛn we wi rili valyu na di op we wi gɛt fɔ se Jiova go pul wi pan ɔltin we de mek wi fil pen ɛn we de mɔna wi. (Sam 37:9-11; Ayz. 25:8; 33:24) Jɔs tink bɔt aw wi go fil we Jiova go kil ɔl in ɛnimi dɛn ɛn mek wi de na di nyu wɔl usay kolat go de ɛn ɔlman go de du wetin rayt. Nɔto kɔmɔn tɛnki wi go tɛl Jiova da de de!—Rɛv. 20:1-3; 21:3, 4.

15. Wetin yu dɔn mekɔp yu maynd fɔ du dis 2015?

15 Insay dis ia, 2015, wi de op fɔ gɛt bɔku blɛsin frɔm Jiova. Na tru se sɔm prɔblɛm dɛn go mit wi. Bɔt ilɛk wetin apin, wi no se Jiova nɔ go ɛva lɛf wi. (Dyut. 31:8; Sam 9:9, 10) I go kɔntinyu fɔ gi wi wetin wi nid fɔ sav am fetful wan. So lɛ wi mekɔp wi maynd fɔ tan lɛk di prɔfɛt Abakɔk we bin tɔk se: “Ilɛksɛf di fig tik nɔ pul flawa, ɛn di vayn nɔ bia frut; ɛn di ɔliv nɔ bɛtɛ, ɛn natin nɔ gro na di fam dɛn, ɛn di animal dɛn lɔs na di say we dɛn de mɛn dɛn, ɛn nɔn nɔ de de igen; a go stil gladi bikɔs a gɛt Jiova; a go gladi fɔ mi Gɔd we de sev mi.” (Aba. 3:17, 18) Te dis ia dɔn, lɛ wi kɔntinyu fɔ tink ɛn gladi fɔ di blɛsin dɛn we wi gɛt ɛn fala di advays we de na wi iatɛks fɔ 2015, we se: “Tɛl Jiova tɛnki, bikɔs i gud.”—Sam 106:1.

^ par. 10 Dɛn dɔn chenj sɔm nem dɛn na dis atikul.