Go dayrɛkt to di men tin

Go dayrɛkt to di say we di difrɛn difrɛn atikul dɛn de

Wetin Du Wi Kin Mek di Ivintɛm It fɔ Mɛmba di Masta?

Wetin Du Wi Kin Mek di Ivintɛm It fɔ Mɛmba di Masta?

“Una go de du dis fɔ mɛmba mi.”—1 KƆR. 11:24.

1, 2. Wetin Jizɔs bin du Naysan 14, insay di ia 33? (Luk di pikchɔ nia dis atikul in taytul.)

WAN nɛt na Jerusɛlɛm, di mun bin ful ɛn i bin de shayn. Dis bin apin Naysan 14, insay di ia 33. Da nɛt de, Jizɔs ɛn in apɔsul dɛn bin sɛlibret di Pasova fɔ mɛmba di tɛm we Jiova bin pul di Izrɛlayt dɛn kɔmɔt na Ijipt. I bin dɔn pas 1,500 ia we dat apin. Jizɔs bin bigin wan spɛshal it wit in 11 fetful apɔsul dɛn fɔ mɛmba di day we i bin gɛt fɔ day da sem de de. *Mat. 26:1, 2.

2 Jizɔs bin pre ɛn pas di bred we nɔ gɛt yist to in apɔsul dɛn, ɛn i tɛl dɛn se: “Una tek am ɛn it.” I pre bak pan di kɔp we gɛt di wayn ɛn tɛl dɛn se: “Una ɔl drink wetin de insay de.” (Mat. 26:26, 27) Jizɔs nɔ bin gi ɔda it to in apɔsul dɛn, bɔt i bin gɛt bɔku tin fɔ tɛl dɛn da nɛt de.

3. Us kwɛstyɔn dɛn wi go tɔk bɔt insay dis atikul?

3 Na so Jizɔs bin bigin di Mɛmorial we dɛn kin kɔl “di  Ivintɛm It fɔ Mɛmba di Masta.” (1 Kɔr. 11:20) Sɔm pipul dɛn go de aks se: Wetin mek wi fɔ mɛmba Jizɔs in day wan? Wetin di bred ɛn di wayn min? Aw wi go pripia fɔ di Mɛmorial? Udat fɔ it di bred ɛn drink di wayn? Ɛn aw Kristian dɛn go sho se dɛn valyu di op we dɛn gɛt?

WETIN MEK WI FƆ DE MƐMBA JIZƆS IN DAY WAN?

4. Wetin Jizɔs in day wan du fɔ wi?

4 Wi ɔl na Adam in pikin dɛn, so wi ɔl dɔn gɛt sin ɛn de day. (Rom 5:12) No mɔtalman nɔ de we pafɛkt, so wi nɔn nɔ go ebul fɔ pe fɔ wi yon layf ɔ fɔ ɔda pipul dɛn layf. (Sam 49:6-9) Bɔt we Jizɔs day, i ebul fɔ pe fɔ di layf we wi bin dɔn lɔs wit in pafɛkt bɔdi ɛn blɔd. We i gi in pafɛkt layf to Gɔd, dat mek wi ebul fɔ kɔmɔt pan sin ɛn day ɛn ebul fɔ gɛt layf we go de sote go.—Rom 6:23; 1 Kɔr. 15:21, 22.

5. (a) Aw wi no se Gɔd ɛn Krays lɛk mɔtalman? (b) Wetin mek wi fɔ go di Mɛmorial fɔ mɛmba Jizɔs in day wan?

5 Di day we Gɔd mek Jizɔs day de sho se Gɔd lɛk mɔtalman. (Jɔn 3:16) Ɛn di day we Jizɔs gri fɔ day fɔ mɔtalman de sho se insɛf lɛk mɔtalman. Wetin mek wi se so? Na bikɔs we Jizɔs bin de nia Gɔd na ɛvin, “na mɔtalman [i] bin lɛk mɔ”! (Prɔv. 8:30, 31) Fɔ sho se wi gladi fɔ wetin Gɔd ɛn in Pikin dɔn du fɔ wi, wi fɔ go di Mɛmorial fɔ mɛmba Jizɔs in day wan. We wi du dis, wi de sho se wi de obe di lɔ we Jizɔs bin gi, we i se: “Una go de du dis fɔ mɛmba mi.”—1 Kɔr. 11:23-25.

WETIN DI BRED ƐN WAYN MIN?

6. Aw wi fɔ si di bred ɛn di wayn we wi kin yuz na di Mɛmorial?

6 We Jizɔs bin de du di Mɛmorial, i nɔ bin mek mirekul fɔ tɔn di bred ɛn di wayn to in bɔdi ɛn blɔd. Bifo dat, we i bin de tɔk bɔt di bred, i bin se: “Dis min mi bɔdi.” Ɛn we i bin de tɔk bɔt di wayn, i bin se: “Dis min mi ‘blɔd we a tek fɔ mek di agrimɛnt,’ ɛn we a gɛt fɔ gi fɔ bɔku pipul dɛn.” (Mak 14:22-24) So wi dɔn si klia wan se di bred ɛn di wayn min sɔntin.

7. Wetin di bred we dɛn kin yuz na di Mɛmorial, min?

7 Insay di ia 33, Jizɔs bin yuz di bred we nɔ gɛt yist we bin lɛf afta dɛn dɔn it di Pasova dɔn. (Ɛks. 12:8) Sɔntɛnde, we di Baybul kin yuz di wɔd “yist,” i kin min kɔrɔpshɔn ɔ sin. (Mat. 16:6, 11, 12; Lyuk 12:1) So i rili impɔtant we Jizɔs yuz bred we nɔ gɛt yist bikɔs di bred min in bɔdi we nɔ gɛt wan sin. (Ibru 7:26) So na dis kayn bred dɛn kin yuz fɔ di Mɛmorial.

8. Wetin di Mɛmorial wayn min?

8 Di wayn we Jizɔs bin yuz Naysan 14, insay di ia 33, min in blɔd, ɛn di wayn sɛf we wi kin yuz na di Mɛmorial, insɛf min di sem tin. Na wan ples we dɛn kɔl Gɔlgɔta, we de nia Jerusɛlɛm, na de dɛn bin kil Jizɔs so dat Gɔd go “fɔgiv bɔku pipul dɛn sin.” (Mat. 26:28; 27:33) Bikɔs di bred ɛn di wayn we wi kin yuz na di Mɛmorial min Jizɔs in pafɛkt layf we i sakrifays fɔ wi ɛn wi gladi fɔ dis tin we Gɔd ɛn Jizɔs du fɔ wi, dis fɔ mek wi ɔl rɛdi wisɛf gud gud wan fɔ go di Ivintɛm It fɔ Mɛmba di Masta ɛvri ia.

AW WI KIN PRIPIA FƆ DI MƐMORIAL?

9. (a) Wetin mek i fayn fɔ lɛ wi de du di Mɛmorial Baybul ridin? (b) Aw yu fil bɔt di day we Jizɔs kam day fɔ wi?

9 Wan we fɔ pripia fɔ di Mɛmorial na we wi du di Mɛmorial Baybul ridin we  kin de na di deli tɛks. Dis go ɛp wi fɔ tink gud wan bɔt wetin Jizɔs bin du jɔs bifo i day. Ɛn dis go ɛp wi fɔ pripia wisɛf fɔ di Ivintɛm It fɔ Mɛmba di Masta. * Wan sista bin tɔk se: “Wi kin de wet fɔ di Mɛmorial. Ɛvri ia, di Mɛmorial de impɔtant to mi mɔ ɛn mɔ. A mɛmba di tɛm we mi papa bin day . . . na da tɛm de mɔ a rili gladi fɔ di day we Jizɔs day fɔ wi sin. . . . A bin no ɔl di skripchɔ dɛn ɛn aw fɔ ɛksplen dɛn! Bɔt na di tɛm we mi papa day na in mɔ a bin rili gladi fɔ di tin dɛn we Jizɔs in day wan go du fɔ wi.” Fɔ tru, we wi de pripia fɔ di Mɛmorial, i fayn fɔ lɛ wi de tink gud wan bɔt aw Jizɔs in day dɔn pul wi pan sin ɛn day.

Yuz di tin dɛn we dɛn dɔn gi wi fɔ rɛdi yusɛf fɔ di Mɛmorial (Luk na paregraf 9)

10. Wetin bak wi fɔ du fɔ pripia fɔ di Mɛmorial?

10 Wan ɔda tin we wi kin du fɔ pripia fɔ di Mɛmorial, na fɔ du mɔ na di prichin wok. Sɔntɛm wi kin ivin ɔgzilari payɔnia insay di Mɛmorial mɔnt. We wi de invayt wi Baybul stɔdi dɛn ɛn ɔda pipul dɛn fɔ kam di Ivintɛm It fɔ Mɛmba di Masta, wi go gladi we wi de tɔk bɔt Gɔd, in Pikin, ɛn di blɛsin dɛn we de fɔ di wan dɛn we de du wetin Jiova want ɛn prez am.—Sam 148:12, 13.

11. Aw sɔm Kristian dɛn na Kɔrint bin de it di bred ɛn drink di wayn di we aw dɛn nɔ fɔ du am?

11 As yu de pripia fɔ di Ivintɛm It fɔ Mɛmba di Masta, i go fayn fɔ lɛ yu tink bɔt wetin di apɔsul Pɔl bin rayt to di Kristian dɛn na Kɔrint. (Rid Fɔs Lɛta Fɔ Kɔrint 11:27-34.) Pɔl bin se ɛnibɔdi we it di bred ɛn drink di wayn we i nɔ gɛt rayt fɔ du dat, da pɔsin de “dɔn sin bikɔs i nɔ rɛspɛkt di Masta in bɔdi ɛn blɔd.” So pɔsin we na anɔyntɛd Kristian fɔ “chɛk insɛf gud gud wan” bifo i it di bred ɛn drink di wayn. If i nɔ du dat, i go briŋ “jɔjmɛnt” pan insɛf. Bɔku pan di Kristian dɛn na Kɔrint nɔ bin de biev fayn, so dɛn bin “wik ɛn sik,” ɛn ‘plɛnti pan dɛn bin day na Gɔd in yay.’ I go mɔs bi se sɔm dɛn bin de it ɛn drink pasmak bifo dɛn kam di Mɛmorial ɔ it ɛn drink pasmak we dɛn de na di Mɛmorial, so dɛn nɔ kin soba we dɛn de na di Mɛmorial. Gɔd nɔ bin de gladi fɔ dɛn we dɛn bin de it di bred ɛn drink di wayn di we aw dɛn nɔ fɔ du am.

12. (a) Wetin Pɔl bin kɔmpia di Mɛmorial to? Us wɔnin i bin gi di wan dɛn we kin it di bred ɛn drink di wayn? (b) If pɔsin we kin it di bred ɛn drink di wayn sin siriɔs wan, wetin i fɔ du?

 12 Pɔl bin kɔmpia di Mɛmorial to it we dɛn kin sheb wit ɔda pipul dɛn, ɛn i bin wɔn di wan dɛn we de it di bred ɛn drink di wayn se: “Una nɔ go de drink na Jiova in kɔp dɔn una de drink na di dɛbul dɛn kɔp; una nɔ go de it na ‘Jiova in tebul’ dɔn una de it na di dɛbul dɛn tebul.” (1 Kɔr. 10:16-21) If pɔsin we kin it di bred ɛn drink di wayn pan di Mɛmorial sin siriɔs wan, i fɔ go to di ɛlda dɛn fɔ mek dɛn ɛp am. (Rid Jems 5:14-16.) If i ‘sho se i sɔri fɔ di bad we i du,’ i nɔ bad fɔ lɛ i it di bred ɛn drink di wayn.—Lyuk 3:8.

13. Wetin mek i go fayn fɔ pre bɔt di op we Gɔd dɔn gi wi?

13 As wi de pripia fɔ di Mɛmorial, i go fayn lɛ wi de pre ɛn tink bɔt di op we Gɔd dɔn gi wi. Ɛnibɔdi we dɔn gi in layf to Jiova ɛn we de fala Jizɔs nɔ fɔ it di bred ɔ drink di wayn we i no se i nɔ gɛt di rayt fɔ du dat, bikɔs dat go sho se i nɔ gɛt wan rɛspɛkt fɔ di day we Jizɔs bin kam day fɔ wi. So, aw sɔmbɔdi go no if i fɔ it di bred ɛn drink di wayn?

UDAT DƐN FƆ IT DI BRED ƐN DRINK DI WAYN?

14. Bikɔs di anɔyntɛd Kristian dɛn de pan di nyu agrimɛnt, wetin dɛn kin du we dɛn go di Mɛmorial?

14 Di wan dɛn we gɛt di rayt fɔ it di bred ɛn drink di wayn no klia wan se dɛn de pan di nyu agrimɛnt. Jizɔs bin tɔk bɔt di wayn se: “Dis kɔp min di nyu agrimɛnt we a mek wit mi blɔd.” (1 Kɔr. 11:25) Gɔd bin tɛl di prɔfɛt Jɛrimaya se I gɛt fɔ mek wan nyu agrimɛnt we difrɛn frɔm di Lɔ agrimɛnt we i bin mek wit di Izrɛlayt dɛn. (Rid Jɛrimaya 31:31-34.) Gɔd mek dis nyu agrimɛnt wit pipul dɛn we i tek as Izrɛlayt dɛn. (Gal. 6:15, 16) Na Krays in day wan na in mek dis agrimɛnt ol wata ɛn na in blɔd mek di agrimɛnt bigin wok. (Lyuk 22:20) Na Jizɔs na di Midulman na di nyu agrimɛnt, ɛn di fetful anɔyntɛd Kristian dɛn we de insay dis agrimɛnt go gɛt fɔ go na ɛvin.—Ibru 8:6; 9:15.

15. Udat dɛn de insay di nyu agrimɛnt? Wetin dɛn go gɛt if dɛn fetful?

15 Di wan dɛn we gɛt di rayt fɔ it di bred ɛn drink di wayn na di Mɛmorial no se dɛn de insay di nyu agrimɛnt. (Rid Lyuk 12:32.) Jizɔs in anɔyntɛd disaypul dɛn we bin sɔfa wit am ɛn we nɔ bin kɔmɔt biɛn am go rul wit am na ɛvin. (Fil. 3:10) Bikɔs dɛn anɔyntɛd Kristian ya de insay di nyu agrimɛnt, dɛn go rul wit Krays as kiŋ sote go na ɛvin. (Rɛv. 22:5) So dɛn anɔyntɛd Kristian ya gɛt di rayt fɔ it di bred ɛn drink di wayn we dɛn go di Ivintɛm It fɔ Mɛmba di Masta.

16. Ɛksplen smɔl bɔt wetin Lɛta Fɔ Rom 8:15-17 min.

16 Na di wan dɛn nɔmɔ we di spirit de tɛl se dɛn na Gɔd in pikin dɛn, fɔ it di bred ɛn drink di wayn we dɛn go di Ivintɛm It fɔ Mɛmba di Masta. (Rid Lɛta Fɔ Rom 8:15-17.) Pɔl bin yuz di Aramik wɔd “Aba,” we min “Papa.” Dis wɔd de sho di kayn lɔv ɛn rɛspɛkt we pikin kin gɛt fɔ in papa. Di wan dɛn we Gɔd in spirit dɔn “pik . . . fɔ bi in pikin dɛn” dɔn bi Gɔd in spirit pikin dɛn. In spirit de tɛl dɛn spirit se dɛn na in pikin dɛn ɛn dis de mek dɛn no se dɛn na Jiova in pikin dɛn we i dɔn anɔynt. Dɛn nɔ de fil dis we  jɔs bikɔs dɛn dɔn taya fɔ de na dis wɔl. Dɛn shɔ se dɛn go rul wit Jizɔs na ɛvin if dɛn fetful te dɛn day. Tide, na jɔs smɔl pipul dɛn lɛf pan di 144,000 we na Krays in disaypul dɛn, we Jiova, we na “di oli wan dɔn anɔynt.” (1 Jɔn 2:20; Rɛv. 14:1) Na Jiova in spirit de mek dɛn se, “Aba, we min Papa!” Na big big blɛsin dɛn gɛt fɔ bi Gɔd in pikin dɛn!

VALYU DI OP WE YU GƐT

17. Us op anɔyntɛd Kristian dɛn gɛt? Aw dɛn de si di op we dɛn gɛt?

17 If yu na anɔyntɛd Kristian, wan impɔtant tin we yu fɔ de pre bɔt, na di op we yu gɛt fɔ go na ɛvin. We di Baybul tɔk se anɔyntɛd Kristian dɛn gɛt fɔ “mared” to di Ɔkɔ we de na ɛvin, we na Jizɔs Krays, yu fɔ de tink bɔt aw dat gɛt sɔntin fɔ du wit yu, ɛn yu fɔ de tink bɔt di tɛm we yu go bi Krays in “yawo.” (2 Kɔr. 11:2; Jɔn 3:27-29; Rɛv. 21:2, 9-14) We di Baybul kin tɔk bɔt aw Gɔd lɛk in pikin dɛn we i dɔn anɔynt, yu kin tɔk se, “Na mi so i de tɔk bɔt.” Ɛn we Jiova in Wɔd kin tɛl in anɔyntɛd pikin dɛn fɔ du sɔntin, di oli spirit kin mek yu du am ɛn i kin mek yu tɔk na yu at se, “Dis na fɔ mi.” So Gɔd in spirit ɛn yu yon spirit de mek yu no se yu gɛt di op fɔ go na ɛvin.

18. Us op di “ɔda ship dɛn” gɛt? Aw yu fil bɔt dis op?

18 If yu na wan pan di “bɔku bɔku pipul dɛn” ɔ di “ɔda ship dɛn,” Gɔd dɔn gi yu di op fɔ de na dis wɔl. (Rɛv. 7:9; Jɔn 10:16) Yu go mɔs want fɔ de sote go na Paradays, ɛn yu kin gladi we yu de tink bɔt di we aw di Baybul se layf go tan lɛk tumara bambay na dis wɔl. Yu de wet fɔ di tɛm we pis go de ɔlsay na di wɔl ɛn di tɛm we yu fambul dɛn ɛn ɔda pipul dɛn we de du wetin rayt go de nia yu. Yu de wet bak fɔ di tɛm we angri, po, sɔfa, sik, ɛn day nɔ go de igen fɔ ambɔg mɔtalman. (Sam 37:10, 11, 29; 67:6; 72:7, 16; Ayz. 33:24) Yu de pre mek di tɛm kam kwik kwik wan we di wan dɛn we dɔn day go gɛt layf bak ɛn gɛt di chans fɔ de na dis wɔl sote go. (Jɔn 5:28, 29) Yu kin tɛl Jiova plɛnti plɛnti tɛnki we i gi yu di op fɔ de na dis wɔl! Ɛn pan ɔl we yu nɔ kin it di bred ɛn drink di wayn, yu kin stil go di Mɛmorial fɔ sho se yu gladi fɔ di day we Jizɔs Krays kam day fɔ wi.

YU GO GO?

19, 20. (a) Wetin go mek yu ebul fɔ ɛnjɔy di op we Gɔd dɔn gi yu? (b) Wetin mek yu want fɔ go di Ivintɛm It fɔ Mɛmba di Masta?

19 Ilɛksɛf yu gɛt di op fɔ de na dis wɔl ɔ fɔ go na ɛvin, yu fɔ sho se yu biliv pan Jiova Gɔd, Jizɔs Krays, ɛn di day we Jizɔs bin dɔn kam day fɔ wi, bikɔs na dis nɔmɔ go mek yu ebul gɛt wetin yu op fɔ. We yu go di Mɛmorial, yu go gɛt di chans fɔ tink bɔt di op we yu gɛt ɛn di we aw Jizɔs in day impɔtant. So du ɔl wetin yu ebul fɔ du so dat yu go ebul fɔ go di Ivintɛm It fɔ Mɛmba di Masta. Dis ia, i go bi Frayde, Epril 3, 2015, we di san dɔn go dɔŋ ɛn dɛn go ol am na ɔl di Kiŋdɔm Ɔl dɛn ɛn ɔda ples dɛn na di wɔl.

20 We yu go di Mɛmorial, yu go valyu di day we Jizɔs day fɔ wi mɔ. Ɛn we yu lisin gud gud wan to di tɔk we dɛn go gi, dat go mek yu lɛk yu kɔmpin mɔtalman mɔ ɛn mɔ ɛn i go mek yu tɛl dɛn wetin yu dɔn lan bɔt di lɔv we Jiova gɛt fɔ wi ɛn di fayn fayn tin dɛn we i dɔn tɔk se i go du fɔ mɔtalman. (Mat. 22:34-40) So nɔ alaw ɛnitin fɔ stɔp yu fɔ go di Ivintɛm It fɔ Mɛmba di Masta.

^ par. 1 To di Izrɛlayt dɛn, di de de bigin we di san go dɔŋ ɛn i kin kɔntinyu te di nɛks de we di san go dɔŋ bak.

^ par. 9 Rid sɛkshɔn 16 insay wan buk we nem Buk we Go Ɛp Yu fɔ Stɔdi Gɔd in Wɔd.