Go dayrɛkt to di men tin

Go dayrɛkt to di say we di difrɛn difrɛn atikul dɛn de

Wetin Yu Go Du fɔ Lɛ Gladi At De na Yu Mared?

Wetin Yu Go Du fɔ Lɛ Gladi At De na Yu Mared?

“If Jiova nɔ bil di os, na fɔ natin di wokman dɛn de wok tranga wan.”—SAM 127:1a.

1-3. Wetin na sɔm prɔblɛm dɛn we kin mit mared pipul dɛn? (Luk di pikchɔ nia dis atikul in taytul.)

WAN brɔda we dɔn ɛnjɔy in mared fɔ 38 ia bin tɔk se: “If yu want fɔ lɛ Jiova blɛs yu, yu fɔ tray tranga wan ɛn sho se yu want lɛ gladi at de na yu mared.” So dis de sho se i pɔsibul fɔ lɛ maredman ɛn mareduman ɛnjɔy dɛn mared ɛn sɔpɔt dɛnsɛf we dɛn gɛt prɔblɛm.—Prɔv. 18:22.

2 Bɔt stil, maredman ɛn mareduman dɛn kin gɛt “prɔblɛm.” (1 Kɔr. 7:28) Wetin mek? Di yagba na layf kin ambɔg di mared. Ɛn bikɔs maredman ɛn mareduman dɛn nɔ pafɛkt, dɛn kin du tin dɛn we kin at dɛn kɔmpin, dɛn nɔ kin ɔndastand dɛnsɛf, ɛn dɛn nɔ kin tɔk fayn to dɛnsɛf. Dɛn prɔblɛm ya kin ivin ambɔg pipul dɛn we gɛt gud mared. (Jems 3:2, 5, 8) Bɔku mared pipul dɛn gɛt wok we de tek dɛn tɛm tumɔs ɛn dɛn kin gɛt pikin dɛn bak fɔ kia fɔ. Dɛn kin gɛt bɔku yagba we kin mek dɛn taya pasmak, so dɛn nɔ kin gɛt tɛm fɔ tɔk bɔt di tin dɛn we go mek dɛn mared go bifo. Di mɔni prɔblɛm, wɛlbɔdi prɔblɛm, ɛn ɔda prɔblɛm dɛn we dɛn kin gɛt kin mek dɛn nɔ gɛt lɔv ɛn rɛspɛkt fɔ dɛnsɛf igen. Di tin we kin ambɔg di mared mɔ na “di tin dɛn we di bɔdi lɛk.” Dis kin apin we wan pan  dɛn go du mami ɛn dadi biznɛs wit ɔda pɔsin, ɔ du dɛn shemful shemful tin dɛn, ɔ dɛn bigin gɛt bad at fɔ dɛnsɛf, ɔ mek dɛnsɛf plaba, ɔ dɛn bigin de jɛlɔs dɛnsɛf, ɔ bigin vɛks pasmak, ɛn bigin mek siriɔs agyumɛnt.—Gal. 5:19-21.

3 Di tin we mek mared nɔ izi tide na bikɔs wi de na di tɛm we di ‘wɔl want dɔn.’ Naw pipul dɛn jɔs bisin bɔt dɛnsɛf nɔmɔ ɛn na dɛn kayn bad abit ya de ambɔg mared. (2 Tim. 3:1-4) Wan wikɛd pɔsin de we want fɔ pwɛl pipul dɛn mared. Di apɔsul Pita bin wɔn wi bɔt am. I tɔk se: “Una ɛnimi we na di Dɛbul, de waka lɛk layɔn we de ala lawd wan, de fɛn we fɔ it sɔmbɔdi.”—1 Pit. 5:8; Rɛv. 12:12.

4. Aw mared pipul dɛn go gɛt gladi at na dɛn mared?

4 Wan maredman we de na Jepan bin tɔk se: “A bin gɛt bɔku mɔni prɔblɛm we bin de mɔna mi. Ɛn bikɔs a nɔ bin de tɔk to mi wɛf lɛk aw mared pipul dɛn fɔ tɔk to dɛnsɛf, mi wɛf bigin de wɔri bad bad wan. Dɔn i kam bigin de sik siriɔs wan. Sɔntɛnde, dɛn prɔblɛm ya bin de mek wi mek plaba.” Sɔm prɔblɛm dɛn kin de na mared-os we mared pipul dɛn nɔ go ebul fɔ balans, bɔt dis nɔ min se dɛn nɔ go ebul fɔ sɔlv dɛn. Jiova kin ɛp mared pipul dɛn fɔ gɛt gladi at na dɛn mared-os. (Rid Sam 127:1.) So naw lɛ wi kam tɔk bɔt fayv tin dɛn na di Baybul we go ɛp mared pipul dɛn fɔ ɛnjɔy dɛn mared sote go. Dɔn wi go tɔk bɔt aw lɔv go mek dɛn ɛnjɔy dɛn mared gud gud wan.

MEK JIOVA DE INSAY UNA MARED

5, 6. Wetin maredman ɛn mareduman fɔ du fɔ lɛ Jiova de insay dɛn mared?

5 Di men tin we go mek gladi at de na mared-os na we mared pipul dɛn fetful to Jiova, we bigin mared, ɛn put dɛnsɛf ɔnda am. (Rid Ɛkliziastis 4:12.) Wan we we mared pipul dɛn go put Jiova insay dɛn mared na we dɛn fala di fayn advays dɛn we i dɔn gi dɛn. Di Baybul bin tɛl di Izrɛlayt dɛn se: “Una yes go yɛri vɔys biɛn una de tɔk se, ‘Dis na di rod. Waka de,’ if una go na di rayt ɔ una go na di lɛft.” (Ayz. 30:20, 21) Tide, mared pipul dɛn go “yɛri” Jiova in wɔd we dɛn rid di Baybul togɛda. (Sam 1:1-3) Wan ɔda tin we go ɛp dɛn na we dɛn de du dɛn Famili Wɔship ɔltɛm ɛn mek ɔlman ɛnjɔy ɛn lan sɔntin we go ɛp dɛn. Wan tin bak we kin mek mared tinap tranga wan na we mared pipul dɛn de pre togɛda ɛvride.

We mared pipul dɛn wɔship Gɔd togɛda, dɛn go lɛk Gɔd mɔ, dɛn go lɛk dɛnsɛf mɔ, ɛn dɛn go gɛt gladi at na dɛn mared (Luk na paregraf 5 ɛn 6)

6 Wan brɔda na Jamani we nem Jiad, bin tɔk se: “Ɛnitɛm we wi nɔ kin ɔndastand wisɛf ɔ we sɔntin kin want fɔ ambɔg di gladi at we de na wi mared, di advays dɛn we de na Gɔd in Wɔd kin ɛp wi fɔ de peshɛnt ɛn fɔgiv wisɛf. Dɛn tu tin ya rili impɔtant if wi want wi mared fɔ go bifo.” We mared pipul dɛn stɔdi Gɔd in Wɔd togɛda, go fil savis togɛda, ɛn du ɔda tin dɛn togɛda, dɛn de mek Gɔd de insay dɛn mared ɛn dis go mek dɛn kam nia Gɔd mɔ, lɛk dɛnsɛf mɔ, ɛn gɛt gladi at na di mared.

MAREDMAN DƐN UNA SHO SE UNA LƐK UNA WƐF DƐN ƐN TRIT DƐN FAYN

7. Aw maredman dɛn fɔ trit dɛn wɛf dɛn?

7 Di we aw maredman dɛn de trit dɛn wɛf go mek gladi at de na di os. Di Baybul se: “Na Krays de oba di man; ɛn na di man de oba di uman.” (1 Kɔr. 11:3) Dis skripchɔ de tray fɔ tɛl maredman dɛn se dɛn fɔ trit dɛn wɛf di sem we aw Krays de trit man dɛn. Jizɔs nɔ bin de trit pipul dɛn bad, ɛn i nɔ bin de ala pan dɛn. I bin lɛk pipul dɛn, i bin de du gud tin to dɛn, i bin  no se dɛn nɔ pafɛkt, i nɔ bin de vɛks pan dɛn, ɛn i bin de put insɛf dɔŋ.—Mat. 11:28-30.

8. Aw maredman go mek in wɛf lɛk ɛn rɛspɛkt am?

8 Jɔs lɛk Krays, maredman dɛn nɔ nid fɔ de tɛl dɛn wɛf dɛn ɔltɛm se dɛn fɔ rɛspɛkt dɛn. Bifo dat, dɛn fɔ “kɔntinyu fɔ de trit [dɛn] wɛf dɛn wit sɛns [dɛn fɔ sho se dɛn bisin bɔt dɛn; ɛn ɔndastand dɛn, futnot].” Dɛn fɔ “rɛspɛkt dɛn ɛn ol dɛn fayn lɛk sɔntin we nɔ at fɔ brok.” (1 Pit. 3:7) Maredman dɛn fɔ trit dɛn wɛf dɛn fayn usay pipul dɛn de ɛn ivin usay pipul dɛn nɔ de. Ɛn dɛn fɔ sho se dɛn valyu dɛn wɛf. (Prɔv. 31:28) We maredman dɛn sho se dɛn lɛk dɛn wɛf, dɛn wɛf go lɛk ɛn rɛspɛkt dɛn ɛn Gɔd go blɛs dɛn mared.

MAREDUMAN DƐN UNA PUT UNASƐF ƆNDA UNA MAN DƐN

9. Aw mareduman go sho se i de put insɛf ɔnda in man?

9 We sɔmbɔdi lɛk Jiova gud gud wan, i go put insɛf ɔnda am. (1 Pit. 5:6) Wan fayn we we mareduman dɛn go sho se dɛn de rɛspɛkt Jiova, na we dɛn sɔpɔt dɛn man ɛn jɔyn an wit am fɔ mek di famili go bifo. Di Baybul se: “Una dɛn mareduman dɛn, una fɔ put unasɛf ɔnda una man dɛn, lɛk aw di Masta want.” (Kɔl. 3:18) Nɔto ɔltin we di man go disayd fɔ du, di uman go lɛk. Bɔt if wetin di man disayd fɔ du nɔ pwɛl Gɔd in lɔ, di uman fɔ stil put insɛf dɔŋ ɛn sɔpɔt in man.—1 Pit. 3:1.

10. Wetin mek i fayn fɔ lɛ mareduman dɛn put dɛnsɛf ɔnda dɛn man?

10 Mareduman dɛn gɛt impɔtant tin fɔ du na di famili. Uman ɛn man na “patna dɛn.” (Mal. 2:14) Uman dɛn kin tɔk sɔm impɔtant tin dɛn we go ɛp di famili, bɔt we dɛn de tɔk, dɛn fɔ sho se dɛn rɛspɛkt dɛn man. Maredman we gɛt sɛns fɔ tek tɛm lisin fayn we in wɛf de tɛl am sɔntin. (Prɔv. 31:10-31) We mareduman dɛn put dɛnsɛf ɔnda dɛn man dɛn, i de mek gladi at, pis, ɛn wanwɔd de na di famili. Ɛn dis de mek dɛn ɔl tu fil fayn bikɔs dɛn no se dɛn de du wetin Gɔd want.—Ɛfi. 5:22.

 UNA KƆNTINYU FƆ DE FƆGIV UNASƐF ƆLTƐM

11. Wetin mek i impɔtant fɔ lɛ mared pipul dɛn de fɔgiv dɛnsɛf?

11 Wan pan di impɔtant tin dɛn we go mek mared las na we di man ɛn in wɛf de fɔgiv dɛnsɛf. Di mared de go bifo mɔ if di man ɛn in wɛf ‘kɔntinyu fɔ bia dɛnsɛf ɛn fɔgiv dɛnsɛf ɔltɛm.’ (Kɔl. 3:13) Bɔt wan tin we go ambɔg di mared na we di man ɛn in wɛf de kip grɔj na dɛn at ɛn yuz am fɔ bigin ɔda plaba. Jɔs lɛk we krak kin mek os nɔ strɔng, na so mared pipul dɛn go ambɔg dɛn mared if dɛn de vɛks tumɔs ɔ kip grɔj na dɛn at, ɛn dis go mek i nɔ izi fɔ lɛ dɛn fɔgiv dɛnsɛf. Bɔt if dɛn want mek dɛn mared go bifo, dɛn fɔ de fɔgiv dɛnsɛf, jɔs lɛk aw Jiova de fɔgiv dɛn.—Mayk. 7:18, 19.

12. Aw lɔv kin kɔba “bɔku sin”?

12 Mared pipul dɛn we rili lɛk dɛnsɛf nɔ de kip tin na dɛn at fɔ dɛn kɔmpin. Infakt, “lɔv de kɔba bɔku sin.” (1 Kɔr. 13:4, 5, futnot; rid Pita In Fɔs Lɛta 4:8.) Dis min se we pɔsin gɛt lɔv, i nɔ fɔ kɔnt ɔmɔs tɛm i de fɔgiv sɔmbɔdi. We di apɔsul Pita bin aks Jizɔs ɔmɔs tɛm i fɔ fɔgiv pɔsin, Jizɔs bin tɛl am se:“Yu fɔ fɔgiv am 77 tɛm.” (Mat. 18:21, 22) Jizɔs bin de tray fɔ tɔk se Kristian dɛn nɔ fɔ taya fɔ fɔgiv ɔda pipul dɛn.—Prɔv. 10:12. *

13. Wetin go ɛp wi fɔ de fɔgiv?

13 Wan sista we nem Anɛt bin tɔk se: “If mared pipul dɛn nɔ de fɔgiv dɛnsɛf, dɛn go bigin kip grɔj na dɛn at ɛn dɛn nɔ go de biliv dɛnsɛf igen. Dis na bad tin we kin ambɔg di mared. We mared pipul dɛn de fɔgiv dɛnsɛf, dɛn mared de go bifo ɛn dɛn go lɛk dɛnsɛf mɔ ɛn mɔ.” Fɔ lɛ yu ebul fɔ de fɔgiv, na fɔ tray fɔ de tɛl di ɔda pɔsin tɛnki fɔ di tin dɛn we i de du ɛn sho se yu gladi fɔ dɛn tin dɛn de. Mek am abit fɔ de tɛl yu man ɔ wɛf tɛnki. (Kɔl. 3:15) We una de du dɛn tin ya, una go gɛt kolat ɛn wanwɔd, ɛn Jiova go blɛs una mared.—Rom 14:19.

TRIT ƆDA PIPUL DƐN DI WE AW YU WANT LƐ DƐN TRIT YU

14, 15. Wetin na di Goldɛn Rul? Aw i go ɛp mared pipul dɛn?

14 Yu go mɔs want lɛ dɛn trit yu fayn ɛn rɛspɛkt yu. Yu kin gladi we ɔda pipul dɛn de lisin to yu ɛn sho se dɛn bisin bɔt yu. Bɔt yu dɔn ɛva yɛri we sɔmbɔdi tɔk se, “A go tɔn am gi bak”? Sɔntɛnde wi kin ɔndastand wetin mek di pɔsin tɔk so, bɔt di Baybul se: “Nɔ tɔk se: ‘Wetin i du mi na in a go du am.’” (Prɔv. 24:29) Infakt, Jizɔs sho wi wetin fɔ du we wi gɛt prɔblɛm wit ɔda pɔsin. Bɔku pipul dɛn no bɔt dis advays we Jizɔs bin gi, dɛn kin kɔl am di Goldɛn Rul. Jizɔs se: “Jɔs lɛk aw una want mek dɛn trit una, na so una fɔ trit ɔda pipul dɛn.” (Lyuk 6:31) Jizɔs bin de tray fɔ tɔk se wi fɔ trit pipul dɛn di we aw wi go want lɛ dɛn trit wi ɛn wi nɔ fɔ du bad to pɔsin we du wi bad. Dis min se mared pipul dɛn fɔ trit dɛn kɔmpin di we aw dɛn go want lɛ i trit dɛn.

15 If di man bisin bɔt aw in wɛf de fil ɛn di uman insɛf bisin bɔt aw in man de fil, di mared go go bifo. Wan maredman na Sawt Afrika bin tɔk se: “Wi dɔn tray fɔ du wetin Jizɔs bin se we i se wi fɔ trit ɔda pipul dɛn di we aw wi want mek dɛn trit wi. Sɔntɛnde, wi kin vɛks, bɔt wi dɔn tray tranga wan fɔ trit wisɛf di we aw wi want  mek di ɔda pɔsin trit wi. Wi kin tray fɔ trit wisɛf wit rɛspɛkt.”

16. Wetin mared pipul dɛn nɔ fɔ du?

16 Mared pipul dɛn nɔ fɔ de tɛl ɔda pipul dɛn bɔt di mistek dɛn we dɛn man ɔ wɛf de mek, ilɛksɛf na pan jok. Ɛn dɛn nɔ fɔ de grɔmbul tumɔs pan dɛn man ɔ wɛf ɔ grɔmbul to ɔda pipul dɛn bɔt wetin dɛn man ɔ wɛf de du. Mɛmba se mared nɔto kɔmpitishɔn fɔ no udat strɔng pas in kɔmpin, ɔ udat ebul ala pas in kɔmpin, ɔ udat ebul tɛl in kɔmpin at wɔd. Na tru se, wi ɔl kin mek mistek, ɛn sɔntɛnde wi kin tɔk sɔntin we kin at di ɔda pɔsin. Bɔt no rizin nɔ de fɔ mek maredman ɔ mareduman tɛl in kɔmpin at at wɔd, ɔ tɛl am sɔntin we go mek in at pwɛl, ɛn no rizin nɔ de fɔ mek mared pipul dɛn bigin push dɛnsɛf ɔ fɛt.—Rid Prɔvabs 17:27; 31:26.

17. Aw maredman dɛn go fala di fayn advays we Jizɔs bin gi na Lyuk 6:31?

17 Na sɔm say dɛn, dɛn kin tek am se we man tek advantej pan in wɛf ɔ bit am, na da tɛm de in na rial man, bɔt di Baybul se: “Pɔsin we nɔ de vɛks kwik bɛtɛ pas pɔsin we gɛt trɛnk, ɛn pɔsin we de kɔntrol insɛf we i vɛks bɛtɛ pas pɔsin we de fɛt ɛn kapchɔ wan ol siti.” (Prɔv. 16:32) Maredman dɛn nid fɔ tray tranga wan fɔ kɔntrol dɛnsɛf lɛk Jizɔs Krays, we na di bɛst pɔsin we dɔn ɛva liv na di wɔl. Ɛni man we de bit in wɛf ɔ we de tɛl am bad wɔd, nɔto bɛtɛ man, ɛn i go pwɛl in padi biznɛs wit Jiova. Devid, we na bin pɔsin we gɛt trɛnk ɛn maynd, bin tɔk se: “Vɛks, bɔt nɔ sin. Tɔk na yu at we yu de na yu bed, ɛn nɔ se natin.”—Sam 4:4.

“UNA LƐK UNASƐF”

18. Wetin mek i impɔtant fɔ lɛ lɔv de insay mared?

18 Rid Fɔs Lɛta Fɔ Kɔrint 13:4-7. Lɔv impɔtant pas ɔl di ɔda kwaliti dɛn we maredman ɛn mareduman fɔ gɛt. Infakt, di Baybul tɔk se: “Una lɛk unasɛf ɛn gɛt sɔri-at, una go de du gud, una put unasɛf dɔŋ, una nɔ fɔ de vɛks kwik, ɛn una fɔ de peshɛnt wit unasɛf. Bɔt apat frɔm ɔl dɛn tin ya, una sho lɔv to unasɛf, bikɔs lɔv kin mek pipul dɛn de togɛda pafɛkt wan.” (Kɔl. 3:12, 14) I rili impɔtant fɔ lɛ mared pipul dɛn gɛt di kayn lɔv we Krays bin gɛt, bikɔs dis kayn lɔv tan lɛk mɔta we dɛn kin yuz fɔ jɔyn blɔk dɛn togɛda. Na dis kayn lɔv kin mek mared pipul dɛn gɛt gladi at, pan ɔl we dɛn go de du af af tin we dɛn kɔmpin nɔ lɛk. Ɛn dis kayn lɔv go ɛp dɛn ilɛksɛf dɛn gɛt mɔni prɔblɛm, ɔ dɛn nɔ gɛt bɛtɛ wɛlbɔdi, ɔ ivin we dɛn fambul dɛn go de mɔna dɛn.

19, 20. (a) Wetin go ɛp mared pipul dɛn fɔ gɛt gladi at na dɛn mared? (b) Wetin wi go tɔk bɔt na di nɛks atikul?

19 Fɔ lɛ gladi at go de na mared, di man ɛn in wɛf fɔ lɛk dɛnsɛf, dɛn nɔ fɔ kɔmɔt biɛn dɛnsɛf, ɛn dɛn fɔ tray tranga wan fɔ lɛ di mared go bifo. Dɛn nɔ fɔ skata we prɔblɛm kam. Dɛn fɔ tray tranga wan fɔ ɛnjɔy dɛn mared, nɔto fɔ jɔs bia insay de nɔmɔ. Mared pipul dɛn we lɛk Jiova ɛn we lɛk dɛnsɛf fɔ tray fɔ sɔlv dɛn prɔblɛm dɛn, bikɔs “lɔv go de sote go.”—1 Kɔr. 13:8; Mat. 19:5, 6; Ibru 13:4.

20 I nɔ rili izi fɔ gɛt gladi at na mared naw, bikɔs ‘tin tranga’ na di wɔl. (2 Tim. 3:1) Bɔt Jiova go ɛp mared pipul dɛn fɔ gɛt gladi at. Bɔt pan ɔl we Jiova de ɛp mared pipul dɛn fɔ gɛt gladi at, mared pipul dɛn stil gɛt ɔda prɔblɛm dɛn we dɛn fɔ sɔlv. Wan pan dɛn na di mami ɛn dadi biznɛs we dɔn bɔku na di wɔl. Di ɔda atikul go tɔk bɔt wetin maredman ɛn mareduman dɛn go du fɔ mek dis tin nɔ ambɔg dɛn mared.

^ par. 12 Na tru se mared pipul dɛn fɔ tray fɔ fɔgiv dɛnsɛf ɛn sɔlv dɛn prɔblɛm dɛn, bɔt if wan pan dɛn go du mami ɛn dadi biznɛs wit ɔda pɔsin, di Baybul se di wan we nɔ sin gɛt di rayt fɔ fɔgiv di wan we sin ɔ nɔ fɔ fɔgiv am. (Mat. 19:9) Rid di atikul we tɔk bɔt “The Bible’s Viewpoint: Adultery—To Forgive or Not to Forgive?” we de na di Ɔgɔst 8, 1995, Awake!