Go dayrɛkt to di men tin

Go dayrɛkt to di say we di difrɛn difrɛn atikul dɛn de

 DI TƆPIK NA DI FRƆNT PEJ | YU GO EBUL FƆ KAM NIA GƆD

Yu De Fil lɛk se Yu De Nia Gɔd?

Yu De Fil lɛk se Yu De Nia Gɔd?

Wan man we de na Gana we nem Kristofa, bin se: “We yu gɛt tayt padi biznɛs wit Gɔd, i de mek yu fil sef, i de mek yu fil lɛk se yu gɛt ɔltin, ɛn i de mek yu tinap tranga wan. I kin mek yu fil lɛk se Gɔd want mek gud tin apin to yu ɔltɛm.”

Wan 13 ia ol titi we nem Ana, we de Alaska na Amɛrika tɔk se: “Gɔd de si ɔl di prɔblɛm dɛn we de mit yu, i de sho se i lɛk yu ɛn i de pe atɛnshɔn to yu pas di we aw yu tink se i bisin bɔt yu.”

Wan uman we nem Gina, we dɔn pas 40 ia ɛn we de na Jameyka, bin tɔk se: “We yu no se yu gɛt tayt padi biznɛs wit Gɔd, i de mek yu rili fil fayn.”

Nɔto Kristofa, Ana, ɛn Gina nɔmɔ kin fil dis kayn we. Bɔku pipul dɛn na di wɔl biliv se Gɔd de si dɛn as in padi. We yu? Yu fil se yu de nia Gɔd? Ɔ yu go lɛk fɔ de nia Gɔd? Sɔntɛm yu go de wɔnda: ‘Mɔtalman go rili ebul fɔ gɛt tayt padi biznɛs wit Gɔd, we de pantap ɔlman? If i pɔsibul fɔ lɛ mɔtalman bi padi wit Gɔd, di kwɛstyɔn naw na, Aw wi go ebul gɛt tayt padi biznɛs wit Gɔd?’

YU GO EBUL FƆ KAM NIA GƆD

Di Baybul se wi go ebul fɔ gɛt tayt padi biznɛs wit Gɔd. Ɛn i tɔk bak se Gɔd bin de kɔl Ebraam in “padi.” (Ayzaya 41:8) Wan ɔda fayn tin de insay Jems 4:8 we se: “Una kam nia Gɔd ɛn i go kam nia una.” So wi dɔn si klia wan se wi ɔl go ebul fɔ gɛt tayt padi biznɛs wit Gɔd. Bɔt we nɔbɔdi nɔ de si Gɔd, aw wi go ebul fɔ “kam nia” am ɛn ɛnjɔy tayt padi biznɛs wit am?

Fɔ ansa dis kwɛstyɔn, lɛ wi tɔk bɔt wetin kin apin we mɔtalman dɛn kin mek padi biznɛs wit dɛnsɛf. I kin bigin we tu pipul dɛn kin tray fɔ no dɛn nem dɛn. Dɔn as dɛn de tɔk to dɛnsɛf ɔltɛm bɔt aw dɛn de fil ɛn tink, na so dɛn padi biznɛs de go bifo. Ɛn we dɛn de tray fɔ du sɔntin we go ɛp di ɔda pɔsin, na di mɔ dɛn padi biznɛs de tayt. Na di sem tin wisɛf fɔ du if wi want fɔ gɛt tayt padi biznɛs wit Gɔd. Lɛ wi si aw wi go ebul fɔ du dis.