Go dayrɛkt to di men tin

Go dayrɛkt to di say we di difrɛn difrɛn atikul dɛn de

 DI TƆPIK NA DI FRƆNT PEJ | YU GO EBUL FƆ KAM NIA GƆD

Di Bɛst We fɔ Liv Yu Layf

Di Bɛst We fɔ Liv Yu Layf

Wetin yu go du fɔ kam nia Gɔd? Wi dɔn tɔk bɔt tri tin dɛn we go ɛp yu fɔ bi Gɔd in tayt padi.

  1. Wi fɔ no Gɔd in nem we na Jiova ɛn yuz am.

  2. Wi fɔ de tɔk to Gɔd ɔltɛm bay we wi de pre to am ɛn stɔdi in Wɔd, di Baybul.

  3. Wi fɔ kɔntinyu fɔ du wetin de mek Jiova gladi.

Fɔ lɛ yu go ebul fɔ kam nia Gɔd yu fɔ yuz in nem, pre to am, stɔdi in Wɔd, ɛn du wetin de mek i gladi

We yu rid dɛn tin ya, yu go se yu de du wetin go ɛp yu fɔ kam nia Gɔd? Ɛniwan pan dɛn de we yu fɔ tray fɔ du mɔ? Na tru se i nɔ izi, bɔt tink bɔt di bɛnifit dɛn we yu go gɛt.

Wan uman na Amɛrika we nem Jɛnifa, bin tɔk se: “Yu go gɛt bɔku bɛnifit we yu tray fɔ bi Gɔd in tayt padi. Di padi biznɛs we yu go mek wit Gɔd go mek yu gɛt bɔku blɛsin: yu go abop pan Gɔd mɔ, yu go ɔndastand am mɔ, ɛn pantap dat, yu go lɛk am mɔ. Na di bɛst we dis fɔ liv yu layf.”

If yu want fɔ gɛt tayt padi biznɛs wit Gɔd, Jiova Witnɛs dɛn go gladi fɔ ɛp yu. Dɛn go kam stɔdi di Baybul wit yu, fɔ fri. Ɛn yu kin go na dɛn mitin dɛn we dɛn kin ol na dɛn Kiŋdɔm Ɔl, usay dɛn kin tɔk bɔt di Baybul. Yu go gladi fɔ si pipul dɛn we valyu dɛn padi biznɛs wit Gɔd. * We yu du dat, yu go fil lɛk aw wan pan di man dɛn we rayt di Sam buk bin fil, we i rayt se: “Bɔt as fɔ mi, i gud fɔ mek a kam nia Gɔd.”—Sam 73:28.

^ par. 9 If yu want fɔ stɔdi di Baybul ɔ go na di Kiŋdɔm Ɔl we de nia yu, tɛl di pɔsin we gi yu dis magazin ɔ go na wi Wɛbsayt we na www.jw.org. Luk ɔnda di say we dɛn rayt IF YU WANT FƆ TƆK TO WI we de dɔŋ di pej.