Di Baybul in Ansa to Sɔm Kwɛstyɔn Dɛn
Jizɔs bin rili gi layf bak to pipul dɛn we dɔn day?
Jizɔs bin gi layf bak to Lazarɔs, we bin dɔn day fɔ 4 dez
Di Baybul sho wi klia wan se Jizɔs gi layf bak to pipul dɛn we bin dɔn day. Dis nɔto jɔs ɛmti stori; dɛn bin apin na ples dɛn we rili de ɛn di Baybul sho wi di tɛm we dɛn bin apin. Fɔ ɛgzampul, insay di ia 31, bɔku bɔku pipul dɛn bin de travul wit Jizɔs frɔm Kepanum to Nen. We dɛn rich de, dɛn mitɔp ɔda bɔku bɔku pipul dɛn. Jizɔs bin gi layf bak to di pɔsin we dɛn pipul ya bin de go bɛr. Wi fɔ biliv se Jizɔs bin gi layf bak to dis pɔsin bikɔs dɛn rayt am na Gɔd in Wɔd, ɛn Jizɔs bin du am bifo bɔku bɔku pipul dɛn.—Rid Lyuk 7:11-15.
Jizɔs bin gi layf bak to in padi Lazarɔs, we bin dɔn day fɔ 4 dez. Yu fɔ biliv dis bikɔs Jizɔs bin du am usay bɔku bɔku pipul dɛn de.—Rid Jɔn 11:39-45.
Wetin mek Jizɔs bin de gi layf bak to pipul dɛn we bin dɔn day?
Jizɔs bin de gi layf bak to pipul dɛn we bin dɔn day bikɔs i bin de fil sɔri fɔ dɛn. I bin de du am bak fɔ sho se in Papa, we mek layf, dɔn gi am pawa fɔ pul day kɔmɔt.—Rid Jɔn 5:21, 28, 29.
Di gi we Jizɔs gi layf bak to pipul dɛn we bin dɔn day ɛp wi fɔ biliv tranga wan se Gɔd go du di tin dɛn we i dɔn prɔmis. I go gi layf bak to bɔku bɔku pipul dɛn we dɔn day, ivin di wan dɛn we nɔ bin de du wetin rayt, bikɔs dɛn nɔ bin no natin bɔt di tru Gɔd. Dɛn go gɛt di chans fɔ no Jiova Gɔd ɛn lɛk am.—Rid Di Apɔsul Dɛn Wok [Akt] 24:15.
You May Also Like
DI WACHTAWA
Op fɔ di Wan dɛn We Dɔn Day, Aw Yu Go No Se Na Tru?
Di Baybul gi tu gud rizin dɛn we mek wi fɔ biliv se di wan dɛn we dɔn day go gɛt layf bak.
