Go dayrɛkt to di men tin

Go dayrɛkt to di say we di difrɛn difrɛn atikul dɛn de

“Una Put Una Maynd pan di Tin dɛn we De Ɔp”

“Una Put Una Maynd pan di Tin dɛn we De Ɔp”

“Una put una maynd pan di tin dɛn we de ɔp, una nɔ put una maynd pan di tin dɛn we de na dis wɔl.”—KƆL. 3:2.

1, 2. (a) Wetin sho se di Kristian dɛn we bin de na Kɔlɔse bin de gɛt sɔm prɔblɛm dɛn? (b) Us advays Pɔl bin gi di brɔda dɛn na Kɔlɔse so dat dɛn padi biznɛs wit Jiova nɔ go pwɛl?

DI Kristian dɛn we bin de na di kɔngrigeshɔn na Kɔlɔse bin de gɛt sɔm prɔblɛm dɛn. Sɔm brɔda dɛn we bin de na di kɔngrigeshɔn bin de tɛl ɔda brɔda dɛn fɔ stil fala di lɔ we Gɔd bin gi Mozis. Ɔda brɔda dɛn bin de fala di pegan dɛn fɔ tɔk se i nɔ fayn fɔ ɛnjɔy yusɛf atɔl. Fɔ mek di brɔda dɛn na Kɔlɔse nɔ biliv dɛn lay lay tɔk ya, di apɔsul Pɔl bin rayt dɛn wan lɛta fɔ ɛnkɔrej dɛn ɛn wɔn dɛn. I bin rayt dɛn se: “Una tek tɛm mek nɔbɔdi nɔ yuz mɔtalman sɛns fɔ tɔn una to slev ɛn ful una wit dɛn lay lay tin dɛn we dɛn biliv pan, ɛn wit dɛn smɔl smɔl tin dɛn we di wɔl biliv pan we nɔ kɔmɔt frɔm Krays.”—Kɔl. 2:8.

2 If dɛn anɔyntɛd Kristian dɛn bin put dɛn maynd pan di “smɔl smɔl tin dɛn we di wɔl biliv pan,” dat bin fɔ dɔn mek dɛn tɔn dɛn bak pan Jiova ɛn sho se dɛn nɔ want fɔ bi in pikin dɛn. (Kɔl. 2:20-23) So fɔ mek dɛn nɔ pwɛl dɛn padi biznɛs wit Gɔd, Pɔl bin advays dɛn fɔ put dɛn  “maynd pan di tin dɛn we de ɔp” ɛn nɔ put dɛn “maynd pan di tin dɛn we de na dis wɔl.” (Kɔl. 3:2) Krays in brɔda dɛn fɔ put dɛn maynd pan di op we dɛn gɛt, dat na fɔ de na ɛvin sote go.—Kɔl. 1:4, 5.

3. (a) Us op anɔyntɛd Kristian dɛn gɛt? (b) Us kwɛstyɔn dɛn wi go tɔk bɔt insay dis atikul?

3 Tide sɛf, anɔyntɛd Kristian dɛn de put dɛn maynd pan Gɔd in Kiŋdɔm we de na ɛvin ɛn dɛn de tink bɔt di op we dɛn gɛt fɔ “rul wit Krays.” (Rom 8:14-17) Bɔt wetin wi go se bɔt di wan dɛn we gɛt di op fɔ de na dis wɔl? Aw dɛnsɛf go fala Pɔl in advays? Aw di “ɔda ship dɛn” go put dɛn maynd pan “di tin dɛn we de ɔp”? (Jɔn 10:16) Ɛn aw wi go falamakata Ebraam ɛn Mozis we bin put dɛn maynd pan di tin dɛn we de ɔp, pan ɔl we tin nɔ bin izi fɔ dɛn?

WETIN I MIN FƆ PUT WI MAYND PAN DI TIN DƐN WE DE ƆP?

4. Aw di ɔda ship dɛn go put dɛn maynd pan di tin dɛn we de ɔp?

4 Pan ɔl we di ɔda ship dɛn nɔ gɛt di op fɔ go de na ɛvin, dɛnsɛf fɔ put dɛn maynd pan di tin dɛn we de ɔp. Aw dɛn go ebul fɔ du dis? Dɛn go du dis bay we dɛn put Jiova Gɔd ɛn in Kiŋdɔm fɔs na dɛn layf. (Lyuk 10:25-27) Na dat Krays bin du, so wisɛf fɔ du di sem tin. (1 Pit. 2:21) Jɔs lɛk wi Kristian brɔda dɛn we bin de trade trade, wisɛf kin mitɔp lay lay tɔk dɛn, di want want we de na Setan in wɔl, ɛn di lay lay sɛns we de na dis wɔl. (Rid Sɛkɔn Lɛta Fɔ Kɔrint 10:5.) Bɔt bikɔs wi de falamakata Jizɔs, wi fɔ tray tranga wan fɔ lɛ dɛn tin ya nɔ ambɔg wi padi biznɛs wit Jiova.

5. Aw wi go ebul fɔ chɛk di we aw wi de tink bɔt mɔni ɛn ɔda tin dɛn?

5 Aks yusɛf dis kwɛstyɔn, ‘A de falamakata pipul dɛn we want want?’ Di tin dɛn we wi de du ɛn di tin dɛn we wi tink bɔt de sho wetin wi lɛk. Jizɔs bin se: “Usay yu jɛntri de, na de yu at go de.” (Mat. 6:21) Fɔ lɛ wi go no wetin de na wi at, i go fayn lɛ wi de chɛk wisɛf ɔltɛm. Aks yusɛf dɛn kwɛstyɔn ya: ‘Ɔmɔs tɛm a kin yuz fɔ tink bɔt mɔni? A de wɔri ɔltɛm fɔ gɛt gud wok, ɔ fɔ liv layf we nɔ gɛt wan yagba? Ɔ a de tray fɔ put ɔl mi atɛnshɔn pan Gɔd biznɛs?’ (Mat. 6:22) Jizɔs bin tɔk se di wan dɛn we put ɔl dɛn atɛnshɔn fɔ fɛn jɛntri na dis wɔl go pwɛl dɛn padi biznɛs wit Jiova.—Mat. 6:19, 20, 24.

6. Wetin wi fɔ du fɔ lɛ wi nɔ du di tin dɛn we wi at de tɛl wi fɔ du?

6 Wi nɔ pafɛkt, so i kin izi fɔ lɛ wi du tin dɛn we nɔ rayt. (Rid Lɛta Fɔ Rom 7:21-25.) If Gɔd in oli spirit nɔ de pan wi, wi go “du di tin dɛn we pipul dɛn kin du na dak.” Sɔm pan dɛn tin ya na dɛn “wayl pati dɛn, fɔ drink rɔm te wi chak, . . . fɔ du mami ɛn dadi biznɛs di we aw Gɔd nɔ want” ɛn “fɔ du dɛn shemful tin dɛn.” (Rom 13:12, 13) Fɔ lɛ wi nɔ go put an “pan di tin dɛn we de na dis wɔl,” dat na di tin dɛn we wi at de tɛl wi fɔ du, wi fɔ put wi maynd pan di tin dɛn we de ɔp. Dis na tin we nɔ izi fɔ du. Na dis mek di apɔsul Pɔl bin se i “kin pɔnish in bɔdi ɛn trit am lɛk slev.” (1 Kɔr. 9:27) So wi rili nid fɔ strikt pan wisɛf fɔ lɛ wi go ebul fɔ dɔn di res we go mek wi gɛt di layf we go de sote go! Lɛ wi kam tɔk bɔt wetin tu fetful pipul  dɛn bin du trade trade fɔ lɛ dɛn go “ebul fɔ du wetin Gɔd want fayn fayn wan.”—Ibru 11:6.

EBRAAM “PUT FET PAN JIOVA”

7, 8. (a) Us prɔblɛm dɛn Ebraam ɛn Sera bin gɛt? (b) Wetin Ebraam bin de tink bɔt?

7 We Jiova bin tɛl Ebraam fɔ tek in famili ɛn go na Kenan, Ebraam bin gri fɔ du am. Bikɔs Ebraam bin gɛt fet ɛn i bin du wetin Jiova tɛl am, Jiova bin prɔmis am se: “A go mek yu bi wan big neshɔn, a go blɛs yu.” (Jɛn. 12:2) Bɔt afta lɔng tɛm, Ebraam ɛn in wɛf nɔ bin stil gɛt pikin. Fɔ se Jiova bin dɔn fɔgɛt di prɔmis we i bin mek to Ebraam? Tink bɔt dis: Kenan nɔto bin izi ples fɔ liv. Ebraam ɛn in famili bin dɔn lɛf dɛn os ɛn fambul dɛn na Ɔ, pan ɔl we Ɔ na bin big siti na Mɛsopotemia. Ɛn dɛn bin travul 1,000 mayl fɔ kam na Kenan. Bɔt we dɛn rich na Kenan, na insay tɛnt dɛn bin de liv, ɛn dɛn nɔ bin de gɛt bɛtɛ tin fɔ it. Dɔn, sɔntɛnde tifman dɛn bin de kam ambɔg dɛn. (Jɛn. 12:5, 10; 13:18; 14:10-16) Bɔt pan ɔl dat, dɛn nɔ bin want fɔ go bak na Ɔ!—Rid Di Ibru Pipul Dɛn 11:8-12, 15.

8 Ebraam nɔ bin put in atɛnshɔn “pan di tin dɛn we de na dis wɔl,” bifo dat, i bin “put fet pan Jiova.” (Jɛn. 15:6) Ɛn i bin put in maynd pan di tin dɛn we de ɔp, we min se i bin de tink bɔt di prɔmis dɛn we Gɔd bin dɔn mek. Bikɔs Ebraam bin gɛt dis kayn fet, Papa Gɔd we de pantap ɔlman bin tɛl am se: “Duya, es yu ed ɔp ɛn luk di skay ɛn kɔnt di sta dɛn if yu ebul. Dɔn i tɛl am se: ‘Na so yu pikin dɛn go bɔku.’” (Jɛn. 15:5) Dis go dɔn mek Ebraam no se Jiova nɔ fɔgɛt bɔt di prɔmis we i bin dɔn mek to am. Ɛnitɛm we Ebraam wach ɔp di skay, i go dɔn de mɛmba se Jiova dɔn prɔmis am se i go gi am bɔku pikin dɛn. Ɛn we Gɔd in tɛm rich, Ebraam gɛt pikin, jɔs lɛk aw Gɔd bin dɔn tɔk.—Jɛn. 21:1, 2.

9. Aw Ebraam in ɛgzampul go ɛnkɔrej wi fɔ gɛt zil fɔ du Gɔd in wok?

9 Jɔs lɛk Ebraam, wisɛf tide de wet fɔ lɛ Gɔd in prɔmis dɛn kam tru. (2 Pit. 3:13) Bɔt if wi nɔ put wi maynd pan di tin dɛn we de ɔp, i go tan lɛk se Gɔd de westɛm fɔ du di tin dɛn we i dɔn prɔmis, ɛn wi nɔ go gɛt zil igen fɔ du Gɔd in wok. Fɔ ɛgzampul, yu bin dɔn lɛf ɛnitin biɛn fɔ lɛ yu go ebul fɔ payɔnia ɔ du mɔ fɔ sav Jiova? If yu ansa na yɛs, na fayn tin yu bin du. Bɔt we naw? Mɛmba se Ebraam bin kɔntinyu fɔ de tink bɔt “di siti we gɛt gud fawndeshɔn.” (Ibru 11:10) I bin “put fet pan Jiova, ɛn dat bin mek I si am as pɔsin we de waka stret wit am.”—Rom 4:3.

MOZIS BIN SI DI WAN WE MƆTALMAN NƆ DE SI

10. Aw Mozis in layf bin tan lɛk we i bin yɔŋ?

10 Wan ɔda pɔsin we bin put in maynd pan di tin dɛn we de ɔp na Mozis. We i bin yɔŋ, dɛn bin mek i lan “ɔl di buk we bin de na Ijipt.” Insay Mozis in tɛm, Ijipt na bin di kɔntri we gɛt pawa pas ɔl di ɔda kɔntri dɛn na di wɔl, ɛn na Fɛro in famili bin mɛn Mozis. Bikɔs Mozis bin lan bɔku bɔku buk, i kam fɔ bi man we bin ‘sabi tɔk ɛn sabi wok.’ (Akt 7:22) Tink bɔt di bɔku bɔku chans we Mozis bin gɛt fɔ bi sɔmbɔdi! Bɔt pan ɔl dis, Mozis in  maynd bin de pan di tin dɛn we de ɔp, dat na fɔ du wetin Gɔd want.

11, 12. Wetin Mozis bin rili valyu? Aw wi no se i bin valyu am?

11 We Mozis bin smɔl, in rial mama we nem Jokabɛd, go mɔs dɔn tich am bɔt Jiova. Mozis bin rili valyu wetin i lan bɔt Jiova pas ɛni jɛntri. So i bin rɛdi fɔ lɛf di pawa ɛn jɛntri we i bin fɔ gɛt na Fɛro in os. (Rid Di Ibru Pipul Dɛn 11:24-27.) Di tin dɛn we Mozis bin lan bɔt Jiova ɛn di fet we i bin gɛt pan Jiova bin mek i put in maynd pan di tin dɛn we de ɔp.

12 Mozis bin lan bɔku bɔku buk na Ijipt, bɔt yu tink se i bin yuz am fɔ go bifo na Ijipt, fɔ mek nem fɔ insɛf, ɔ fɔ gɛda bɔku prɔpati? Nɔ, i nɔ bin du dat. Na dat mek di Baybul se “i nɔ gri mek dɛn se na Fɛro in gyal pikin bɔn am,” bifo dat, i “disayd fɔ lɛ dɛn trit am bad wit Gɔd in pipul dɛn pas fɔ lɛ i ɛnjɔy insɛf fɔ shɔt tɛm pan sin.” Dis dɔn sho wi klia wan se Mozis bin yuz di tin dɛn we i lan bɔt Jiova fɔ mek wetin Jiova want go bifo.

13, 14. (a) Wetin bin ɛp Mozis fɔ rɛdi fɔ di wok we Jiova bin gɛt fɔ gi am? (b) Jɔs lɛk Mozis, wetin wisɛf nid fɔ du?

13 Mozis bin bisin bɔt Jiova ɛn In pipul dɛn. We Mozis ol 40 ia, i bin fil se i dɔn rɛdi fɔ pul Gɔd in pipul dɛn pan di slev wok we dɛn bin de du na Ijipt. (Akt 7:23-25) Bɔt Jiova bin no se Mozis nɔ rɛdi yet bikɔs Mozis bin nid fɔ put insɛf dɔŋ, fɔ peshɛnt, fɔ kɔntrol insɛf mɔ, ɛn nɔ fɔ vɛks kwik. (Prɔv. 15:33) Jiova bin nid fɔ tren Mozis so dat i go rɛdi fɔ bia di prɔblɛm dɛn we go kam in we. Mozis bin gɛt dis trenin we i bi shɛpad fɔ 40 ia.

14 Yu tink se dis trenin bin ɛp Mozis? Yɛs, i bin ɛp am! Di Baybul se Mozis bin “ɔmbul pas ɔlman na di wɔl.” (Nɔm. 12:3) Mozis bin dɔn lan fɔ put insɛf dɔŋ, so dis bin ɛp am fɔ peshɛnt wit ɔlkayn pipul dɛn ɛn dɛn prɔblɛm dɛn. (Ɛks. 18:26) Semweso, wisɛf nid fɔ gɛt gud kwaliti dɛn we go ɛp wi fɔ sev we “da big trɔbul” go kam ɛn go insay di nyu wɔl we Gɔd go mek usay ɔlman go de du wetin rayt. (Rɛv. 7:14) So wi kin aks wisɛf se, ‘A ebul fɔ bia wit pipul dɛn, ivin di wan dɛn we gɛt wamat ɔ we rili at fɔ dil wit?’ I go fayn fɔ lɛ wi fala di apɔsul Pita in advays we i se: “Una fɔ rɛspɛkt ɔlman, lɛk ɔl di brɔda dɛn na di wɔl.”—1 Pit. 2:17.

LƐ WI KƆNTINYU FƆ PUT WI MAYND PAN DI TIN DƐN WE DE ƆP

15, 16. (a) Wetin mek i impɔtant fɔ tink bɔt di tin dɛn we de ɔp? (b) Wetin mek i impɔtant fɔ lɛ Kristian dɛn de biev fayn?

15 Di tɛm we wi de naw na tɛm we ‘tin tranga.’ (2 Tim. 3:1) So i rili impɔtant fɔ lɛ wi put wi maynd pan di tin dɛn we de ɔp so dat wi go kɔntinyu fɔ de nia Gɔd. (1 Tɛs. 5:6-9) Lɛ wi kam tɔk bɔt tri we dɛn we wi go du dis.

16 Di we aw wi de biev: Pita bin tɛl wi wetin mek i impɔtant fɔ lɛ wi de biev fayn. I bin se: “Una biev fayn we una de wit ɔda pipul dɛn . . . so dat dɛn go si di gud tin dɛn we una de du ɛn dis go mek dɛn prez Gɔd di de we i go kam chɛk.” (1 Pit. 2:12) Ilɛksɛf wi de na os, na wokples, na skul, na fil savis, ɔ wi de ɛnjɔy wisɛf, wi fɔ tray tranga wan fɔ briŋ prez to Jiova bay we wi de biev fayn. Na tru se, wi ɔl kin mek mistek  bikɔs wi nɔ pafɛkt. (Rom 3:23) Bɔt if wi kɔntinyu fɔ ‘fɛt fɔ di tin dɛn we wi biliv,’ wi nɔ go du di tin dɛn we wi at de tɛl wi fɔ du.—1 Tim. 6:12.

17. Aw wi go falamakata di we aw Krays Jizɔs bin de tink? (Luk di pikchɔ nia dis atikul in taytul.)

17 Di we aw wi de tink: Fɔ lɛ wi go ebul fɔ biev fayn, wi fɔ tink di rayt we. Na dis mek di apɔsul Pɔl bin se: “Tink lɛk aw Krays Jizɔs bin de tink.” (Fil. 2:5) Uskayn pɔsin Jizɔs bin bi? I bin ɔmbul, ɛn dis bin de mek i prich to pipul dɛn. Di tin we Jizɔs bin de tink bɔt ɔltɛm na fɔ prich di gud nyus bɔt Gɔd in Kiŋdɔm. (Mak 1:38; 13:10) Na Gɔd in Wɔd Jizɔs bin de pul ɔl wetin i de tich. (Jɔn 7:16; 8:28) I bin de stɔdi di Baybul gud gud wan so dat i go ebul fɔ kot am, fɛt fɔ am, ɛn ɛksplen am. So if wisɛf ɔmbul, prich wit zil, ɛn stɔdi di Baybul gud gud wan, wi go bigin tink lɛk Krays.

Di tin we Jizɔs bin de tink bɔt ɔltɛm na fɔ prich di gud nyus bɔt Gɔd in Kiŋdɔm (Luk na paregraf 17)

18. Aw wi go ebul fɔ sɔpɔt Jiova in wok?

18 Sɔpɔt Jiova in wok: Jiova want lɛ ‘ɔlman we de na ɛvin, ɛn na dis wɔl,’ put dɛnsɛf ɔnda Jizɔs. (Fil. 2:9-11) Pan ɔl we Jizɔs gɛt ay pozishɔn, i go stil put insɛf ɔnda in Papa, so wisɛf fɔ du di sem tin. (1 Kɔr. 15:28) Aw wi go du am? Na bay we wi du ɔl wetin wi ebul fɔ du fɔ sɔpɔt Jiova in wok, dat na fɔ mek “disaypul dɛn na ɔl di neshɔn dɛn.” (Mat. 28:19) Dɔn, wi want fɔ “du gud to ɔlman” we min se wi fɔ ɛp ɔlman, mɔ wi brɔda dɛn.—Gal. 6:10.

19. Wetin wi fɔ rɛdi fɔ du?

19 Wi rili gladi we Jiova de mɛmba wi fɔ kɔntinyu fɔ put wi maynd pan di tin dɛn we de ɔp! Na dat mek wi nid fɔ “bia we wi de rɔn di res we de bifo wi.” (Ibru 12:1) So lɛ wi wok wit ɔl wi “at lɛk se na fɔ Jiova” wi de wok fɔ ɛn Jiova go blɛs wi.—Kɔl. 3:23, 24.