Go dayrɛkt to di men tin

Go dayrɛkt to di say we di difrɛn difrɛn atikul dɛn de

 DI TƆPIK NA DI FRƆNT PEJ | WETIN GƆD IN KIŊDƆM GO DU FƆ YU?

Gɔd in Kiŋdɔm—Wetin I min to Jizɔs

Gɔd in Kiŋdɔm—Wetin I min to Jizɔs

Di tɛm we Jizɔs bin de prich na di wɔl, i bin de prich bɔt bɔku tɔpik dɛn. Fɔ ɛgzampul, i bin de tich in disaypul dɛn aw fɔ pre, aw fɔ mek Gɔd gladi fɔ dɛn, ɛn aw fɔ gɛt tru tru gladi at. (Matyu 6:5-13; Mak 12:17; Lyuk 11:28) Bɔt di tɔpik we Jizɔs bin lɛk fɔ tɔk bɔt pas ɔl na Gɔd in Kiŋdɔm.—Lyuk 6:45.

As wi bin dɔn tɔk insay di las atikul, di men tin we Jizɔs in atɛnshɔn bin de pan na fɔ “prich di gud nyus bɔt Gɔd in Kiŋdɔm.” (Lyuk 8:1) I bin de waka go fa fɔ mek i go ebul fɔ tich pipul dɛn bɔt Gɔd in Kiŋdɔm. Matyu, Mak, Lyuk, ɛn Jɔn rayt bɔt Jizɔs in prichin wok ɛn dɛn rayt bɔt di Kiŋdɔm pas 100 say dɛn. Bɔku pan di say dɛn we dɛn rayt bɔt di Kiŋdɔm, na say dɛn we Jizɔs tɔk bɔt di Kiŋdɔm. Bɔt stil, i go mɔs bi se na jɔs smɔl pan di tin dɛn we Jizɔs tɔk bɔt Gɔd in Kiŋdɔm dɛn bin rayt!—Jɔn 21:25.

Wetin mek di Kiŋdɔm bin rili impɔtant to Jizɔs we i bin de na di wɔl? Wan rizin na bikɔs Jizɔs no se na in Gɔd dɔn pik fɔ bi di Kiŋ na di Kiŋdɔm. (Ayzaya 9:6; Lyuk 22:28-30) Bɔt Jizɔs nɔ bin jɔs bisin bɔt di pawa ɔ glori we i go gɛt. (Matyu 11:29; Mak 10:17, 18) Ɛn nɔto di bɛnifit dɛn nɔmɔ we i go gɛt mek i bin de tɔk bɔt di Kiŋdɔm. Di men rizin we mek Jizɔs bin de tɔk bɔt di Kiŋdɔm * na bikɔs di Kiŋdɔm go du bɔku tin dɛn fɔ di wan dɛn we i lɛk, dat na in Papa we de na ɛvin ɛn in fetful disaypul dɛn.

WETIN DI KIŊDƆM GO DU FƆ JIZƆS IN PAPA?

Jizɔs rili lɛk in Papa we de na ɛvin. (Prɔvabs 8:30; Jɔn 14:31) I bin de kɔle in Papa in fayn fayn kwaliti dɛn, lɛk lɔv, sɔri-at, ɛn we i lɛk fɔ du tin stret. (Dyutɔrɔnɔmi 32:4; Ayzaya 49:15; Jɔn In Fɔs Lɛta 4:8) Na ɔl dɛn tin ya mek Jizɔs nɔ lɛk we dɛn de lay pan in Papa se i want fɔ mek wi sɔfa ɛn i nɔ bisin bɔt wi we wi de sɔfa. Dis na wan rizin we mek Jizɔs bin gɛt zil fɔ prich “di gud nyus bɔt Gɔd in Kiŋdɔm.” I bin no se tumara bambay di Kiŋdɔm go pul bad nem pan in Papa. (Matyu 4:23; 6:9, 10) Aw di Kiŋdɔm go du dis?

Jiova go yuz di Kiŋdɔm fɔ mek chenj dɛn we go bɛnifit wi. “I go wep ɔl di kray wata” we de na fetful pipul dɛn yay. Jiova go pul ɔl di tin dɛn we de mek mɔtalman kray. I go mek shɔ se “day nɔ go de igen, munin nɔ go de igen, kray nɔ go de igen, ɛn pen nɔ go de igen.” (Rɛvɛleshɔn 21:3, 4) Gɔd go yuz in Kiŋdɔm fɔ pul ɔl di tin dɛn we de mek mɔtalman sɔfa. *

 No wɔnda we mek Jizɔs bin gɛt zil fɔ tɛl pipul dɛn bɔt di Kiŋdɔm! I bin no se na dat go sho se in Papa pawaful ɛn i gɛt sɔri-at. (Jems 5:11) Jizɔs bin no bak se we i du dis, i go mek di Kiŋdɔm bɛnifit di wan dɛn we i lɛk, dat na di wan dɛn we de du wetin rayt na Gɔd in yay.

WETIN GƆD IN KIŊDƆM GO DU FƆ FETFUL PIPUL DƐN

Jizɔs bin dɔn liv wit in Papa na ɛvin fɔ lɔng tɛm bifo i kam na di wɔl. In Papa bin mek i ɛp am fɔ mek ɔltin. Tin dɛn lɛk di wɔl, di bɔku bɔku galaksi dɛn, di sta dɛn, ɛn ɔl di animal dɛn. (Lɛta Fɔ Kɔlɔse 1:15, 16) Pan ɔl di tin dɛn we dɛn mek na mɔtalman Jizɔs bin “lɛk mɔ.”—Prɔvabs 8:31.

Di prichin wok we Jizɔs bin de du sho se i lɛk mɔtalman. Frɔm we i bigin prich, i bin de tɔk am klia wan se i kam na di wɔl fɔ prich di “gud nyus” to pipul dɛn we rili nid am. (Lyuk 4:18) Jizɔs nɔ bin jɔs de tɔk se i want fɔ ɛp pipul dɛn. Bɔku bɔku tɛm, i bin de du tin dɛn we sho se i lɛk pipul dɛn. Fɔ ɛgzampul, we bɔku pipul dɛn gɛda fɔ lisin we Jizɔs de prich, “i fil sɔri fɔ dɛn, ɛn i mɛn di wan dɛn we sik.” (Matyu 14:14) We wan man we bin gɛt wan bad bad sik sho se i biliv se Jizɔs go mek i wɛl, Jizɔs bin mɛn di man fɔ sho se i lɛk mɔtalman. I bin tɛl di man se: “A want fɔ mek yu klin.” (Lyuk 5:12, 13) We Jizɔs si Meri de kray bikɔs in brɔda, Lazarɔs dɔn day, Jizɔs “fil am bad insay in at,” i “fil sɔri fɔ dɛn,” ɛn i “kray.” (Jɔn 11:32-36) Na de i du wan wɔndaful tin. I mek Lazarɔs gɛt layf bak pan ɔl we i bin dɔn day fɔ 4 dez!—Jɔn 11:38-44.

Jizɔs bin no se di ɛp we i bin ɛp pipul dɛn na fɔ shɔt tɛm nɔmɔ. Ɔl di wan dɛn we i bin mɛn go sik bak, ɛn ɔl di wan dɛn we i bin gi layf go day bak. Bɔt Jizɔs bin no bak se Gɔd in Kiŋdɔm go pul ɔl dɛn prɔblɛm ya. Na dat mek Jizɔs nɔ bin jɔs de du mirekul dɛn nɔmɔ, i bin de prich “di gud nyus bɔt Gɔd in Kiŋdɔm” wit zil. (Matyu 9:35) In mirekul dɛn bin jɔs de sho smɔl pan di tin dɛn we Gɔd in Kiŋdɔm go du na di wan ol wɔl. Luk wetin di Baybul prɔmis bɔt da tɛm de.

  •  Sik nɔ go de igen.

    “Da tɛm de, di wan dɛn we nɔ de si, go si, ɛn di wan dɛn we nɔ de yɛri, go yɛri. Da tɛm de, di wan dɛn we nɔ ebul waka, go rɔn lɛk dia, ɛn di wan dɛn we nɔ ebul tɔk, go tɔk.” I nɔ tap de, “nɔbɔdi nɔ go se: ‘A nɔ wɛl.’”—Ayzaya 33:24; 35:5, 6.

  • Day nɔ go de igen.

    “Na di wan dɛn we de du wetin rayt go gɛt di wɔl, ɛn dɛn go de de sote go.”Sam 37:29.

    “I go swɛla day sote go, ɛn Jiova we na di Rula we gɛt pawa pas ɔlman go wep di kray wata we de na ɔlman in yay.”—Ayzaya 25:8.

  • Di wan dɛn we dɔn day go gɛt layf bak.

    “Ɔl di wan dɛn we de na di grev go yɛri in vɔys, ɛn grap.”—Jɔn 5:28, 29.

    “Gɔd go gi layf bak to di wan dɛn we dɔn day.”—Di Apɔsul Dɛn Wok [Akt] 24:15.

  • Os ɛn wok go de fɔ ɔlman.

    “Dɛn go bil os ɛn liv insay de, ɛn dɛn go mek gadin ɛn it wetin dɛn plant. Dɛn nɔ go bil fɔ lɛ ɔda pɔsin kam de de, ɛn dɛn nɔ go plant fɔ lɛ ɔda pɔsin it am. . . . Di pipul dɛn we a dɔn pik go rili ɛnjɔy di wok we dɛn de du.”—Ayzaya 65:21, 22.

  •  Wɔ nɔ go de igen.

    “I de mek wɔ dɔn ɔlsay na di wɔl.”—Sam 46:9.

    “Wan neshɔn nɔ go fɛt ɔda neshɔn, ɛn dɛn nɔ go lan fɔ fɛt wɔ igen.”—Ayzaya 2:4.

  • It go de fɔ ɔlman.

    “Bɔku bɔku it go gro na di wɔl; Papa Gɔd we na wi Gɔd, go blɛs wi.”—Sam 67:6.

    “Bɔku bɔku it go de na di wɔl, ɛn i go pasmak ɔp dɛn mawnten dɛn.”—Sam 72:16.

  • Po nɔ go de igen.

    “Gɔd nɔ go fɔgɛt di po wan dɛn sote go.”—Sam 9:18.

    “I go ɛp di po wan dɛn we de kray fɔ lɛ pɔsin ɛp dɛn, di wan dɛn we dɛn nɔ tek mek natin, ɛn di wan dɛn we nɔ gɛt pɔsin fɔ ɛp dɛn. I go sɔri fɔ di wan dɛn we dɛn nɔ tek mek natin ɛn di po wan dɛn, ɛn i go sev di po wan dɛn layf.”—Sam 72:12, 13.

We yu tink bɔt dɛn tin ya we Gɔd in Kiŋdɔm go du, yu de si wetin mek di Kiŋdɔm impɔtant to Jizɔs. Na dat mek we Jizɔs bin de na di wɔl, i bin gɛt zil fɔ tɔk bɔt di Kiŋdɔm to ɛnibɔdi we want fɔ lisin, bikɔs i bin no se na di Kiŋdɔm nɔmɔ go pul ɔl di prɔblɛm dɛn we de mit mɔtalman.

Yu lɛk di tin dɛn we di Baybul dɔn prɔmis bɔt di Kiŋdɔm? If yu lɛk di prɔmis dɛn, aw yu go lan mɔ bɔt di Kiŋdɔm? Ɛn wetin yu go du fɔ bɛnifit frɔm di blɛsin dɛn we di Kiŋdɔm go kam wit? Di las atikul ɔnda dis tɔpik go ansa dɛn kwɛstyɔn dɛn ya.

^ par. 5 Dis atikul de tɔk bɔt aw Jizɔs de fil rayt naw bikɔs i de na ɛvin. Ɛn pan ɔl we i dɔn go na ɛvin in atɛnshɔn stil de pan Gɔd in Kiŋdɔm.—Lyuk 24:51.

^ par. 8 If yu want fɔ no wetin mek Gɔd de alaw wi fɔ sɔfa, na fɔ rid chapta 11 na wan buk we dɛn kɔl Wetin Rili di Baybul De Tich? Na Jiova Witnɛs dɛn mek am.