Go dayrɛkt to di men tin

Go dayrɛkt to di say we di difrɛn difrɛn atikul dɛn de

Kɔntinyu fɔ Sav Gɔd Pan Ɔl We Yu Gɛt fɔ “Sɔfa Bɔku Tin”

Kɔntinyu fɔ Sav Gɔd Pan Ɔl We Yu Gɛt fɔ “Sɔfa Bɔku Tin”

“Wi go sɔfa bɔku tin bifo wi go insay Gɔd in Kiŋdɔm.”—AKT 14:22.

1. Wetin mek Gɔd in savant dɛn nɔ fɔ sɔprayz we dɛn de sɔfa?

YU SƆPRAYZ fɔ no se yu gɛt fɔ sɔfa plɛnti tin bifo yu gɛt di layf we go de sote go? Sɔntɛm, yu nɔ go sɔprayz. Ilɛksɛf yu jɔs bigin fɔ sav Jiova, ɔ i dɔn te we yu de sav am, yu no se yu jɔs gɛt fɔ sɔfa insay dis wɔl we Setan de rul.—Rɛv. 12:12.

2. (a) Apat frɔm di prɔblɛm dɛn we kin mit ɔlman, us ɔda prɔblɛm kin mit Kristian dɛn? (Luk di pikchɔ nia dis atikul in taytul.) (b) Udat de mek wi de sɔfa? Aw wi no se na in de mek wi sɔfa?

2 Apat frɔm di prɔblɛm dɛn we kin mit ɔlman, ɔda prɔblɛm dɛn de we kin mit Kristian dɛn. (1 Kɔr. 10:13) Wan pan dɛn prɔblɛm ya na we pipul dɛn kin mek dɛn sɔfa bikɔs dɛn de du wetin Gɔd in lɔ se. Jizɔs bin tɛl in disaypul dɛn se: “Slev nɔ pas in masta. If dɛn dɔn mek a sɔfa, dɛn go mek unasɛf sɔfa.” (Jɔn 15:20) Udat de mek Kristian dɛn de sɔfa? Nɔto no ɔda pɔsin, na Setan. Di Baybul se i tan lɛk “layɔn we de ala lawd wan” ɛn we “de fɛn we fɔ it” Gɔd in pipul dɛn. (1 Pit. 5:8) Setan go yuz ɔlkayn we fɔ mek wi lɛf fɔ du wetin Jiova want. Lɛ wi kam tɔk bɔt wetin bin apin to di apɔsul Pɔl.

DI PRƆBLƐM WE BIN MIT PƆL NA LISTRA

3-5. (a) Us prɔblɛm bin mit Pɔl na Listra? (b) We Pɔl bin tɔk bɔt di sɔfa we wi gɛt fɔ sɔfa, aw dat bin ɛnkɔrej di Kristian dɛn we bin de trade?

3 Pɔl bin sɔfa bɔku bɔku tɛm bikɔs i bin de du wetin Jiova  want. (2 Kɔr. 11:23-27) Wan pan di ples dɛn we Pɔl bin sɔfa, na Listra. Afta Pɔl bin dɔn mɛn wan man we nɔ bin ebul fɔ waka frɔm we dɛn bɔn am, di pipul dɛn na Listra bigin fɔ tek Pɔl ɛn Banabas as dɛn gɔd dɛn. Pɔl ɛn Banabas bin gɛt fɔ beg di pipul dɛn lɛ dɛn nɔ wɔship dɛn. I nɔ tu te, sɔm Ju pipul dɛn we nɔ bin lɛk Pɔl ɛn Banabas, kam ɛn bigin fɔ lay to di pipul dɛn bɔt Pɔl ɛn Banabas so dat di pipul dɛn go vɛks pan dɛn. Wantɛm wantɛm di pipul dɛn tɔn pan Pɔl ɛn Banabas! Dɛn ston Pɔl te dɛn fil se i dɔn day.—Akt 14:8-19.

4 Afta Pɔl ɛn Banabas dɔn go na Dabi, “dɛn go bak na Listra, Aykoniɔm, ɛn Antiɔk. We dɛn go de, dɛn bin ɛnkɔrej di disaypul dɛn fɔ kɔntinyu fɔ biliv di tin dɛn we dɛn dɔn lan. Ɛn dɛn bin tɛl dɛn se: ‘Wi go sɔfa bɔku tin bifo wi go insay Gɔd in Kiŋdɔm.’” (Akt 14:21, 22) Sɔntɛm yu go sɔprayz we Pɔl ɛn Banabas se wi gɛt fɔ “sɔfa bɔku tin,” bikɔs nɔbɔdi nɔ lɛk fɔ sɔfa ɛn sɔfa nɔto tin we de ɛnkɔrej wi. Bɔt wetin mek Pɔl ɛn Banabas yuz dɛn wɔd ya fɔ “ɛnkɔrej di disaypul dɛn”?

5 Wi go fɛn di ansa if wi tek tɛm luk di wɔd dɛn we Pɔl tɔk. I nɔ bin jɔs se: “Wi fɔ bia we wi de sɔfa bɔku tin.” Bɔt i tɔk se: “Wi go sɔfa bɔku tin bifo wi go insay Gɔd in Kiŋdɔm.” So Pɔl bin ɛnkɔrej di brɔda dɛn bay we i tɛl dɛn mɔ bɔt di bɛnifit we dɛn go gɛt if dɛn nɔ stɔp fɔ du wetin Jiova want. Di bɛnifit we dɛn go gɛt nɔto jɔs ɛmti drim, na sɔntin we rial. Na dat mek Jizɔs bin tɔk se: “Di wan we go bia te ɔltin dɔn na in go sev.”Mat. 10:22.

6. Us bɛnifit de fɔ di wan dɛn we de bia?

6 If wi bia, wi go gɛt bɔku bɛnifit. Fɔ di anɔyntɛd Kristian dɛn, dɛn go gɛt spɛshal layf na ɛvin we dɛn de rul wit Jizɔs. Dɛn nɔ go ɛva day igen. Fɔ di “ɔda ship dɛn,” dɛn go gɛt layf sote go na dis wɔl usay “ɔlman go de du wetin rayt.” (Jɔn 10:16; 2 Pit. 3:13) Bɔt fɔ naw, Pɔl bin tɔk se wi gɛt fɔ sɔfa bɔku tin. Lɛ wi kam tɔk bɔt tu prɔblɛm dɛn we kin mit wi.

FES-TO-FES

7. Uskayn prɔblɛm dɛn wi go se na fes-to-fes prɔblɛm?

7 Jizɔs bin dɔn tɔk se: “Pipul dɛn go kɛr una go na dɛn lokal kɔt, ɛn dɛn go bit una na dɛn Ju mitin os dɛn, ɛn dɛn go kɛr una go bifo dɛn gɔvnɔ ɛn kiŋ dɛn.” (Mak 13:9) Wetin Jizɔs tɔk, sho se sɔm pipul dɛn go mek Kristian dɛn sɔfa. Ɛn sɔm pan dɛn pipul ya we go mek Kristian dɛn sɔfa na di bigman dɛn pan Gɔd biznɛs ɛn di wan dɛn we de rul. (Akt 5:27, 28) Lɛ wi tɔk bak bɔt Pɔl. Yu tink se i bin de fred we pipul dɛn bin de mek i sɔfa? Nɔ, Pɔl nɔ bin de fred atɔl.—Rid Di Apɔsul Dɛn Wok [Akt] 20:22, 23.

8, 9. Aw Pɔl bin sho se i rɛdi fɔ bia ɛnikayn tin we go kam in we? Aw sɔm Witnɛs dɛn tide dɔn du di sem tin?

8 Pɔl bin gɛt maynd, i nɔ bin de fred di prɔblɛm dɛn we Setan bin de briŋ kam to am. Na dat mek i tɔk se: “A nɔ tek mi layf mek natin, di tin we impɔtant na fɔ lɛ a dɔn di res we a de rɔn ɛn di wok we Masta Jizɔs gi mi fɔ du, dat na fɔ prich di gud nyus gud gud wan, we de tɔk bɔt di gud tin dɛn we Gɔd dɔn du fɔ wi we wi nɔ fit fɔ gɛt.” (Akt 20:24) So wi dɔn si klia wan se Pɔl nɔ bin de fred fɔ sɔfa atɔl. Bifo dat, i bin rɛdi fɔ bia ɛnikayn prɔblɛm we go mit am. Pan ɔl we Pɔl bin de sɔfa, di men tin we i bin bisin bɔt na “fɔ tɛl pipul di Gud Nyuz.”

9 Tide, bɔku pan wi brɔda ɛn sista dɛn dɔn rɛdi fɔ bia ɛnikayn tin we go mit dɛn. Fɔ ɛgzampul, insay wan kɔntri, sɔm Witnɛs dɛn dɔn tek lɛk 20 ia so na prizin bikɔs dɛn nɔ gri fɔ put an pan pɔlitiks.  Dɛn nɔ wande kɛr dɛn kes go na kɔt, bikɔs no lɔ nɔ bin de na di kɔntri we go ɛp pɔsin we in kɔnshɛns nɔ alaw am fɔ put an pan pɔlitiks. We dɛn brɔda ya de na prizin, di gɔvmɛnt nɔ bin de gri mek ɛnibɔdi go fɛn dɛn. Dɛn nɔ bin de ivin gri mek dɛn famili go fɛn dɛn. Ɛn dɛn bin de bit sɔm pan di prizina dɛn ɛn du ɔlkayn bad tin to dɛn.

10. Wetin mek wi nɔ fɔ fred prɔblɛm dɛn we kin jɔs mit wi lɛk dat?

10 Insay sɔm ɔda kɔntri dɛn, wi brɔda dɛn kin bia sɔm prɔblɛm dɛn we kin jɔs mit dɛn lɛk dat. If dis kayn tin ya apin to yu, nɔ fred. Tink bɔt wetin bin apin to Josɛf. Dɛn bin sɛl am as slev na Ijipt, bɔt Jiova “bin de sev am frɔm ɔl di prɔblɛm dɛn we bin de mit am.” (Akt 7:9, 10) Jiova go du di sem tin fɔ yu. Nɔ ɛva fɔgɛt se Jiova no aw fɔ “pul pipul dɛn we de wɔship am kɔmɔt pan prɔblɛm.” (2 Pit. 2:9) Yu nɔ tink se yu fɔ kɔntinyu fɔ abop pan Jiova, naw we yu dɔn no se i go sev yu na dis wikɛd wɔl ɛn gi yu layf we go de sote go we in Kiŋdɔm kam? Yu gɛt bɔku rizin we fɔ mek yu abop pan Jiova ɛn bia ɛni bad tin we go mit yu.—1 Pit. 5:8, 9.

KƆNI KƆNI WE DƐN

11. Aw di kɔni kɔni we dɛn we Setan de yuz difrɛn frɔm di prɔblɛm dɛn we kin mit wi fes-to-fes?

11 Setan kin yuz kɔni kɔni we dɛn bak fɔ mek wi sɔfa. Aw dɛn kɔni kɔni we ya difrɛn frɔm di prɔblɛm dɛn we kin mit wi fes-to-fes? Prɔblɛm dɛn we kin mit wi fes-to-fes tan lɛk ebi ebi briz we go ib yu os dɔŋ wantɛm wantɛm. Bɔt di kɔni kɔni we dɛn we Setan de yuz fiba lɛk bɔg bɔg we de it di bod dɛn na yu os smɔl smɔl te i pwɛl. Bay di tɛm we yu de notis wetin di bɔg bɔg dɛn dɔn du, yu os go dɔn pwɛl bad bad wan.

12. (a) Wetin na wan pan di kɔni kɔni we dɛn we Setan de yuz? Wetin mek i lɛk fɔ yuz am? (b) Wetin mek Pɔl in at bin de pwɛl?

12 Setan want fɔ pwɛl yu padi biznɛs wit Jiova. Aw i kin du dat? I kin yuz kɔni kɔni we dɛn ɔ briŋ prɔblɛm dɛn we kin mit yu fes-to-fes. Wan pan di kɔni kɔni we dɛn we Setan lɛk fɔ yuz, na fɔ mek wi at pwɛl. Di apɔsul Pɔl insɛf bin se sɔntɛnde in at bin de pwɛl. (Rid Lɛta Fɔ Rom 7:21-24.) Wetin mek Pɔl we bin biliv Gɔd gud gud wan ɛn we sɔntɛm na bin wan pan di gɔvnin bɔdi mɛmba dɛn we bin de trade bin tɔk se in na “man we sɔri”? Pɔl bin de fil dis kayn we bikɔs i nɔ pafɛkt. I bin rili want fɔ du wetin rayt, bɔt nɔto ɔltɛm i bin izi fɔ am. If yusɛf kin fil dis kayn we wan wan tɛm, i go fayn mek yu mɛmba se dis sem tin bin apin to di apɔsul Pɔl. We yu tink bɔt dis, i go ɛnkɔrej yu.

13, 14. (a) Wetin kin mek sɔm pan Gɔd in savant dɛn at pwɛl? (b) Udat want fɔ mek wi lɛf fɔ sav Jiova? Wetin mek i want lɛ wi lɛf fɔ sav Jiova?

13 Sɔntɛnde, bɔku pan wi brɔda ɛn sista dɛn at kin pwɛl, dɛn kin wɔri, ɛn dɛn kin fil se dɛn nɔ gɛt wan valyu. Fɔ ɛgzampul, wan payɔnia sista we gɛt zil fɔ di prichin wok bin tɔk se: “Bɔku tɛm, a kin tink bɔt wan mistek we a bin dɔn mek, ɛn ɛnitɛm we a tink bɔt am, a de fil bad mɔ ɛn mɔ. We a kin tink bɔt ɔl di tin dɛn we a nɔ bin du di rayt we, i kin mek a fil se nɔbɔdi nɔ de we go ɛva lɛk mi, ivin Jiova sɛf nɔ go lɛk mi.”

14 Wetin kin mek sɔm pan Jiova in savant dɛn we gɛt zil kin fil lɛk aw dis sista kin fil? Bɔku rizin dɛn de we kin mek dɛn fil dis kayn we. Sɔm dɛn gɛt di abit fɔ tink bad bɔt dɛnsɛf ɛn di tin dɛn we de apin to dɛn. (Prɔv. 15:15) Ɔda wan dɛn de we dɛn at kin pwɛl bikɔs dɛn gɛt sik we de mɔna dɛn. Bɔt ilɛk wetin de mek wi at pwɛl, wi fɔ mɛmba udat want fɔ mek wi fil dis kayn we. Udat rili want fɔ mek wi at pwɛl ɛn lɛf  fɔ sav Jiova? Udat want fɔ mek yu fil se yu nɔ gɛt wan op lɛk aw insɛf nɔ gɛt wan op? (Rɛv. 20:10) Nɔto ɛni ɔda pɔsin, na Setan. I nɔ mata if Setan kam wit prɔblɛm dɛn to wi fes-to-fes ɔ i yuz kɔni kɔni trik dɛn pan wi; di men tin we i want fɔ du, na fɔ mek wi wɔri, mek wi nɔ gɛt zil igen, ɛn lɛf fɔ sav Jiova. Nɔ ɛva fɔgɛt se Gɔd in pipul dɛn de fɛt wɔ wit Setan, we want fɔ pwɛl wi padi biznɛs wit Jiova!

15. Aw wi go sho se wi nɔ de alaw ɛnitin fɔ mek wi at pwɛl?

15 Nɔ alaw ɛnitin fɔ stɔp yu fɔ sav Jiova. Go de tink bɔt di blɛsin dɛn we wi go gɛt we wi sav Jiova. Pɔl bin tɛl di Kristian dɛn na Kɔrint se: “Wi nɔ fɔ giv ɔp, bɔt ilɛksɛf di pɔsin we wi bi na do de west, wi fɔ no se di pɔsin we wi bi insay de nyu ɛvride. Pan ɔl we di prɔblɛm we de mit wi na fɔ shɔt tɛm ɛn i nɔ bɛtɛ, i de mek wi gɛt mɔ blɛsin we pas di wan we wi gɛt naw, ɛn i go de sote go.”—2 Kɔr. 4:16, 17.

RƐDI YUSƐF NAW FƆ ƐNI PRƆBLƐM WE GO MIT YU

16. Wetin mek i fayn fɔ rɛdi yusɛf naw fɔ ɛni prɔblɛm we go mit yu tumara bambay?

16 As wi dɔn si, Setan gɛt bɔku bɔku “kɔni kɔni we dɛn” we i de yuz. (Ɛfi. 6:11) Wi ɔl fɔ fala di advays we de na Pita In Fɔs Lɛta 5:9, we se: “Una nɔ du ɛnitin we i want, una tinap tranga wan fɔ di tin dɛn we una biliv.” Fɔ lɛ wi go ebul fɔ du dat, wi fɔ rɛdi wi maynd ɛn wi at ɛn tren wisɛf naw fɔ du wetin rayt. Fɔ ɛgzampul, sojaman dɛn nɔ kin wet te wɔ kam bifo dɛn bigin tren, dɛn kin tren bɔku bɔku tɛm, ivin we wɔ nɔ de. Na di sem tin Jiova in savant dɛnsɛf fɔ du. Wi nɔ no uskayn prɔblɛm go mit wi tumara bambay. So yu nɔ tink se i go rili mek sɛns fɔ lɛ wi tren wisɛf naw we wi nɔ gɛt siriɔs prɔblɛm we de mɔna wi? Pɔl bin tɛl di Kristian dɛn na Kɔrint se: “Una  kɔntinyu fɔ de tɛst unasɛf fɔ si if una stil biliv gud gud wan; kɔntinyu fɔ sho uskayn pɔsin una bi.”—2 Kɔr. 13:5.

17-19. (a) Aw wi go ebul fɔ chɛk wisɛf? (b) Wetin go ɛp yɔŋ wan dɛn fɔ rɛdi fɔ tɔk bɔt wetin dɛn biliv na skul?

17 Wan we we wi go fala di advays we Pɔl gi na we wi tray fɔ chɛk wisɛf gud gud wan. Aks yusɛf dɛn kwɛstyɔn ya: ‘A de pre ɔltɛm? We mi kɔmpin dɛn kin want lɛ a du sɔntin we Gɔd nɔ want, a de obe Gɔd ɔ a de obe dɛn? A de go di mitin dɛn ɔltɛm? A gɛt maynd fɔ tɔk bɔt di tin dɛn we a biliv? A kin rili tray fɔ bia wit mi brɔda ɛn sista dɛn we dɛn mek mistek, jɔs lɛk aw dɛn kin bia wit mi we misɛf mek mistek? A de put misɛf ɔnda di wan dɛn we de bifo na di kɔngrigeshɔn ɛn di wan dɛn we de bifo na di ɔganayzeshɔn?’

18 Yu go dɔn notis se tu pan di kwɛstyɔn dɛn we wi jɔs dɔn tɔk bɔt aks if wi gɛt maynd fɔ tɔk bɔt wetin wi biliv, ɛn if wi kin du wetin Gɔd want pan ɔl we wi kɔmpin dɛn go want fɔ lɛ wi du wetin bad. Bɔku pan wi yɔŋ brɔda ɛn sista dɛn kin gɛt fɔ du dis we dɛn de na skul. Dɛn nɔ kin fred ɔ shem fɔ tɔk bɔt wetin dɛn biliv. Wetin dɔn ɛp dɛn yɔŋ brɔda ɛn sista ya nɔ fɔ fred fɔ tɔk bɔt di tin dɛn we dɛn biliv? Dɛn kin yuz di advays dɛn we kin de na wi magazin dɛn. Fɔ ɛgzampul, insay di Julay 2009 Awake! dɛn ɛksplen wan fayn tin we dɛn yɔŋ wan dɛn kin du. I tɔk se if yu klasmet aks yu se: “Wetin mek yu biliv se Gɔd de?” yu kin aks am se: “Wetin mek a nɔ fɔ biliv se Gɔd de? Sɔm sayɛnsman dɛnsɛf gri se Gɔd de, ɛn na dɛn fɔ no mɔ bɔt dis.” Mama ɛn papa dɛn, i go fayn mek una de praktis wit una pikin dɛn so dat dɛn go no aw fɔ ansa dɛn kɔmpin dɛn we dɛn aks dɛn, dɛn kayn kwɛstyɔn ya.

19 Bɔt nɔto ɔltɛm i kin izi fɔ tɔk bɔt di tin dɛn we wi biliv ɔ du di tin dɛn we Jiova want wi fɔ du. Fɔ ɛgzampul, afta wi kin dɔn wok ol de na wokples, wi kin taya, bɔt wi kin stil tray tranga wan fɔ go di mitin dɛn. Ɛn i nɔ kin izi fɔ lɛ wi grap na bed na mɔnin fɔ go fil savis. Bɔt mɛmba se: If yu dɔn yus fɔ go mitin ɛn fil savis, i go ɛp yu fɔ tinap tranga wan we ɔda prɔblɛm dɛn go mit yu.

20, 21. (a) We wi de tink gud wan bɔt di day we Jizɔs bin kam day fɔ wi, aw dat go ɛp wi we wi at pwɛl? (b) Wetin wi fɔ mekɔp wi maynd fɔ du?

20 Wetin wi go du if Setan tray fɔ yuz in kɔni kɔni we dɛn pan wi? Fɔ ɛgzampul, wetin wi go du if wi at pwɛl? Wan impɔtant tin we wi fɔ du na fɔ de tink gud wan bɔt di day we Jizɔs day fɔ wi. Na dat di apɔsul Pɔl bin du. Sɔm tɛm dɛn de, i bin de fil sɔri fɔ insɛf. Bɔt i bin no se Krays nɔ bin kam day fɔ pafɛkt pipul dɛn, bɔt i bin kam day fɔ di wan dɛn we de sin. Ɛn Pɔl na bin wan pan di pipul dɛn we de sin. Na dat mek i bin rayt se: “Di layf we a de liv naw, na bikɔs a biliv pan Gɔd in Pikin, we lɛk mi ɛn gi in layf fɔ mi.” (Gal. 2:20) Fɔ tru, Pɔl bin rili gladi fɔ di day we Jizɔs day fɔ am, ɛn i bin biliv se na in Jizɔs day fɔ.

21 Di sem we aw Pɔl bin fil bɔt Jizɔs in day, na so wisɛf fɔ fil. If yusɛf biliv se na fɔ yu Jiova mek Jizɔs kam day fɔ, dat go rili ɛp yu. Dis nɔ min se wi at nɔ go pwɛl igen. Sɔm pan wi gɛt fɔ de bia wit sɔm prɔblɛm dɛn te Paradays kam. Bɔt mɛmba se: Na di wan dɛn we nɔ taya, na dɛn go gɛt di blɛsin. Di tɛm dɔn nia fɔ lɛ Gɔd in Kiŋdɔm mek pis de ɔlsay ɛn mek ɔlman we fetful, pafɛkt bak. So lɛ wi mekɔp wi maynd fɔ go insay Gɔd in Kiŋdɔm, ilɛksɛf wi gɛt fɔ sɔfa bɔku tin.