Go dayrɛkt to di men tin

Go dayrɛkt to di say we di difrɛn difrɛn atikul dɛn de

Day we Na di Las Ɛnimi, Nɔ Go De Igen

Day we Na di Las Ɛnimi, Nɔ Go De Igen

“Di las ɛnimi we na day, nɔ go de igen.”—1 KƆR. 15:26.

1, 2. Uskayn layf Adam ɛn Iv bin gɛt fɔs? Us kwɛstyɔn dɛn we dis briŋ?

WE GƆD bin mek Adam ɛn Iv, dɛn nɔ bin gɛt no ɛnimi. Dɛn bin pafɛkt ɛn dɛn bin de liv na Paradays. Adam ɛn Iv na bin Gɔd in pikin dɛn. Ɛn dɛn bin de ɛnjɔy tayt padi biznɛs wit Gɔd. (Jɛn. 2:7-9; Lyuk 3:38) Di wok we Gɔd bin gi dɛn bin sho aw lɔng i bin want dɛn fɔ liv. (Rid Jɛnɛsis 1:28.) Gɔd bin tɛl Adam ɛn Iv fɔ ‘bɔn pikin dɛn te dɛn bɔku ɛn ful-ɔp di wɔl ɛn mek am fayn.’ I nɔ go tek lɔng tɛm fɔ lɛ dɛn du dis wok we Gɔd gi dɛn. Bɔt fɔ lɛ dɛn go ‘kɔntrol ɔltin we gɛt layf na di wɔl,’ dɛn nid fɔ liv sote go. Day nɔ bin fɔ ebul stɔp Adam ɛn Iv fɔ du dis wok.

2 Bɔt wetin mek ɔltin dɔn chenj so naw? Aw wi kam fɔ gɛt bɔku ɛnimi dɛn, we nɔ want fɔ mek wi gɛt gladi at? Aw wi kam fɔ gɛt di ɛnimi we pas ɔl, we na day? Wetin Gɔd go du fɔ mek dɛn ɛnimi ya nɔ de igen? Wi go gɛt di ansa to dɛn kwɛstyɔn ya insay di Baybul.  Naw, lɛ wi si aw di Baybul ansa dɛn kwɛstyɔn ya.

WAN FAYN ADVAYS

3, 4. (a) Us lɔ Gɔd bin gi Adam ɛn Iv? (b) Wetin mek i bin impɔtant fɔ lɛ Adam ɛn Iv obe Gɔd in lɔ?

3 Pan ɔl we Adam ɛn Iv bin gɛt di chans fɔ liv sote go, dɛn bin gɛt tin dɛn we dɛn nid fɔ de du fɔ kɔntinyu fɔ liv. Dɛn bin nid fɔ drink, slip, ɛn it. Ɛn dɛn bin nid briz fɔ lɛ dɛn liv. Bɔt di tin we pas ɔl we go ɛp dɛn fɔ kɔntinyu fɔ liv, na dɛn padi biznɛs wit di Pɔsin we gi dɛn layf. (Dyut. 8:3) Ɛn dɛn bin nid fɔ fala Gɔd in advays fɔ lɛ dɛn go kɔntinyu fɔ ɛnjɔy layf. Jiova bin mek Adam no dis klia wan ivin bifo i mek Iv. Aw? “Jiova Gɔd tɛl di man se: ‘Yu kin it frɔm ɔl di tik dɛn we de na di gadin te yu satisfay. Bɔt as fɔ di sɛns tik we de sho gud ɛn bad, yu nɔ fɔ it frɔm am, bikɔs di de we yu it frɔm am, natin nɔ go pwɛl am, yu go day.’”—Jɛn. 2:16, 17.

4 “Di sɛns tik we de sho gud ɛn bad” bin de sho se na Gɔd nɔmɔ gɛt di rayt fɔ tɛl dɛn wetin gud ɛn wetin bad. Adam bin no wetin gud ɛn bad, bikɔs Gɔd bin mek am lɛk aw insɛf tan ɛn i bin gɛt kɔnshɛns. Di tik bin de sho Adam ɛn Iv se dɛn go nid Jiova in advays ɔltɛm. If dɛn it di frut we de na di tik, dat go sho se dɛn want fɔ de fɔ dɛnsɛf, dɛn nɔ want lɛ Gɔd rul dɛn. Ɛn dis go kam wit siriɔs prɔblɛm fɔ dɛn ɛn dɛn pikin dɛn. Di we aw Gɔd bin pɔnish dɛn bin sho se na bad bad tin, dɛn bin du.

WETIN BRIŊ DAY PAN MƆTALMAN?

5. Wetin mek Adam ɛn Iv pwɛl Gɔd in lɔ?

5 Afta Gɔd bin dɔn mek Iv, Adam bin tɛl am bɔt Gɔd in lɔ. Iv bin no dis lɔ gud gud wan, ɛn i bin ebul fɔ ripit am wɔd fɔ wɔd we i de tɔk to di snek. (Jɛn. 3:1-3) Di pɔsin we bin de yuz di snek na Setan. Setan na bin wan pan Gɔd in spirit pikin dɛn we bin want fɔ de fɔ insɛf, ɛn i bin want fɔ rul mɔtalman. I bin de tink bɔt dɛn tin ya smɔl smɔl na in at. (Luk Jems 1:14, 15.) So fɔ lɛ i ebul du di bad tin we i bin de tink bɔt, i go tɛl Iv se Gɔd de lay. I tɛl Iv se if i de fɔ insɛf, i nɔ go day, bɔt i go tan lɛk Gɔd. (Jɛn. 3:4, 5) Iv bin biliv wetin di snek tɛl am, ɛn i sho se i want fɔ de fɔ insɛf bay we i it di frut, ɛn mek in man bak jɔyn am fɔ it am. (Jɛn. 3:6, 17) Na lay Setan bin lay to Iv. (Rid Fɔs Lɛta To Timoti 2:14.) Pan ɔl we Adam bin no se fɔ it di frut na bad tin, i bin stil “lisin to [in] wɛf.” Di snek bin de mek lɛk se in na padi to Iv, bɔt Setan we bin de yuz di snek na pɔsin we nɔ gɛt wan sɔri-at, ɛn i bin no bɔt di bad tin we go apin to Iv if i it di frut.

6, 7. Wetin Jiova bin du we Adam ɛn Iv sin?

6 Adam ɛn Iv bin tɔn dɛn bak pan di Wan we gi dɛn layf ɛn ɔltin we dɛn bin gɛt. Jiova bin no ɔl wetin dɔn apin. (1 Krɔn. 28:9; rid Prɔvab 15:3.) I bin alaw Adam, Iv, ɛn Setan fɔ sho wetin dɛn tink bɔt am. Jɔs lɛk ɛni papa, Jiova bin rili fil am. (Luk Jɛnɛsis 6:6.) Bɔt Jiova bin gɛt fɔ jɔj dɛn, ɛn i bin mek wetin i bin dɔn tɔk se go apin to dɛn, bi.

7 Gɔd bin dɔn tɛl Adam se: “Di de we yu it frɔm [di sɛns tik we de sho gud ɛn bad], natin nɔ go pwɛl am, yu go day.” Sɔntɛm Adam go dɔn fil se na di sem de we i it di frut, i go day. So afta i pwɛl Gɔd in lɔ, i go dɔn fil se  Jiova go mek i day da sem de de bifo di san go dɔŋ. Jiova go to Adam ɛn Iv “arawnd di tɛm we di briz kin de blo.” (Jɛn. 3:8) Bikɔs Jiova na Jɔj we de du wetin rayt, i bin aks Adam ɛn Iv wetin apin, ɛn i lisin to wetin dɛn de se. (Jɛn. 3:9-13) Afta dat, i tɛl dɛn aw i go pɔnish dɛn fɔ dɛn sin. (Jɛn. 3:14-19) If Jiova Gɔd bin fɔ dɔn kil Adam ɛn Iv wantɛm wantɛm, dɛn ɛn dɛn pikin dɛn nɔ bin fɔ dɔn du di wok we i bin want mek dɛn du. (Ayz. 55:11) Pan ɔl we i tɔk se dɛn go day ɛn dɛn bigin fɔ si di bad tin we sin kin briŋ pan pɔsin, i alaw Adam ɛn Iv fɔ bɔn pikin dɛn we go bɛnifit frɔm di tin we I go du fɔ dɛn. To Gɔd, Adam ɛn Iv day da sem de de, bikɔs to Jiova, 1,000 ia tan lɛk wan de.—2 Pit. 3:8.

8, 9. Aw Adam in sin bin afɛkt in pikin dɛn? (Luk di pikchɔ nia dis atikul in taytul.)

8 Yu tink se di tin we Adam ɛn Iv bin du go afɛkt dɛn pikin dɛn? Yɛs, i go afɛkt dɛn pikin dɛn. Lɛta Fɔ Rom 5:12 se: “Na wan man briŋ sin na di wɔl ɛn sin briŋ day, so day de mit ɔlman bikɔs ɔlman dɔn sin.” Ebɛl na di fɔs pɔsin we bin day. (Jɛn. 4:8) Dɔn Adam in ɔda pikin dɛn bigin fɔ ol ɛn day. Adam briŋ sin ɛn day pan in pikin dɛn. Na dat mek di apɔsul Pɔl se: “Wan man nɔ obe Gɔd ɛn mek bɔku pipul dɛn de sin.” (Rom 5:19) Di sin ɛn day we wi gɛt frɔm Adam, dɔn bi big big ɛnimi to mɔtalman. Wi nɔ rili no aw sin ɛn day pas frɔm Adam to in pikin dɛn, bɔt wetin wi no na dat, Adam dɔn pas sin ɛn day to in pikin dɛn.

9 Na dat mek di Baybul se di sin ɛn day we wi gɛt frɔm Adam tan lɛk “tik blankit we kɔba ɔl di pipul dɛn ɛn di klos we kɔba ɔlman na di wɔl.” (Ayz. 25:7) Wi nɔn nɔ go ebul fɔ kɔmɔt ɔnda dis tik blankit we na sin ɛn day. Na dat mek di Baybul se: “Adam dɔn mek ɔlman de day.” (1 Kɔr. 15:22) So na dis mek Pɔl bin aks se: “Udat go sev mi frɔm dis bɔdi we de mek a day?” Ɛnibɔdi de we ebul fɔ sev Pɔl? *Rom 7:24.

DI SIN ƐN DAY WE ADAM BRIŊ NƆ GO DE IGEN

10. (a) Wetin na sɔm vas dɛn na di Baybul we sho se Jiova gɛt fɔ pul di day we Adam dɔn briŋ pan wi? (b) Wetin dɛn vas ya de tɛl wi bɔt Jiova ɛn in Pikin?

10 Yɛs, Jiova ebul fɔ sev Pɔl. Jɔs afta Ayzaya tɔk bɔt “di tik blankit,” i rayt se Jiova “go swɛla day sote go, ɛn Jiova we na di Rula we gɛt pawa pas ɔlman go wep di kray wata we de na ɔlman in yay.” (Ayz. 25:8) Jɔs lɛk papa we de pul di tin we de mek in pikin dɛn sɔfa ɛn wep di kray wata we de na dɛn yay, na so Jiova insɛf gladi we i gɛt fɔ pul di day we Adam dɔn briŋ kam pan wi! Fɔ du dis, Jiova gɛt sɔmbɔdi we de wok wit am. Fɔs Lɛta Fɔ Kɔrint 15:22 tɔk se: “Jɔs lɛk aw Adam dɔn mek ɔlman de day, na so Krays go mek ɔlman gɛt layf.” Semweso, afta Pɔl bin dɔn aks se ‘Udat go sev am?,’ i kɔntinyu fɔ se: “A tɛl Gɔd tɛnki tru Jizɔs Krays we na wi Masta!” (Rom 7:25) Dis dɔn sho wi klia wan se di lɔv we Jiova bin gɛt we mek i mek mɔtalman, nɔ chenj ivin we Adam ɛn Iv tɔn dɛn bak pan am. Ɛn di  pɔsin we bin de wok wit Jiova fɔ mek Adam ɛn Iv, stil lɛk dɛn pikin dɛn. (Prɔv. 8:30, 31) Bɔt aw Jiova go sev Adam ɛn Iv dɛn pikin dɛn frɔm sin ɛn day?

11. Wetin Jiova dɔn du fɔ ɛp mɔtalman?

11 We Adam sin, Jiova tɛl am se i go day ɛn dis dɔn mek mɔtalman de sin ɛn day. (Rom 5:12, 16) Lɛta Fɔ Rom 5:18 se: “Wan man in sin dɔn mek ɔlman de day.” Di lɔ we Jiova bin gi Adam de sho se wi ɔl fɔ day. So, wetin Jiova go du fɔ pul wi pan dis day ɛn stil nɔ kɔmɔt biɛn in wɔd? Jizɔs bin tɔk sɔntin we ɛp wi fɔ no di ansa. I se: “Mɔtalman Pikin . . . kam fɔ wok fɔ pipul dɛn ɛn fɔ gi in layf fɔ sev bɔku pipul dɛn.” (Matyu 20:28) Jizɔs na Jiova in fɔs spirit Pikin. We dɛn bɔn am as pafɛkt mɔtalman na dis wɔl, i bin tɔk klia wan se i go gi in layf fɔ bay mɔtalman bak. Aw dis gi, we Jizɔs go gi in layf go satisfay Jiova?—1 Tim. 2:5, 6.

12. Us sakrifays we bin mek Jiova satisfay?

12 Bikɔs Jizɔs na bin pafɛkt mɔtalman, i bin gɛt di chans fɔ liv sote go na dis wɔl, jɔs lɛk aw Jiova bin want fɔ Adam. Bɔt, bikɔs i bin rili lɛk in Papa ɛn Adam in pikin dɛn, i sakrifays di pafɛkt layf we i bin gɛt as mɔtalman fɔ pe fɔ di pafɛkt layf we Adam lɔs. Afta Jizɔs day, Jiova gi am layf bak as spirit pɔsin. (1 Pit. 3:18) Jiova bin satisfay wit di pafɛkt sakrifays we Jizɔs bin mek fɔ bay Adam in famili bak ɛn gi dɛn di chans fɔ gɛt di layf we Adam bin lɔs. I bin jɔs tan lɛk se Jizɔs tek Adam in ples. So na dat mek we Pɔl bin tɔk bɔt wetin dɛn bin dɔn rayt, i tɔk se: “Di fɔs man we na Adam kam fɔ bi pɔsin we gɛt layf. Ɛn di las Adam kam fɔ bi spirit we de gi layf.”—1 Kɔr. 15:45.

Ebɛl, we na di fɔs pɔsin we day go bɛnifit frɔm Jizɔs in day wan (Luk na paregraf 13)

13. Wetin “di las Adam” go du fɔ ɛp di wan dɛn we dɔn day?

13 Di tɛm go kam we “di las Adam” go “bi spirit we de gi layf” to mɔtalman. Da tɛm de, bɔku pan Adam in pikin dɛn go gɛt layf bak. Wetin du? Na bikɔs dɛn bin dɔn liv ɛn day. So dɛn go nid fɔ gɛt layf bak fɔ liv na dis wɔl.—Jɔn 5:28, 29.

14. Wetin Jiova dɔn du fɔ mek mɔtalman pafɛkt bak?

14 Aw mɔtalman go pafɛkt bak? Jiova dɔn mek wan Kiŋdɔm ɔ gɔvmɛnt we go du dis. Na “di las Adam” ɛn sɔm mɔtalman dɛn we Jiova dɔn pik na dis wɔl go rul dis Kiŋdɔm. (Rid Rɛvɛleshɔn 5:9, 10.) Di wan dɛn we go rul wit Jizɔs na ɛvin go dɔn no wetin i min fɔ bi pɔsin we nɔ pafɛkt. Fɔ wan tawzin ia, Jizɔs ɛn di wan dɛn we go rul wit am, go ɛp di wan dɛn we go de na dis wɔl fɔ bi pafɛkt mɔtalman bak. Dis na tin we mɔtalman nɔ ebul du fɔ dɛnsɛf.—Rɛv. 20:6.

15, 16. (a) Wetin go apin to “di las ɛnimi” we Adam briŋ kam pan wi? Ustɛm i nɔ go de igen? (b) Wetin Fɔs Lɛta Fɔ Kɔrint 15:28 se Jizɔs go du?

15 Bay di tɛm we di wan tawzin ia rul go dɔn, di pipul dɛn we de du wetin Gɔd want go fri frɔm di sin ɛn day we Adam in tranga-yes briŋ kam pan wi. Di Baybul se: “Jɔs lɛk aw Adam dɔn mek ɔlman de day, na so Krays go mek ɔlman gɛt layf. Bɔt na bay tɔn ɔlman go gɛt layf bak: na Krays fɔs, afta am, ɔl di wan dɛn we na Krays in yon [dat na di wan dɛn we go rul wit am] . . . . Dɔn, di nɛks tin we i go du, i go gi di Kiŋdɔm bak to in Gɔd ɛn in Papa, we i go dɔn dɔnawe wit ɔl di gɔvmɛnt dɛn ɛn ɔl di  wan dɛn we de na pawa. I go rul as kiŋ te Gɔd put ɔl in ɛnimi dɛn ɔnda in fut. Ɛn di las ɛnimi we na day, nɔ go de igen.” (1 Kɔr. 15:22-26) Di day we Adam bin briŋ kam pan wi nɔ go de igen. Dis day we dɔn kɔba mɔtalman lɛk “tik blankit” nɔ go de igen.—Ayz. 25:7, 8.

16 Di apɔsul Pɔl kɔntinyu fɔ tɔk se: “We ɔltin go dɔn de ɔnda am, di Pikin insɛf go put insɛf ɔnda di Wan we put ɔltin ɔnda am, so dat Gɔd go bi ɔltin to ɔlman.” (1 Kɔr. 15:28) Da tɛm de, Jizɔs go dɔn du ɔl wetin Jiova tɛl am fɔ du. Ɛn i go gladi fɔ gi di Kiŋdɔm bak to Jiova ɛn mek mɔtalman we go dɔn pafɛkt, de ɔnda Jiova.

17. Wetin Jiova go du to Setan?

17 Wetin go apin to Setan, we dɔn mek ɔlkayn bad tin de mit mɔtalman? Rɛvɛleshɔn 20:7-15 gi wi di ansa. We di wan tawzin ia go dɔn dɔn, Jiova go gi Setan wan las chans fɔ tray fɔ ful mɔtalman. Afta dat, Jiova go kil Setan ɛn ɔl di wan dɛn we de biɛn am; dɛn nɔ go de igen. Di Baybul kɔl dis “di sɛkɔn day.” (Rɛv. 21:8) Di wan dɛn we go day pan dis “sɛkɔn day,” nɔ go gɛt layf igen igen. Ɛn Jiova nɔ go pul dis sɛkɔn day kɔmɔt. Bɔt di wan dɛn we lɛk Gɔd ɛn we de sav am nɔ fɔ fred dis “sɛkɔn day,” bikɔs i nɔ go du dɛn natin.

18. Udat go du di wok we Gɔd bin gi Adam?

18 Afta ɔl dɛn tin ya go dɔn apin, mɔtalman go dɔn pafɛkt ɛn Jiova go si dɛn as pipul dɛn we fit fɔ gɛt layf we go de sote go. Ɛn dɛn nɔ go gɛt ɛni ɛnimi igen. Na Adam in pikin dɛn naw go du di wok we Gɔd bin gi am. Adam in pikin dɛn go bɔku na di wɔl, ɛn dɛn go kia fɔ ɔl di tin dɛn we de na di wɔl ɛn ɛnjɔy di difrɛn difrɛn tin dɛn we Gɔd mek. Wi gladi fɔ no se i nɔ go te igen, Jiova go pul di las ɛnimi we na day!

^ par. 9 We Insight on the Scriptures de tɔk bɔt aw sayɛnsman dɛn de tray fɔ no wetin mek wi de ol ɛn day, i tɔk se: “Dɛn nɔ gri se na Gɔd insɛf sɛf sɛntɛns di fɔs tu pipul dɛn fɔ day. Ɛn Gɔd mek dis sɛntɛns de wok di we aw mɔtalman nɔ rili ɔndastand.”—Vol. 2, pej 247.