Go dayrɛkt to di men tin

Go dayrɛkt to di say we di difrɛn difrɛn atikul dɛn de

Lisin to Jiova Ɛnisay we Yu De

Lisin to Jiova Ɛnisay we Yu De

“Una yes go yɛri vɔys [biɛn] una de tɔk se, ‘Na di rod dis.’”—AYZ. 30:21.

1, 2. Aw Jiova de tɔk to in savant dɛn?

FƆ LƆNG tɛm naw, Jiova dɔn de gi advays to in pipul dɛn difrɛn difrɛn we dɛn. Jiova bin de yuz enjɛl dɛn, vishɔn, ɔ drim fɔ tɛl in savant dɛn bɔt wetin gɛt fɔ apin, ɔ fɔ sho dɛn di wok we dɛn fɔ du. (Nɔm. 7:89; Izi. 1:1; Dan. 2:19) Sɔntɛnde Jiova kin yuz sɔm pipul dɛn we de na di pat pan in ɔganayzeshɔn we de na dis wɔl, fɔ tɛl in savant dɛn wetin i want lɛ dɛn du. I nɔ mata udat Jiova de yuz fɔ gi in mɛsej to in pipul dɛn, di wan dɛn we de lisin to am go gɛt blɛsin.

2 Tide, Jiova de yuz di Baybul, in oli spirit, ɛn di kɔngrigeshɔn fɔ gayd in pipul dɛn. (Akt 9:31; 15:28; 2 Tim. 3:16, 17) Di advays dɛn we Jiova de gi wi, so klia dat i tan lɛk se ‘wi de yɛri vɔys biɛn wi de tɔk se: “Na di rod dis, waka de.”’ (Ayz. 30:21) Jizɔs insɛf de ɛp wi fɔ lisin to Jiova. Aw i de du dat? I de yuz “di bɔy we tru to in masta ɛn we gɛt sɛns” fɔ tɛl di kɔngrigeshɔn dɛn wetin Jiova want dɛn fɔ du. (Mat. 24:45) So wi nid fɔ fala di advays dɛn we Jiova de gi wi, bikɔs fɔ lɛ wi go de sote go, wi fɔ lisin to Jiova.—Ibru 5:9.

3. Wetin kin mek i nɔ izi fɔ lisin to di advays dɛn we Jiova de gi wi? (Luk di pikchɔ nia dis atikul in taytul.)

3 Setan de tray fɔ pul wi maynd pan di gud advays dɛn we Jiova de gi wi, bikɔs i no se dɛn advays ya go mek wi sev  tumara bambay. Pantap dat, wisɛf sɛf yon ‘at kɔrɔpt in kayn nɔ de.’ So dis kin mek i nɔ izi fɔ lisin to di advays dɛn we Jiova de gi wi. (Jɛr. 17:9) Naw i go fayn lɛ wi tɔk bɔt wetin go ɛp wi fɔ avɔyd di tin dɛn we go mek i nɔ izi fɔ lisin to Gɔd. Wi go tɔk bak bɔt aw di lisin we wi de lisin to Jiova ɛn di pre we wi de pre to am go ɛp wi fɔ de nia am ilɛk wetin apin.

AVƆYD SETAN IN TRAP DƐN

4. Wetin Setan de yuz fɔ ambɔg di we aw pipul dɛn de tink?

4 Setan kin yuz lay lay tɔk dɛn fɔ ful pipul dɛn ɛn ambɔg di we aw dɛn de tink. (Rid Jɔn In Fɔs Lɛta 5:19.) I de yuz bak nyuspepa, buk, redio, tɛlivishɔn, ɛn di Intanɛt fɔ ful pipul dɛn ɔlsay na di wɔl. Pan ɔl we dɛn tin ya kin gɛt sɔm tin dɛn we impɔtant to wi, dɛn kin stil tɔk bɔt sɔm tin dɛn we Jiova nɔ want. (Jɛr. 2:13) Fɔ ɛgzampul, dɛn kin tɔk se i nɔ bad fɔ lɛ man mared in kɔmpin man ɔ fɔ lɛ uman mared in kɔmpin uman. Dis dɔn mek bɔku pipul dɛn fil se di Baybul tu strikt ɛn i nɔ want mek dɛn ɛnjɔy dɛn layf.—1 Kɔr. 6:9, 10.

5. Aw wi go ebul fɔ avɔyd di tin dɛn we Setan de yuz fɔ ful pipul dɛn?

5 Aw di wan dɛn we lɛk Gɔd go ebul fɔ avɔyd di tin dɛn we Setan de yuz fɔ ful pipul dɛn? Aw dɛn go ebul fɔ no wetin gud ɛn wetin bad? “Na we [dɛn] de du wetin [Gɔd in] lɔ se.” (Sam 119:9) Gɔd in Wɔd, di Baybul, gɛt impɔtant advays dɛn we go ɛp wi fɔ no di tru tin frɔm di lay lay tin. (Prɔv. 23:23) We Jizɔs bin de kot frɔm di Baybul, i bin se: “Na Gɔd in wɔd de gi pɔsin tru layf.” (Mat. 4:4) So wi nid fɔ lan aw fɔ du di tin dɛn we di Baybul se. Fɔ ɛgzampul, lɔn lɔn tɛm bifo Mozis rayt bɔt Jiova in lɔ we se man nɔ fɔ lɛf in wɛf go slip wit ɔda uman, ɛn uman nɔ fɔ lɛf in maredman go slip wit ɔda man, Josɛf in bin dɔn no se dis na sɔntin we bad na Gɔd in yay. So we Pɔtifa in wɛf bin de mɔna am fɔ ledɔm wit am, i nɔ bin de ɛva tink bɔt dɛn kayn tin ya bikɔs i no se if i du am, i dɔn pwɛl Gɔd in lɔ. (Rid Jɛnɛsis 39:7-9.) Pan ɔl we Pɔtifa in wɛf bin de kɔntinyu fɔ mɔna Josɛf, Josɛf nɔ bin gri fɔ lisin to am ɛn du wetin Gɔd nɔ want. Wan impɔtant tin we go ɛp wi fɔ no wetin gud ɛn wetin bad na we wi de lisin to Jiova in advays dɛn ɛn nɔ lisin to di lay lay tin dɛn we Setan de tɔk.

6, 7. Wetin wi fɔ du so dat wi go avɔyd di bad advays dɛn we Setan de gi?

6 Di wɔl dɔn ful-ɔp wit rilijɔn dɛn we de tich difrɛn difrɛn tin dɛn. Ɛn dis dɔn mek bɔku pipul dɛn dɔn kɔnfyus ɛn dɛn fil se dɛn nɔ go ebul fɔ no di tru rilijɔn. Bɔt if pɔsin rɛdi fɔ lisin to Jiova, Jiova dɔn mek am izi fɔ am fɔ no di tru rilijɔn. So na wi gɛt fɔ disayd udat wi go lisin to, bikɔs wi nɔ go ebul fɔ lisin to tu pipul dɛn di sem tɛm. So wi nid fɔ “no” Jizɔs in vɔys ɛn lisin to am. Na in na di pɔsin we Jiova dɔn pik fɔ gayd wi.—Rid Jɔn 10:3-5.

 7 Jizɔs bin se: “Una lisin mi gud.” (Mak 4:24) Jiova de gi wi di bɛst advays ɛn in advays dɛn klia, so wi nid fɔ pe atɛnshɔn ɛn lisin to dɛn. Wan we we wi kin du dat na we wi rɛdi fɔ du wetin i se. Bɔt if wi nɔ tek tɛm, wi go lisin to di bad advays dɛn we Setan de gi ɛn nɔ lisin to di gud advays dɛn we Gɔd de gi wi. Nɔ ɛva alaw myuzik, fim, tɛlivishɔn program dɛn, buk dɛn, padi dɛn, ticha dɛn, ɔ dɛn masta sabi bukman dɛn fɔ kɔntrol yu layf.—Kɔl. 2:8.

8. (a) Aw wi at kin mek am izi fɔ lɛ wi du wetin Setan want? (b) Wetin go apin to wi if wi lɛf fɔ si di sayn dɛn?

8 Setan no se bikɔs wi nɔ pafɛkt dat kin mek wi want fɔ du bad. So bikɔs i dɔn no se wi kin want fɔ du bad, i kin yuz dis fɔ tɛmpt wi fɔ du bad tin. We i kin du dis, i nɔ kin izi fɔ lɛ wi du wetin Gɔd want. (Jɔn 8:44-47) Aw wi go ebul fɔ du wetin Gɔd want pan ɔl we Setan go de tɛmpt wi? Fɔ ɛgzampul, tink bɔt pɔsin we lɛf fɔ ɛnjɔy insɛf te i go du bad tin we i nɔ bin ɛva tink se i go du. (Rom 7:15) Wetin kin mek pɔsin du dis kayn tin? Sɔntɛm, smɔl smɔl, di pɔsin go dɔn lɛf fɔ lisin to Jiova. I go bi se di pɔsin go dɔn de si sayn dɛn we de tɛl am se dis tin ya we i want du so, i bad, bɔt i chuz nɔ fɔ lisin. Fɔ ɛgzampul, i go bi se i go dɔn stɔp fɔ de pre, i nɔ de go fil savis fast fast igen, ɔ i dɔn bigin de mis mitin. If tin lɛk dis bigin apin to pɔsin, if i nɔ tek tɛm, i go lisin to in at ɛn du wetin i no se bad. Bɔt wi go ebul fɔ avɔyd dɛn kayn mistek ya if wi tray fɔ si di sayn dɛn ɛn du sɔntin wantɛm wantɛm fɔ kɔrɛkt di prɔblɛm. If wi de lisin to wetin Jiova de tɛl wi, wi nɔ go lisin to ɛnibɔdi we bin dɔn lɛf fɔ fala Jiova ɛn bigin tich lay lay tin.—1 Tim. 4:1.

9. Wetin wi go du if wi notis se wi dɔn de alaw di we aw wi de tink fɔ pul wi kɔmɔt nia Jiova?

9 We pɔsin gɛt sik, ɛn i notis am kwik, dat kin ɛp fɔ sev di pɔsin in layf. Semweso, wi go ebul fɔ avɔyd prɔblɛm if wi kwik fɔ notis ɛnitin pan wi we go mek wi du bad bad tin. As wi no se wi at dɔn de tɛl wi fɔ du bad tin, wi fɔ du sɔntin wantɛm wantɛm bifo ‘Setan kech wi ɛn mek wi du wetin i want.’ (2 Tim. 2:26) Wetin wi go du if wi notis se di we aw wi de tink ɛn di tin dɛn we wi at de tɛl wi fɔ du, de pul wi kɔmɔt nia Jiova smɔl smɔl? We wi notis dis, wi nɔ fɔ westɛm, wi fɔ put wisɛf dɔŋ, kam bak to Jiova, ɛn lisin wit ɔl wi at to wetin i de tɛl wi. (Ayz. 44:22) Wan tin we wi fɔ no na dat if wi disayd fɔ du tin we nɔ rayt, wi go sɔfa siriɔs wan fɔ di  tin dɛn we wi dɔn du, ivin afta we Jiova go dɔn fɔgiv wi. So i bɛtɛ lɛ wi avɔyd ɛnitin we go want fɔ pul wi kɔmɔt nia Jiova!

Aw di mitin dɛn ɛn di ɔda fayn tin dɛn we wi de du go protɛkt wi frɔm Setan in trap dɛn? (Luk na paregraf 4 to 9)

NƆ MEK PRAWD ƐN AVƆYD WANT WANT

10, 11. (a) Aw prawd pɔsin kin biev? (b) Us lɛsin wi lan frɔm di bad tin we Kora, Detan, ɛn Abiram bin du?

10 Wi fɔ no se wi at na wan ɔda tin we kin mek wi want fɔ kɔmɔt nia Jiova. Di tin dɛn we kin de na wi at kin mek wi want fɔ du bad. Fɔ ɛgzampul, lɛ wi tɔk bɔt aw prawd ɛn want want kin ambɔg wi. Dɛn tu abit ya go mek wi nɔ lisin fayn to Jiova ɛn dɛn go mek wi du sɔntin we bad na Jiova in yay. Sɔmbɔdi we prawd kin lɛk fɔ es insɛf ɔp ɔ tink se i bɛtɛ pas ɔda pipul dɛn. I kin fil se i gɛt di rayt fɔ du ɛnitin we i want ɛn nɔbɔdi nɔ fɔ tɛl am wetin fɔ du. So i go de fil se in kɔmpin Kristian dɛn, di ɛlda dɛn, ɛn ivin Gɔd in ɔganayzeshɔn nɔ fɔ advays am ɔ tɛl am wetin fɔ du. Dɛn kayn pipul ya, de tu fa frɔm Jiova so dɛn nɔ de yɛri wetin i de se.

11 We di Izrɛlayt dɛn bin de na di ɛmti land we pɔsin nɔ go ebul fɔ liv, Kora, Detan, ɛn Abiram nɔ bin de gri fɔ du wetin Mozis ɛn Erɔn bin de tɛl dɛn. Bikɔs dɛn bin prawd, dɛn bin tray fɔ wɔship Jiova dɛn yon we. Wetin Jiova bin du to dɛn? I kil dɛn ɔl. (Nɔm. 26:8-10) Dis stori de tich wi impɔtant lɛsin! I de sho wi se if wi nɔ gri fɔ du wetin Jiova want, i kin mek wi lɔs wi layf. Lɛ wi mɛmba bak se di Baybul se: “If yu de kak, yu go kapsay.”—Prɔv. 16:18; Ayz. 13:11.

12, 13. (a) Gi wan ɛgzampul we de sho aw want want kin mek bad tin mit pɔsin. (b) Aw want want kin tɔn abit pan pɔsin if i nɔ tray fɔ stɔp am?

12 Lɛ wi tɔk bak bɔt pɔsin we want want. Pɔsin we want want kin fil se Jiova in advays dɛn nɔto fɔ am, ɛn i kin tek sɔntin we nɔto in yon. Lɛ wi tɔk bɔt Geazi in ɛgzampul. Wan tɛm, di bigman pan di sojaman dɛn na Sirya, we nem Neman, bin gɛt lɛprɔsi. Afta di prɔfɛt Ilaysha dɔn mɛn Neman, i gi gift dɛn to Ilaysha, bɔt Ilaysha nɔ tek dɛn. Bɔt in savant we nem Geazi bin dɔn milɛ dɛn gift ya. Geazi tɔk to insɛf se, ‘A swɛ to PAPA GƆD, a de go mit Neman na rod ɛn pul sɔntin nain an.’ I kɔmɔt biɛn Ilaysha, ɛn bigin rɔnata Neman fɔ go lay to am so dat Neman go gi am “tati-fo kilo silva ɛn tu sɛt klos.” Wetin bin apin we Geazi du dis ɛn lay to Jiova in prɔfɛt? Di lɛprɔsi we Neman bin gɛt bin kam pan Geazi!—2 Kiŋ 5:20-27.

13 Want want kin stat smɔl smɔl na pɔsin in at, bɔt if wi nɔ pul am kɔmɔt de i go tɔn abit pan wi we go mek wi lɔs wi layf. Di Baybul tɔk bak bɔt Ekan in stori we sho wi wetin want want kin mek pɔsin du. Lɛ wi si aw want want bin ambɔg Ekan. Ekan bin se, ‘Na we a si wan fayn lapa, fayv pawn wet silva ɛn gold ba we na wan ɛn kwata pawn wet, pan di tin dɛn we wi kapchɔ, nain mi at go de, so a tek dɛn.’ Ekan bin fɔ dɔn pul in at pan dɛn tin ya, bɔt i nɔ du am, bifo dat, i tif dɛn ɛn ayd dɛn na in tɛnt. We ɔlman kam fɔ no bɔt di bad tin we Ekan dɔn du, Jɔshwa bin tɛl am se Jiova go pɔnish am fɔ dat. Da sem de de, dɛn bin ston Ekan ɛn in famili te dɛn day. (Jɔs. 7:11, 21, 24, 25) Want want na tin we kin afɛkt wi ɔl. So na dat mek Jizɔs Krays wɔn wi se mek wi “nɔ put at pan jɛntri. Nɔto di plɛnti tin dɛn we pɔsin gɛt go mek di pɔsin gɛt di tru layf.” (Lyuk 12:15) Pan ɔl we, wan wan tɛm, wi kin tink bɔt tin dɛn we nɔ fayn ɔ wi kin tink bɔt mami ɛn dadi biznɛs, i go fayn lɛ wi pik wetin wi de tink bɔt, ɛn wi nɔ fɔ alaw di tin dɛn we de na wi at fɔ mek wi du wetin nɔ fayn.—Rid Jems 1:14, 15.

14. Wetin wi fɔ du if wi notis se na prawd ɛn want want de mek wi want fɔ du sɔntin?

 14 Prawd ɛn want want kin briŋ big big trɔbul pan pɔsin. We wi de tink bɔt di prɔblɛm dɛn we wi go gɛt we wi du bad tin, dat go ɛp wi fɔ lisin to Jiova ɛn nɔ du di bad tin dɛn we wi at de tɛl wi fɔ du. (Dit. 32:29) Insay di Baybul, Gɔd nɔ jɔs tɛl wi di rayt tin we wi fɔ du, bɔt i tɛl wi bak di bɛnifit dɛn we wi go gɛt if wi du wetin rayt ɛn di bad tin dɛn we go mit wi if wi nɔ du wetin rayt. If wi notis se na prawd ɛn want want de mek wi want fɔ du sɔntin, i go fayn lɛ wi tink bɔt di prɔblɛm dɛn we wi go gɛt if wi du wetin wi at de tɛl wi! Wi fɔ tink bɔt aw di bad tin dɛn we wi go du go afɛkt wi, di wan dɛn we lɛk wi, ɛn ivin wi padi biznɛs wit Jiova.

KƆNTINYU FƆ PRE ƐN LISIN TO JIOVA ƆLTƐM

15. Wetin wi lan bɔt prea frɔm Jizɔs in ɛgzampul?

15 Jiova want di bɛst fɔ wi. (Sam 1:1-3) Na dat mek i de gi wi advays dɛn di rayt tɛm we wi nid am. (Rid Di Ibru Pipul Dɛn 4:16.) Pan ɔl we Jizɔs bin pafɛkt, i bin abop pan Jiova, so i bin de pre to am ɔltɛm. Na dis mek Jiova bin de sɔpɔt Jizɔs ɛn sho am ɔl wetin fɔ du. Jiova bin sɛn enjɛl dɛn fɔ ɛp Jizɔs, i bin gi in oli spirit to Jizɔs fɔ ɛp am, ɛn i bin ɛp am di tɛm we i bin de pik di 12 apɔsul dɛn. Jiova bin de tɔk frɔm ɛvin fɔ sho se i de sɔpɔt Jizɔs ɛn i gladi fɔ am. Dɛn tin ya we Jiova bin de du fɔ ɛp Jizɔs, bin rili wɔndaful. (Mat. 3:17; 17:5; Mak 1:12, 13; Lyuk 6:12, 13; Jɔn 12:28) Jɔs lɛk Jizɔs, wisɛf fɔ de pre to Gɔd wit ɔl wi at. (Sam 62:7, 8; Ibru 5:7) Prea go ɛp wi fɔ tɔk to Jiova ɔltɛm ɛn i go ɛp wi fɔ liv wi layf di we we go briŋ ɔnɔ ɛn prez to am.

16. Wetin go ɛp wi fɔ lisin to Jiova?

16 Jiova rɛdi fɔ gi in advays to ɔlman, bɔt i nɔ de fos ɛnibɔdi fɔ fala in advays. If wi aks am fɔ in oli spirit, i go gi wi am. (Rid Lyuk 11:10-13.) So i impɔtant fɔ lɛ wi “tek tɛm lisin.” (Lyuk 8:18) Fɔ ɛgzampul, if wi de aks Jiova fɔ ɛp wi fɔ avɔyd mami ɛn dadi biznɛs bɔt wi stil kɔntinyu fɔ de wach dɛn rud rud pikchɔ ɔ fim dɛn, wi de sho se wi nɔ rili want lɛ Jiova ɛp wi. If wi rili want lɛ Jiova ɛp wi, wi fɔ de na say dɛn we in spirit de, lɛk wi mitin dɛn so. Bɔku pan Jiova in savant dɛn dɔn ebul fɔ avɔyd prɔblɛm dɛn bikɔs dɛn de lisin to Jiova we dɛn go na di mitin dɛn. Ɛn dɛn dɔn ebul fɔ no we dɛn at kin bigin tɛl dɛn fɔ du bad tin, ɛn dɛn kin kɔrɛkt di prɔblɛm wantɛm wantɛm.—Sam 73:12-17; 143:10.

NƆ ALAW ƐNITIN FƆ STƆP YU FƆ LISIN TO JIOVA

17. Wetin mek i nɔ fayn fɔ abop pan wisɛf?

17 Lɛ wi tɔk bɔt Kiŋ Devid we bin de na Izrɛl. We i bin yɔŋ, i bin kil di Filistin dɛn jayant we nem Golaya. Leta, Devid bin bi sojaman ɛn kiŋ na Izrɛl. So i bin de protɛkt di Izrɛlayt dɛn ɛn disayd di rayt tin we dɛn fɔ du. Bɔt we Devid bigin abop pan insɛf, in at bin ful am ɛn i bin sin siriɔs wan we i ledɔm wit Batshiba, ɛn i ivin mek dɛn kil Batshiba in man we na Yuraya. We Jiova bin kɔrɛkt Devid, i bin put insɛf dɔŋ ɛn gri se na bad tin i dɔn du. Devid bin tray fɔ mek in ɛn Jiova bi padi bak.—Sam 51:4, 6, 10, 11.

18. Wetin go ɛp wi fɔ kɔntinyu fɔ lisin to Jiova?

18 Lɛ wi fala di advays we de na Fɔs Lɛta Fɔ Kɔrint 10:12 we se wi nɔ fɔ ɛva abop pan wisɛf. Bikɔs wi nɔ ebul fɔ ‘kɔntrol wi layf,’ wi nid pɔsin we go advays wi aw fɔ waka na layf. So if wi nɔ lisin to Jiova in advays, na Setan in advays wi go lisin to. (Jɛr. 10:23) Dis dɔn sho wi se i rili impɔtant fɔ lɛ wi de pre ɔltɛm ɛn du wetin di oli spirit de tɛl wi. So i go fayn lɛ wi ɔl kɔntinyu fɔ de lisin to Jiova ɔltɛm.