Go dayrɛkt to di men tin

Go dayrɛkt to di say we di difrɛn difrɛn atikul dɛn de

 DI TƆPIK NA DI FRƆNT PEJ | YU TINK SE GƆD BISIN BƆT YU?

Gɔd Ebul Fɔ Kɔrej Yu

Gɔd Ebul Fɔ Kɔrej Yu

“Gɔd we de kɔrej dɛn wan we dɛn at pwɛl, [bin] kɔrej wi.” —SƐKƐN LƐTA FƆ KƆRINT 7:6.

“Gɔd in Pikin so lɛk mi dat i sakrifays in layf fɔseka mi.”—LƐTA FƆ GALESHYA 2:20

WETIN MEK SƆM PIPUL DƐN DE DAWT? Pan ɔl we sɔm pipul dɛn rili nid pɔsin fɔ kɔrej dɛn, dɛn kin fil se i nɔ fayn fɔ aks Gɔd fɔ ɛp dɛn fɔ bia wit dɛn prɔblɛm. Wan uman we nem Rakɛl, bin se: “We a kin si di bɔku bɔku pipul dɛn we de na di wɔl ɛn di siriɔs prɔblɛm dɛn we dɛn gɛt, a kin si se mi yon prɔblɛm dɛn tu smɔl fɔ beg Gɔd fɔ ɛp mi.”

WETIN GƆD IN WƆD SE? Gɔd dɔn du wan wɔndaful tin fɔ ɛp wi ɛn kɔrej wi. Tide, ɔlman we de na di wɔl dɔn gɛt sin frɔm Adam ɛn dis dɔn mek wi nɔ ebul fɔ du wetin Gɔd want pafɛkt wan. Bɔt Gɔd ‘lɛk wi ɛn i sɛn in Pikin, Jizɔs Krays, fɔ kam na di wɔl fɔ sakrifays insɛf fɔ wi so dat i go fɔgiv wi sin dɛn.’ (Jɔn In Fɔs Lɛta 4:10) Na Jizɔs in day de mek Gɔd de fɔgiv wi sin dɛn, na in de mek wi at klin bifo Gɔd, ɛn na in gi wi di op fɔ de sote go na di nyu wɔl usay kolat go de. * Bɔt fɔ se Jizɔs in sakrifays na fɔ jɔs ɔlman, ɔ na sɔntin we de sho se Gɔd bisin bɔt yusɛf?

Lɛ wi tɔk smɔl bɔt di apɔsul Pɔl. I bin so gladi fɔ di day we Jizɔs day fɔ mɔtalman dat i bin rayt se: “Na we a biliv pan Gɔd in Pikin mek a gɛt di layf we a gɛt naw. Gɔd in Pikin so lɛk mi dat i sakrifays in layf fɔseka mi.” (Na wi mek am italiks; Lɛta Fɔ Galeshya 2:20) Na tru se, Jizɔs day ivin bifo Pɔl bi Kristian. Bɔt stil, Pɔl bin si se di day we Jizɔs day na gift we Gɔd gi am.

Di day we Jizɔs day na gift we Gɔd gi yusɛf. Dis gift de sho se Gɔd rili valyu yu. I go mek yu gɛt “kɔrej ɔltɛm” ɛn dis go ‘ɛp yu fɔ du ɛn tɔk ɔl wetin gud.’—Sɛkɛn Lɛta Fɔ Tɛsalonayka 2:16, 17.

Na lɛk 2,000 ia so dɔn pas we Jizɔs gi in layf fɔ mɔtalman. Wetin sho se Gɔd want fɔ mek padi biznɛs wit yu tide?

^ par. 5 If yu want fɔ no mɔ bɔt Jizɔs in day wan, na fɔ rid chapta 5 na wan buk we dɛn kɔl Wetin Rili di Baybul De Tich? Na Jiova Witnɛs dɛn mek am.