Go dayrɛkt to di men tin

Go dayrɛkt to di say we di difrɛn difrɛn atikul dɛn de

 DI TƆPIK NA DI FRƆNT PEJ | YU TINK SE GƆD BISIN BƆT YU?

Gɔd De Pe Atɛnshɔn To Yu

Gɔd De Pe Atɛnshɔn To Yu

“Pan ɔl we mi na nɔnɛntiti [ɔ natin], PAPA GƆD, nɔ fɔgɛt mi.”—Sam 40:17; DEVID WE BIN DE NA IZRƐL TRADE TRADE

“Di neshɔn dɛn na lɛk wan drɔp wata na bokit.”—AYZAYA 40:15

Wetin yu tink, yu fil se i bin fayn fɔ lɛ Devid de tink se Gɔd fɔ pe atɛnshɔn to am ɔ nɔ fɔgɛt am? Yu tink se Gɔd de pe atɛnshɔn to yu? I nɔ izi fɔ lɛ bɔku pipul dɛn biliv se Gɔd we gɛt pawa pas ɔlman bisin bɔt dɛn. Wetin mek?

Wan rizin na dat Gɔd tu pawaful ɛn i pas mɔtalman fa fawe. Gɔd de na ɛvin ɛn i de si mɔtalman “lɛk wan drɔp wata na bokit . . . , ɛn I si dɛn lɛk dɔst na skel.” (Ayzaya 40:15) Wan man we kin rayt bad bɔt rilijɔn bin se na fɔ natin pɔsin go sidɔm ɛn tink se Gɔd de we rili bisin bɔt wetin wi de du.

Wan ɔda rizin na dat sɔm pipul dɛn de fil se na wetin dɛn de du de mek dɛn nɔ fit fɔ lɛ Gɔd pe atɛnshɔn to dɛn. Fɔ ɛgzampul, wan man we nem Jim bin tɔk se: “A bin de pre ɔltɛm fɔ lɛ Gɔd gi mi kolat ɛn ɛp mi fɔ mek a ebul fɔ kɔntrol misɛf, bɔt i nɔ kin tu te mi at kin wam bak. Leta, a tɛl misɛf se mi na wikɛd wikɛd pɔsin we Gɔd nɔ go ebul fɔ ɛp.”

Fɔ se Gɔd de tu fa frɔm wi we mek i nɔ de pe atɛnshɔn to wi? Aw Gɔd de rili fil bɔt mɔtalman we nɔ pafɛkt? If Gɔd nɔ tɛl wi bɔt insɛf, no mɔtalman nɔ go ebul fɔ tɔk fɔ Gɔd ɛn ansa dɛn kwɛstyɔn ya. Bɔt Gɔd in Wɔd, di Baybul, ɛp wi fɔ no se Gɔd nɔ de fa frɔm wi ɛn i bisin bɔt wi. Di Baybul se ‘Gɔd de nia wi ɔl.’ (Di Apɔsul Dɛn Wok [Akt] 17:27) Insay di ɔda 4 atikul dɛn, wi go lan wetin Gɔd tɛl wi bɔt aw i bisin bɔt mɔtalman ɛn aw i dɔn sho se i rili bisin bɔt pipul dɛn we jɔs tan lɛk yu.