Go dayrɛkt to di men tin

Go dayrɛkt to di say we di difrɛn difrɛn atikul dɛn de

Jiova Na Gɔd We Ɔganayz

Jiova Na Gɔd We Ɔganayz

“Gɔd nɔ want mek wi we i kɔl fɔ du in wok, kɔnfyus pan ɛnitin we wi de du. I want mek ɔltin waka fayn.”—1 KƆR. 14:33.

1, 2. (a) Udat na di fɔs pɔsin we Gɔd mek? Wetin Jiova yuz am fɔ du? (b) Wetin sho se di enjɛl dɛn ɔganayz?

NA JIOVA mek di wan ol wɔl, ɛn i ɔganayz pan ɔltin we i de du. Di fɔs pɔsin we i mek na in wangren Pikin, we di Baybul kɔl “di Wɔd.” Di Baybul kɔl am “di Wɔd” bikɔs na in na di men pɔsin we de tɔk fɔ Gɔd. Di Wɔd dɔn de sav Jiova fɔ lɔng lɔng tɛm. Aw wi no dat? Na bikɔs di Baybul se: “Bifo Gɔd mek di wɔl, di wan we dɛn kɔl di Wɔd bin dɔn de, i bin de wit Gɔd.” Di Baybul tɔk bak se: “Tru di Wɔd, Gɔd mek ɔltin; natin nɔ de na [di] wɔl we Gɔd mek we in an nɔ de pan.” Na lɛk 2,000 ia so dɔn pas frɔm we Gɔd bin sɛn di Wɔd na di wɔl as pafɛkt mɔtalman. Di Wɔd na Jizɔs Krays, ɛn i bin du ɔl wetin in Papa want.—Jɔn 1:1-3, 14.

2 We Jizɔs bin de na ɛvin, i bin ɛp in Papa fɔ mek bɔku tin dɛn. (Prɔv. 8:30) Na in Jiova bin yuz fɔ mek di bɔku bɔku enjɛl dɛn we de na ɛvin. (Kɔl. 1:16) We di Baybul de tɔk bɔt di enjɛl dɛn we de wok fɔ Jiova, i se “tawzin tawzin pipul bin de wok fɔ am; ɛn tɛn tawzin tayms tɛn tawzin” bin tinap bifo am. (Dan. 7:10) Di Baybul tɔk se dɛn bɔku bɔku enjɛl ya we Jiova gɛt ɔganayz lɛk “sojaman dɛn.”—Sam 103:21.

3. Ɔmɔs sta ɛn planɛt dɛn de? Aw dɛn ɔganayz?

 3 Wetin wi go se bɔt di ɔda tin dɛn we Gɔd mek, lɛk di bɔku bɔku sta dɛn ɛn ɔda wɔl dɛn we dɛn kɔl planɛt, yu tink se dɛn ɔganayz? Wan nyuspepa we nem di Ustin, Tɛksas, Chronicle, bin tɔk se afta sayɛnsman dɛn bin jɔs dɔn dɔn fɔ stɔdi bɔt di sta dɛn, dɛn bin se na lɛk “300 sɛkstilyɔn sta dɛn de. Dis nɔmba bɔku tri tɛm pas di wan we sayɛnsman dɛn bin dɔn tɔk trade.” Di nyuspepa kɔntinyu fɔ tɔk se: “Dis nɔmba na 3 we gɛt 23 ziro biɛn am. Ɔ 3 trilyɔn tayms 100 bilyɔn.” Pan ɔl we di sta dɛn bɔku, dɛn ɔganayz. Dɛn de bay grup dɛn we dɛn kɔl galaksi. Ɛniwan pan dɛn grup ya, gɛt bɔku bɔku bɔku sta dɛn ɛn plɛnti planɛt dɛn. Bɔku pan dɛn galaksi ya, kin bɔnch togɛda ɛn mek grup dɛn we dɛn kɔl klɔsta. Ɛn dɛn klɔsta ya kin kam bak togɛda ɛn mek big big grup dɛn we dɛn kɔl supaklɔsta.

4. Aw wi no se Gɔd ɔganayz in savant dɛn we de na di wɔl?

4 Di enjɛl dɛn we de na ɛvin ɛn di sta ɛn planɛt dɛn, rili ɔganayz. (Ayz. 40:26) So wi fɔ biliv se Jiova go mɔs ɔganayz in savant dɛn we de na di wɔl. Gɔd want lɛ in savant dɛn ɔganayz pan ɔltin we dɛn de du, ɛn dis rili impɔtant bikɔs dɛn gɛt bɔku impɔtant wok dɛn fɔ du. Frɔm trade trade, Jiova bin dɔn ɔganayz in savant dɛn fɔ mek dɛn wɔship am fayn fayn wan. Bɔku ɛgzampul dɛn de we de sho se Jiova bin de wit dɛn, ɛn i ‘nɔ want mek di wan dɛn we i kɔl fɔ du in wok, kɔnfyus pan ɛnitin we dɛn de du. I want mek ɔltin waka fayn.’—Rid Fɔs Lɛta Fɔ Kɔrint 14:33, 40.

GƆD BIN ƆGANAYZ IN PIPUL DƐN WE BIN DE TRADE

5. Wetin mek di wɔl nɔto Paradays naw?

5 We Jiova bin mek di fɔs mɔtalman dɛn, i tɛl dɛn se: “Una bɔn bɔku pikin dɛn, fɔ mek una de ɔlsay na di wɔl ɛn kɔntrol di wɔl. Una go gɛt pawa fɔ kɔntrol ɔl di fish dɛm, ɔl di bɔd dɛm ɛn ɔl dɛn animal dɛm.” (Jɛn. 1:28) Jiova nɔ bin mek bɔku bɔku pipul dɛn wantɛm wantɛm. Adam ɛn Iv bin fɔ bɔn pikin dɛn, ɛn dɛn pikin dɛn bak fɔ bɔn pikin dɛn, te mɔtalman de ɔlsay na di wɔl. Gɔd bin want mek dɛn mek di wan ol wɔl bi Paradays. Bɔt we Adam ɛn Iv pwɛl Gɔd in lɔ, dat bin mek di wɔl nɔ bi Paradays. (Jɛn. 3:1-6) Leta, “PAPA GƆD si se mɔtalman in wikɛdnɛs dɔn pasmak, ɛn na bad nɔmɔ i de mɛmba ɔltɛm.” Dat bin mek “ɔlman na di wɔl bin bad na PAPA GƆD in yay dɔn na soso fɛt fɛt ɛn bad bad tin dɛn bin de apin.” So Gɔd disayd fɔ kam wit ebi ebi ren we go kil ɔl di wikɛd pipul dɛn.—Jɛn. 6:5, 11-13, 17.

6, 7. (a) Wetin mek Jiova bin gladi fɔ Noa? (Luk di pikchɔ nia dis atikul in taytul.) (b) Wetin bin apin to di wikɛd pipul dɛn na Noa in tɛm?

6 “Noa bin mek PAPA GƆD in at gladi wit am” bikɔs i “bin de du wetin rayt bifo PAPA GƆD. Nain wangren nɔ bin gɛt fɔlt pan ɔl in kɔmpin dɛn.” Bikɔs Noa ɛn “PAPA GƆD na bin padi,” Gɔd bin tɛl am aw fɔ bil wan big ak. (Jɛn. 6:8, 9, 14-16) Gɔd bin tɛl Noa fɔ mek di ak wan kayn we fɔ lɛ i go flot pantap di wata so dat di mɔtalman ɛn animal dɛn we de insay de, go sev. “Noa du ɔl wetin PAPA GƆD tɛl am fɔ du.” Ɛn bikɔs in famili bin sɔpɔt am, i bin ebul fɔ dɔn di wok fayn fayn wan. Afta Noa ɛn in famili briŋ di animal dɛn insay di ak, “PAPA GƆD lɔk di ak in do.”—Jɛn. 7:5, 16.

7 We di ebi ren bin kam insay di ia 2370 bifo Krays, Jiova bin “pwɛl ɔltin we gɛt layf na [di] wɔl,” bɔt i bin sev Noa ɛn in famili insay di ak. (Jɛn. 7:23) Ɔlman we de na di wɔl tide kɔmɔt frɔm Noa, in pikin dɛn, ɛn dɛn wɛf dɛn. Bɔt ɔl di pipul dɛn we nɔ bin go insay di ak bin day bikɔs dɛn nɔ bin lisin to Noa, “we bin de tɛl pipul fɔ du wetin rayt.”—2 Pit. 2:5.

Di we aw Gɔd bin ɔganayz et pipul dɛn bin mek dɛn sev we da ebi ren bin kam (Luk na paregraf 6 ɛn 7)

8. Wetin sho se di Izrɛlayt dɛn bin ɔganayz we Gɔd tɛl dɛn fɔ go na di land we i bin dɔn prɔmis dɛn?

 8 Afta et ɔndrɛd ia dɔn pas we da ebi ren bin kam, Gɔd bin ɔganayz di Izrɛlayt dɛn fɔ bi wan neshɔn. Gɔd bin ɔganayz ɔltin we dɛn fɔ du, mɔ so di we aw dɛn fɔ wɔship am. Fɔ ɛgzampul, Gɔd bin mek dɛn gɛt bɔku prist ɛn Livayt dɛn. Apat frɔm dat, dɛn bin gɛt “uman dɛn we bin de sav na di Tɛnt domɔt.” (Ɛks. 38:8) We Jiova Gɔd bin tɛl di Izrɛlayt dɛn fɔ go na Kenan, bɔku pan dɛn bin fred ɛn dɛn nɔ bin gri fɔ go, so Jiova bin tɛl Mozis fɔ tɛl dɛn se ‘dɛn nɔn nɔ go mas fut insay di land we i bin dɔn swɛ se i go mek i bi dɛn yon pas Kelɛb we na Jɛfunɛ in bɔypikin ɛn Jɔshwa we na Nɔn in bɔypikin.’ Wetin mek Jiova bin tɔk so? Na bikɔs na Jɔshwa ɛn Kelɛb nɔmɔ bin kam tɔk gud tin afta dɛn bin go wach aw di land we Jiova bin dɔn prɔmis dɛn, tan lɛk. (Nɔm. 14:30, 36-38) Leta, Gɔd bin tɛl Mozis fɔ pik Jɔshwa fɔ lid di Izrɛlayt dɛn. (Nɔm. 27:18-23) Jɔs bifo Jɔshwa bin want fɔ kɛr di Izrɛlayt dɛn go na Kenan, Jiova bin tɛl am se: “Wans nain PAPA GƆD dɔn tɛl am se mek i tinap lɛkɛ man, i nɔ fɔ fred natin ɛn i nɔ fɔ gɛt ɛni dawt nain maynd, bikɔs PAPA GƆD we nain PAPA GƆD go de wit am ɛnisay we i de go.”—Jɔs. 1:9.

9. Wetin Reab bin tink bɔt Jiova ɛn in pipul dɛn?

9 Jiova Gɔd bin rili de wit Jɔshwa ɛnisay we i bin de go. Fɔ ɛgzampul, lɛ wi tɔk bɔt wetin bin apin we di Izrɛlayt dɛn bin kam gɛda nia wan Kenanayt tɔŋ we dɛn kɔl Jɛriko. Insay di ia 1473 bifo Krays, Jɔshwa bin sɛn tu man dɛn fɔ go luk aw Jɛriko tan. We dɛn go de, dɛn mit wan rare gyal we nem Reab. Dis uman bin ayd dɛn ɔp di ruf na in os, so dat di man dɛn we di kiŋ na Jɛriko bin sɛn, nɔ go ol dɛn. Reab bin tɛl di tu man dɛn we kam luk aw Jɛriko tan, se: “In no se, PAPA GƆD dɔn gi Izrɛl di land . . . Reab se dɛn bin dɔn yɛri bɔt aw PAPA GƆD mek di rɛd si dray lɛ di Izrɛlayt dɛn krɔs. I se dɛn bin yɛri igen bɔt aw dɛn bin nyakanyaka dɛn tu Amorayt kiŋ.” Reab tɔk bak se: “Di Izrɛlayt dɛn PAPA GƆD, na di PAPA GƆD na ɛvin ɛn na di ath.” (Jɔs. 2:9-11) Bikɔs Reab bin sɔpɔt Jiova in  ɔganayzeshɔn we bin de da tɛm de, Jiova bin sev in ɛn in famili we di Izrɛlayt dɛn bin kam fɔ pwɛl Jɛriko. (Jɔs. 6:25) Reab bin sho se i gɛt fɛt, ɛn i bin rɛspɛkt Jiova ɛn in pipul dɛn.

DI KRISTIAN DƐN WE BIN DE TRADE, BIN ƆGANAYZ

10. Wetin Jizɔs bin tɛl di Ju edman dɛn pan Gɔd biznɛs? Wetin mek i bin tɔk dat?

10 Di tɛm we Jɔshwa bin de lid di Izrɛlayt dɛn, dɛn bin fɛt ɛn win bɔku bɔku tɔŋ dɛn na Kenan ɛn na dɛn naw bin de na di pipul dɛn land. Bɔt wetin bin apin leta? Di Izrɛlayt dɛn bin de pwɛl Gɔd in lɔ dɛn ɔltɛm. Bay di tɛm we Jiova sɛn in Pikin fɔ kam na di wɔl, di Izrɛlayt dɛn nɔ bin de obe Gɔd igen, ɛn dɛn nɔ bin de lisin to in prɔfɛt dɛn we i bin de sɛn. Na dis mek Jizɔs bin se di pipul dɛn na Jerusɛlɛm “de kil dɛn prɔfɛt.” (Rid Matyu 23:37, 38.) Di Ju edman dɛn pan Gɔd biznɛs nɔ bin de du wetin Gɔd want, so Gɔd bin pul an pan dɛn. Jizɔs bin tɛl dɛn se: “Di rayt we una gɛt fɔ mek Gɔd rul una nɔ go bi una yon igen, na dɛn pipul we go du wetin Gɔd want go gɛt am.”—Mat. 21:43.

11, 12. (a) Wetin sho se Jiova bin pul in blɛsin pan di Ju pipul dɛn ɛn put am pan wan ɔda ɔganayzeshɔn we bin de insay Jizɔs in tɛm? (b) Udat dɛn bin de na di nyu ɔganayzeshɔn we Gɔd put in blɛsin pan?

11 I nɔ tu te, afta Jizɔs bin kam na di wɔl, Jiova bin lɛf di Izrɛlayt dɛn. Bɔt dat nɔ min se Jiova nɔ bin gɛt ɔganayzeshɔn na di wɔl igen, ɔ i nɔ bin gɛt fetful pipul dɛn we de sav am. Jiova bin pul in blɛsin pan di Ju pipul dɛn ɛn put am pan wan nyu ɔganayzeshɔn we bin de obe Jizɔs Krays ɛn du di tin dɛn we i bin de tich. Dis ɔganayzeshɔn bin bigin insay di ia 33, na wan de we dɛn kɔl Pɛntikɔst. Da de de, na lɛk 120 pan Jizɔs in disaypul dɛn bin gɛda na wan ples na Jerusɛlɛm. We dɛn bin de de, wantɛm wantɛm, “dɛn yɛri nɔys lɛkɛ big briz de blo ɛn di nɔys bin de ɔlɔbɔt insay di os we dɛn bin de.” Dɔn “dɛn si tin dɛn lɛkɛ lili lili faya na di ples we dɛn bin de, ɛn di lili lili faya dɛn kam pan dɛn ɔl. Gɔd in Spirit kam insay dɛn ɔl we bin [de] de ɛn mek dɛn ɔl bigin tɔk laŋwej we dɛn nɔ lan; ɛnitin we Gɔd in Spirit want mek dɛn tɔk, nain dɛn tɔk.” (Akt 2:1-4) Dis tin we bin apin bin sho klia wan se Jiova bin de wit dis nyu ɔganayzeshɔn, we na Krays in disaypul dɛn bin de de.

12 Da de de, na lɛk “tri tawzin pipul” bin kam ad pan Jizɔs in disaypul dɛn. Pantap dat, Jiova bin mek “mɔ ɛn mɔ pipul bin de kam jɔyn to di pipul dɛn we bin biliv pan Jizɔs Krays.” (Akt 2:41; 5:14) Jizɔs in disaypul dɛn bin so prich di gud nyus dat “Gɔd in wɔd go ɔlsay ɛn mɔ ɛn mɔ pipul biliv pan Jizɔs na Jerusɛlɛm.” Ivin “plɛnti pan dɛn man we de mek sakrifays fɔ pipul sin gri fɔ biliv pan Jizɔs Krays.” (Akt 6:7) Leta, Jiova bin sho bak se i de wit dis ɔganayzeshɔn we i bigin briŋ “dɛn pipul we nɔto Ju,” insay di Kristian kɔngrigeshɔn.—Rid Di Apɔsul Dɛn Wok [Akt] 10:44, 45.

13. Us wok we Gɔd in nyu ɔganayzeshɔn bin de du?

13 Jizɔs in disaypul dɛn nɔ bin gɛt wan dawt bɔt di wok we Gɔd bin gi dɛn fɔ du, bikɔs Jizɔs insɛf sɛf bin dɔn sho dɛn wetin fɔ du. Jɔs afta i baptayz, i bigin fɔ prich bɔt “Gɔd in rul.” (Mat. 4:17) Na dis sem wok Jizɔs tich in disaypul dɛn fɔ du. I bin tɛl dɛn se: “Una tɔk bɔt mi na Jerusɛlɛm, na Judia, na Sameria ɛn ɔlɔbɔt na [di] wɔl.” (Akt 1:8) Jizɔs in disaypul dɛn bin rili no wetin fɔ du. Fɔ ɛgzampul, we Pɔl ɛn Banabas bin go na Antiɔk we de na Pisidia, dɛn bin tɛl di Ju pipul dɛn we nɔ bin want fɔ lisin to dɛn, se: “Wi bin gɛt fɔ tɛl una dɛn Ju pipul bɔt Gɔd bifo wi tɛl dɛn pipul we nɔto Ju. We una nɔ gri biliv pan am, una dɔn kɔndɛm unasɛf se una nɔ fit fɔ  gɛt layf sote go. Na dat mek wi de tɛl dɛn pipul we nɔto Ju bɔt Gɔd naw. Di Masta dɔn tɛl wi se, ‘A dɔn put una lɛkɛ lamp fɔ dɛn pipul we nɔto Ju. Na una a go yus fɔ sev ɔlman na di wɔl.’” (Akt 13:14, 45-47) Frɔm di tɛm we di apɔsul dɛn bin de, Gɔd in ɔganayzeshɔn dɔn de tɛl pipul dɛn bɔt wetin Jiova dɔn du fɔ sev mɔtalman.

BƆKU PIPUL DƐN BIN DAY, BƆT GƆD IN YON PIPUL DƐN BIN SEV

14. Wetin bin apin na Jerusɛlɛm insay di apɔsul dɛn tɛm? Udat dɛn bin sev?

14 Bɔku pan di Ju pipul dɛn nɔ bin gri fɔ lisin to di gud nyus, so big big trɔbul bin gɛt fɔ mit dɛn. Jizɔs bin wɔn in disaypul dɛn se: “We una go si soja man dɛn gɛda rawnd Jerusɛlɛm, una fɔ no se di tɛm we da tɔŋ de go pwɛl dɔn de rich. Da tɛm de, mek di pipul dɛn na Judia rɔnawe go na dɛn il, mek dɛn pipul we de na Jerusɛlɛm kɔmɔt de, ɛn mek dɛn wan we de na fam nɔ tɔn bak go insay di tɔŋ.” (Lyuk 21:20, 21) Wetin Jizɔs bin tɔk, bin apin. Di Ju pipul dɛn nɔ bin gri fɔ du wetin di Roman dɛn want. So wan edman na di Roman ami we nem Sɛstiɔs Galɔs, bin kam wit Roman sojaman dɛn, dɛn kam gɛda rawnd Jerusɛlɛm insay di ia 66, ɛn dɛn bin want fɔ pwɛl am. Bɔt i nɔ tu te, di sojaman dɛn bin tɔn bak ɛn dis bin gi Jizɔs in disaypul dɛn di chans fɔ rɔnawe kɔmɔt na Jerusɛlɛm ɛn Judia. Wan man we nem Yusibiɔs, we de rayt bɔt tin dɛn we dɔn pas, bin se bɔku pan Jizɔs in disaypul dɛn bin rɔnawe ɛn krɔs Riva Jɔdan fɔ go na Pɛla we de na Peria. Insay di ia 70, wan ɔda edman na di Roman ami we nem Taytɔs, bin kam bak wit sojaman dɛn ɛn pwɛl Jerusɛlɛm. Bɔt di Kristian dɛn we bin fala Jizɔs in wɔnin bin sev.

15. Us bad tin bin de mit di Kristian dɛn we dɛn bin de go bifo?

15 Tin nɔ bin izi fɔ Krays in disaypul dɛn, pipul dɛn bin de mek dɛn sɔfa, ɛn ɔda bad tin dɛn bin de mit dɛn, bɔt pan ɔl dat, di Kristian rilijɔn bin stil de go bifo. (Akt 11:19-21; 19:1, 19, 20) Wetin mek i bin de go bifo? Na bikɔs Gɔd bin de blɛs dɛn.—Prɔv. 10:22.

16. Fɔ mek dɛn fɔstɛm Kristian dɛn go bifo na Gɔd in yay, wetin dɛn bin gɛt fɔ du?

16 Fɔ mek dɛn fɔstɛm Kristian dɛn go bifo pan Gɔd biznɛs, dɛn bin gɛt fɔ tray tranga wan. I bin rili impɔtant fɔ mek dɛn stɔdi di Baybul gud gud wan, go mitin dɛn ɔltɛm, ɛn prich wit zil. Ɔl dɛn tin ya bin de mek Jiova in pipul dɛn we bin de da tɛm de, gɛt mɔ fet ɛn wanwɔd, jɔs lɛk aw in pipul dɛn de tide. Di kɔngrigeshɔn dɛn we bin de da tɛm de, bin rili ɔganayz. Dɛn bin gɛt ɛlda ɛn ministerial savant dɛn we bin rɛdi fɔ ɛp dɛn, ɛn di kɔngrigeshɔn dɛn bin de bɛnifit plɛnti we dɛn brɔda ya bin de tray tranga wan fɔ ɛp dɛn. (Fil. 1:1; 1 Pit. 5:1-4) Ɛn dɛn bin gɛt travlin ovasia dɛn bak, lɛk Pɔl we bin de go na di difrɛn difrɛn kɔngrigeshɔn dɛn. Ɔlman na di kɔngrigeshɔn go mɔs dɔn gladi we dɛn brɔda ya bin de go to dɛn! (Akt 15:36, 40, 41) Di we aw wi de wɔship Jiova tide fiba di we aw dɛn fɔstɛm Kristian dɛn bin de wɔship am trade. Wi rili gladi we Jiova bin ɔganayz in savant dɛn trade ɛn ivin naw! *

17. Wetin wi go tɔk bɔt insay di nɛks atikul?

17 As dis wɔl we Setan de rul de kam dɔn, di pat pan Jiova in ɔganayzeshɔn we de na dis wɔl de go bifo mɔ ɛn mɔ wit spid. So aks yusɛf dɛn kwɛstyɔn ya, ‘A de go bifo wit Jiova in ɔganayzeshɔn? A dɔn de tray fɔ go bifo na Gɔd in yay?’ Di nɛks atikul go sho yu aw yu go du dat.

^ par. 16 Rid dɛn atikul ya, we gɛt di taytul “Christians Worship With Spirit and Truth” ɛn “They Keep On Walking in the Truth” insay di Julay 15, 2002, Wachtawa. If yu want fɔ no plɛnti tin bɔt di pat pan Gɔd in ɔganayzeshɔn we de na dis wɔl tide, na fɔ rid wan buk we dɛn kɔl Jehovah’s Witnesses—Proclaimers of God’s Kingdom.