Go dayrɛkt to di men tin

Go dayrɛkt to di say we di difrɛn difrɛn atikul dɛn de

Nɔbɔdi Nɔ Go Ebul Sav Tu Masta

Nɔbɔdi Nɔ Go Ebul Sav Tu Masta

“Nɔbɔdi nɔ go bi slev to tu masta. . . . Una nɔ go de du Gɔd wok ɛn bi slev to mɔni.”—MAT. 6:24.

1-3. (a) Uskayn prɔblɛm dɛn bɔku pipul dɛn kin gɛt we i kam pan mɔni biznɛs? Aw sɔm dɛn dɔn tray fɔ sɔlv dɛn prɔblɛm ya? (Luk di pikchɔ nia dis atikul in taytul.) (b) Wetin sɔm kin wɔri bɔt we i kam pan aw fɔ mɛn dɛn pikin dɛn?

WAN sista we nem Marilin, bin tɔk se: “We mi man we nem Jems, bin de kɔmɔt wok ɛvride, i kin taya bad. * Bɔt di mɔni we dɛn bin de pe am nɔ bin de du. So a bin want fɔ ɛp am ɛn bay sɔm fayn fayn tin dɛn fɔ wi pikin, Jimi. So dat insɛf go gɛt wetin in skulmet dɛn gɛt.” Marilin bin want bak fɔ ɛp in fambul dɛn ɛn kip mɔni fɔ tumara bambay. Bɔku pan in padi dɛn bin dɔn go na ɔda kɔntri fɔ go fɛn mɔ mɔni. Bɔt we i de tink if i fɔ go, i nɔ bin no wetin fɔ du. Wetin mek?

2 Marilin bin de fred fɔ lɛf in famili we i rili lɛk ɛn di we aw dɛn bin de wɔship Gɔd togɛda ɔltɛm. Bɔt stil, i bin de tink se ɔda pipul dɛn de we dɔn go na ɔda kɔntri fɔ sɔm tɛm, ɛn dɛn famili stil de wɔship Gɔd. Bɔt i bin de tink bak bɔt aw i go mɛn Jimi we i go de fa frɔm am. Yu tink se i go ebul yuz di Intanɛt fɔ ɛp fɔ gi in pikin “Kristiɛn trenin”?—Ɛfi. 6:4.

3 Marilin bin aks fɔ advays so dat i go no wetin fɔ du. In man nɔ bin want lɛ i go, bɔt i se i nɔ go tray fɔ stɔp am. Di ɛlda dɛn ɛn ɔda brɔda ɛn sista dɛn na in kɔngrigeshɔn bin advays am nɔ fɔ go, bɔt bɔku ɔda sista dɛn bin advays am fɔ go. Dɛn bin de  tɛl am se: “If yu lɛk yu famili, yu go go. Yu go stil ebul fɔ sav Jiova.” Pan ɔl we Marilin nɔ bin shɔ se na di rayt tin i de du, i bin stil lɛf Jems ɛn Jimi fɔ go wok na ɔda kɔntri. I bin prɔmis dɛn se: “A nɔ de go te, a de kam jisnɔ.”

DI MAMA ƐN PAPA DƐN WOK ƐN DI ADVAYS WE DI BAYBUL GI

4. Wetin mek plɛnti pipul dɛn kin go na ɔda kɔntri? Udat dɛn kin lɛf dɛn pikin dɛn to fɔ mɛn?

4 Jiova nɔ want mek in savant dɛn po pasmak. Trade trade, pipul dɛn bin de muf go ɔdasay if dɛn po. (Sam 37:25; Prɔv. 30:8) Jekɔb bin sɛn in bɔy pikin dɛn fɔ go bay tin fɔ it na Ijipt fɔ mek angri nɔ go kil dɛn. * (Jɛn. 42:1, 2) Tide, bɔku pipul dɛn we kin go liv na ɔda kɔntri, nɔ kin go de bikɔs angri want fɔ kil dɛn. Bɔt dɛn kin go de bikɔs dɛn gɛt bɔku dɛt fɔ pe. Ɔda wan dɛn kin go de jɔs fɔ mek dɛn famili liv bɛtɛ layf. Fɔ mek bɔku pipul dɛn go ebul du ɔl wetin dɛn want na kɔntri we tin tranga, dɛn kin lɛf dɛn famili ɛn go de na ɔda pat na di kɔntri ɔ go de na ɔda kɔntri. Bɔku tɛm, dɛn kin lɛf dɛn smɔl pikin dɛn to dɛn man ɔ wɛf, ɔ to dɛn big pikin, ɔ to dɛn mama ɔ papa, ɔ to ɔda fambul dɛn, ɔ to dɛn padi dɛn. Pan ɔl we di wan dɛn we kin go na ɔda kɔntri, kin fil am bad we dɛn kin lɛf dɛn man ɔ wɛf ɛn dɛn pikin dɛn, plɛnti pan dɛn kin tink se natin nɔ de we dɛn go du, pas dɛn go.

5, 6. (a) Wetin Jizɔs bin tich bɔt gladi at ɛn jɛntri? (b) Wetin Jizɔs bin tich wi fɔ pre fɔ? (c) Aw Jiova de blɛs wi?

5 Di tɛm we Jizɔs bin de na di wɔl, bɔku pipul dɛn bin de we po ɛn we nɔ bin gɛt nɔbɔdi fɔ ɛp dɛn. Dɛnsɛf go mɔs dɔn de fil se dɛn go gladi mɔ if dɛn gɛt bɔku mɔni. (Mak 14:7) Bɔt Jizɔs bin want mek pipul dɛn abop pan ɔda tin. I bin want mek dɛn abop pan Jiova we na in de gi jɛntri we go de sote go. We Jizɔs bin de tich sɔm pipul dɛn ɔp wan mawnten, i bin ɛksplen to dɛn se fɔ mek mɔtalman gɛt tru tru gladi at, nɔ min se wi fɔ gɛt bɔku tin dɛn, lan bɔku buk, fɛn bɔku mɔni, ɔ du ɔda tin dɛn, bɔt na bay we wi gɛt padi biznɛs wit wi Papa we de na ɛvin.

6 We Jizɔs bin de tich wi aw fɔ pre, i nɔ bin tich wi fɔ pre fɔ jɛntri, bɔt i bin tich wi fɔ pre fɔ wetin wi nid ɛvride, we na “wetin wi fɔ it tide.” I tɛl di wan dɛn we bin de lisin am se: “Una nɔ fɔ kip plɛnti dia tin fɔ unasɛf na dis wɔl. . . . Bɔt una fɔ kip una jɛntri na ɛvin.” (Na wi mek am italiks; Mat. 6:9, 11, 19, 20) Wi biliv se Jiova go blɛs wi jɔs lɛk aw i dɔn prɔmis. We Gɔd de blɛs wi, i nɔ de jɔs tɛl wi tɛnki nɔmɔ; bɔt i de gi wi di tin dɛn we wi rili nid. Fɔ tru, di wangren we aw wi go gɛt tru tru gladi at na we wi abop pan wi Papa we de kia fɔ wi ɛn nɔ abop pan mɔni.—Rid Matyu 6:24, 25, 31-34.

7. (a) Udat dɛn Jiova gi di wok fɔ mɛn pikin dɛn? (b) Wetin mek na mama ɛn papa fɔ mɛn dɛn pikin dɛn?

7 Wan pan di tin dɛn we de sho se wi de ‘du di rayt tin we Gɔd want wi fɔ du,’ na we wi de si di wok we wi gɛt na di famili, di we aw Jiova de si am. Di Lɔ we Gɔd bin gi Mozis bin gɛt wan advays we de fɔ ɔlman we na Kristian. Wetin na dis advays? Mama ɛn papa dɛn fɔ tich dɛn pikin dɛn bɔt Gɔd. (Rid Ditarɔnɔmi 6:6, 7.) Na to mama ɛn papa dɛn Gɔd gi dis wok, nɔto to grani ɔ granpa, ɔ to ɛni ɔda pɔsin. Kiŋ Sɔlɔmɔn bin se: “Mi pikin, pe atɛnshɔn to wetin yu papa de tɛl yu, nɔ fɔgɛt wetin yu mama de tɛl yu.” (Na wi mek am italiks; Prɔv. 1:8) Jiova want lɛ mama ɛn papa dɛn de wit dɛn pikin dɛn fɔ gayd ɛn tich dɛn. (Prɔv. 31:10, 27, 28) We i kam  pan Gɔd biznɛs, pikin dɛn kin lan bɔku tin dɛn frɔm dɛn mama ɛn papa. Dɛn kin lan frɔm wetin dɛn de yɛri dɛn mama ɛn papa de tɔk bɔt Jiova ɛvride ɛn frɔm dɛn ɛgzampul.

PRƆBLƐM DƐN WE PƆSIN NƆ KIN TINK BƆT

8, 9. (a) Uskayn chenj dɛn kin apin we mama ɔ papa nɔ de wit dɛn famili? (b) Wetin na di prɔblɛm dɛn we kin apin we famili nɔ de liv togɛda?

8 Bifo pipul dɛn go na ɔda kɔntri, dɛn kin tray fɔ no wetin na sɔm prɔblɛm dɛn we dɛn go gɛt ɛn di tin dɛn we dɛn go lɔs, bɔt bɔku pipul dɛn nɔ kin tink bɔt ɔl di prɔblɛm dɛn we go apin we dɛn lɛf dɛn famili biɛn. (Prɔv. 22:3) * Jɔs afta Marilin go, i bigin fil am bad we i nɔ de nia in famili. In man ɛn in pikin sɛf bin de fil am bad we dɛn nɔ de togɛda. Jimi bin de aks in mama ɔltɛm se, “Wetin mek yu go lɛf mi?” Marilin bin jɔs plan fɔ go fɔ shɔt tɛm nɔmɔ, bɔt i go te na di kɔntri usay i go. As tɛm de go, i bigin si se plɛnti tin dɔn chenj na in famili. I si se Jimi dɔn bigin kip to insɛf, ɛn i bin tan lɛk se Jimi nɔ ivin bisin bɔt am igen. Marilin in at bin pwɛl we i tɔk se, “Mi pikin nɔ bin lɛk mi igen.”

9 We mama ɛn papa ɛn dɛn pikin dɛn nɔ de liv togɛda, dis kin kam wit bɔku bɔku prɔblɛm. * Dis kin apin mɔ we di pikin dɛn tu smɔl ɛn we di famili nɔ de liv togɛda fɔ lɔng tɛm. Marilin bin ɛksplen to Jimi se i de go wok na ɔda kɔntri fɔ in sek. Bɔt Jimi in bin tek am se in mama nɔ bisin bɔt am. Fɔs, Jimi nɔ bin gladi we in mama bin go. Bɔt ivin leta we in mama kam fɛn dɛn, i nɔ bin stil gladi wit am. Jimi bin fil se i nɔ fɔ obe ɛn lɛk in mama igen bikɔs i bin dɔn go lɛf am. Na so bɔku pikin dɛn kin fil we dɛn mama ɔ papa kin lɛf dɛn.—Rid Prɔvabs 29:15.

Yu nɔ go ebul fɔ ɔg yu pikin na di Intanɛt (Luk na paregraf 10)

10. (a) Aw di gi we mama ɔ papa de gi pikin gift bikɔs i nɔ de wit am go ambɔg di pikin? (b) Wetin mama ɔ papa nɔ go ebul fɔ du we i de mɛn in pikin dɛn we nɔ de nia am?

10 Bikɔs Marilin nɔ bin de nia in pikin, i bin de sɛn mɔni ɛn gift dɛn to am so dat i nɔ go vɛks pan am tumɔs. Bɔt Marilin kam fɔ si se i de ambɔg in padi biznɛs wit in pikin, ɛn i bin de tren in pikin fɔ lɛk mɔni pas Gɔd ɛn in famili. (Prɔv. 22:6) Jimi bin de tɛl in mama se: “Nɔ kam bak. Jɔs go de sɛn fɔ mi nɔmɔ.” Marilin bigin si se i nɔ go ebul yuz lɛta, fon kɔl, ɔ Intanɛt fɔ mɛn in pikin. I bin se, “Yu nɔ go ebul fɔ ɔg yu pikin na di Intanɛt ɔ kis am we i want fɔ go slip.”

Us prɔblɛm dɛn go kam we yu ɛn yu man ɔ wɛf nɔ de liv togɛda? (Luk na paregraf 11)

11. (a) Aw pɔsin kin ambɔg in mared we i lɛf in man ɔ in wɛf ɛn go wok na ɔda pat na di kɔntri ɔ go wok na ɔda kɔntri? (b) Wetin bin ɛp Marilin fɔ no se i fɔ go bak to in famili?

 11 Di padi biznɛs we Marilin bin gɛt wit Jiova ɛn wit in man, Jems, nɔ bin tayt igen. Na wangren de insay di wik i bin de go mitin ɛn fil savis ɛn sɔntɛnde, i nɔ kin ivin go. Ɛn i bin gɛt fɔ tinap tranga wan nɔ fɔ gri fɔ mek in ɛn in bɔs de. Bikɔs Marilin ɛn Jems nɔ bin de togɛda fɔ kɔrej dɛnsɛf, dɛn bigin lɛk ɔda pɔsin, ɛn i lɛf smɔl lɛ dɛn du mami ɛn dadi biznɛs wit ɔda pɔsin. Marilin kam fɔ si se pan ɔl we in ɛn in man nɔ bin du mami ɛn dadi biznɛs wit ɔda pɔsin, dɛn nɔ bin stil ebul fɔ du wetin di Baybul se mared pipul dɛn fɔ du, we na fɔ sho lɔv to dɛnsɛf ɛn du mami ɛn dadi biznɛs to dɛnsɛf. Bikɔs Marilin ɛn Jems nɔ bin de togɛda, dɛn nɔ bin ebul fɔ de sidɔm ɛn tɔk ɔl wetin dɛn de tink bɔt, ɔ wach dɛnsɛf ɛn smayl, ɔ ol dɛn an, ɔ ɔg dɛnsɛf, ɔ ivin sho “lɔv” to dɛnsɛf, ɔ ‘du ɔl wetin maredman ɔ mareduman fɔ du to in man ɔ wɛf.’ (Solo. In Siŋ 1:2; 1 Kɔr. 7:3, 5) Ɛn dɛn nɔ bin ebul fɔ wɔship Jiova gud gud wan wit dɛn pikin. Marilin se: “We a bin lan na wan kɔnvɛnshɔn se fɔ du famili wɔship ɔltɛm go ɛp wi fɔ sev we Jiova go kam pul di wikɛd wan dɛn kɔmɔt na di wɔl, dat bin ɛp mi fɔ no se a fɔ go bak to mi famili. A bigin tray fɔ du tin dɛn we go mek mi padi biznɛs wit Jiova ɛn mi famili, tayt bak.”

GUD ADVAYS ƐN BAD ADVAYS

12. Us advays de na di Baybul we yu go gi to di wan dɛn we nɔ de liv wit dɛn famili?

12 We Marilin bin disayd fɔ go bak to in famili, sɔm pipul dɛn bin gladi bɔt sɔm nɔ bin gladi. Di ɛlda dɛn na di kɔngrigeshɔn usay i de, bin prez am ɛn tɛl am tɛnki fɔ di fet ɛn kɔrej we i bin gɛt. Bɔt sɔm pipul dɛn we dɛnsɛf nɔ bin de nia dɛn famili, nɔ bin du dat. Bifo dɛn fala Marilin in gud ɛgzampul, dɛn tray fɔ pwɛl in at fɔ mek i nɔ go bak to in famili. Dɛn tɛl am se: “Yu go kam bak jisnɔ. Aw yu go ebul fɛn yu an-to-mɔt if yu go bak?” Bifo Kristian dɛn tray fɔ pwɛl dɛn kɔmpin in at, dɛn fɔ de advays di yɔŋ uman dɛn “fɔ lɛk dɛn man ɛn dɛn pikin, ɛn . . . dɛn fɔ de du dɛn os biznɛs gud,” na dɛn yon os, “so dat nɔbɔdi nɔ go tɔk bad bɔt Gɔd in mɛsej.”—Rid Taytɔs 2:3-5.

13, 14. Wetin mek wi nid fɔ gɛt fet if wi want fɔ put wetin Jiova want bifo wetin wi famili want? Gi ɛgzampul.

13 Bɔku pan di pipul dɛn we kin muf go na ɔda kɔntri, kɔmɔt na ples dɛn we pipul dɛn fil se dɛn fɔ du ɔl wetin dɛn mama ɛn papa se. Fɔ mek pɔsin we na Kristian, nɔ du wetin bɔku pipul dɛn de du ɔ nɔ du wetin in famili se bikɔs i want fɔ du wetin Jiova want, de sho se i rili gɛt fet.

14 Tink bɔt Karin in stori. I se: “Mi ɛn mi  man bin de wok na ɔda kɔntri we wi bɔn wi pikin we nem Dɔn. Dɛn tɛm dɛn de, a bin jɔs dɔn bigin fɔ stɔdi di Baybul. Ɔlman na mi famili bin fil se a go sɛn Dɔn go to mi mama ɛn papa fɔ mek dɛn mɛn am fɔ wi te wi gɛt mɔni.” We Karin bin pin se insɛf sɛf go mɛn in pikin, in fambul dɛn, ɛn ivin in man, bin de laf am ɛn se i lezi. Karin se: “Fɔ tru, a nɔ bin rili ɔndastand wetin mek i bad fɔ sɛn Dɔn go to mi mama ɛn papa fɔ jɔs smɔl tɛm. Bɔt a bin no se na wi we bɔn wi pikin, na wi Jiova dɔn gi di wok fɔ mɛn am.” We Karin kam gɛt bɛlɛ bak, in man we nɔ bin de stɔdi di Baybul, se pawpa i fɔ pwɛl di bɛlɛ. We Karin nɔ bin gri fɔ sɛn Dɔn go to in mama ɛn papa, dat bin dɔn ɛp am fɔ gɛt mɔ fet. So dis bin mek i tinap tranga wan fɔ Jiova we in man bin tɛl am fɔ pul di bɛlɛ. Naw, in ɛn in man, ɛn dɛn tu pikin dɛn gladi we dɛn ɔl de liv togɛda. If Karin bin sɛn wan pikin ɔ ɔl tu in pikin dɛn fɔ mek ɔda pipul dɛn mɛn dɛn, ɔlman na in famili nɔ bin fɔ gladi di we aw dɛn gladi naw.

15, 16. (a) Ɛksplen wetin apin to wan sista we in mama ɛn papa bin sɛn am go to in grani fɔ mɛn. (b) Wetin mek in disayd nɔ fɔ sɛn in yon pikin to in mama fɔ mɛn?

15 Wan Jiova Witnɛs we nem Viki, bin tɔk se: “We a bin smɔl, a bin de wit mi grani fɔ sɔm tɛm, bɔt mi smɔl sista in bin de wit mi mama ɛn papa. Bay di tɛm we a go de wit mi mama ɛn papa, a nɔ bin de fil fri wit dɛn igen. Bɔt mi sista, in bin de fil fri fɔ tɔk to dɛn, fɔ ɔg dɛn, ɛn in ɛn dɛn na bin tayt padi. Mi nɔ bin yus to mi mama ɛn papa, ɛn te a big sɛf, i nɔ bin izi fɔ mek a tɛl dɛn di we aw a rili bin de fil. Mi ɛn mi sista dɔn tɛl wi mama ɛn papa se wi go kia fɔ dɛn we dɛn ol. Bɔt a go du am mɔ bikɔs na dɛn bɔn mi, bɔt mi sista in go kia fɔ dɛn bikɔs i lɛk dɛn.

16 “Naw, mi mama want mek a sɛn mi gyal pikin to am fɔ mɛn, jɔs lɛk aw i bin sɛn mi to in mama. Bɔt a tek tɛm tɛl am se a nɔ go sɛn mi pikin. Mi ɛn mi man want fɔ mɛn wi pikin di we aw Jiova want. Ɛn a nɔ want fɔ pwɛl mi padi biznɛs wit mi pikin.” Viki dɔn kam fɔ no se fɔ fɛn mɔni ɛn fɔ du wetin yu famili want nɔto in go mek pɔsin in layf bɛtɛ, bɔt di wangren tin we go mek pɔsin bɛtɛ, na we i put wetin Jiova want fɔs ɛn fala di advays we i de gi. Jizɔs bin tɔk klia wan se: “Nɔbɔdi nɔ go bi slev to tu masta.” Dis min se pɔsin nɔ go ebul fɔ wok fɔ Gɔd ɛn wok fɔ gɛt jɛntri.—Na wi mek am italiks; Mat. 6:24; Ɛks. 23:2.

JIOVA GO MEK “BƐTƐ FALA” WI WE WI TRAY FƆ DU DI RAYT TIN

17, 18. (a) Na wetin Kristian dɛn gɛt fɔ disayd? (b) Us kwɛstyɔn dɛn wi go ansa na di nɛks atikul?

17 Wi Papa, Jiova, dɔn tɔk se i go ɛp wi fɔ gɛt di tin dɛn we wi rili nid if wi put in Kiŋdɔm fɔs na wi layf ɛn du di rayt tin we i want wi fɔ du. (Mat. 6:33) So tru Kristian dɛn gɛt fɔ disayd wetin dɛn want fɔ du ɔltɛm. Jiova dɔn prɔmis wi se i go ‘sho wi wetin fɔ du’ so dat wi nɔ go kɔmɔt biɛn in advays dɛn we de na di Baybul, ilɛk uskayn prɔblɛm de mit wi. (Rid Fɔs Lɛta Fɔ Kɔrint 10:13.) We wi “sidɔm, luk” wetin Jiova go du fɔ wi, we wi sho se wi “trɔs am” bay we wi de pre to am fɔ gi wi sɛns, fɔ sho wi aw fɔ waka na layf, ɛn fala in lɔ ɛn advays dɛn we i de gi, dat go mek i “mɔs ɛp [wi].” (Sam 37:5, 7) I go blɛs wi we wi tray wi bɛst fɔ sav in wangren as wi Masta. If wi put am fɔs na wi layf, i go mek wi layf “bɛtɛ.”—Luk Jɛnɛsis 39:3.

18 Wetin pɔsin go du fɔ sɔlv di prɔblɛm dɛn we in famili de gɛt bikɔs i nɔ bin de wit dɛn? Wetin-ɛn-wetin wi go du fɔ ebul liv wit wi famili ɛn fɛn an-to-mɔt fɔ dɛn? Aw wi go ɛnkɔrej ɔda pipul dɛn fɔ du di rayt tin we go mek dɛn nɔ lɛf dɛn famili? Di nɛks atikul go ansa dɛn kwɛstyɔn ya.

^ par. 1 Nɔto dɛn rial nem.

^ par. 4 We Jekɔb in pikin dɛn bin de go na Ijipt, na fɔ lɛk tri wiks so dɛn nɔ kin de nia dɛn famili. Bɔt we Jekɔb ɛn in pikin dɛn bin de muf go na Ijipt, dɛn bin kɛr dɛn wɛf ɛn dɛn pikin dɛn wit dɛn.—Jɛn. 46:6, 7.

^ par. 8 Rid di Fɛbwari 2013 Awake! we tɔk bɔt “Immigration—Dreams and Realities.”

^ par. 9 Di stori dɛn we wi kin yɛri frɔm difrɛn difrɛn kɔntri dɛn dɔn sho se we di man ɔ in wɛf go wok na ɔda kɔntri ɛn lɛf in kɔmpin ɛn di pikin dɛn biɛn, dis kin mek plɛnti siriɔs prɔblɛm dɛn apin na di famili. Sɔm pan dɛn prɔblɛm ya kin bi we di man ɔ in wɛf ɔ dɛn ɔl tu go du mami ɛn dadi biznɛs wit ɔda pɔsin, ɔ go du mami ɛn dadi biznɛs wit in kɔmpin man ɔ uman, ɔ wit fambul. Di pikin dɛnsɛf kin gɛt dɛn yon prɔblɛm dɛn. Sɔm kin biev bad ɛn dɛn nɔ kin du wɛl na skul, dɛn kin kwik fɔ vɛks ɛn fɛt, dɛn kin wɔri, dɛn at kin pwɛl bad, ɔ dɛn kin ivin want fɔ kil dɛnsɛf.