Go dayrɛkt to di men tin

Go dayrɛkt to di say we di difrɛn difrɛn atikul dɛn de

Falamakata di Kayn Fet we Mozis Bin Gɛt

Falamakata di Kayn Fet we Mozis Bin Gɛt

“Na bikɔs Mozis bin biliv Gɔd, mek wɛn i dɔn big, i nɔ gri mek dɛn se na di Kiŋ na Ijipt in gyal pikin bɔn am.”—IBRU 11:24.

1, 2. (a) Wetin Mozis bin disayd fɔ du we i bin ol 40 ia? (Luk di pikchɔ nia dis atikul in taytul.) (b) Wetin mek Mozis bin chuz fɔ mek dɛn trit am lɛk slev wit Gɔd in pipul dɛn?

MOZIS bin no bɔt ɔl di fayn fayn tin dɛn we i go gɛt na Ijipt. I bin de si di big big os dɛn we di jɛntriman dɛn bin gɛt. I bin de na di famili we bin de rul Ijipt. Dɛn bin “tren Mozis lɛkɛ dɛn Ijipt pikin.” Sɔntɛm i bin stɔdi bɔt di mun ɛn di sta dɛn, mats, ɛn ɔda sayɛns sɔbjɛkt dɛn. (Akt 7:22) Mozis bin gɛt di chans fɔ gɛt bɔku jɛntri, pawa, ɛn ɔda tin dɛn we ɔdinari Ijipshian nɔ bin fɔ gɛt.

2 Bɔt we Mozis bin ol 40 ia, i bin disayd fɔ du sɔntin we mek in Ijipshian famili we mɛn am, bin sɔprayz. I nɔ bin ivin chuz fɔ liv lɛk aw dɛn ɔdinari Ijipshian dɛn bin de liv, bɔt i bin chuz fɔ liv wit slev dɛn! Wetin mek Mozis du dat? Na bikɔs i bin gɛt fet. (Rid Di Ibru Pipul Dɛn 11:24-26.) Di fet we Mozis bin gɛt, bin mek i nɔ bin de tink bɔt di tin dɛn nɔmɔ we de na dis wɔl. Mozis bin gɛt fet pan di Pɔsin “we mɔtalman nɔ de si” we na Jiova, ɛn i bin biliv se Gɔd go du ɔl wetin i dɔn prɔmis.—Ibru 11:27.

3. Wetin na di tri kwɛstyɔn dɛn we wi go fɛn ansa to insay dis atikul?

 3 Wisɛf nɔ fɔ de tink bɔt di tin dɛn nɔmɔ we de na dis wɔl. Wi fɔ bi pipul dɛn we “biliv Gɔd.” (Ibru 10:38, 39) Fɔ ɛp wi fɔ gɛt mɔ fet, lɛ wi lan bɔt Mozis frɔm wetin dɛn rayt bɔt am na Di Ibru Pipul Dɛn 11:24-26. As wi de lan, tray fɔ luk fɔ di ansa to dɛn kwɛstyɔn ya. Aw di fet we Mozis bin gɛt bin ɛp am nɔ fɔ du wetin in at bin de tɛl am fɔ du? We Mozis bin de sɔfa, aw di fet we i bin gɛt ɛp am fɔ gladi fɔ di spɛshal wok we Gɔd bin gi am? Ɛn wetin mek Mozis bin “put in at pan di blɛsin we i go gɛt bambay”?

I NƆ GRI FƆ DU WETIN IN AT BIN DE TƐL AM FƆ DU

4. Wetin Mozis bin no bɔt di gladi we wi kin “gladi fɔ du bad”?

4 Di fet we Mozis bin gɛt bin ɛp am fɔ no se di gladi we pɔsin kin “gladi fɔ du bad” nɔ kin te. Sɔm pipul dɛn bin de tink se pan ɔl we di pipul dɛn na Ijipt bin de put an pan ɔlkayn juju biznɛs ɛn wɔship aydɔl bɛtɛ bɛtɛ wan, na dɛn stil bin de rul di wan ol wɔl, bɔt Jiova in yon pipul dɛn bin de as slev ɔnda dɛn! Mozis bin no se Gɔd go du sɔntin fɔ chenj dat. Pan ɔl we di wan dɛn we bin de du dɛn bad tin ya na Ijipt, bin tan lɛk se dɛn de go bifo, Mozis bin gɛt fet se tɛm go kam we di wikɛd wan dɛn nɔ go de igen. Na dis mek i nɔ bin “gladi fɔ du bad we i no se da gladi de nɔ go te.”

5. Wetin go ɛp yu fɔ lɛ yu nɔ “gladi fɔ du bad” tin?

5 Wetin go ɛp yu fɔ lɛ yu nɔ “gladi fɔ du bad” tin? Yu nɔ fɔ ɛva fɔgɛt se di gladi we pɔsin de gladi we i de du bad, nɔ de te. Di fet we yu gɛt go ɛp yu fɔ no se “di wɔl ɛn ɔltin we [de] de we pipul want bad bad go dɔn wande.” (1 Jɔn 2:15-17) Tink bɔt wetin gɛt fɔ apin to di bad wan dɛn we nɔ gri fɔ chenj. Di Baybul se dɛn de na “slipul ples . . . i go bad fɔ dɛn we dɛn rich dɛn watalo”! (Sam 73:18, 19) Ɛnitɛm we yu want fɔ du bad tin, na fɔ aks yusɛf dis kwɛstyɔn, ‘Aw a go want mi tumara bambay fɔ bi?’

6. (a) Wetin mek Mozis “nɔ gri mek dɛn se na di Kiŋ na Ijipt in gyal pikin bɔn am”? (b) Wetin mek Mozis disayd fɔ du di rayt tin?

6 Di fet we Mozis bin gɛt bin ɛp am fɔ chuz fɔ du di rayt tin. “Na bikɔs Mozis bin biliv Gɔd, mek wɛn i dɔn big, i nɔ gri mek dɛn se na di Kiŋ na Ijipt in gyal pikin bɔn am.” (Ibru 11:24) Mozis nɔ bin de tink se i go de sav Gɔd we i de na di Kiŋ in os ɛn stil yuz in jɛntri ɛn post fɔ ɛp in Izrɛlayt brɔda dɛn. Bɔt Mozis bin mekɔp in maynd fɔ lɛk Jiova wit ɔl in at, sol, ɛn trɛnk. (Dit. 6:5) Dis tin we Mozis bin disayd fɔ du bin mek i nɔ bin gɛt wan rigrɛt. I nɔ tu te, di Izrɛlayt dɛn bin tek bɔku pan di jɛntri we bin de na Ijipt we Mozis bin dɔn tɔn in bak pan! (Ɛks. 12:35, 36) Fɛro bin shem ɛn i bin day. (Sam 136:15) Bɔt Gɔd bin sev Mozis ɛn I bin yuz am fɔ lid in pipul dɛn fɔ go na say we bad tin nɔ go apin to dɛn. Mozis bin yuz ɔl in layf fɔ sav Gɔd ɛn dis bin mek i rili gladi.

7. (a) Frɔm wetin Matyu 6:19-21 se, wetin mek wi nɔ fɔ kip jɛntri na dis wɔl we nɔ go te? (b) Gi wan ɛgzampul we de sho se fɔ jɛntri na dis wɔl ɛn fɔ gɛt Gɔd in yon jɛntri na tu difrɛn tin.

7 If yu na yɔŋ pɔsin we de sav Jiova, aw fet go ɛp yu fɔ chuz wetin yu want fɔ du wit yu layf? Yu go sho se yu gɛt sɛns if yu plan fɔ tumara bambay. Bɔt yu tink se di fet we yu gɛt pan di prɔmis dɛn we Gɔd dɔn mek go mek yu kip jɛntri na dis wɔl we nɔ go te ɔ yu go kip jɛntri fɔ di wɔl we go de sote go? (Rid Matyu 6:19-21.) Na dis kwɛstyɔn bin de na Sofi in maynd. Sofi na pɔsin we sabi dans bale gud gud wan. Dɛn bin gi am skɔlaship dɛn ɛn ay pozishɔn na di bale kɔmni dɛn we de na Amɛrika. Sofi bin se: “A bin gladi pasmak we pipul dɛn de kɔle mi. Infakt, a bin de fil se a bɛtɛ pas mi kɔmpin dɛn. Bɔt stil, a nɔ bin gɛt gladi at.” Wande, Sofi wach wan fim we dɛn kɔl Young People Ask—What Will I Do With My Life? Sofi se: “A kam fɔ no se di tin dɛn we di wɔl de gi mi fɔ mek a  go bifo ɛn di kɔle we i de mek pipul dɛn kɔle mi, na fɔ lɛ a nɔ wɔship Jiova wit ɔl mi at. So a pre to Jiova gud gud wan. Afta dat, a lɛf fɔ dans bale.” Aw Sofi bin fil we i lɛf fɔ dans? I se: “A nɔ bin fil am atɔl. Naw, a rili gɛt gladi at. Mi ɛn mi man de payɔnia. Nɔto ɔlman sabi wi, ɛn wi nɔ gɛt bɛtɛ mɔni. Bɔt wi gɛt Jiova, wi gɛt wi Baybul stɔdi dɛn, ɛn wi gɛt ɔda tin dɛn we wi want fɔ du fɔ sav Jiova mɔ. A nɔ rigrɛt am atɔl.”

8. Us advays di Baybul gi we go ɛp yɔŋ pɔsin fɔ disayd wetin i go du wit in layf?

8 Jiova no wetin gud fɔ yu. Mozis bin tɛl di Izrɛlayt dɛn se, ‘PAPA GƆD se i want mek dɛn wɔship am ɛn wok fɔ am wit ɔl dɛn at ɛn ɔl dɛn sol, ɛn du ɔl wetin i tɛl dɛn se dɛn fɔ du, so dat ɔltin go fayn fɔ dɛn.’ (Dit. 10:12, 13) Naw we yu yɔŋ, i go fayn lɛ yu chuz wok we go ɛp yu fɔ lɛk Jiova ɛn sav am ‘wit ɔl yu at ɛn ɔl yu sol.’ Wan tin we yu fɔ no na dat, dis tin we yu go du go mek ‘ɔltin fayn fɔ yu.’

I BIN GLADI FƆ DI SPƐSHAL WOK WE I GƐT

9. Ɛksplen wetin mek i nɔ bin izi fɔ lɛ Mozis du di wok we Jiova gi am.

9 Mozis bin “gri se if i sɔfa fɔseka di Mɛsaya we Gɔd go sɛn kam na [di] wɔl, dat bɛtɛ fɔ am, pas fɔ gɛt ɔl di jɛntri we de na Ijipt.” (Ibru 11:26) Jiova bin pik Mozis fɔ bi lɛk “di Mɛsaya” ɔ “pɔsin we Gɔd dɔn anɔynt.” We min se na Mozis Gɔd bin pik fɔ pul di Izrɛlayt dɛn kɔmɔt na Ijipt. Mozis bin no se fɔ du dis wok nɔ go izi; i bin no se i gɛt fɔ “sɔfa.” Wan pan di Izrɛlayt dɛn bin ivin aks am se, ‘Udat gi yu pawa fɔ bi rula ɛn jɔj fɔ wi kes?’ (Ɛks. 2:13, 14) Leta, Mozis aks Jiova se: “Wetin a go se to di kiŋ we [go] mek i lisin to mi?” (Ɛks. 6:12) Fɔ mek Mozis rɛdi ɛn ebul fɔ bia di sɔfa we i gɛt fɔ sɔfa, i bin tɛl Jiova aw i bin de fil ɛn wetin de mɔna am. Aw Jiova bin ɛp Mozis fɔ du dis wok we nɔ bin izi?

10. Aw Jiova bin ɛp Mozis fɔ rɛdi fɔ di wok we i bin gi am?

10 Di fɔs we aw Jiova ɛp Mozis, na we i tɛl am se: “A go de wit yu.” (Ɛks. 3:12) Di sɛkɔn tin we Jiova du fɔ ɛp Mozis fɔ gɛt maynd, na we i ɛksplen to am wan pan di minin dɛn we in nem gɛt. Gɔd bin tɛl Mozis se: “A GO BI ƐNITIN WE A WANT FƆ BI.” * (Ɛks. 3:14, NW) Di tɔd we aw Gɔd ɛp Mozis na we i gi am pawa fɔ sho se na in rili sɛn am. (Ɛks. 4:2-5) Di las tin we Jiova bin du fɔ ɛp Mozis fɔ du dis wok fayn fayn wan, na we i gi am Erɔn we go de ɛp am ɛn tɔk fɔ am. (Ɛks. 4:14-16) Te to di tɛm we Mozis day, i bin biliv tranga tranga wan se Gɔd de gi in savant dɛn ɔl wetin dɛn nid fɔ du di wok we i gi dɛn. Na dat mek Mozis bin tɛl Jɔshwa, we bin tek in ples se: “PAPA GƆD go de bifo dɛn ɛn i go de wit dɛn ɔltɛm; i nɔ go kɔmɔt biɛn dɛn, so i nɔ sɔpoz fɔ fred natin ɔ pwɛl at.”—Dit. 31:8.

11. Wetin mek Mozis bin rili valyu di wok we Gɔd gi am?

11 Jiova bin de ɛp Mozis, ɛn dis bin mek Mozis rili valyu in wok pan ɔl we i nɔ bin izi fɔ am. I bin si dis wok as sɔntin we bɛtɛ “pas . . . ɔl di jɛntri we de na Ijipt.” Uswan wi go se bɛtɛ, fɔ sav Fɛro ɔ fɔ sav Gɔd we gɛt pawa pas ɔlman? Ɔ us valyu fɔ bi prins na Ijipt gɛt, we yu kɔmpia am to di pɔsin we Jiova pik fɔ pul di Izrɛlayt dɛn kɔmɔt na Ijipt? Jiova bin blɛs Mozis bikɔs Mozis bin gladi fɔ du ɔl wetin i tɛl am fɔ du. Mozis bin gɛt tayt padi biznɛs wit Jiova; na dat bin ɛp am fɔ du “fiaful tin dɛn” we i bin de kɛr di Izrɛlayt dɛn go na di say we Gɔd bin dɔn prɔmis dɛn.—Dit. 34:10-12.

12. Us wok we Jiova dɔn gi wi we wi fɔ rili valyu?

12 Wisɛf gɛt wok fɔ du. Jiova dɔn mek in Pikin pik wi fɔ du di prichin wok, jɔs lɛk aw i bin pik Pita ɛn di ɔda apɔsul dɛn. (Rid Fɔs  Lɛta To Timoti 1:12-14.) Na wi ɔl gɛt dis wok fɔ tɛl pipul dɛn di gud nyus. (Mat. 24:14; 28:19, 20) Sɔm brɔda ɛn sista dɛn de, we de yuz ɔl dɛn tɛm fɔ sav Jiova. Ɔda machɔ brɔda dɛn de na di kɔngrigeshɔn we de sav as ministerial savant ɛn ɛlda dɛn. Sɔntɛnde, yu fambul dɛn ɛn ɔda pipul dɛn we nɔto Jiova Witnɛs go bigin aks yu wetin na di bɛnifit we yu de gɛt biɛn dis wok, ɔ dɛn go ivin tɔk pan yu bikɔs yu dɔn disayd fɔ yuz yu tɛm fɔ sav Jiova. (Mat. 10:34-37) Bɔt if yu gri fɔ mek dɛn pwɛl yu at, yu go bigin tink if na fayn tin yu de du, we yu de yuz ɔl yu tɛm fɔ sav Gɔd ɔ if yu go rili ebul fɔ du dis wok. If dat apin to yu, aw fet go ɛp yu fɔ kɔntinyu fɔ du dis wok?

13. Aw Jiova de ɛp wi fɔ du di wok dɛn we i dɔn gi wi?

13 Na fɔ biliv Jiova ɛn beg am fɔ ɛp yu. Tɛl am aw yu de fil ɛn ɔl wetin de mɔna yu. Nɔ fɔgɛt se na Jiova gi yu dis wok, ɛn i go ɛp yu so dat yu go ebul fɔ du am. Aw i go ɛp yu? I go ɛp yu di sem we jɔs lɛk aw i bin ɛp Mozis. Fɔs, Jiova de tɛl yu se: “A go gi yu trɛnk, a go ɛp yu, a go ol yu ɔp wit mi raytan we de win ɔltɛm.” (Ayz. 41:10) Sɛkɔn, Jiova de mɛmba yu se ɔl wetin i dɔn prɔmis fɔ du, i go du am. Na dat mek i se: “A dɔn tɔk am, ɛn a go mek I bi; A dɔn mek ɔp am, ɛn a go du am.” (Ayz. 46:11) Tɔd, Jiova rɛdi fɔ gi yu “di pawa fɔ kɔntrol ɔltin” so dat yu go ebul fɔ du di prichin wok. (2 Kɔr. 4:7) Wetin na di las tin we Jiova dɔn gi yu fɔ ɛp yu fɔ kɔntinyu fɔ du dis wok? Jiova we na wi Papa we kia fɔ wi, dɔn gi yu bɔku brɔda ɛn sista dɛn we de ɔlsay na di wɔl. Dɛn brɔda ɛn sista ya de ‘kɔrej ɛn ɛp dɛn kɔmpin Kristian dɛn.’ (1 Tɛs. 5:11) As Jiova de ɛp yu fɔ du in wok, na di mɔ yu go de gɛt fet pan am ɛn dat go mek yu valyu di wok we i gi yu pas ɛni jɛntri na dis wɔl.

“I PUT IN AT PAN DI BLƐSIN WE I GO GƐT BAMBAY”

14. Wetin mek Mozis bin biliv se Gɔd go blɛs am?

14 Mozis bin “put in at pan di blɛsin we i go gɛt bambay.” (Ibru 11:26) Fɔ tru, pan ɔl we Mozis nɔ bin sabi bɛtɛ bɔt di tumara bambay, i bin stil put in at pan di blɛsin we i go gɛt da tɛm de. Mozis bin biliv se Jiova ebul fɔ gi layf bak to di wan dɛn we dɔn day, jɔs lɛk aw Ebraam bin biliv. (Lyuk 20:37, 38; Ibru 11:17-19) Bikɔs Mozis bin de tink bɔt di blɛsin dɛn we i go gɛt tumara bambay, dat bin ɛp am nɔ fɔ tink se na west i bin de west in layf we i tek 40 ia as rɛfyuji ɛn 40 ia na di ɛmti land usay pɔsin nɔ go ebul de. Pan ɔl we Mozis nɔ bin no aw Gɔd go du ɔl wetin i  dɔn prɔmis, i bin stil gɛt fet se ɔl di tin dɛn we Gɔd dɔn prɔmis go bi.

15, 16. (a) Wetin mek wi fɔ de tink bɔt di blɛsin dɛn we wi go gɛt tumara bambay? (b) Us blɛsin dɛn yu rili want fɔ ɛnjɔy ɔnda Gɔd in Kiŋdɔm?

15 Yu de ‘put yu at pan di blɛsin we yu go gɛt tumara bambay’? Jɔs lɛk Mozis, wisɛf tide nɔ no ɔltin bɔt di prɔmis dɛn we Gɔd dɔn mek. Fɔ ɛgzampul, wi “nɔ no ustɛm” da big trɔbul go kam na di wɔl. (Mak 13:32, 33) Bɔt wi no plɛnti tin dɛn we Mozis nɔ bin no bɔt di Paradays we gɛt fɔ kam. Pan ɔl we wi nɔ no ɔltin, wi gɛt bɔku prɔmis dɛn we Gɔd dɔn mek we de sho wi aw layf go tan lɛk ɔnda Gɔd in Kiŋdɔm. Dɛn prɔmis ya de mek wi ‘put wi at pan’ da Kiŋdɔm de. We wi de tink bɔt aw da nyu wɔl de go tan lɛk, dis go mek wi put Gɔd in Kiŋdɔm fɔs na wi layf. Aw wi go ebul du dat? Tink bɔt dis: Yu go bay os we yu nɔ no bɛtɛ tin bɔt am? Nɔ, yu nɔ go du dat! Wɛl, na di sem tin we i kam pan di we aw wi de liv wi layf. Wi nɔ go yuz ɔl wi layf pan tin dɛn we wi no se nɔ de gi wi wan op. Di fet we wi gɛt go ɛp wi fɔ si klia wan aw layf go tan lɛk ɔnda Gɔd in Kiŋdɔm.

Wi go gladi pasmak fɔ tɔk to Mozis ɛn Gɔd in ɔda fetful savant dɛn! (Luk na paregraf 16)

16 Fɔ mek yu go ebul si klia wan aw Gɔd in Kiŋdɔm go tan lɛk, na fɔ tink bɔt aw yu layf go tan lɛk insay Paradays. Fɔ ɛgzampul, we yu de stɔdi di Baybul bɔt pipul dɛn we bin de bifo Jizɔs kam na di wɔl, yu fɔ de tink bɔt us kwɛstyɔn yu go aks dɛn we dɛn gɛt layf bak. Ɛn yu fɔ de tink bak bɔt us kwɛstyɔn dɛn, dɛn go aks yu bɔt aw layf bin tan lɛk we di wɔl bin want fɔ dɔn. Tink bɔt aw yu go gladi fɔ si dɛn yu fɔs fɔstɛm granpa dɛn we bin de trade trade. Ɛn tink bak bɔt aw yu go gladi fɔ tich dɛn bɔt ɔl di tin dɛn we Gɔd dɔn du fɔ dɛn. Tink bak bɔt aw yu go gladi we yu de wach plɛnti wayl animal dɛn ɛn lan bɔt dɛn. Dɛn wayl animal ya nɔ go de du ɛni bad tin igen. Tink bɔt aw yu go de kam nia Jiova mɔ ɛn mɔ as yu de pafɛkt.

17. Aw di tink we wi de tink bɔt di blɛsin dɛn we wi go gɛt tumara bambay go ɛp wi tide?

17 We wi de tink bɔt di blɛsin dɛn we wi go gɛt, dat go ɛp wi fɔ kɔntinyu fɔ wɔship Jiova, fɔ kɔntinyu fɔ gladi, ɛn fɔ disayd fɔ du tin dɛn we go mek wi gɛt layf we go de sote go tumara bambay. Pɔl bin rayt to anɔyntɛd Kristian dɛn se: “If wi de abop fɔ tin we wi nɔ si yet, wi go bia wet fɔ am.” (Rom 8:25) Dis advays na fɔ ɔl Kristian dɛn we gɛt di op fɔ gɛt layf we go de sote go. Pan ɔl we wi nɔ gɛt di blɛsin dɛn yet, di fet we wi gɛt de mek wi kɔntinyu fɔ wet fɔ ‘di blɛsin dɛn we wi go gɛt tumara bambay.’ Jɔs lɛk Mozis, wi nɔ de tink se na west wi dɔn west wi layf fɔ sav Jiova. Bifo dat, wi biliv se “dɛn tin we wi de si nɔ de las, bɔt dɛn tin we wi nɔ de si go de sote go.”—Rid Sɛkɛn Lɛta Fɔ Kɔrint 4:16-18.

18, 19. (a) Wetin mek wi fɔ tray tranga wan fɔ kɔntinyu fɔ gɛt fet? (b) Wetin wi go lan insay di nɛks atikul?

18 Fet de mek wi “no se, dɛn tin we wi nɔ de si, de, fɔ tru.” (Ibru 11:1) Pɔsin we nɔ gɛt Gɔd in spirit nɔ de si se i rili impɔtant fɔ sav Jiova. To da kayn pɔsin de, Gɔd in biznɛs “na nɔnsɛns.” (1 Kɔr. 2:14) Bɔt wi difrɛn. Wi de op fɔ gɛt layf we go de sote go ɛn si pipul dɛn we go gɛt layf bak, bɔt di pipul dɛn we de na di wɔl nɔ de tink bɔt dɛn tin ya. Jɔs lɛk dɛn masta sabi bukman dɛn we bin de tɛl Pɔl se i “nɔ sabi buk,” na so bɔku pipul dɛn tide de tink se di prich we wi de prich na nɔnsɛns.—Akt 17:18.

19 Insay dis wɔl we wi de tide, plɛnti pipul dɛn nɔ gɛt fet, so wi fɔ tray tranga wan fɔ kɔntinyu fɔ gɛt fet. Yu fɔ de beg Jiova fɔ mek i ɛp yu so dat yu nɔ go “tap fɔ biliv.” (Lyuk 22:32) I go fayn mek yu de tink bɔt di prɔblɛm dɛn we yu go gɛt if yu put yu an pan bad tin. Dɔn yu fɔ de tink bɔt di blɛsin dɛn we yu go gɛt we yu sav Jiova, ɛn di op we yu gɛt fɔ liv sote go. Di fet we Mozis bin gɛt bin ɛp am fɔ si ɔda tin dɛn we pas dɛn wan ya. Insay di nɛks atikul, wi go lan aw fet bin ɛp Mozis fɔ si “Gɔd we mɔtalman nɔ de si.”—Ibru 11:27.

^ par. 10 Wan man we bin stɔdi di Baybul gud gud wan, bin rayt bɔt wetin Gɔd tɔk na Ɛksodɔs 3:14. I bin se dis vas de sho se: “Natin nɔ go ebul stɔp Gɔd fɔ du wetin i want . . . Dis nem [Jiova] na in bin fɔ tan lɛk ples we go protɛkt di Izrɛlayt dɛn, ɛn gi dɛn op ɛn kɔrej ɔltɛm.”