DI TƆPIK NA DI FRƆNT PEJ
Yu Tink Se Yu Fɔ Pre?
Sɔntɛm yu go aks se, ‘If Gɔd sabi ɔltin, ivin wetin a de tink ɛn di tin dɛn we a nid, wetin mek a fɔ pre to am?’ Dis kwɛstyɔn rili impɔtant bikɔs Jizɔs bin tɔk se Gɔd ‘no wetin wi nɔ gɛt bifo wi aks am.’ (Matyu 6:8) Kiŋ Devid we bin de trade trade na Izrɛl bin no dis, ɛn i bin rayt se: “PAPA GƆD, bifo a opin mi mɔt fɔ tɔk sɛf, yu no wetin a wan se.” (Sam 139:4) So, wetin mek naw wi fɔ pre to Gɔd? Fɔ ansa dis kwɛstyɔn, lɛ wi si wetin di Baybul se bɔt prea? *
“Una kam klos Gɔd ɛn i go kam klos una.”—Jems 4:8
PREA DE MEK WI KAM NIA GƆD
Pan ɔl we di Baybul se Jiova * Gɔd no ɔltin, i sho wi bak se Jiova nɔ jɔs no di difrɛn difrɛn tin dɛn bɔt di wan dɛn we de wɔship am. (Sam 139:6; Lɛta Fɔ Rom 11:33) I nɔ tan lɛk kɔmpyuta we kin jɔs kip pipul dɛn nem ɛn ɔda tin dɛn bɔt dɛn. Gɔd rili bisin bɔt di tin dɛn we wi de tink insay insay wi at bikɔs i want mek wi kam nia am. (Sam 139:23, 24; Jems 4:8) Na dat mek Jizɔs bin ɛnkɔrej di wan dɛn we de fala am, fɔ de pre, pan ɔl we in Papa no ɔl wetin wi nid. (Matyu 6:6-8) Di mɔ wi de tɛl Gɔd di we aw wi de tink, na di mɔ wi go kam nia am.
Sɔntɛnde, wi nɔ kin rili no wetin fɔ pre fɔ. Bɔt Gɔd in no aw wi de fil, ɛn i no wetin rili de apin to wi, so i kin no wetin wi want fɔ se ɛn gi wi wetin wi nid. (Lɛta Fɔ Rom 8:26, 27; Lɛta Fɔ Ɛfisɔs 3:20, NW) We wi si se Gɔd dɔn du sɔntin na wi layf, ivin if na smɔl tin sɛf, dat kin mek wi kam nia am mɔ.
NA ƆL PREA GƆD DE ANSA?
Di Baybul tɛl wi se Papa Gɔd de ansa di pre we in fetful savant dɛn de pre to am, bɔt i tɛl wi bak wetin mek Gɔd nɔ de lisin to sɔm prea dɛn. Fɔ ɛgzampul, di tɛm we di Izrɛlayt dɛn bin de du bɔku bad bad tin dɛn, Gɔd bin tɛl in prɔfɛt Ayzaya fɔ tɛl dɛn se: “I lɛk we una pre bɔku bɔku prea A nɔ go lisin; na so so blɔd de na una an.” (Ayzaya 1:15) So wi si klia wan se di wan dɛn we nɔ de du wetin Gɔd in lɔ se ɔ we nɔ de pre fɔ di rayt rizin nɔ fɔ fil se Gɔd go ansa dɛn prea.—Prɔvabs 28:9; Jems 4:3.
Bɔt di Baybul tɛl wi se: “Wɛn wi kam bifo Gɔd ɛn aks am fɔ ɛnitin, i go yɛri wi ɛn gi wi, if na dat in want.” (Jɔn In Fɔs Lɛta 5:14) Fɔ se dis min se Gɔd de gi di wan dɛn we de wɔship am ɛnitin we dɛn pre fɔ wantɛm wantɛm? Nɔ, nɔto dat i min. Lɛ wi tɔk smɔl bɔt di apɔsul Pɔl, we bin beg Gɔd tri tɛm fɔ mek i pul wan sik kɔmɔt pan am. (Sɛkɛn Lɛta Fɔ Kɔrint 12: 7, 8, NW) I go bi se Pɔl bin gɛt siriɔs prɔblɛm wit in yay. Dis bin de rili mɔna am! Gɔd bin dɔn gi Pɔl pawa fɔ de mɛn pipul dɛn, ɛn Pɔl bin dɔn ivin gi layf bak to sɔmbɔdi we bin dɔn day, bɔt stil i bin gɛt fɔ bia in yon sik we i gɛt. (Di Apɔsul Dɛn Wok [Akt] 19:11, 12; 20:9, 10) Pan ɔl we Gɔd nɔ ansa Pɔl in prea di we aw Pɔl want, Pɔl bin stil gladi fɔ di we aw Gɔd bin ansa in prea.—Sɛkɛn Lɛta Fɔ Kɔrint 12:9, 10.
“Wi biliv se wɛn wi kam bifo Gɔd ɛn aks am fɔ ɛnitin, i go yɛri wi ɛn gi wi, if na dat in want.”—Jɔn In Fɔs Lɛta 5:14
Trade trade, Gɔd bin de ansa sɔm pan in savant dɛn prea wantɛm wantɛm. (Sɛkɛn Kiŋ 20:1-7) Bɔt nɔto ɔltɛm Gɔd bin de du so. Sɔm pan Gɔd in savant dɛn bin de fil se Gɔd nɔ de ansa dɛn prea, ɛn dis bin de mek dɛn nɔ de fil fayn. Kiŋ Devid bin se: “PAPA GƆD, nɔ wes mɔ tɛm fɔ ansa mi prea.” (Sam 13:1) Bɔt we Devid tink bɔt di plɛnti tɛm dɛn we Jiova dɔn ɛp am, dat mek i biliv Gɔd mɔ ɛn mɔ. Insay dis sem prea, Devid bin tɔk bak se: “A trɔs yu bikɔs yu lɛk mi ɔltɛm.” (Sam 13:5) Jɔs lɛk Devid, di wan dɛn we de wɔship Gɔd tide, fɔ de pre to Gɔd ɔltɛm te dɛn no se Gɔd dɔn ansa dɛn prea.—Lɛta Fɔ Rom 12:12.
AW GƆD KIN ANSA WI PREA DƐN?
Gɔd kin gi wi di tin dɛn we wi rili nid.
Wi ɔl go gri se nɔto ɔltɛm mama ɛn papa dɛn we lɛk dɛn pikin dɛn, kin gi dɛn wetin dɛn want di tɛm we dɛn kin aks fɔ am. Semweso, Gɔd nɔ kin ansa wi prea di we aw wi tink se i fɔ ansa am ɔ di tɛm we wi want. Bɔt wi fɔ biliv tranga wan se Gɔd go gi wi wetin wi rili nid jɔs lɛk ɛni papa we lɛk in pikin. I go gi wi wetin wi nid di rayt tɛm ɛn di we aw i want.—Lyuk 11:11-13.
Gɔd kin yuz di Baybul fɔ ansa wi prea
Gɔd kin ansa wi prea di we aw wi nɔ kin no.
Wetin wi go se if wi dɔn de pre to Gɔd fɔ ɛp wi wit prɔblɛm we dɔn de mɔna wi fɔ lɔng tɛm? Wi go se bikɔs Jiova nɔ ansa wi prea di we aw wi want, so i nɔ ansa am atɔl? Nɔ. Bifo dat, i go fayn mek wi tink bɔt di tin dɛn we Gɔd dɔn du fɔ ɛp wi wit di prɔblɛm. Sɔntɛnde, wi nɔ kin ivin no se Gɔd dɔn ɛp wi. Fɔ ɛgzampul, wan wi padi we kia fɔ wi go dɔn du sɔntin fɔ ɛp wi di rayt tɛm. (Prɔvabs 17:17) Sɔntɛm na Jiova go dɔn mek dis wi padi ɛp wi. Pantap dat, Gɔd kin yuz di Baybul fɔ ansa wi prea. We wi rid di Baybul, i kin mek wi gɛt di sɛns we wi nid fɔ bia wit di prɔblɛm we de mɔna wi.—Sɛkɛn Lɛta To Timoti 3:16, 17.
Gɔd kin yuz wi padi dɛn fɔ ɛp wi di rayt tɛm
Sɔntɛnde Gɔd nɔ kin pul di prɔblɛm we de mɔna wi. Bɔt i kin gi wi di trɛnk we wi nid fɔ bia wit di prɔblɛm. (Sɛkɛn Lɛta Fɔ Kɔrint 4:7) Fɔ ɛgzampul, wan tɛm bin de we Jizɔs bin beg in Papa fɔ mek i pul wan prɔblɛm we bin de mɔna am. Jizɔs bin tɔk dis bikɔs i bin de fred se dis prɔblɛm go briŋ badnem pan Gɔd. Jiova nɔ bin pul di prɔblɛm, bifo dat, i sɛn wan enjɛl fɔ kɔrej Jizɔs. (Lyuk 22:42, 43) Semweso, Gɔd kin yuz wan wi tayt padi fɔ ɛnkɔrej wi di tɛm mɔ we wi nid pɔsin fɔ ɛnkɔrej wi. (Prɔvabs 12:25) Bikɔs Gɔd kin ansa sɔm prea dɛn di we aw wi nɔ kin no, wi fɔ rili tray fɔ no di we aw Gɔd de ansa wi prea dɛn.
Gɔd kin ansa sɔm prea dɛn di tɛm we in no se na di rayt tɛm.
Di Baybul tɔk se Gɔd de blɛs di wan dɛn we de put dɛnsɛf dɔŋ. Ustɛm i go blɛs dɛn? I go blɛs dɛn “we di rayt tɛm rich.” (Pita In Fɔs Lɛta 5:6, NW.) So if i tan lɛk se Jiova nɔ ansa wi prea wantɛm wantɛm, wi nɔ fɔ fil se i nɔ bisin bɔt wi. Bifo dat, wi fɔ mɛmba se na in mek wi, i no ɔltin bɔt wi, ɛn i bisin bɔt wi. So we Gɔd kin lisin to wi prea, i kin no wetin gud fɔ wi.
“Una put unasɛf dɔŋ ɔnda Gɔd in pawaful an, so dat i go es una ɔp we di rayt tɛm rich.”—Pita In Fɔs Lɛta 5:6, NW
Fɔ ɛgzampul: Lɛ wi se yu gɛt wan smɔl bɔy pikin we tɛl yu fɔ bay baysikul fɔ am. Yu go bay am fɔ am wantɛm wantɛm? If yu fil se i nɔ big yet fɔ rayd baysikul, yu nɔ go bay am fɔ am datɛnde. Bɔt yu go bay am fɔ am di tɛm we yu no se i dɔn big fɔ rayd baysikul. Semweso, if wi kɔntinyu fɔ pre fɔ di rayt tin, Gɔd go gi wi “wetin [wi] want” we di rayt tɛm rich.—Sam 37:4.
WI FƆ BILIV SE JIOVA DE LISIN WI PREA
Di Baybul de ɛnkɔrej Kristian dɛn fɔ biliv se Gɔd de lisin to dɛn prea. Bɔt sɔm pipul dɛn kin se, ‘I izi fɔ tɔk, bɔt i at fɔ du.’ Dat na tru, mɔ if wi dɔn de bia wit wan prɔblɛm fɔ lɔng tɛm, ɔ sɔmbɔdi de du wi bad bad tin. Dis kin mek i at fɔ wet fɔ lɛ Gɔd ansa wi prea. I go fayn mek wi mɛmba wetin Jizɔs bin se. I bin tɔk se wi nɔ fɔ taya fɔ de pre.
Jizɔs bin pul wan stori bɔt wan po mami we in man bin dɔn day. Dis mami bin de go to wan wikɛd jɔj ɔltɛm fɔ mek i gi am rayt pan in kes. (Lyuk 18:1-3) Di jɔj nɔ bin want fɔ ɛp di mami, bɔt leta i tɔk na in at se: “A go tek di kes. If a nɔ du so, i go de kam to mi sote misɛf go taya!” (Lyuk 18:4, 5) Di fɔs langwej we dɛn yuz fɔ rayt dis pat na di Baybul, sho se di jɔj bin tek dis kes siriɔs so dat di mami nɔ go “gi am badnem.” Di jɔj bin si dis badnem lɛk se di mami bin want fɔ “bɔks am ɔnda in yay.” * If dis wikɛd jɔj bin ɛp dis po mami bikɔs i nɔ bin want fɔ gɛt badnem, wetin wi go se bɔt Gɔd we kia fɔ wi? Yu nɔ tink se i go ɛp di wan dɛn we de “kray to am de ɛn nɛt”? Jizɔs bin se, “i nɔ go te, Gɔd go tek in pipul dɛn kes ɛn fɛt fɔ dɛn.”—Lyuk 18:6-8.
“Una aks Gɔd fɔ ɛnitin, i go gi una.”—Lyuk 11:9
Sɔntɛnde wi kin taya fɔ de pre to Gɔd fɔ mek i ɛp wi. Bɔt wi nɔ fɔ taya fɔ de du dat. If wi kɔntinyu fɔ de pre, wi de sho se wi rili want mek Gɔd ɛp wi. Ɛn wi go lan aw Gɔd de ansa wi prea dɛn, ɛn dis go mek wi kam nia am mɔ ɛn mɔ. Fɔ tru, wi fɔ biliv tranga tranga wan se Jiova go ansa wi prea dɛn if wi pre to am fɔ di rayt tin ɛn kɔntinyu fɔ biliv se i go gi wi wetin wi aks am fɔ.—Lyuk 11:9.
^ par. 3 If wi want mek Gɔd lisin to wi prea, wi fɔ tray tranga wan fɔ du wetin i want. If wi du dat, Gɔd go yɛri wi prea. Na dat wi de kam tɔk bɔt insay dis atikul. If yu want fɔ no mɔ, na fɔ rid chapta 17 insay wan buk we dɛn kɔl Wetin Rili di Baybul De Tich? Na Jiova Witnɛs dɛn mek am.
^ par. 5 Di Baybul sho se Gɔd in nem na Jiova.
