Go dayrɛkt to di men tin

Go dayrɛkt to di say we di difrɛn difrɛn atikul dɛn de

Gɔd Want fɔ—Lɛ Rilijɔn dɛn Miks fɔ Wɔship?

Gɔd Want fɔ—Lɛ Rilijɔn dɛn Miks fɔ Wɔship?

Wan nyuspepa we dɛn kɔl The Sydney Morning Herald, bin aks wan kwɛstyɔn. Di kwɛstyɔn na: “Rilijɔn de briŋ pipul dɛn togɛda ɔ i de skata dɛn?” Bɔku pipul dɛn we ansa dis kwɛstyɔn bin se rilijɔn de skata pipul dɛn.

BƆT di wan dɛn we gri se rilijɔn dɛn fɔ miks fɔ wɔship, bin tɔk se rilijɔn de briŋ pipul dɛn togɛda. Wan man we nem Ebu Patɛl, bin bigin wan ɔganayzeshɔn we de fɔ briŋ rilijɔn dɛn kam togɛda. I bin tɔk se: “No rilijɔn nɔ de we nɔ gɛt sɔri-at fɔ pipul dɛn. No rilijɔn nɔ de we nɔ bisin bɔt di we aw pipul dɛn de kɔntrol di wɔl. No rilijɔn nɔ de we nɔ de du gud tin to pipul dɛn.”

Tide, Budist, Katlik, Protɛstant, Indu, Muslim, ɛn plɛnti ɔda rilijɔn dɛn kin jɔyn an fɔ pul po kɔmɔt na di wɔl, fɔ fɛt fɔ pipul dɛn rayt, fɔ mek pipul dɛn lɛf fɔ ayd bɔm dɛn na grɔn, ɔ fɔ tɔk bɔt tin dɛn we de ambɔg pipul dɛn. Bɔku bɔku rilijɔn dɛn dɔn kam togɛda fɔ tɔk bɔt tin dɛn we go mek dɛn ɔndastand ɛn ɛnkɔrej dɛnsɛf. Fɔ sho se dɛn kin gladi we dɛn kam togɛda, dɛn kin layt kandul pan di savis dɛn we dɛn kin ol, mek gladi gladi, ple myuzik, pre, ɛn du bɔku ɔda tin dɛn.

Yu tink se di miks we rilijɔn dɛn de miks fɔ wɔship na in go mek dɛn gɛt wanwɔd ɛn sɔlv di af af prɔblɛm dɛn we dɛn kin gɛt? Yu tink se na dis we Gɔd de yuz fɔ mek di wɔl bi fayn fayn ples fɔ liv?

DƐN FIL SE WANWƆD BƐTƐ PAS GƆD

Wan pan di big ɔganayzeshɔn dɛn we de fɔ briŋ difrɛn difrɛn rilijɔn dɛn togɛda de blɔf se i gɛt pipul dɛn we de na lɛk 200 rilijɔn dɛn so ɛn we kɔmɔt na 76 kɔntri dɛn. Di men tin we dis ɔganayzeshɔn de du na fɔ “mek shɔ se rilijɔn dɛn kɔntinyu fɔ jɔyn an.” Dis na tin we izi fɔ tɔk, bɔt i at fɔ du. Fɔ ɛgzampul, di pipul dɛn we de bifo pan dis ɔganayzeshɔn, bin mek wan pepa we de sho wetin-ɛn-wetin di ɔganayzeshɔn de fɔ. Dɛn bin tek tɛm rayt di tin dɛn we de na di pepa, so dat dɛn nɔ go ambɔg ɛni rilijɔn we de na di ɔganayzeshɔn. Wetin mek dɛn du so? Wan rizin na dat, sɔm pipul dɛn nɔ bin want fɔ lɛ dɛn tɔk bɔt Gɔd na di pepa. So dis bin mek dɛn nɔ bin tɔk bɔt Gɔd na ɛni pat na di pepa.

If dɛn dɔn pul Gɔd kɔmɔt na di pepa we de sho wetin dɛn ɔganayzeshɔn de bɔt, aw dɛn go sho se dɛn biliv Gɔd? Apat frɔm dat, yu tink se dis kayn ɔganayzeshɔn difrɛn frɔm ɔda ɔganayzeshɔn dɛn we jɔs de fɔ ɛp pipul dɛn? Na dis mek, da ɔganayzeshɔn we wi bin tɔk bɔt, se dɛn nɔto ɔganayzeshɔn we de fɔ rilijɔn, bɔt dɛn de fɔ “mek pipul dɛn kam togɛda.”

NA GUD TIN NƆMƆ RILIJƆN FƆ DU?

Wan bigman we dɛn kin kɔl Dalay Lama, de tray fɔ mek rilijɔn dɛn jɔyn an ɛn gɛt wanwɔd. I bin tɔk se: “Ɔl di men rilijɔn dɛn de tɔk bɔt di sem tin: dat na bɔt lɔv, sɔri-at, ɛn aw fɔ fɔgiv.” I bin tɔk bak se di tin we impɔtant na fɔ “du dɛn tin ya ɔltɛm.”

 Na tru, i rili impɔtant fɔ sho lɔv, fɔ gɛt sɔri-at, ɛn fɔ fɔgiv pipul dɛn. Jizɔs bin tɔk sɔntin we sɔm pipul dɛn kin kɔl di Goldɛn Rul. I bin se: “Dɛn tin we una want mek ɔda pipul du to una, nain una fɔ du to dɛn.” (Matyu 7:12) Bɔt yu tink se na gud tin nɔmɔ rilijɔn fɔ du?

Di apɔsul Pɔl bin tɔk bɔt sɔm pipul dɛn we bin tɔk se dɛn de sav Gɔd. I bin se: “A kin tɔk fɔ dɛn se, dɛn want pliz Gɔd bad wan, bɔt dɛn nɔ no di rayt we. Dɛn nɔ bin ɔndastand aw Gɔd de mek ɔltin rayt bitwin in ɛn pipul.” Wetin na bin di prɔblɛm? “Dɛn bin de tray fɔ fɛn dɛn yon we fɔ mek ɔltin rayt bitwin dɛn ɛn Gɔd.” (Lɛta Fɔ Rom 10:2, 3) Dɛn nɔ bin no di tru tin we Gɔd want dɛn fɔ du, so di zil ɛn fet we dɛn bin gɛt, ɔl na fɔ natin.—Matyu 7:21-23.

DI BAYBUL WANT LƐ RILIJƆN DƐN MIKS FƆ WƆSHIP?

Jizɔs bin se: “Dɛn wan we de mek pis fɔ pipul, gɛt blɛsin.” (Matyu 5:9) Jizɔs bin de du ɔl di tin dɛn we i bin de prich. I bin de tɛl pipul dɛn se dɛn nɔ fɔ de fɛt dɛnsɛf ɛn di mɛsej we i bin de prich, na mɛsej we de briŋ pis to pipul dɛn we kɔmɔt na difrɛn difrɛn rilijɔn dɛn. (Matyu 26:52) Di wan dɛn we bin de lisin to Jizɔs bin lɛk dɛn kɔmpin dɛn bad bad wan. (Lɛta Fɔ Kɔlɔse 3:14) Bɔt yu tink se Jizɔs bin de du ɔl dis jɔs fɔ mek pipul dɛn we kɔmɔt na difrɛn difrɛn rilijɔn de togɛda wit pis? Yu tink se Jizɔs bin jɔyn ɔda pipul dɛn yon we fɔ wɔship?

Di edman dɛn pan Gɔd biznɛs we na bin di Faresi ɛn Sadyusi dɛn, bin de du ɔlkayn bad tin to Jizɔs, ɛn dɛn bin ivin tray fɔ kil am. Wetin Jizɔs bin du? I bin tɛl in disaypul dɛn se: “Una lɛf dɛn; dɛn na blɛnyay pipul we de tray fɔ lid ɔda blɛnyay pipul.” (Matyu 15:14) Jizɔs nɔ bin miks di we aw i de wɔship Gɔd wit di we aw dɛn pipul ya de wɔship Gɔd.

Afta sɔm tɛm, dɛn bin opin wan kɔngrigeshɔn na Kɔrint, na wan ples we dɛn kɔl Gris. Dis ples na bin say we difrɛn difrɛn rilijɔn dɛn bin de, ɛn dɛn rilijɔn ya bin de jɔyn fɔ wɔship. Wetin di Kristian dɛn we bin de de, go du? Di apɔsul Pɔl bin tɛl dɛn se: “Una nɔ fɔ jɔyn an wit dɛn pipul we nɔ biliv Gɔd lɛkɛ se una ɔl na wan.” Wetin mek dɛn nɔ fɔ du dat? Pɔl bin tɛl dɛn se: “Aw Krays ɛn Setan go gɛt wanwɔd? Aw pɔsin we biliv Gɔd ɛn pɔsin we nɔ biliv Gɔd go gɛt wanwɔd?” Dɔn, i advays dɛn se: “Una fɔ lɛf dɛn bad pipul ya, ɛn nɔ gɛt ɛnitin fɔ du wit dɛn.”—Sɛkɛn Lɛta Fɔ Kɔrint 6:14, 15, 17.

Dis dɔn sho wi klia wan se di Baybul nɔ want fɔ lɛ rilijɔn dɛn miks fɔ wɔship. Bɔt yu go mɔs want fɔ no di ansa to dis kwɛstyɔn, ‘Aw wi go ebul fɔ gɛt tru tru wanwɔd?’

AW FƆ GƐT TRU TRU WANWƆD?

We bɔku bɔku kɔntri dɛn kin kam togɛda fɔ du sɔntin, dɛn kin rayt wan pepa we go sho dɛn aw fɔ du wetin dɛn want. Yu tink se dɛn go ebul fɔ du wetin dɛn kam togɛda fɔ, if dɛn nɔ gri fɔ fala wan patikyula we ɔ if ɔlman gɛt in yon we aw i want fɔ lɛ dɛn du am?

Na di sem tin de apin to di rilijɔn dɛn we de miks di we aw dɛn de wɔship. Pan ɔl we dɛn de tɔk bɔt wanwɔd ɛn rɛspɛkt, dɛn stil nɔ gri pan wan patikyula we we dɛn fɔ fala we i kam pan Gɔd biznɛs. Dis dɔn mek dɛn de tich difrɛn tin dɛn bɔt Gɔd ɛn bɔt aw pɔsin fɔ liv in layf.

Di Baybul gɛt ɔl wetin Gɔd want wi fɔ du. I tan lɛk da pepa we wi bin tɔk bɔt. Wi fɔ liv wi layf di we aw di Baybul se. Di wan dɛn we de fala wetin di Baybul se, nɔ et pipul dɛn we kɔmɔt na ɔda kɔntri ɔ ɔda rilijɔn, ɛn dɛn dɔn lan aw fɔ de togɛda wit pis ɛn wanwɔd. Gɔd bin dɔn tɔk bɔt dis lɔn lɔn tɛm. I bin se: “Da tɛm de dɛn ɔl go de tɔk wan laŋwej, dat na fɔ de pre to PAPA GƆD nɔmɔ wit ɔl dɛn at ɛn du wetin i want.” Rilijɔn go gɛt wanwɔd we di wan dɛn we de insay de, de tɔk “wan laŋwej.” Dis langwej na di we aw Gɔd want wi fɔ wɔship am.—Zɛfinaya 3:9; Ayzaya 2:2-4.

Jiova Witnɛs dɛn de invayt yu fɔ go na ɛni Kiŋdɔm Ɔl we de nia yu, fɔ mek yu go si fɔ yusɛf di kayn pis ɛn wanwɔd we dɛn gɛt.—Sam 133:1.