Go dayrɛkt to di men tin

Go dayrɛkt to di say we di difrɛn difrɛn atikul dɛn de

Aw fɔ Kɔntinyu fɔ Tink di Rayt We

Aw fɔ Kɔntinyu fɔ Tink di Rayt We

“Pipul dɛn we gɛt lɔŋ layf fɔ ɛnjɔy dɛnsɛf ɔltɛm.” —ƐKLI. 11:8.

1. Wetin na di blɛsin dɛn we Jiova de gi wi we de mek wi gladi?

JIOVA want mek wi gladi. Ɛn i de gi wi bɔku blɛsin dɛn we de mek wi gladi. Wan pan dɛn blɛsin ya, na di layf we i gi wi. Wi kin yuz wi layf fɔ prez am, bikɔs i dɔn mek wi sabi aw fɔ wɔship am di rayt we. (Sam 144:15; Jɔn 6:44) Jiova de tɛl wi se i rili lɛk wi, ɛn i de ɛp wi fɔ mek wi nɔ taya fɔ sav am. (Jɛr. 31:3; 2 Kɔr. 4:16) I de mek wi ɛnjɔy ɛn lan bɔku tin dɛn bɔt am, we de mek i tan lɛk se wi de na Paradays. Wi de ɛnjɔy di padi biznɛs ɛn wanwɔd we wi gɛt wit wi brɔda dɛn. Apat frɔm dat, wi gɛt op fɔ tumara bambay.

2. Wetin kin apin to sɔm pan Gɔd in fetful savant dɛn?

2 Pan ɔl we dɛn tin ya fɔ mek wi gladi, sɔm pan Gɔd in fetful savant dɛn kin stil de tink bad bɔt dɛnsɛf. Dɛn kin tink se Jiova nɔ valyu dɛn, ɛn i nɔ ivin valyu di tin dɛn we dɛn de du fɔ am. Di wan dɛn we kin kɔntinyu fɔ fil dis kayn we, kin tink se dɛn nɔ go ebul fɔ ɛnjɔy “lɔŋ layf.” Dɛn kin fil se na tin we nɔ go ɛva apin, pas pan drim. Dis na bikɔs di layf we dɛn de liv, kin luk bita fɔ dɛn.—Ɛkli. 11:8.

3. Wetin kin mek wi fil bad bɔt wisɛf?

3 Di rizin we mek dɛn brɔda ɔ sista ya kin fil bad bɔt  dɛnsɛf, na bikɔs dɛn at pwɛl, dɛn sik, ɔ sɔntɛm dɛn dɔn de ol. (Sam 71:9; Prɔv. 13:12; Ɛkli. 7:7) Bɔt ɔl Kristian fɔ no se mɔtalman at bad pas ɔltin, ɛn i kin mek wi fil se wi nɔ de du di rayt tin, pan ɔl we Gɔd kin gladi fɔ wetin wi de du. (Jɛr. 17:9; Jɔn In Fɔs Lɛta 3:20) Setan kin lay pan Gɔd in savant dɛn. Ɛn di wan dɛn we de tink lɛk Setan kin tray fɔ mek wi tink lɛk aw Ɛlifaz we nɔ bin gɛt fet pan Gɔd, bin de tink. I bin de tink se Gɔd nɔ valyu wi atɔl. Dat nɔto bin tru insay Job in tɛm ɛn ivin naw nɔto tru.—Job 4:18, 19.

4. Wetin wi go lan na dis atikul?

4 Insay di Baybul, Jiova mek wi no klia wan se i go de wit di wan dɛn we “kin de pan trɔbul.” (Sam 23:4) Wan we aw Jiova de sho se i de wit wi na bay we i gi wi in Wɔd, di Baybul. Di Baybul gɛt pawa fɔ “rut dɛn tin we tinap traŋa,” lɛk tin dɛn we kin mek wi tink bad bɔt wisɛf. (2 Kɔr. 10:4, 5) Lɛ wi si aw di Baybul kin ɛp wi fɔ kɔntinyu fɔ tink di rayt we. Dis go ɛnkɔrej yu, ɛn yu go ivin yuz am fɔ ɛnkɔrej ɔda pipul dɛn.

YUZ DI BAYBUL FƆ ƐP YU FƆ TINK DI RAYT WE

5. Wetin go ɛp wi fɔ tink di rayt we?

5 Di apɔsul Pɔl bin tɔk bɔt sɔm tin dɛn we kin ɛp wi fɔ tink di rayt we. I bin tɛl di kɔngrigeshɔn we de na Kɔrint se: “Una fɔ jɔj unasɛf fɔ si if una biliv [Gɔd] gud gud.” (2 Kɔr. 13:5) We di apɔsul Pɔl bin de tɔk bɔt “biliv,” i bin min ɔl di Kristian tichin dɛn we de na di Baybul. If wetin wi de tɔk ɛn du na di sem wit wetin di Baybul de tich, dat min se wi rili dɔn jɔj wisɛf ɛn de sho se wi “biliv [Gɔd] gud gud” wan. Bɔt apat frɔm dat, wi fɔ rili tray fɔ si if di we aw wi de liv wi layf, na di sem wit ɔl di tin dɛn we de na di Baybul. So nɔto wi fɔ pik wetin wi want fɔ du ɛn wetin wi nɔ want fɔ du. Wi fɔ du ɔl wetin de na di Baybul.—Jems 2:10, 11.

6. Wetin mek wi fɔ jɔj wisɛf fɔ no if ‘wi biliv Gɔd gud gud wan’? (Luk di pikchɔ nia dis atikul in taytul.)

6 Sɔntɛm yu go de fred fɔ jɔj yusɛf, mɔ if yu tink se yu nɔ de du wɛl. Bɔt di we aw Jiova de si wi bɛtɛ pas aw wi de si wisɛf, bikɔs i de tink ay pas aw wi de tink. (Ayz. 55:8, 9) I de luk ɔl di wan dɛn we de wɔship am, nɔto fɔ tɛl dɛn se dɛn nɔ de du wetin rayt, bɔt na fɔ luk fɔ di gud tin dɛn we dɛn de du, ɛn fɔ ɛp dɛn. We yu yuz Gɔd in Wɔd fɔ jɔj yusɛf fɔ si if ‘yu biliv am gud gud wan,’ yu go bigin si yusɛf di we aw Gɔd de si yu. Ɛn dis go mek bifo yu tink se yu nɔ gɛt wan valyu na Gɔd in yay, yu go tink lɛk aw di Baybul se, dat Jiova rili valyu yu. Dis go tan lɛk we pɔsin de opin winda kɔtin fɔ mek san shayn insay dak rum.

7. Aw wi kin bɛnifit frɔm di ɛgzampul dɛn we di Baybul gi bɔt fetful pipul dɛn?

7 Wan gud we fɔ jɔj wisɛf na we wi de tink gud wan bɔt sɔm fetful pipul dɛn we di Baybul tɔk bɔt. I go fayn fɔ mek wi kɔmpia di tin dɛn we bin de mit dɛn, ɔ di we aw dɛn bin de fil, to di tin dɛn we de mit wisɛf, ɛn di we aw wisɛf de fil tide, ɛn si wetin wi bin fɔ dɔn du if wi na bin dɛn. Lɛ wi luk tri ɛgzampul dɛn we de sho aw wi kin yuz di Baybul fɔ jɔj wisɛf fɔ no if wi “biliv [Gɔd] gud gud” wan. Dis go ɛp wi fɔ tink di rayt we bɔt wisɛf.

WAN PO MAMI WE IN MAN BIN DƆN DAY

8, 9. (a) Wetin na di tin dɛn we bin mit wan po mami we in man bin dɔn day? (b) Aw dis mami bin de fil?

8 We Jizɔs bin go na di tɛmpul na Jerusɛlɛm, i bin si wan po mami we in  man bin dɔn day. Dis mami in ɛgzampul go ɛp wi fɔ tink di rayt we, pan ɔl we wi nɔ kin ebul fɔ du ɔltin we wi want fɔ du. (Rid Lyuk 21:1-4.) Lɛ wi tɔk bɔt di tin dɛn we bin apin to dis mami. I bin de fil am we in man dɔn day, bɔt nɔto dat nɔmɔ, i bin gɛt fɔ bia we di edman dɛn pan Gɔd biznɛs bin de “tek dɛn uman, we dɛn man dɔn day, dɛn prɔpati.” Dɛn edman ya nɔ bin de ɛp dɛn uman dɛn de. (Lyuk 20:47) Dis uman bin so po dat di mɔni we i bin put na di bɔks insay di tɛmpul, na wetin lebra go wok fɔ insay shɔt tɛm.

9 Tray fɔ tink bɔt aw dis mami bin fil we i ol in tu smɔl kɔyn dɛn as i de go insay di tɛmpul. Yu tink se i bin de kɔmpia di smɔl mɔni we i de go put, to wetin i bin de put di tɛm we in man nɔ bin day yet? Ɔ yu tink se i bin shem we i bin de si ɔda pipul dɛn de put bɔku mɔni, ɛn fil se in yon mɔni nɔ bɛtɛ? Ilɛksɛf na so i bin de fil, i bin stil gi wetin i gɛt fɔ sɔpɔt Gɔd in wok.

10. Aw Jizɔs bin sho se di mami we in man bin dɔn day, impɔtant to Gɔd?

10 Jizɔs bin tɔk se Jiova valyu dis mami ɛn di mɔni we i bin gi. I bin se di mami “put pas wetin [dɛn jɛntri pipul dɛn] put.” Di mɔni we di mami put ɛn di mɔni we di ɔda pipul dɛn put ɔl bin go jɔyn insay di bɔks, bɔt stil, Jizɔs bin prez di mami bikɔs i bin gi ɔl wetin i gɛt. Di wan dɛn we bin kam leta fɔ kɔnt di mɔni, nɔ bin no aw di kɔyn dɛn ɔ di pɔsin we put di kɔyn dɛn na di bɔks, impɔtant to Jiova. Bɔt stil na di we aw Gɔd bin si dis mami, na in rili impɔtant; nɔto wetin pipul dɛn bin tink ɔ aw di mami bin de si insɛf. Yu kin yuz dis stori fɔ jɔj yusɛf fɔ no if yu biliv Gɔd gud gud wan.

Wetin wi kin lan frɔm di uman we in man bin dɔn day? (Luk na paregraf 8 to 10)

11. Wetin yu kin lan frɔm da mami we in man bin dɔn day?

11 Sɔntɛm di tin dɛn we de mit yu go mek yu nɔ ebul fɔ sav Jiova lɛk aw yu want. Sɔm pipul dɛn we dɔn ol ɔ we nɔ  gɛt bɛtɛ wɛlbɔdi, nɔ kin ebul fɔ prich fɔ lɔng tɛm. Yu tink se dɛn nɔ fɔ gi dɛn fil savis ripɔt bikɔs dɛn nɔ de prich bɛtɛ? Ilɛksɛf yu yɔŋ ɛn gɛt wɛlbɔdi, yu go de fil se wetin yu de du smɔl, we yu kɔmpia am to wetin ɔda pipul dɛn de du fɔ wɔship Gɔd. Bɔt di tin we wi dɔn lan bɔt da mami we in man bin dɔn day, de sho wi se Jiova de si ɛn i valyu ɛni smɔl tin we wi de du fɔ am, mɔ we wi de du am di tɛm we wi kin gɛt prɔblɛm. Tink bɔt di we aw yu bin de wɔship Jiova las ia. Ɛnitɛm bin de we yu bin gɛt fɔ sakrifays sɔntin fɔ mek yu ebul fɔ wɔship Jiova fɔ wan awa? If yu ansa na yɛs, na fɔ no se Jiova valyu wetin yu bin du fɔ am insay da wan awa de. We yu du ɔl wetin yu ebul fɔ du fɔ sav Jiova ɛn falamakata da mami we in man bin dɔn day, dat de sho se yu “biliv [Gɔd] gud gud” wan.

‘LƐ A DAY WANTƐM’

12-14. (a) Aw Ilayja bin de fil? (b) Wetin mek Ilayja bin de fil da we de?

12 Di prɔfɛt Ilayja bin de du wetin Jiova want, ɛn i bin biliv Jiova tranga wan. Bɔt tɛm bin de we i bin de fil so bad dat i tɛl Jiova fɔ kil am. I se “in dɔn taya, in dɔn si bɔku trɔbul so lɛ in day wantɛm.” (1 Kiŋ 19:4) Di wan dɛn we nɔ ɛva fil dis kayn we aw Ilayja bin fil go se Ilayja gɛt “shɔtat.” (Job 6:3) Bɔt Ilayja bin rili de fil bad. Jiova nɔ bin tɔk pan Ilayja bikɔs i se i want day, bɔt i bin ɛp am.

13 Wetin bin mek Ilayja fil dis kayn we? Jɔs bifo i bigin fil dis kayn we, i bin du wan mirekul we sho se na Jiova na di tru Gɔd. Afta i du dis, i bin gɛt fɔ kil 450 pan Beal in prɔfɛt dɛn. (1 Kiŋ 18:37-40) Ilayja bin tink se we i du dis, Gɔd in pipul dɛn go bigin wɔship Gɔd di rayt we; bɔt dat nɔ bin apin. Wan wikɛd kwin we nem Jezibɛl bin sɛn mɛsej to Ilayja se i de plan fɔ kil am. Ilayja fred fɔ in layf, so i rɔn go fawe na wan ɛmti land usay pɔsin nɔ go ebul liv.—1 Kiŋ 19:2-4.

14 We Ilayja in wangren bin sidɔm de tink, i bin tink se na fɔ natin i bi prɔfɛt. I tɛl Jiova se “in nɔ bɛtɛ pas in fɔstɛm-papa dɛn.” I bin de tray fɔ se i nɔ ebul fɔ du natin jɔs lɛk aw in gret gret granpa dɛn we dɔn day nɔ ebul fɔ du natin. I bin fil se i nɔ ebul du ɛni bɛtɛ tin, we min se i nɔ gɛt wan valyu to Jiova ɔ to ɛni ɔda pɔsin.

15. Aw Gɔd bin sho Ilayja se i stil valyu am?

15 Nɔto da sem we de Jiova bin de si Ilayja. Ilayja bin stil gɛt valyu na Jiova in yay, ɛn Jiova bin du tin dɛn we ɛp Ilayja fɔ no dat. Gɔd bin sɛn in enjɛl fɔ kɔrej Ilayja. Ɛn Jiova bin gi Ilayja tin fɔ it ɛn wata fɔ drink, we go ɛp am fɔ travul 40 dez fɔ go na Mawnt Orɛb. Apat frɔm dat, Gɔd bin tɛl Ilayja se i nɔ fɔ tink se no ɔda Izrɛlayt nɔ de we fetful to am. Gɔd bin rili sho se i valyu Ilayja, bikɔs i bin kɔntinyu fɔ gi am mɔ tin dɛn fɔ du, ɛn Ilayja bin gri fɔ du dɛn. Ilayja bin bɛnifit frɔm di ɛp we Jiova bin ɛp am, ɛn i bin gɛt zil fɔ go du in prɔfɛt wok.—1 Kiŋ 19:5-8, 15-19.

16. Aw Jiova dɔn ɛp yu?

16 Ilayja in stori go ɛp yu fɔ biliv Gɔd gud gud wan, ɛn i go mek yu tink di rayt we. Fɔs, na fɔ tink bɔt aw Jiova dɔn ɛp yu. Ɛniwan pan di ɛlda dɛn ɔ ɔda machɔ Kristian dɔn ɛp yu di tɛm we yu bin nid pɔsin fɔ ɛp yu? (Gal. 6:2) Yu go mɔs dɔn bɛnifit frɔm di Baybul, wi ɔda buk dɛn, ɛn di mitin dɛn. Ɔl dɛn tin ya go dɔn ɛp yu fɔ no se Jiova kia fɔ yu. Di nɛks tɛm we ɛniwan pan dɛn tin ya ɛp yu, na fɔ tink bɔt Jiova we na in rili ɛp yu, ɛn pre to am fɔ tɛl am tɛnki.—Sam 121:1, 2.

17. Wetin Jiova valyu pan in savant dɛn?

 17 Sɛkɔn, wi go de ful wisɛf if wi de tink bad bɔt wisɛf. Na di we aw Gɔd de si wi na in rili impɔtant. (Rid Lɛta Fɔ Rom 14:4.) Jiova valyu we wi de sav am ɛn we wi fetful to am. I nɔ de luk wi bay di tin dɛn we wi de du fɔ am. I go bi se wi dɔn du bɔku tin dɛn fɔ Jiova we wi nɔ no, jɔs lɛk Ilayja. Sɔntɛm pipul dɛn go de na di kɔngrigeshɔn we yu go dɔn ɛp. Ɛn pipul dɛn go de bak na say dɛn we yu de prich we yu go dɔn ɛp fɔ lan di tru tin dɛn we de na di Baybul.

18. Wetin di wok we Jiova gi yu de sho?

18 Di las tin na dat, ɛni wok we Jiova gi yu de sho se i de wit yu. (Jɛr. 20:11) Jɔs lɛk Ilayja, wisɛf kin gɛt pwɛl at bikɔs i kin tan lɛk se wetin wi de du nɔ min natin, ɔ sɔntɛnde wi nɔ kin ebul fɔ du sɔm tin dɛn we wi bin dɔn plan fɔ du we wi de wɔship Jiova. Bɔt sɔntin de we impɔtant pas ɛni ɔda tin we wi ɔl kin ebul fɔ du. Wetin na da tin de? Dat na fɔ prich di gud nyus ɛn fɔ bi Jiova Witnɛs. So kɔntinyu fɔ bi fetful to Jiova. I go jɔs tan lɛk se na yu Jizɔs tɔk to na wan pan in parebul dɛn we i se: “Kam ɛnjɔy wit yu masta!”—Mat. 25:23.

PREA WE PƆSIN “WE IN AT PWƐL” KIN PRE

19. Aw di pɔsin we rayt Sam 102 bin de fil?

19 Di pɔsin we rayt Sam 102 bin de wɔri. In at bin pwɛl, ɛn i bin de sɔfa. I bin dɔn wik, ɛn i nɔ bin ebul fɔ bia wit di prɔblɛm dɛn we bin de mit am. (Di tin we rayt pantap Sam 102.) Di tin dɛn we dis pɔsin rayt sho se i bin de fil lɛk se na in wangren de, i bin de fil pen na in at, ɛn i bin de fil bad bɔt insɛf. (Sam 102:3, 4, 6, 11) I bin fil se Jiova want fɔ push am na kɔna.—Sam 102:10.

20. Aw prea kin ɛp pɔsin we de fil bad bɔt insɛf?

20 Bɔt pan ɔl dat, di pɔsin we rayt dis Sam bin stil ebul fɔ prez Jiova. (Rid Sam 102:19-21.) As wi dɔn si na Sam 102, ivin di wan dɛn we biliv Gɔd gud gud wan kin fil pen na dɛn at, ɛn i nɔ kin izi fɔ mek dɛn tink di rayt we. Di pɔsin we rayt dis Sam bin de fil lɛk se na in wangren de. I bin se: “Lɛkɛ bɔd, na so a de pantap os.” I bin tan lɛk se na prɔblɛm dɛn nɔmɔ de mit am. (Sam 102:7) If na da sem we de yusɛf de fil, na fɔ pre to Jiova wit ɔl yu at, lɛk aw di pɔsin we rayt dis Sam bin du. Di pre we yu go pre go ɛp yu fɔ mek yu nɔ fil bad bɔt yusɛf. Jiova prɔmis se “i go yɛri di po pipul [dɛn] prea ɛn i nɔ go tɔn in bak pan dɛn.” (Sam 102:17) Na fɔ biliv da prɔmis de.

21. Aw pɔsin we de fil bad bɔt insɛf kin ebul fɔ tink di rayt we?

21 Sam 102 de sho bak aw yu go tink di rayt we. Di pɔsin we rayt dis Sam bin du dat bay we i bigin tink bɔt in padi biznɛs wit Jiova. (Sam 102:12, 27) I bin gladi fɔ no se Jiova kin ɛp In savant dɛn ɔltɛm we bad tin de mit dɛn. So if di bad we aw yu de fil bɔt yusɛf de mek yu nɔ ebul fɔ du mɔ fɔ sav Gɔd, yu fɔ pre to Gɔd bɔt dat. Beg Gɔd fɔ mek i lisin to yu we yu de pre. Bɔt nɔ jɔs pre fɔ mek i pul yu pan yu prɔblɛm dɛn, na fɔ pre bak fɔ lɛ ‘ɔlman tɔk bɔt Jiova.’—Sam 102:20, 21.

22. Aw wi ɔl kin mek Jiova in at gladi?

22 Wi kin yuz di Baybul fɔ sho wisɛf se wi biliv Jiova gud gud wan, ɛn dat Jiova valyu wi. Insay dis wɔl we Setan de rul, wi nɔ go ebul fɔ lɛf fɔ tink bad bɔt wisɛf, ɛn wi nɔ go ebul fɔ stɔp di tin dɛn we kin mek wi at pwɛl. Bɔt wi ɔl kin mek Jiova in at gladi, ɛn i go sev wi if wi kɔntinyu fɔ bi fetful to am.—Mat. 24:13.