Go dayrɛkt to di men tin

Go dayrɛkt to di say we di difrɛn difrɛn atikul dɛn de

Jiova Na Wi Gɔd We De Gi Wi Wetin Wi Nid ɛn We De Kɔba Wi

Jiova Na Wi Gɔd We De Gi Wi Wetin Wi Nid ɛn We De Kɔba Wi

“PAPA GƆD se in nɔ go mek natin du am bikɔs i lɛk am i se in go kɔba am bikɔs i no am.”—SAM 91:14.

1, 2. Aw wi difrɛn as mɔtalman? Aw wi difrɛn we i kam pan di we aw wi lan bɔt Gɔd?

ƆLMAN we de na di wɔl kɔmɔt frɔm Jiova. (Ɛfi. 3:14, 15) Bɔt pan ɔl we wi na mɔtalman, wi ɔl difrɛn. Wi ɔl gɛt difrɛn abit, ɛn nɔto di sem tin de mit wi ɔl. Sɔntɛm, yu go dɔn de wit yu mama ɛn papa frɔm we yu smɔl te yu big. Ɔda pipul dɛn de we tin dɛn lɛk sik, aksidɛnt, ɔ ɔda bad bad tin, go dɔn mek dɛn mama ɛn papa day. Sɔm dɛn stil de we nɔ sabi dɛn mama ɛn papa.

2 Wi ɔl de na Jiova in famili, ɛn na in wi de wɔship. Bɔt wi difrɛn we i kam pan di we aw wi lan bɔt am. Sɔntɛm, frɔm we yu smɔl, yu mama ɛn papa go dɔn tich yu di tru tin dɛn we de na di Baybul. (Dit. 6:6, 7) Ɔ sɔntɛm, yu na wan pan di pipul dɛn we lan di trut bay we Jiova in pipul dɛn de du di prichin wok.—Rom 10:13-15; 1 Tim. 2:3, 4.

3. Wetin na di tin dɛn we de mit wi ɔl?

3 Pan ɔl we wi difrɛn, sɔm tin dɛn de we de apin to wi ɔl. Wi ɔl de sɔfa bikɔs Adam nɔ bin lisin to Gɔd, ɛn na dat mek wi nɔ pafɛkt, wi de sin, ɛn wi de day. (Rom 5:12) Bɔt pan ɔl dat, bikɔs wi de wɔship Jiova di rayt we, wi de kɔl am wi “Papa.” Ayzaya 64:8 sho di we aw Gɔd in pipul dɛn we bin de  trade trade bin de kɔl Gɔd. Dɛn bin de se: “PAPA GƆD, na yu na wi Papa.” Apat frɔm dat, we Jizɔs bin de sho in disaypul dɛn aw fɔ pre, di fɔs tin we i tɔk na: “Papa Gɔd we de na ɛvin: na yu wangren na Gɔd, mek ɔlman pre to yu ɛn ɔna yu.”—Mat. 6:9.

4, 5. Wetin i go fayn fɔ mek wi du as wi de tɔk mɔ bɔt wi Papa we na Jiova?

4 Wi Papa we de na ɛvin de kia fɔ wi, ɛn i de kɔba wi we wi de pre to am frɔm wi at. Wan pan di pipul dɛn we rayt di Sam buk bin tɔk se: “PAPA GƆD se in nɔ go mek natin du am [ɛnibɔdi we de wɔship am di rayt we] bikɔs i lɛk am [,] i se in go kɔba am bikɔs i no am.” (Sam 91:14) Fɔ tru, Jiova Gɔd lɛk wi, i de sev wi frɔm wi ɛnimi dɛn, ɛn i de kɔba wi, so dat wi ɛnimi dɛn nɔ go kil wi ɔl.

5 Sɔm impɔtant tin dɛn de we go mek wi gladi mɔ ɛn mɔ fɔ wi Papa we de na ɛvin. Wetin na dɛn tin ya? (1) Wi Papa de gi wi wetin wi nid. (2) Jiova de kɔba wi. (3) Ɛn Gɔd na wi tayt Padi. As wi de tɔk bɔt dɛn tin ya, i go fayn fɔ mek wi tink dip wan bɔt wi padi biznɛs wit Gɔd ɛn tray fɔ no aw wi go sho am se wi lɛk am as wi Papa. I go fayn bak mek wi de tink gud wan bɔt di blɛsin dɛn we Jiova go gi ɔl di wan dɛn we de kam nia am.—Jems 4:8.

JIOVA, DI GƆD WE DE GI WI WETIN WI NID

6. Wetin na wan we we Jiova dɔn sho wi se na in “nɔmɔ de gi wi ɔl dɛn tin we gud”?

6 Di disaypul Jems bin se: “Na Gɔd nɔmɔ de gi wi ɔl dɛn tin we gud ɛn we mek wi nɔ want ɛnitin mɔ. Na Gɔd mek di san, di mun ɛn di sta dɛn.” (Jems 1:17) Layf na wɔndaful gift we Jiova gi wi. (Sam 36:9) We wi yuz wi layf fɔ du wetin Gɔd want, wi go ɛnjɔy bɔku bɔku blɛsin dɛn naw, ɛn wi go gɛt layf we go de sote go na Paradays. (Prɔv. 10:22; 2 Pit. 3:13) Bɔt aw ɔl dis go bi we Adam dɔn mek ɔlman de sin ɛn day?

7. Aw Gɔd dɔn mek wi ebul fɔ bi in padi?

7 Jiova rili na di Gɔd we de gi wi wetin wi nid. I dɔn du dat bɔku bɔku we. Fɔ ɛgzampul, di lɛk we Gɔd lɛk wi we wi nɔ fit fɔ gɛt, dɔn mek i pul wi pan sin ɛn day. Di fɔs man we na in bɔn wi ɔl dɔn mek wi de sin ɛn day. (Rom 3:23) Bɔt bikɔs Jiova lɛk wi, i dɔn mek wi ebul fɔ bi in tayt tayt padi. Di apɔsul Jɔn bin rayt se: “Na di we dis we Gɔd sho wi se in lɛk wi: I sɛn in wangren Pikin kam na [di] wɔl, so dat in Pikin kin mek wi gɛt layf. Wetin na lɛk? Nain dis: Nɔto fɔ se wi lɛk Gɔd, bɔt in lɛk wi ɛn i sɛn in Pikin kam na [di] wɔl fɔ sakrifays insɛf fɔ wi mek i go padin wi sin dɛn.”—1 Jɔn 4:9, 10.

8, 9. Trade trade we Ebraam ɛn Ayzak bin de, aw Jiova bin sho se in na Gɔd we de gi wi wetin wi nid? (Luk di pikchɔ nia dis atikul in taytul.)

8 Lɛk 1,900 ia so bifo dɛn bɔn Jizɔs, sɔntin apin na Ebraam in layf we bin sho aw Jiova go gi layf we go de sote go to ɔl in fetful savant dɛn. Di Ibru Pipul Dɛn 11:17-19 se: “Na bikɔs Ebraam bin biliv Gɔd, mek, wɛn Gɔd tɛst am, i gri fɔ tek Ayzak, we na bin in wangren pikin, fɔ sakrifays am to Gɔd. Ebraam bin go fɔ sakrifays Ayzak pan ɔl we Gɔd bin dɔn prɔmis Ebraam se, na Ayzak go bɔn plɛnti pikin dɛn we go bi in grampikin pikin dɛm. Bɔt Ebraam bin biliv se Gɔd ebul mek Ayzak rayz bak, if i day. So, wi kin se, ivin we Ayzak nɔ day, i tan lɛkɛ pɔsin we bin dɔn day, bɔt i rayz bak ɛn fala Ebraam.” Jɔs lɛk aw Ebraam bin rɛdi fɔ sakrifays in wangren pikin we na Ayzak, na so Jiova insɛf bin rɛdi fɔ gi in Pikin we na Jizɔs Krays, fɔ kam day fɔ sev mɔtalman.—Rid Jɔn 3:16, 36.

 9 Aw Ayzak bin fil we i kam fɔ no se in papa nɔ go kil am igen? In at go mɔs dɔn kam dɔŋ! Ɛn i bin rili gladi we Jiova gi Ebraam wan manship fɔ sakrifays. Na dat mek Ebraam kɔl di ples in nem “Jiova Jayrɛ.” I min “PAPA GƆD go provayd.”—Jɛn. 22:14; futnot.

DI WE AW WI GƐT PIS WIT GƆD

10, 11. Udat dɛn de bifo fɔ “mek ɔda padi dɛn fɔ Gɔd”? Aw dɛn dɔn du dat?

10 We wi de tink dip wan bɔt aw Jiova de sho se in na Gɔd we de gi wi wetin wi nid, wi go kam fɔ no se na Jizɔs in day nɔmɔ go ebul mek wi bi Gɔd in padi. Pɔl bin rayt se: “Na di lɛk we Krays lɛk wi de rul wi, bikɔs naw wi si se wan man dɔn day fɔ ɔlman, so dat min se ɔlman dɔn day wit am. I day fɔ ɔlman so dat dɛn wan we gɛt layf nɔ go liv fɔ dɛnsɛf nɔmɔ, bɔt dɛn go jɛs liv nɔmɔ fɔ di wan we dɔn day, we Gɔd mek rayz frɔm di grev fɔseka dɛn.”—2 Kɔr. 5:14, 15.

11 Di Kristian dɛn we bin de di tɛm we di apɔsul dɛn bin de, bin gladi fɔ “mek ɔda padi dɛn fɔ Gɔd,” bikɔs dɛn bin lɛk Gɔd ɛn gladi fɔ we dɛn ebul fɔ sav am. Di wok we dɛn bin gɛt we na fɔ mek pipul dɛn bi Jizɔs in disaypul, bin ɛp plɛnti we rili want fɔ no di tru bɔt Gɔd. Dis wok bin ɛp dɛn pipul ya fɔ mek dɛn go ebul fɔ gɛt pis wit Gɔd, fɔ bi in padi, ɛn fɔ bi in pikin dɛn. Tide, di pipul dɛn we Jiova dɔn anɔynt, de du di sem wok. Dɛn de ɛp ɔda pipul dɛn fɔ bi padi to Gɔd ɛn Krays. Dis wok de ɛp pipul dɛn we rili want fɔ no bɔt Gɔd ɛn we ɔmbul fɔ mek dɛn kam nia Jiova ɛn bi in savant dɛn.—Rid Sɛkɛn Lɛta Fɔ Kɔrint 5:18-20; Jɔn 6:44; Akt 13:48.

12, 13. Aw wi go sho se wi gladi fɔ ɔl di tin dɛn we Jiova de gi wi?

12 Bikɔs di ɔda ship dɛn gladi fɔ we Jiova na di Gɔd we de gi dɛn wetin dɛn nid, na dat mek dɛn de jɔyn di anɔyntɛd Kristian dɛn fɔ prich bɔt Gɔd in Kiŋdɔm. We wi de du dis wok, wi de yuz wan ɔda tin we Gɔd dɔn gi wi, dat na di Baybul. (2 Tim. 3:16, 17) We wi de yuz Gɔd in Wɔd as wi de prich, wi de ɛp ɔda pipul dɛn fɔ mek dɛn go gɛt layf we go de sote go. Bɔt fɔ mek wi go ebul du dis wok fayn fayn wan, wi ɔl fɔ abop pan wan ɔda tin we Jiova de gi wi. Wetin na da tin de? Na in oli spirit. (Zɛk. 4:6; Lyuk 11:13) Di we aw dis wok de ɛp pipul dɛn tide rili wɔndaful, jɔs lɛk aw wi kin si am na wi Yearbook dɛn. Na wɔndaful tin fɔ mek wi ɛp fɔ du dis wok we de mek wi Papa ɛn wi Gɔd we de gi wi wetin wi nid, gladi!

13 Bikɔs Gɔd dɔn gi wi ɔl dɛn tin ya, i go fayn mek wi aks wisɛf dɛn kwɛstyɔn ya: ‘A de du ɔl wetin a ebul fɔ du pan di prichin wok fɔ sho Jiova se a gladi fɔ ɔl wetin i dɔn gi mi? Wetin a go du fɔ mek a ebul du di prichin wok fayn fayn wan?’ Wi go sho se wi gladi fɔ ɔl di wɔndaful tin dɛn we Gɔd dɔn gi wi bay we wi de put wi at gud wan pan Gɔd in Kiŋdɔm. We wi du dat, Jiova go gi wi di tin dɛn we wi nid. (Mat. 6:25-33) Bikɔs Gɔd lɛk wi, wi fɔ tray tranga wan fɔ du ɔl wetin wi ebul fɔ du so dat wi go du wetin i want ɛn mek i gladi.—Prɔv. 27:11.

14. Aw Jiova dɔn de pul in pipul dɛn pan trɔbul?

14 Devid we rayt sɔm pat dɛn na di Sam buk bin se: “Pan ɔl we mi na nɔnɛntiti, PAPA GƆD, nɔ fɔgɛt mi[.] Na yu na di wan we de pul mi pan trɔbul ɛn ɛp mi.” (Sam 40:17) Jiova na di Wan we de pul in pipul dɛn pan trɔbul, mɔ we dɛn ɛnimi dɛn de du bad bad tin dɛn to dɛn. Wi kin rili gladi we Gɔd kin ɛp wi dɛn tɛm dɛn de, ɛn we ɔltɛm i kin gi wetin wi nid fɔ kɔntinyu fɔ sav am!

 JIOVA DE KƆBA WI

15. Gi ɛgzampul fɔ sho aw papa we lɛk in pikin kin tray fɔ mek bad tin nɔ mit am.

15 Ɛni papa we lɛk in pikin dɛn nɔ kin jɔs gi dɛn wetin dɛn nid, bɔt i kin tray bak fɔ mek bad tin nɔ mit dɛn. If dɛn de pan trɔbul, i kin tray fɔ pul dɛn de kwik kwik wan. Wan brɔda mɛmba sɔntin we bin apin we i bin smɔl. In ɛn in papa bin de kɔmɔt fil savis ɛn dɛn pas na wan rod fɔ go na dɛn os. As dɛn de go, dɛn rich na wan riva. Bɔt bikɔs ebi ebi ren bin dɔn kam da mɔnintɛm de, di wata bin ful-ɔp pasmak. So pas dɛn krɔs di wata bifo dɛn go ebul go na dɛn os. Ɛn fɔ krɔs, dɛn bin gɛt fɔ jomp jomp pan big big ston dɛn. Na di brɔda bin de bifo in papa. As dɛn de go, na de i slipul pan wan ston, ɛn fɔdɔm insay di wata. I go dɔŋ di wata tu tɛm. I bin rili gladi we in papa ol am tayt wan na in sholda, ɛn pul am insay di wata fɔ mek i nɔ day. Na da sem we de wi Papa we de na ɛvin de kɔba wi frɔm di bad bad tin dɛn we de na di wɔl ɛn frɔm Setan. Na Jiova na di bɛst Pɔsin we ɛnibɔdi go want fɔ mek i kɔba am.—Mat. 6:13; 1 Jɔn 5:19.

16, 17. Aw Jiova bin ɛp ɛn kɔba di Izrɛlayt dɛn we dɛn bin de fɛt di Amalɛkayt dɛn?

16 Insay di ia 1513 bifo Krays, Jiova bin kɔba in pipul dɛn. I bin dɔn pul dɛn kɔmɔt na Ijipt usay dɛn bin de as slev, ɛn i bin dɔn kɔba dɛn we dɛn bin de krɔs di Rɛd Si. We di Izrɛlayt dɛn bin de go na Mawnt Saynay, dɛn rich na wan ples we dɛn kɔl Refidim.

17 Setan go dɔn de tray tranga wan fɔ du bad tin to di Izrɛlayt dɛn, mɔ we di tin we Gɔd bin dɔn tɔk na Jɛnɛsis 3:15 nɔ bin dɔn apin yet. Setan bin fil se di Izrɛlayt dɛn nɔ gɛt pɔsin we de kɔba dɛn. Aw Setan bin dɔn de tray fɔ du bad tin to dɛn? I bin de yuz di Amalɛkayt dɛn, we nɔ bin lɛk Gɔd in pipul dɛn. (Nɔm. 24:20) Aw Jiova yuz Jɔshwa, Mozis, Erɔn,  ɛn Ɔ, fɔ kɔba in pipul dɛn? As Jɔshwa bin de fɛt di Amalɛkayt dɛn, Mozis, Erɔn, ɛn Ɔ bin de na wan il we bin de nia di ples we dɛn de fɛt. Di Izrɛlayt dɛn bin de win di fɛt we Mozis bin es in an dɛn ɔp. We i taya fɔ es in an dɛn, Erɔn ɛn Ɔ bin ɛp am fɔ es dɛn ɔp. So na bikɔs Jiova ɛp dɛn ɛn kɔba dɛn, na dat mek “Jɔshwa tek in sɔd fɛt di Amalɛkayt dɛn” te i win dɛn. (Ɛks. 17:8-13) Mozis bil wan ɔlta de ɛn kɔl am “Jiova Nisi.” I min “PAPA GƆD gi am viktri.”—Rid Ɛksodɔs 17:14, 15; futnot.

JIOVA DE ƐP WI FƆ MEK SETAN NƆ EBUL WI

18, 19. Aw Gɔd dɔn de kɔba in savant dɛn na di wɔl tide?

18 Jiova de kɔba di wan dɛn we lɛk am ɛn we de du wetin i want. Wi de abop pan Gɔd fɔ kɔba wi, jɔs lɛk di Izrɛlayt dɛn we dɛn bin de na Refidim. Jiova dɔn de kɔba wi, ɛn i de ɛp wi fɔ mek Setan nɔ ebul wi. Tink bɔt ɔl di difrɛn difrɛn tɛm we Gɔd dɔn kɔba wi brɔda dɛn we bin tinap tranga wan fɔ wetin dɛn biliv ɛn nɔ put an pan pɔlitiks. Fɔ ɛgzampul, tink bɔt wi brɔda dɛn na Jamani ɛn ɔda kɔntri dɛn insay dɛn 1930 ɛn 1940. We wi kin rid insay sɔm magazin dɛn ɛn Yearbook dɛn bɔt di we aw Gɔd bin kɔba di brɔda dɛn na dɛn kɔntri dɛn de, i kin mek wi biliv tranga wan se Gɔd gɛt di pawa fɔ kɔba wi.—Sam 91:2.

Jiova kin yuz wi brɔda dɛn fɔ ɛp wi fɔ tinap tranga wan we bad tin mit wi (Luk na paregraf 18-20)

19 Jiova de kɔba wi bay we i de yuz in ɔganayzeshɔn ɛn buk dɛn ɛn ɔda tin dɛn. Tink bɔt aw dɛn tin ya we Jiova de yuz tide, dɔn rili ɛp wi. Di wɔl dɔn ful-ɔp wit bɔku bad bad tin dɛn, lɛk mami ɛn dadi biznɛs, pipul dɛn we de drink te dɛn chak, ɛn pikchɔ dɛn we de sho nekɛd pipul dɛn. Bɔt Jiova de ɛp wi fɔ mek wi nɔ du dɛn tin ya we go pwɛl wi padi biznɛs wit am. Fɔ ɛgzampul, Jiova we na wi Papa, kin advays wi fɔ mek wi tek tɛm aw wi de yuz di difrɛn difrɛn say dɛn na di Intanɛt we pipul dɛn kin yuz fɔ tɔk to ɔda pipul dɛn, so dat wi nɔ go gɛt natin fɔ du wit bad pipul dɛn. *1 Kɔr. 15:33.

20. Aw Jiova de yuz di kɔngrigeshɔn fɔ kɔba wi ɛn gayd wi?

20 Aw wi go sho se wi de rili fala dɛn advays ya ɛn sho bak se ‘na Jiova de tich wi’? Wi go du dat bay we wi de du wetin i de tɛl wi. (Ayz. 54:13) Di kɔngrigeshɔn na di ples usay wi kin go fɔ mek Jiova kɔba wi ɛn gayd wi. Di ɛlda dɛn go ɛp wi ɛn gi wi gud advays. (Gal. 6:1) Na dɛn man ya Jiova “gi mɔtalman” fɔ kia fɔ wi fayn fayn wan. (Ɛfi. 4:7, 8) So, wetin wi fɔ du we di ɛlda dɛn gi wi advays? I go fayn mek wi du wetin dɛn tɛl wi so dat wi go gɛt Gɔd in blɛsin.—Ibru 13:17.

21. (a) Wetin wi fɔ rɛdi fɔ du? (b) Wetin wi go lan na di nɛks atikul?

21 So lɛ wi rɛdi fɔ alaw Gɔd in spirit fɔ ɛp wi ɛn fɔ fala di we aw wi Papa we de na ɛvin, de gayd wi. Apat frɔm dat, wi fɔ de tink gud wan bɔt Jizɔs Krays in ɛgzampul ɛn tray tranga wan fɔ falamakata am. Bikɔs “i gri fɔ du ɔl wetin Gɔd tɛl am fɔ du, fɔ day sɛf,” dat bin mek Gɔd gi am bɔku bɔku blɛsin. (Fil. 2:5-11) Jiova go blɛs wi bak if wi abop pan am wit ɔl wi at. (Prɔv. 3:5, 6) Lɛ wi abop pan Jiova ɔltɛm bikɔs na in nɔmɔ go ebul gi wi wetin wi nid ɛn kɔba wi pas ɛnibɔdi. Wi go rili gladi we wi sav Jiova! Bɔt, aw Jiova na wi tayt Padi? I go fayn fɔ mek wi no di ansa bikɔs dat go mek wi lɛk Jiova mɔ ɛn mɔ. Na dat wi go tɔk bɔt na di nɛks atikul.

^ par. 19 Sɔm pan di advays dɛn we Gɔd dɔn gi wi, de insay magazin dɛn lɛk di Ɔgɔst 15, 2011, Wachtawa, frɔm pej 3 to pej 5, insay di atikul we na “The Internet—Making Wise Use of a Global Tool”; di Ɔgɔst 15, 2012, Wachtawa, frɔm pej 20 to pej 29, insay di atikul dɛn we na “Beware of the Devil’s Snares!” ɛn “Stand Firm and Avoid Satan’s Traps!” Na insay Inglish ɔl dɛn magazin ya de.