Go dayrɛkt to di men tin

Go dayrɛkt to di say we di difrɛn difrɛn atikul dɛn de

Lɛ Wi Gladi fɔ di Ship In Mared!

Lɛ Wi Gladi fɔ di Ship In Mared!

“Lɛ wi gladi ɛn fɔdɔm bifo Gɔd . . . bikɔs . . . di tɛm fɔ mek di Ship mared dɔn kam.”—RƐV. 19:7.

1, 2. (a) Udat in mared go mek di wan dɛn we de na ɛvin, gladi? (b) Us kwɛstyɔn dɛn wi de kam tɔk bɔt?

PIPUL DƐN kin tek lɔng tɛm fɔ rɛdi fɔ di de we dɛn go mared. Di mared we wi de kam tɔk bɔt, na wan spɛshal ɛn impɔtant mared. Tink bɔt dis: I dɔn tek lɛk 2,000 ia so frɔm we dɛn dɔn de rɛdi fɔ dis mared. Naw di tɛm nɔ de fa igen fɔ mek di ɔkɔ kam de wit in yawo. I nɔ go te igen, fayn fayn myuzik go bigin ple na di Kiŋ in os, ɛn ɔl di wan dɛn we de na ɛvin go de siŋ se: “Aliluya! Di Masta, we na wi Gɔd we gɛt pawa pas ɔl, de rul, una lɛ wi prez am! Lɛ wi gladi ɛn fɔdɔm bifo Gɔd ɛn prez am, bikɔs na big Gɔd! Di tɛm fɔ mek di Ship mared dɔn kam, ɛn in yawo dɔn drɛs de wet am.”—Rɛv. 19:6, 7.

2 “Di Ship” we in mared go mek gladi gladi de na ɛvin, na Jizɔs Krays. (Jɔn 1:29) Aw i drɛs fɔ di mared? Udat na in yawo? Aw di yawo dɔn de wet fɔ di mared? Ustɛm di mared go apin? Dis mared go mek di wan dɛn we de na ɛvin gladi. Bɔt we di wan dɛn we go de na di wɔl, dɛnsɛf go  gladi? Wi go rili want fɔ gɛt di ansa to dɛn kwɛstyɔn ya as wi de kɔntinyu fɔ tɔk mɔ bɔt di ɔda vas dɛn na Sam 45.

‘IN KLOS DE SMƐL SWIT WIT PAFYUM’

3, 4. (a) Uskayn mared-klos di Ɔkɔ wɛr? Wetin mek i gladi mɔ? (b) Udat na di “uman dɛn we na kiŋ pikin dɛn” ɛn di “pipul we de na say we dɛkɔret wit ayvri” we dɛnsɛf gladi wit di Ɔkɔ?

3 Rid Sam 45:8, 9. Jizɔs Krays we na di Ɔkɔ, wɛr fayn fayn mared-klos. No wɔnda in klos de smɛl swit wit ‘pafyum we dɛn mek wit ma ɛn kasia.’ Dɛn tin ya bin de pan di tin dɛn we dɛn bin de yuz na Izrɛl fɔ mek di ɔyl we dɛn bin de yuz fɔ anɔynt pipul dɛn.—Ɛks. 30:23-25.

4 Di myuzik we de ple na di Kiŋ in os, de mek di Ɔkɔ gladi mɔ as di mared de nia. “Pipul we de na say we dɛkɔret wit ayvri” jɔyn di Kiŋ fɔ gladi. Dɛn pipul ya na ɔl di pipul dɛn na ɛvin we de na Gɔd in wan big famili. Sɔm pan dɛn pipul ya na di enjɛl dɛn we na di “uman dɛn we na kiŋ pikin dɛn.” I go rili fayn fɔ yɛri we ɔl dɛn fayn vɔys ya go de se: “Lɛ wi gladi ɛn fɔdɔm bifo Gɔd . . . bikɔs . . . di tɛm fɔ mek di Ship mared dɔn kam”!

DI YAWO DƆN RƐDI FƆ DI MARED

5. Udat na “di Ship in yawo”?

5 Rid Sam 45:10, 11. Wi dɔn sabi di Ɔkɔ, bɔt udat na di yawo? Di yawo na ɔl di pipul dɛn we Gɔd dɔn anɔynt ɛn we Jizɔs Krays de oba. (Rid Lɛta Fɔ Ɛfisɔs 5:23, 24.) Dɛn pipul ya go de wit Krays fɔ rul na in Kiŋdɔm. (Lyuk 12:32) Dɛn 144,000 Kristian ya we Gɔd dɔn anɔynt, go “de fala di Ship ɛni say i go.” (Rɛv. 14:1-4) Dɛn go bi “di Ship in yawo,” ɛn dɛn go de wit am na ɛvin.—Rɛv. 21:9; Jɔn 14:2, 3.

6. Udat kɔl dis yawo “mi pikin” ɛn wetin mek i kɔl am so? Wetin mek dɛn Kristian ya ‘nɔto dɛn pipul yon igen’?

6 Insay Sam 45, sɔmbɔdi kɔl dis yawo “mi pikin” ɛn se i “de mach go insay di kiŋ in os.” (Sam 45:13) Na udat na dis pɔsin? Na Jiova. Aw wi no dat? Na bikɔs i dɔn tek di Kristian dɛn we i dɔn anɔynt fɔ bi “in pikin dɛn.” (Rom 8:15-17) Gɔd tɛl dɛn Kristian ya se ‘dɛn nɔto dɛn papa [we bɔn dɛn] ɛn dɛn pipul yon igen.’ Wetin mek Gɔd se so? Na bikɔs i dɔn anɔynt dɛn fɔ bi yawo na ɛvin. So dɛn fɔ ‘put ɔl dɛn at pan di tin dɛn we de na ɛvin, dɛn nɔ fɔ put dɛn at pan di tin dɛn we de na dis wɔl.’—Kɔl. 3:1-4.

7. (a) Aw Krays dɔn de rɛdi in yawo? (b) Wetin di yawo fɔ no?

7 Ɔl dɛn tɛm ya, Krays dɔn de rɛdi in yawo fɔ di mared na ɛvin. Di apɔsul Pɔl bin tɔk se Krays “lɛk di chɔch sote i day, fɔ mek di chɔch klin wit wata ɛn in wɔd, dɛn i an am oba gi Gɔd. Krays du ɔl dat, so dat wɛn i go mek di chɔch tinap bifo am, di chɔch go klin, i nɔ go gɛt bɔt pan am.” (Ɛfi. 5:25-27) Pɔl bin tɛl di Kristian dɛn we Gɔd dɔn anɔynt trade na Kɔrint se: “A de jɛlɔs fɔ una lɛkɛ aw Gɔd insɛf de jɛlɔs fɔ wi; una na lɛkɛ uman we nɔ no man we a dɔn prɔmis to wangren man, dat na Krays.” (2 Kɔr. 11:2) Di Ɔkɔ ɛn Kiŋ we na Jizɔs Krays lɛk di we aw in yawo “fayn.” Ɛn di yawo insɛf no se ‘na di Kiŋ gɛt in fayn fayn bɔdi’ ɛn rɛdi fɔ “du wetin i se ɔltɛm.”

‘DƐN KƐR DI YAWO GO TO DI KIŊ’

8. Wetin mek i kɔrɛkt fɔ se ‘na so di yawo fayn’?

8 Rid Sam 45:13, 14a. Di pɔsin we rayt dis Sam tɔk bɔt di yawo se “na so  i fayn” fɔ di mared. Insay Rɛvɛleshɔn 21:2, dɛn kɔmpia di yawo to wan tɔŋ we dɛn kɔl Nyu Jerusɛlɛm, ɛn ‘dɛn bin dɔn mek am fayn fayn wan lɛk uman we jɔs mared we dɔn drɛs de wet fɔ go to in man.’ Na ɛvin dis tɔŋ de, ɛn “Gɔd in brayt layt bin de shayn insay de.” Ɛn “di tɔŋ bin de shayn lɛkɛ wan fayn fayn ston we dɛn kɔl jaspa, ɛn i bin de shayn lɛkɛ glas.” (Rɛv. 21:10, 11) Insay Rɛvɛleshɔn, dɛn tɔk bɔt di we aw dis Nyu Jerusɛlɛm fayn. (Rɛv. 21:18-21) Bikɔs na ɛvin dis impɔtant mared gɛt fɔ bi, na dat mek di pɔsin we rayt Sam 45 tɔk bɔt di yawo se “na so i fayn.”

9. Udat na “di kiŋ” we dɛn kɛr di yawo go to? Aw di yawo drɛs?

9 Di Pɔsin we dɛn kɛr di yawo go to, na di Ɔkɔ. Dis Ɔkɔ na in na di Kiŋ na Gɔd in Kiŋdɔm. I dɔn de rɛdi in yawo bay we i de ‘klin am wit wata ɛn in wɔd.’ Di yawo “nɔ go gɛt bɔt pan am.” (Ɛfi. 5:26, 27) Di yawo insɛf fɔ drɛs fayn fɔ di mared. Ɛn i rili drɛs fayn! Wetin mek wi se so? Na bikɔs dɛn mek “in gawn wit soso gold,” ɛn “i wɛr fayn klos wit dizayn we dɛn de kɛr am go to di kiŋ.” Apat frɔm dat, “dɛn gi am fayn klin wayt linin klos fɔ wɛr. (Di fayn linin de sho aw Gɔd in pipul dɛn de waka tret.)”—Rɛv. 19:8.

“DI TƐM FƆ MEK DI SHIP MARED DƆN KAM”

10. Ustɛm di Ship in mared go bi?

10 Rid Rɛvɛleshɔn 19:7. Ustɛm di Ship in mared go bi? Pan ɔl we di “yawo dɔn drɛs de wet” fɔ di mared, di tin we Jɔn tɔk afta dat insay Rɛvɛleshɔn, nɔto bɔt di mared. Wetin i tɔk bɔt? Na bɔt di tin dɛn we go apin we di big trɔbul go dɔn bigin. (Rɛv. 19:11-21) Fɔ se dis min se di mared apin bifo di Kiŋ we na di Ɔkɔ dɔn fɔ win in wɔ dɛn? Nɔ, nɔto dat i min! Jɔn nɔ rayt di vishɔn dɛn insay Rɛvɛleshɔn lɛk aw dɛn apin. Insay Sam 45, di impɔtant mared apin afta di Kiŋ we na Jizɔs Krays, ol in wɛpɔn ɛn ‘kɔntinyu fɔ win ɔl in wɔ dɛn.’—Sam 45:3, 4.

11. Wetin-ɛn-wetin Krays go du fɔ dɔn fɔ win in wɔ dɛn?

11 So aw di tin dɛn go apin? Fɔs, di Kiŋ go pul ɔl di lay lay rilijɔn dɛn na di wɔl we Jɔn kɔl “da uman we [de] liv fri layf” ɛn “Babilɔn we ɔlman no.” (Rɛv. 17:1, 5, 16, 17; 19:1, 2) Dɔn, Krays go kam fɛt “di wa we go bi da big de we Gɔd, we gɛt pawa pas ɔl, go sho in pawa.” Dis wɔ na Amagɛdɔn. I go fɛt dis wɔ fɔ pul ɔl di tin dɛn we Setan gɛt na di wɔl. (Rɛv. 16:14-16; 19:19-21) Afta ɔl dat, di Kiŋ go dɔn fɔ win in wɔ dɛn bay we i go mek Setan ɛn in dɛbul dɛn nɔ gɛt pawa igen fɔ du ɛnitin to mɔtalman.—Rɛv. 20:1-3.

12, 13. (a) Ustɛm di Ship in mared go apin? (b) Udat na ɛvin go gladi fɔ di Ship in mared?

12 As di Kristian dɛn we Gɔd dɔn anɔynt day naw na di wɔl, dɛn de go na ɛvin wantɛm. Afta Jizɔs go dɔn pul Babilɔn we ɔlman no, i go gɛda ɔl di wan dɛn we lɛf pan in yawo. (1 Tɛs. 4:16, 17) So bifo Amagɛdɔn, ɔl di wan dɛn we na di Kiŋ in yawo go dɔn de na ɛvin. Na afta da wɔ de, di Ship go mared. Dis mared go rili fayn! Rɛvɛleshɔn 19:9 tɔk se: “Blɛsin de pan dɛn wan we dɛn kɔl fɔ go it na di Ship in mared.” Di 144,000 pipul dɛn we na di yawo, go rili gladi. Ɛn di Kiŋ we na di Ɔkɔ, go gladi pasmak fɔ we ɔl dɛn pipul ya ‘go it ɛn drink wit am na di say we i de  rul.’ (Lyuk 22:18, 28-30) Bɔt, nɔto di Ɔkɔ ɛn in yawo nɔmɔ go gladi fɔ di Ship in mared.

13 Lɛk aw wi bin dɔn tɔk, ɔl di wan dɛn na ɛvin go de siŋ se: “Lɛ wi gladi ɛn fɔdɔm bifo [Jiova] ɛn prez am, bikɔs na big Gɔd! Di tɛm fɔ mek di Ship mared dɔn kam, ɛn in yawo dɔn drɛs de wet am.” (Rɛv. 19:6, 7) Bɔt, we Jiova in savant dɛn na di wɔl, dɛnsɛf go jɔyn pan di gladi gladi?

“DƐN ƆL DE SIŊ ƐN DANS” WE DƐN DE GO

14. Udat na di vajin dɛn we Sam 45:14 kɔl “di uman dɛn we de wit [di yawo]”?

14 Rid Sam 45:12, 14b, 15. Di prɔfɛt Zɛkaraya bin se bifo di wɔl dɔn, pipul dɛn ɔlsay na di wɔl go kam jɔyn di wan dɛn we lɛf pan di anɔyntɛd dɛn. I se: “Da tɛm de, tɛn man pan ɔl di trayb dɛn na [di] wɔl, go grip wan Ju man in klos de se lɛ dɛn go wit am bikɔs dɛn dɔn yɛri se, PAPA GƆD de wit am.” (Zɛk. 8:23) Insay Sam 45:12, dɛn kɔl dɛn “tɛn man” ya “pipul dɛn frɔm Tay” ɛn “jɛntri man dɛn.” Dɛn pipul ya briŋ prɛzɛnt to di anɔyntɛd dɛn we lɛf. Dɛn du dat fɔ mek di wan dɛn we Gɔd dɔn anɔynt ɛp dɛn fɔ no Gɔd. Frɔm 1935, plɛnti plɛnti pipul dɛn dɔn gri fɔ mek di anɔyntɛd dɛn we lɛf, ‘sho dɛn aw fɔ waka di rayt we.’ (Dan. 12:3) Dɛn fetful pipul ya we de wok wit di Kristian dɛn we Gɔd dɔn anɔynt, dɔn klin dɛn layf. Dat dɔn mek dɛn tan lɛk vajin dɛn. Dɛn “vajin” ya “we de wit [di yawo]” dɔn gi dɛn layf to  Jiova, ɛn dɛn dɔn sho se dɛn rɛdi fɔ mek di Ɔkɔ we na di Kiŋ, rul dɛn.

15. Aw di “vajin” dɛn dɔn de wok wit di wan dɛn we lɛf pan di yawo?

15 Di wan dɛn we lɛf pan di yawo, gladi fɔ di we aw dɛn “vajin” ya dɔn de ɛp dɛn fɔ prich “di Gud Nyuz bɔt wɛn Gɔd go rul” ɔlsay na di wɔl. (Mat. 24:14) “Gɔd in Spirit ɛn di Ship in yawo, se ‘Kam!’” ɛn ivin di wan dɛn we de yɛri dɛn wɔd ya, dɛnsɛf de se, “Kam!” (Rɛv. 22:17) Fɔ tru, di “ɔda ship dɛn” yɛri we di yawo, de se “Kam!” ɛn dɛnsɛf dɔn jɔyn di wan dɛn we na di yawo, fɔ tɛl ɔlman na di wɔl se “Kam!”—Jɔn 10:16.

16. Wetin Jiova dɔn mek di ɔda ship dɛn ebul fɔ du?

16 Di wan dɛn we lɛf pan di anɔyntɛd dɛn, lɛk di ɔda ship dɛn. Ɛn dɛn gladi fɔ no se di Ɔkɔ in Papa we na Jiova, dɔn mek di ɔda ship dɛn jɔyn fɔ gladi pan di Ship in mared. Dɛn “vajin” ya “we de wit [di yawo]” go ‘de siŋ ɛn dans we dɛn de kɛr di yawo.’ Di ɔda ship dɛn we gɛt fɔ de na di wɔl sote go, dɛnsɛf go de siŋ ɛn dans we di Ship go mared na ɛvin. Insay Rɛvɛleshɔn, dɛn tɔk se “bɔku bɔku pipul” dɛn “tinap bifo di ay chia we kiŋ kin sidɔm, na di say we di Ship insɛf bin de.” Dɛn ɔda ship ya, go de na di wɔl de sav Jiova.—Rɛv. 7:9, 15.

Di Ship in mared go mek di “vajin” dɛn we de wit di yawo, gladi pasmak (Luk na paregraf 16)

YU BƆYPIKIN DƐN GO KAM BI “LƐKƐ DƐN FƆSTƐM-PAPA DƐN”

17, 18. Aw di Ship go gɛt pikin dɛn? Na to udat dɛn Krays go bi papa insay in Wan Tawzin Ia Rul?

17 Rid Sam 45:16. Dɛn “vajin” ya we de wit Krays in yawo go siŋ ɛn dans mɔ na Paradays we dɛn go dɔn si se di yawo ɛn di Ɔkɔ dɔn gɛt pikin dɛn. Di Ɔkɔ we na di Kiŋ go du fayn fayn tin dɛn fɔ di wan dɛn we de na di wɔl, ɛn i go mek in “fɔstɛm-papa dɛn” rayz frɔm dɛn grev ɛn dɛn go bi in “bɔypikin” dɛn. (Jɔn 5:25-29; Ibru 11:35) Na sɔm pan dɛn “bɔypikin” ya Krays go pik fɔ “rul di wanol wɔl.” Wi shɔ se i go pik sɔm ɛlda dɛn bak we de naw ɛn we fetful, fɔ kia fɔ di wan dɛn we go de na Paradays.—Ayz. 32:1.

18 Insay Krays in Wan Tawzin Ia Rul, Krays go bi papa to ɔda pipul dɛn bak. Infakt, ɔl di wan dɛn we go gɛt layf we go de sote go, go gɛt am bikɔs dɛn sho se dɛn biliv pan di day we Jizɔs bin kam day fɔ dɛn. (Jɔn 3:16) So, Jizɔs go bi dɛn “Ɛvalastin Papa.”—Ayz. 9:6, 7.

LƐ WI TƆK BƆT UDAT DI KIŊ BI

19, 20. Aw di tin dɛn we de na Sam 45 gɛt sɔntin fɔ du wit ɔlman we na Kristian tide?

19 Rid Sam 45:1, 17. Fɔ tru, di tin dɛn we de na Sam 45 gɛt sɔntin fɔ du wit ɔlman we na Kristian. Di wan dɛn we lɛf pan di anɔyntɛd dɛn, rili gladi fɔ no se i nɔ go te igen dɛn go jɔyn dɛn kɔmpin dɛn ɛn dɛn Ɔkɔ na ɛvin. Di ɔda ship dɛn rɛdi fɔ put dɛnsɛf ɔnda dɛn wɔndaful Kiŋ, ɛn dɛn gladi fɔ we dɛn ebul fɔ wok wit di wan dɛn we lɛf pan di Kiŋ in yawo we stil de na di wɔl. Afta di mared, Krays ɛn di ɔda wan dɛn we go de wit am na in Kiŋdɔm go du bɔku fayn fayn tin dɛn fɔ ɔl di wan dɛn we go de na di wɔl.—Rɛv. 7:17; 21:1-4.

20 As wi de wet fɔ si di tɛm we Gɔd in Kiŋ go du “fayn, fayn tin dɛn,” lɛ wi rɛdi fɔ ‘tɔk bɔt udat di Kiŋ bi,’ ɛn lɛ wi tray tranga wan fɔ de wit di wan dɛn we ‘nɔ go ɛva fɔgɛt di Kiŋ.’