Go dayrɛkt to di men tin

Go dayrɛkt to di say we di difrɛn difrɛn atikul dɛn de

Kwɛstyɔn dɛn We Pipul dɛn Kin Aks

Kwɛstyɔn dɛn We Pipul dɛn Kin Aks

Wetin mek di Ju pipul dɛn we bin de insay Jizɔs in tɛm, bin “de wet” fɔ di Mɛsaya?

Insay di tɛm we Jɔn bin de baptayz pipul dɛn, “ɔlman bin de wet fɔ mek di Mɛsaya kam ɛn dɛn bin de wɔnda if Jɔn na di Mɛsaya.” (Lyuk 3:15) Wetin mek na da tɛm de di Ju pipul dɛn bin de wet fɔ di Mɛsaya fɔ kam? Bɔku rizin dɛn de.

Afta dɛn bɔn Jizɔs, Jiova bin sɛn in enjɛl to sɔm shɛpad dɛn we bin de mɛn dɛn ship dɛn nia Bɛtliɛm. (1) Di enjɛl bin tɛl di shɛpad dɛn se: “Tide na da tɔŋ we Devid bin bɔn, dɛn dɔn bɔn Wan Pikin we go sev una. Na di Mɛsaya we na wi Masta.” (Lyuk 2:8-11) I nɔ tu te, na in di shɛpad dɛn si “plɛnti plɛnti enjɛl dɛn kam, de prez Gɔd ɛn se: * ‘Lɛ wi prez Gɔd we de ɔp na ɛvin, ɛn mek ɔl mɔtalman we gɛt Gɔd in blɛsin gɛt kolat na di wɔl!’”—Lyuk 2:13, 14, NW.

Di shɛpad dɛn bin rili gladi fɔ yɛri da mɛsej de. Dɛn bin go wantɛm na Bɛtliɛm, ɛn we dɛn si Josɛf ɛn Meri wit Jizɔs, “dɛn tɔk ɔl wetin di enjɛl bin dɔn tɛl dɛn bɔt [Jizɔs].” Dis bin mek “ɔlman we yɛri wetin dɛn tɔk, wɔnda.” (Na wi mek am italiks; Lyuk 2:17, 18) We di Baybul se “ɔlman we yɛri,” dat min se nɔto Josɛf ɛn Meri nɔmɔ di shɛpad dɛn bin tɛl di mɛsej; dɛn bin tɛl ɔda pipul dɛn bak. Ɛn as dɛn shɛpad ya de tɔn bak na dɛn os, dɛn bin de “tɛl Gɔd tɛnki” ɛn “prez am fɔ ɔl wetin dɛn bin jɛs yɛri ɛn si.” (Lyuk 2:20) Dɛn shɛpad ya bin tɛl ɔda pipul dɛn bɔt di gud tin dɛn we dɛn bin dɔn yɛri bɔt di Krays!

We Meri bin kɛr in fɔs bɔy pikin go na Jerusɛlɛm fɔ gi am to Jiova, lɛk aw di lɔ we Gɔd bin gi Mozis se, wan uman prɔfɛt we nem Ana bigin “tɛl Gɔd tɛnki. I tɔk bɔt di Pikin to ɔl dɛn wan we bin de wet fɔ mek Gɔd fri di pipul dɛn na Jerusɛlɛm.” (2) (Na wi mek am italiks; Lyuk 2:36-38; Ɛks. 13:12) So di nyus kɔntinyu fɔ go ɔlsay fɔ se di Mɛsaya dɔn kam.

Leta “sɔm sɛnsman dɛn we no bɔt sta, we kɔmɔt na di ist, kam na Jerusɛlɛm. Dɛn bigin aks pipul se, ‘Usay da pikin we bɔn fɔ kam bi dɛn Ju pipul dɛn kiŋ, de? Wi dɔn si in sta na di ist ɛn wi kam fɔ pre to am.’” (Mat. 2:1, 2) We “Kiŋ Ɛrɔd yɛri dat, in at pwɛl, ɛn na semwe so ɔlman at pwɛl na Jerusɛlɛm. I kɔl di bigman we de mek sakrifays fɔ pipul sin ɛn ɔl di Ju Lɔ ticha dɛn, ɛn aks dɛn se, ‘Usay  di Mɛsaya go bɔn?’” (3) (Na wi mek am italiks; Mat. 2:3, 4) So dis bin mek bɔku pipul dɛn no se di Mɛsaya we dɛn bin de wet fɔ, dɔn kam! *

Lyuk 3:15 we wi bin dɔn tɔk bɔt, sho se sɔm Ju pipul dɛn bin tink se Jɔn we bin de baptayz, na Krays. Bɔt Jɔn bin tɔk sɔntin we bin mek dɛn lɛf fɔ tink da we de. I bin se: “Di wan we de kam afta a dɔn du mi wok, in go baptayz una wit Gɔd in Spirit ɛn wit faya. I gɛt pawa pas mi, ɛn a nɔ fit sɛf fɔ lus in sus.” (Mat. 3:11) Dis tin we Jɔn tɔk, bin rili mek di pipul dɛn kɔntinyu fɔ wet fɔ di Mɛsaya.

Fɔ se di Ju pipul dɛn we bin de insay Jizɔs in tɛm bin yuz di 70 wiks we de na Daniɛl 9:24-27 fɔ no di tɛm we di Mɛsaya bin fɔ kam? I go bi se na in dɛn bin yuz, bɔt wi nɔ shɔ. Di tru tin na dat, insay di tɛm we Jizɔs bin de, di pipul dɛn bin gɛt difrɛn we aw dɛn ɔndastand di 70 wiks. Bɔt ɔl di difrɛn we aw dɛn bin ɔndastand am, nɔ de nia to di we aw wi ɔndastand am tide. *

Di Ju pipul dɛn bin gɛt wan grup we dɛn kɔl di Ɛsinis. Dis grup bin de tich se na tu Mɛsaya dɛn gɛt fɔ kam we di ia 490 want fɔ dɔn. Bɔt wi nɔ shɔ se na di tin we Daniɛl bin dɔn tɔk, dɛn bin de fala. Ilɛksɛf na dat dɛn bin du, i at fɔ biliv se di Ju dɛn fala wetin dɛn pipul ya tɔk. Wan rizin na dat, dis grup nɔ bin de miks wit ɔda pipul dɛn.

Afta lɛk 200 ia so afta Krays, sɔm Ju pipul dɛn bin biliv se di 70 wiks bin bigin frɔm di tɛm we dɛn pwɛl di fɔs tɛmpul na Jerusɛlɛm insay di ia 607 bifo Krays, te to di tɛm we dɛn pwɛl di sɛkɔn tɛmpul insay di ia 70 afta Krays. Ɔda wan dɛn bin tink se di 70 wiks, gɛt sɔntin fɔ du wit di tɛm we sɔm Ju pipul dɛn we dɛn kɔl di Makabiz bin tɔn rebɛl. So dɛn ɔl bin gɛt difrɛn we fɔ kɔnt di 70 wiks we Daniɛl bin tɔk bɔt.

If di Ju pipul dɛn we bin de insay Jizɔs in tɛm, bin rili ɔndastand di 70 wiks, di apɔsul dɛn ɛn ɔda Kristian dɛn bin fɔ dɔn sho dɛn se di Mɛsaya kam di rayt tɛm we dɛn bin se i go kam, ɛn dat dis Mɛsaya na Jizɔs Krays. Bɔt natin nɔ de we sho wi se di Kristian dɛn bin du dat.

Wan ɔda tin bak we fayn fɔ mek wi no na dat, di wan dɛn we rayt di Baybul buk dɛn we na Matyu, Mak, Lyuk, ɛn Jɔn bin tɔk bɔt plɛnti tin dɛn we di prɔfɛt dɛn bin se go apin to Jizɔs Krays. (Mat. 1:22, 23; 2:13-15; 4:13-16) Bɔt, nɔn pan dɛn nɔ bin tɔk se di 70 wiks gɛt sɔntin fɔ du wit Jizɔs in kam wan.

Frɔm ɔl wetin wi dɔn tɔk, wi nɔ shɔ se di pipul dɛn we bin de insay Jizɔs in tɛm, bin rili ɔndastand di 70 wiks we Daniɛl bin tɔk bɔt. Bɔt di Baybul buk dɛn we na Matyu, Mak, Lyuk, ɛn Jɔn gi ɔda gud rizin dɛn we mek di Ju pipul dɛn bin “de wet” fɔ di Mɛsaya.

^ par. 4 Di Baybul nɔ tɔk se di enjɛl dɛn bin “siŋ” di tɛm we dɛn bɔn Jizɔs.

^ par. 7 Sɔntɛm, wi go aks se, Aw di sɛnsman dɛn we no bɔt sta, bin ebul fɔ no se di “sta” we dɛn bin si na di Ist, gɛt sɔntin fɔ du wit di bɔn we dɛn bɔn “dɛn Ju pipul dɛn kiŋ”? Fɔ se na we dɛn bin de travul na Izrɛl dɛn yɛri di nyus se dɛn bɔn Jizɔs?

^ par. 9 Fɔ no aw wi ɔndastand di 70 wiks, na fɔ rid wan buk we dɛn kɔl Pay Attention to Daniel’s Prophecy! insay chapta 11. Na insay Inglish dis buk de.