Go dayrɛkt to di men tin

Go dayrɛkt to di say we di difrɛn difrɛn atikul dɛn de

Sav Jiova Bifo di Tɛm We di Trɔbul na Layf Go Kam

Sav Jiova Bifo di Tɛm We di Trɔbul na Layf Go Kam

“Mɛmba PAPA GƆD we mek yu.”—ƐKLI. 12:1.

1, 2. (a) Wetin na di advays we Kiŋ Sɔlɔmɔn bin gi yɔŋ pipul dɛn? (b) Wetin mek Kristian dɛn we dɔn ol pas 50 ia fɔ tink bɔt di advays we Sɔlɔmɔn bin gi yɔŋ pipul dɛn?

KIŊ SƆLƆMƆN bin tɛl yɔŋ pipul dɛn se: “Mɛmba PAPA GƆD we mek yu, naw we yu yɔŋ, bifo di tɛm kam we di trɔbul na layf go mit yu.” Wetin Sɔlɔmɔn bin min we i tɔk bɔt “di tɛm we di trɔbul na layf go mit yu”? I bin se na di tɛm we pɔsin in an dɛn go de trimbul, in fut dɛn go de shek shek, in tit dɛn nɔ plɛnti igen, in yay dɛn nɔ de si bɛtɛ igen, i nɔ de yɛri fa igen, i go gɛt wet ia, ɛn i nɔ go ebul fɔ tinap tret. Nɔbɔdi nɔ fɔ wet te i rich da tɛm de bifo i fɔ bigin sav Jiova.—Rid Ɛkliziastis 12:1-5.

2 Bɔku Kristian dɛn we dɔn ol pas 50 ia kin stil gɛt trɛnk fɔs. Pan ɔl we sɔm dɛn kin gɛt wet ia, dɛn nɔ kin gɛt di kayn prɔblɛm dɛn we Sɔlɔmɔn bin tɔk bɔt. Dɛn Kristian ya go ebul bɛnifit frɔm di advays we Kiŋ Sɔlɔmɔn bin gi yɔŋ pipul dɛn.  I se: “Mɛmba . . . PAPA GƆD we mek yu.” Wetin da advays de min?

3. Wetin wi go du fɔ sho se wi de mɛmba Papa Gɔd we mek wi?

3 Sɔm dɛn go dɔn de sav Jiova fɔ lɔng tɛm. So wan wantɛm, i go fayn lɛ dɛn de tink gud wan bɔt aw Gɔd pawaful. Layf rili wɔndaful! Di difrɛn difrɛn kayn tin dɛn we Jiova mek, so wɔndaful dat wi nɔ go ebul fɔ ɔndastand dɛn. Ɔl di difrɛn difrɛn tin dɛn we Jiova mek, de mek wi rili ɛnjɔy layf. Wi go gladi mɔ we wi tink gud wan bɔt di tin dɛn we Jiova mek, bikɔs dat de sho se i lɛk wi, i gɛt sɛns, ɛn i gɛt pawa. (Sam 143:5) Bɔt fɔ mɛmba Papa Gɔd we mek wi, min bak se wi fɔ de tink bɔt wetin i se fɔ du. Dat go mek wi want fɔ du ɔl wetin i tɛl wi, ɛn go mek wi sav am wit ɔl wi at te wi day.—Ɛkli. 12:13.

SPƐSHAL TIN DƐN WE PIPUL DƐN WE DƆN OL KIN DU

4. Us impɔtant kwɛstyɔn we Kristian dɛn we dɔn sav Jiova fɔ lɔng fɔ aks dɛnsɛf? Wetin mek dɛn fɔ du dat?

4 If yu na pɔsin we dɔn sav Jiova fɔ lɔng, wan impɔtant kwɛstyɔn de we yu fɔ aks yusɛf. Di kwɛstyɔn na, ‛Wetin a fɔ du wit mi layf naw, we a stil gɛt sɔm trɛnk fɔs?’ Spɛshal tin dɛn de we yu go ebul fɔ du, we ɔda Kristian dɛn nɔ go ebul fɔ du. Wetin na dɛn tin ya? Yu go ebul ɛp yɔŋ wan dɛn fɔ no di tin dɛn we yu dɔn lan bɔt Jiova. Ɛn yu kin ɛnkɔrej ɔda wan dɛn bay we yu go de tɛl dɛn di tin dɛn we yu dɔn ɛnjɔy we yu de sav Gɔd. Kiŋ Devid insɛf bin want fɔ du da sem tin de. Na dat mek i pre se: “PAPA GƆD, frɔm we a smɔl, nain yu dɔn tich mi . . . PAPA GƆD, duya, lɛkɛ aw a dɔn ol so ɛn mi ia ɔl dɔn wet nɔ ib mi oba, de wit mi lɛ a tɛl di nɛks jɛnareshɔn bɔt ɔl di wɔndaful tin we yu dɔn du ɛn tɔk bɔt aw yu gret to jɛnareshɔn we nɔ bɔn yet.”—Sam 71:17, 18.

5. Aw Kristian dɛn we dɔn sav Jiova fɔ lɔng tɛm kin ɛp ɔda pipul dɛn fɔ lan wetin dɛn dɔn lan?

5 Aw yu go ebul tɔk bɔt ɔl di tin dɛn we yu dɔn lan? Yu kin kɔl yɔŋ pipul dɛn we de sav Jiova, na yu os. Yu kin ivin aks dɛn fɔ jɔyn yu fɔ prich, ɛn sho dɛn di tin dɛn we yu dɔn de ɛnjɔy we yu de sav Jiova. Ilayu we bin de trade trade bin se: “Lɛ una we big tɔk fɔs, ɛn una we dɔn ol, gi wi sɛns.” (Job 32:7) Di apɔsul Pɔl bin tɛl uman dɛn we dɔn sav Jiova fɔ lɔng, fɔ mek dɛn de ɛnkɔrej ɔda pipul dɛn wit wetin dɛn de se ɛn wetin dɛn de du. I rayt se: “Tɛl di big uman dɛn se . . . dɛn fɔ de lan pipul dɛn tin we gud fɔ dɛn.”—Taytɔs 2:3.

TINK BƆT WETIN YU EBUL DU FƆ ƐP ƆDA PIPUL DƐN

6. Wetin mek Kristian dɛn we dɔn de sav Jiova fɔ lɔng tɛm, nɔ fɔ tink se dɛn nɔ go ebul fɔ ɛp ɔda pipul dɛn?

6 If yu na Kristian we dɔn sav Jiova fɔ lɔng tɛm, bɔku tin dɛn de we yu go ebul du fɔ ɛp ɔda Kristian dɛn. Tink bɔt ɔl di tin dɛn we yu no naw, we yu nɔ bin no lɛk 30 ɔ 40 ia bifo dis tɛm. Naw, yu dɔn de liv yu layf di we aw di Baybul se, ɛn yu dɔn no aw fɔ tich pipul dɛn di tru tin dɛn na di Baybul we go mek dɛn du wetin dɛn de lan. If yu na ɛlda, yu go dɔn no aw fɔ ɛp brɔda dɛn we dɔn du tin we nɔ rayt. (Gal. 6:1) Ɔ, yu go dɔn lan aw fɔ kia fɔ tin dɛn bɔt kɔngrigeshɔn, asɛmbli, ɔ Kiŋdɔm Ɔl dɛn we dɛn de bil. Ɔ sɔntɛm, yu go dɔn no aw fɔ tɔk to dɔktɔ dɛn fɔ mek dɛn nɔ gi blɔd to pɔsin. Ilɛksɛf i nɔ te yet we yu bigin sav Jiova, yu mɔs gɛt tin dɛn we yu dɔn lan fɔ du na layf. Fɔ ɛgzampul, if yu na pɔsin we dɔn mɛn pikin dɛn, yu go dɔn sabi bɔku tin dɛn bɔt di we aw pikin dɛn kin biev. Bikɔs di brɔda ɛn sista dɛn we dɔn ol dɔn lan bɔku tin dɛn, dɛn  go ebul ɛnkɔrej ɔda Kristian dɛn wit wetin dɛn dɔn lan.—Rid Job 12:12.

7. Wetin na di trenin we Kristian dɛn we dɔn de sav fɔ lɔng kin gi to yɔŋ pipul dɛn?

7 Aw yu go ebul yuz di tin dɛn we yu dɔn lan fɔ ɛp ɔda pipul dɛn? Yu kin sho yɔŋ pipul dɛn aw dɛn fɔ bigin tich ɔda pipul dɛn di Baybul. If yu na sista, yu kin sho ɔda yɔŋ sista dɛn we gɛt pikin dɛn, aw dɛn fɔ du mɔ we dɛn de sav Jiova. If yu na brɔda, yu kin tich ɔda yɔŋ brɔda dɛn aw fɔ gi fayn fayn tɔk dɛn, ɛn fɔ sho dɛn aw fɔ prich di gud nyus fayn fayn wan. Yu kin ivin sho dɛn aw yu kin fɛn ɛn ɛnkɔrej brɔda ɛn sista dɛn we dɔn ol. Sɔntɛm yu nɔ gɛt bɛtɛ trɛnk igen lɛk aw yu bin gɛt trade, bɔt yu stil gɛt fayn tin dɛn we yu dɔn lan we yu kin yuz fɔ tich yɔŋ pipul dɛn. Di Baybul se: “Wɛn man yɔŋ dɛn de kɔle pan am fɔ in trɛnk, bɔt dɛn de kɔle mɔ pan olpa fɔ in wet ia.”—Prɔv. 20:29.

SAV USAY DƐN NID PIPUL DƐN FƆ PRICH

8. Wetin di apɔsul Pɔl bin kɔntinyu fɔ du te i ol?

8 Di apɔsul Pɔl bin kɔntinyu fɔ sav Jiova te i ol. Bay di tɛm dɛn pul Pɔl na jel na Rom insay di ia 61, i bin dɔn bia plɛnti bad bad tin dɛn we in na bin mishɔnari. I bin fɔ dɔn disayd fɔ lɛf na Rom fɔ prich. (2 Kɔr. 11:23-27) Di brɔda dɛn we de de, bin fɔ lɛk di sɔpɔt we Pɔl bin fɔ gi dɛn if i bin de wit dɛn. Bɔt Pɔl bin si se ɔda ples dɛn de we dɛn nid fɔ prich di gud nyus. So i mek Timoti ɛn Taytɔs go wit am fɔ kɔntinyu di mishɔnari wok we i bin de pan. Dɛn go na Ɛfisɔs, Krit, ɛn sɔntɛm dɛn go na Masidonia. (1 Tim. 1:3; Taytɔs 1:5) Wi nɔ no if i bin go na Spen, bɔt i bin plan fɔ go de.—Rom 15:24, 28.

9. Ustɛm Pita bin go na wan say we pipul dɛn nid fɔ yɛri di gud nyus? (Luk di pikchɔ nia dis atikul in taytul.)

9 Di apɔsul Pita bin dɔn ol pas 50 ia we i bin go na wan say we dɛn nid pipul dɛn fɔ prich. Aw wi no dat? If in ɛn Jizɔs bin ol di sem ej ɔ if i bin big pas Jizɔs smɔl, i go bi se Pita bin ol lɛk 50 ia so we in ɛn di ɔda apɔsul dɛn bin gɛt wan mitin na Jerusɛlɛm insay di ia 49. (Akt 15:7) We sɔm tɛm dɔn pas afta dɛn bin gɛt da mitin de, Pita bin go de na Babilɔn fɔ go prich to di Ju pipul dɛn we bin de de. (Gal. 2:9) Na Babilɔn Pita bin de we i rayt in fɔs lɛta na di Baybul; dat na bin arawnd di ia 62. (1 Pit. 5:13) I nɔ izi fɔ de na say we nɔto de yu bɔn, mɔ we yu dɔn ol. Bɔt Pita nɔ bin gri fɔ mek dat pwɛl in at fɔ sav Jiova.

10, 11. Wetin Rɔbɔt ɛn in wɛf bin du we dɛn dɔn ol?

10 Tide, bɔku Kristian dɛn we dɔn ol pas 50 ia, kin dɔn lɛf fɔ wok; so dɛn kin gɛt mɔ tɛm fɔ sav Jiova. Sɔm pan dɛn dɔn go na say we pipul dɛn rili nid fɔ yɛri di gud nyus. Na dat wan brɔda we nem Rɔbɔt bin du. I tɔk se: “We mi ɛn mi wɛf bin ol lɛk 50 ia so, wi si se ɔda tin dɛn de we wi go ebul fɔ du fɔ sav Jiova. Di wangren pikin we wi bin gɛt, bin dɔn go de fɔ insɛf. Wi nɔ bin gɛt mama ɛn papa we wi go kia fɔ, ɛn wi famili bin dɔn gi wi smɔl prɔpati we wi fɔ gɛt. A sɛl di os we wi bin de, ɛn yuz di mɔni fɔ kia fɔ mi ɛn mi wɛf te di tɛm we di say we a bin de wok, pe mi mi pɛnshɔn. Wi bin disayd fɔ go de na wan kɔntri we dɛn kɔl Bolivia bikɔs bɔku pipul dɛn bin de de we want fɔ stɔdi di Baybul ɛn na ples we bɔku tin dɛn nɔ dia. I nɔ bin izi fɔ mek wi de na da kɔntri de bikɔs ɔltin bin difrɛn frɔm usay wi kɔmɔt. Bɔt Jiova de blɛs di wok we wi de du de.”

11 Rɔbɔt tɔk bak se: “Ɔl wetin wi de du naw na fɔ sɔpɔt di kɔngrigeshɔn we wi de. Sɔm pan di pipul dɛn we wi bin stɔdi di Baybul, dɔn baptayz. Wi bin stɔdi di Baybul wit wan famili we po ɛn we bin de na wan vilej we nɔ de nia di Kiŋdɔm Ɔl. Bɔt pan ɔl dat, dɛn bin stil de tray fɔ kam ɔl di  mitin dɛn. So wi bin gladi pasmak we di famili baptayz, ɛn dɛn big bɔy pikin bigin payɔnia.”

PRICH NA SAY DƐN WE DƐN DE TƆK ƆDA LANGWEJ

12, 13. Afta Brayan bin dɔn lɛf fɔ wok, aw in ɛn in wɛf bin ebul fɔ du mɔ fɔ sav Jiova?

12 Di brɔda dɛn we de na kɔngrigeshɔn dɛn usay pipul dɛn de tɔk difrɛn langwej, kin bɛnifit frɔm pipul dɛn we dɔn sav Jiova fɔ lɔng tɛm. I kin fayn fɔ prich na dɛn say dɛn de. Wan brɔda we nem Brayan tɔk se: “Mi ɛn mi wɛf nɔ bin gɛt natin fɔ du we wi bin dɔn rich 65 ia bikɔs na di ej dat we wi fɔ lɛf fɔ wok. Wi pikin dɛn nɔ bin de na os wit wi igen, ɛn na wan wan tɛm wi bin de gɛt pipul dɛn we want fɔ stɔdi di Baybul. Wan de, a mit wan Chayniz man na wan kɔlɛj, a invayt am na mitin, ɛn i bin kam. So a bigin fɔ stɔdi di Baybul wit am. Afta sɔm tɛm, i kam wit wan pan in kɔmpin dɛn pan di stɔdi. Dɔn leta, i kam wit wan ɔda wan we mek tri. Ɛn i nɔ tu te, wan ɔda wan kam we mek 4.”

13 Brayan kɔntinyu fɔ se: “We a de stɔdi wit di wan we mek fayv, na de a no se pan ɔl we a dɔn ol 65 ia, a kin stil du mɔ fɔ sav Jiova. So a aks mi wɛf we bin dɔn ol 63 ia, if i go lɛk fɔ lan Chayniz langwej. I bin gri fɔ lan. So wi bigin fɔ lisin to wan kasɛt we gɛt ɔl wetin wi bin nid fɔ lan di langwej. Frɔm da tɛm de te naw, na tɛn ia. We wi bin de prich na say we dɛn de tɔk ɔda langwej, wi bin de fil lɛk se wi stil yɔŋ. Naw, wi dɔn stɔdi di Baybul wit 112 Chayniz pipul dɛn! Bɔku pan dɛn dɔn kam na di mitin dɛn, ɛn wan pan dɛn na payɔnia.”

Pan ɔl we yu go dɔn ol, yu go stil ebul fɔ du mɔ fɔ sav Jiova (Luk na paregraf 12 ɛn 13)

ƐNJƆY FƆ DU WETIN YU EBUL FƆ DU

14. Wetin kin mek Kristian dɛn we dɔn de sav Jiova fɔ lɔng tɛm gladi? Aw Pɔl in ɛgzampul kin ɛnkɔrej dɛn?

14 Nɔto ɔl di Kristian dɛn we ol pas 50  ia kin ebul fɔ du mɔ fɔ sav Jiova. Sɔm nɔ gɛt bɛtɛ wɛlbɔdi, ɛn ɔda wan dɛn gɛt fɔ kia fɔ dɛn mama ɛn papa, ɔ dɛn yon pikin dɛn. Bɔt Jiova de si ɛn i gladi fɔ ɛnitin we yu ebul fɔ du fɔ sav am. So bifo yu at pwɛl fɔ wetin yu nɔ ebul fɔ du, na fɔ ɛnjɔy fɔ du wetin yu ebul fɔ du. Lɛ wi tɔk smɔl bɔt di apɔsul Pɔl in ɛgzampul. Fɔ lɔng tɛm, dɛn bin gi am lɔ se na insay in os nɔmɔ i fɔ de; i nɔ fɔ go ɛnisay. Dis bin mek i nɔ ebul fɔ go na difrɛn difrɛn say dɛn fɔ prich. Bɔt ɛnitɛm we pipul dɛn bin de kam fɛn am, i bin de tɔk to dɛn bɔt di tin dɛn we de na di Baybul; ɛn i bin de tɛl dɛn tin dɛn we go mek dɛn biliv pan Jiova mɔ.—Akt 28:16, 30, 31.

15. Wetin mek ɔlman na di kɔngrigeshɔn kin gladi fɔ di brɔda ɛn sista dɛn we dɔn de sav Jiova fɔ lɔng tɛm?

15 Jiova kin gladi fɔ wetin i wan dɛn we dɔn ol kin du fɔ sav am. Sɔlɔmɔn bin tɔk se di tɛm we di trɔbul na layf go kam, na tɛm we i nɔ izi. Bɔt Jiova kin gladi fɔ wetin Kristian dɛn we dɔn de sav am fɔ lɔng tɛm de kɔntinyu fɔ du fɔ am. (Lyuk 21:2-4) Dɛn brɔda ɛn sista ya we dɔn ol kin dɔn bia bɔku bad bad tin dɛn we dɔn mit dɛn. Di brɔda dɛn na di kɔngrigeshɔn kin lɛk fɔ falamakata di fayn ɛgzampul we dɛn ol brɔda ɛn sista ya kin sho.

16. Wetin na di blɛsin we Ana nɔ bin ebul fɔ ɛnjɔy? Bɔt wetin i bin ebul fɔ du fɔ wɔship Gɔd?

16 Di Baybul tɔk bɔt wan uman we nem Ana we bin kɔntinyu fɔ sav Jiova fetful wan te i ol. I bin ol 84 ia di tɛm we dɛn bɔn Jizɔs, ɛn in man bin dɔn day. I nɔ bin liv fɔ lɔng afta da tɛm de we bin fɔ mek i bi wan pan Jizɔs in disaypul dɛn. Ɛn i nɔ bin fɔ ɛnjɔy fɔ prich di gud nyus bɔt di Kiŋdɔm, ɛn Gɔd nɔ bin anɔynt am fɔ go na ɛvin. Bɔt stil, Ana bin ɛnjɔy fɔ du wetin i ebul fɔ du. “De ɛn nɛt Ana bin de na Gɔd in Os de pre ɛn fast.” (Lyuk 2:36, 37) Wan pan dɛn de ya we i bin de na di tɛmpul, na de i si we dɛn kam wit Jizɔs. So i bigin fɔ “tɔk bɔt di Pikin to ɔl dɛn wan we bin de wet fɔ mek Gɔd fri di pipul dɛn na Jerusɛlɛm.”—Lyuk 2:38.

17. Aw sɔm kɔngrigeshɔn dɛn kin ɛp di wan dɛn we dɔn ol ɔ we sik fɔ mek dɛnsɛf go wɔship Jiova?

17 Tide, wi fɔ rɛdi ɔltɛm fɔ ɛp Kristian dɛn we dɔn ol ɔ we sik. Sɔm dɛn kin want fɔ go na di mitin dɛn ɛn di asɛmbli dɛn, bɔt nɔto ɔltɛm dɛn kin ebul fɔ go. Sɔm kɔngrigeshɔn dɛn na ɔda kɔntri dɛn kin yuz tɛlifon fɔ ɛp dɛn ol pipul ya fɔ lisin to di mitin dɛn. Pan ɔl we dɛn Kristian ya nɔ kin ebul fɔ go na di mitin dɛn, bɔt stil dɛn kin ɛp fɔ sɔpɔt tru wɔship. Fɔ ɛgzampul, dɛn prea dɛn kin ɛp mek di kɔngrigeshɔn go bifo.—Rid Di Sam Dɛm 92:13, 14.

18, 19. (a) Wetin mek di wan dɛn we dɔn ol nɔ kin no se dɛn kin ɛnkɔrej ɔda Kristian dɛn? (b) Udat dɛn go ebul fɔ ‘mɛmba PAPA GƆD we mek wi’?

18 Di Kristian dɛn we dɔn ol, nɔ kin no se dɛn kin ɛnkɔrej ɔda wan dɛn na di kɔngrigeshɔn. Fɔ ɛgzampul, Ana bin de go ɔltɛm na di tɛmpul, bɔt i nɔ bin no se afta sɔm tɛm wi go lan frɔm in ɛgzampul. Na dat mek dɛn rayt bɔt di we aw Ana bin lɛk Jiova na di Baybul. So, ɔl di ɔda Kristian dɛn na di kɔngrigeshɔn kin lan frɔm di we aw di ol wan dɛn dɔn sho se dɛn lɛk Gɔd. Na dat mek Gɔd in Wɔd se: “Wet ia de sho ol ej ɛn ɛkspiriɛns na di pe dat we pɔsin we de waka tret na PAPA GƆD in yay de gɛt.”—Prɔv. 16:31.

19 We wi de sav Jiova, wi ɔl go mɔs gɛt tɛm we kin mit wi we wi nɔ go ebul fɔ du plɛnti tin lɛk ɔda pipul dɛn. Bɔt wi we ebul fɔ du plɛnti, fɔ kɔntinyu fɔ ‘mɛmba PAPA GƆD we mek wi . . . bifo di tɛm kam we di trɔbul na layf go mit wi.’—Ɛkli. 12:1.