Go dayrɛkt to di men tin

Go dayrɛkt to di say we di difrɛn difrɛn atikul dɛn de

Di 100 Ia We di Kiŋdɔm Dɔn Rul—Aw Dat Dɔn Bɛnifit Yu?

Di 100 Ia We di Kiŋdɔm Dɔn Rul—Aw Dat Dɔn Bɛnifit Yu?

“Masta, Gɔd we gɛt pawa pas ɔl, yu wok dɛn big ɛn dɛn wɔndaful! Na yu na di kiŋ we de rul oba ɔl dɛn neshɔn.”—RƐV. 15:3.

1, 2. Wetin Gɔd in Kiŋdɔm go du? Wetin mek wi biliv se di Kiŋdɔm go kam?

INSAY di ia 31, Jizɔs Krays ɛn in disaypul dɛn bin de ɔp wan mawnten na Kepanyɔm. I bin de tich dɛn aw fɔ pre. I se we dɛn de pre, mek dɛn se: “Mek yu rul wi.” (Mat. 6:10) Tide, bɔku pipul dɛn de wɔnda if Gɔd in Kiŋdɔm go ɛva kam. Bɔt wi rili biliv se da Kiŋdɔm de we wi de pre bɔt, go rili kam. Gɔd go ansa wi prea!

2 Jiova go yuz in Kiŋdɔm fɔ mek in famili we de na ɛvin ɛn di wɔl, wɔship am wit wanwɔd lɛk wan big famili. Gɔd go rili du dat! (Ayz. 55:10, 11) Infakt, Jiova dɔn bi Kiŋ sɛf insay wi yon tɛm! Tin dɛn dɔn de bi fɔ 100 ia naw, we dɔn sho se dat na tru. Gɔd dɔn de du big ɛn wɔndaful tin dɛn fɔ di plɛnti fetful pipul dɛn we i de rul. (Zɛk. 14:9; Rɛv. 15:3) Bɔt di Kiŋ we Jiova bi ɛn di Kiŋdɔm we Jizɔs se mek wi pre fɔ, na tu difrɛn tin. Aw dɛn tin ya difrɛn, ɛn wetin dɛn go du fɔ wi?

DI PƆSIN WE JIOVA MEK KIŊ BIGIN DU IN WOK

3. (a) Ustɛm Jiova mek Jizɔs bi Kiŋ? Na usay dat apin? (b) Aw yu go ebul sho pɔsin se na insay 1914 Gɔd in Kiŋdɔm bigin rul? (Luk di futnot.)

3 Bifo di ia 1900, sɔm pipul dɛn bigin ɔndastand wan tin we Daniɛl bin rayt na di Baybul. I dɔn pas lɛk 2,500 ia frɔm we Daniɛl rayt dis tin ya. Wetin i bin se? I se: “Dɛn tɛm dɛn de we di  kiŋ dɛn go de rul, PAPA GƆD na ɛvin go briŋ in yon kindɔm we nɔ go ɛva fɔdɔm.” (Dan. 2:44) Di Baybul Studɛnt dɛn bin tek lɔng tɛm fɔ sho se 1914 go bi impɔtant ia. Dɛn tɛm dɛn de, bɔku pipul dɛn bin de rili tink se gud tin go apin. Na dat mek wan man bin rayt se: “Insay 1914, pipul dɛn bin gɛt op se tin go bɛtɛ.” Di tin we di Baybul tɔk, bin rili apin we Wɔl Wɔ Wan bigin. Di bɔku bɔku angri, atkwek, ɛn bad bad sik dɛn, wit di ɔda tin dɛn we di Baybul bin tɔk se go apin, rili sho se Jizɔs Krays bigin rul na ɛvin insay 1914. * Jiova bi Kiŋ wan spɛshal we, we i mek in Pikin Kiŋ na in Kiŋdɔm!

4. Wetin na di fɔs tin we Jizɔs du we i bi Kiŋ? Wetin na di ɔda tin dɛn bak we i du?

4 Di fɔs tin we Jizɔs du afta Gɔd mek am Kiŋ, na fɔ fɛt in Papa in big ɛnimi, we na Setan. Jizɔs ɛn in enjɛl dɛn pul Setan ɛn in dɛbul dɛn kɔmɔt na ɛvin. Dat mek ɔlman na ɛvin gladi, bɔt i briŋ plɛnti plɛnti trɔbul na di wɔl. (Rid Rɛvɛleshɔn 12:7-9, 12.) Afta dat, di Kiŋ bigin fɔ du tin dɛn fɔ di pipul dɛn we i de rul na di wɔl. I bigin fɔ klin di wan dɛn we na in tru tru disaypul dɛn, dɔn i bigin tich dɛn, ɛn ɔganayz dɛn so dat dɛn go ebul du wetin Gɔd want. Naw, lɛ wi tɔk bɔt Jizɔs in tru tru disaypul dɛn bin du we Jizɔs du dɛn tri tin ya, ɛn aw wisɛf go falamakata dɛn.

DI NYU KIŊ KLIN DI FETFUL PIPUL DƐN WE I DE RUL

5. Uskayn klinin bin apin frɔm 1914 to 1919?

5 Afta di Kiŋ dɔn pul Setan ɛn in dɛbul dɛn kɔmɔt na ɛvin, Jiova tɛl Jizɔs fɔ bigin chɛk in disaypul dɛn na di wɔl, ɛn klin dɛn. Di prɔfɛt Malakay se di tin we Jizɔs du, tan lɛk we pɔsin de klin gold ɔ silva. (Mal. 3:1-3) Difrɛn difrɛn tin dɛn we bin apin, dɔn sho se dis klinin apin frɔm 1914 to 1919. * If wi want fɔ de na Jiova in wan big famili, wi fɔ bi pipul dɛn we klin. (1 Pit. 1:15, 16) Wi fɔ pul an pan ɛnitin we de na lay lay rilijɔn ɔ pan pɔlitiks.

6. Aw wi de gɛt di it we Jizɔs bin tɔk bɔt? Wetin mek di it impɔtant?

6 Afta dat, Jizɔs yuz in pawa ɛn pik “di bɔy we tru to in masta ɛn we gɛt sɛns.” Na dis bɔy go de kia fɔ di wan dɛn we go bi Jizɔs in “ship dɛn.” (Mat. 24:45-47; Jɔn 10:16) Frɔm 1919, sɔm pipul dɛn we na Kristian dɛn we Gɔd dɔn anɔynt bigin fɔ du di wok we Jizɔs bin gi, we na fɔ kia fɔ di “ɔda bɔy dɛn na di os.” Aw di it we dis bɔy de gi wi, de bɛnifit wi? Di bɔku bɔku it we dis bɔy de gi wi, de mek wi fet trɔng. Dɔn, i de mek wi ebul fɔ bi pipul dɛn we klin di we aw Gɔd want, we min se di we aw wi de wɔship Gɔd, di we aw wi de tink, di we aw wi de liv wi layf, ɛn di we aw pipul dɛn de si wi, ɔl go klin. Ɛn di it we dis bɔy de gi wi, de tich wi ɛn gi wi tin dɛn we wi go yuz fɔ du di impɔtant wok we wi gɛt fɔ du tide. Yu de rili yuz dɛn tin ya we dis bɔy de gi wi?

DI KIŊ DE TICH IN PIPUL DƐN AW FƆ PRICH ƆLSAY NA DI WƆL

7. Wetin na di impɔtant wok we Jizɔs bigin fɔ du we i bin de na di wɔl? Ustɛm dis wok go dɔn?

7 We Jizɔs bigin fɔ prich, i tɛl pipul dɛn se i “fɔ go na dɛn ɔda tɔŋ fɔ tɛl dɛn ɔda pipul di Gud Nyuz bɔt Gɔd in rul bikɔs na dat Gɔd sɛn am fɔ kam du na [di] wɔl.” (Lyuk 4:43) Jizɔs bin tek tri ɛn af ia fɔ du dis wok. Na dis wok na bin di impɔtant tin na Jizɔs in layf. I bin tɛl in disaypul dɛn se: “Una go tɛl pipul se, di tɛm we Gɔd go rul dɔn kam klos!” (Mat. 10:7) Afta Gɔd bin gi Jizɔs layf bak, Jizɔs bin tɔk se in disaypul dɛn go prich dis mɛsej “ɔlɔbɔt na [di] wɔl.”  (Akt 1:8) I prɔmis se insɛf go kɔntinyu fɔ ɛp in disaypul dɛn fɔ du dis wok sote di wɔl dɔn.—Mat. 28:19, 20.

8. Aw di Kiŋ bin mek in pipul dɛn rɛdi fɔ prich?

8 Bay di ia 1919, Jizɔs in disaypul dɛn bin stil de prich “di Gud Nyuz bɔt wɛn Gɔd go rul.” (Mat. 24:14) Jizɔs Krays bin stil de rul na ɛvin, ɛn i bin dɔn gɛda sɔm pipul dɛn we i bin dɔn klin. Dɛn pipul ya bigin kwik kwik wan fɔ du wetin Jizɔs tɛl dɛn fɔ du, dat na fɔ prich di gud nyus bɔt Gɔd in Kiŋdɔm ɔlsay na di wɔl. (Akt 10:42) Fɔ ɛgzampul, pan wan big kɔnvɛnshɔn we dɛn bin gɛt na wan ples na Amɛrika insay Sɛptɛmba 1922, na lɛk 20,000 pipul dɛn bin go, we sho se dɛn de sɔpɔt Gɔd in Kiŋdɔm. Insay dis program, Brɔda Rutafɔd bin gi wan pawaful tɔk we gɛt di taytul “Di Kiŋdɔm.” Brɔda Rutafɔd bin tɔk se: “Una luk, di Kiŋ de rul! Una na di wan dɛn we de tɛl pipul dɛn bɔt am. So, una advatayz, advatayz, advatayz, di Kiŋ ɛn in kiŋdɔm.” Tu tawzin pipul dɛn we bin de pan di kɔnvɛnshɔn, bin jɔyn pan wan spɛshal prichin wok we dɛn bin gɛt. Dɛn go 45 mayl frɔm di say we di kɔnvɛnshɔn bin de, fɔ go mit pipul dɛn na dɛn os ɛn tɔk to dɛn. Wan pan di pipul dɛn we bin du dis prichin wok, bin tɔk se: “A nɔ go ɛva fɔgɛt we dɛn tɛl wi fɔ advatayz di Kiŋdɔm ɛn di zil we di pipul dɛn we kam pan di kɔnvɛnshɔn, bin gɛt!” Nɔto dis pɔsin in wan bin fil dis we; bɔku ɔda pipul dɛn bak bin gladi.

9, 10. (a) Aw Jizɔs de tren di wan dɛn we de prich di gud nyus bɔt Gɔd in Kiŋdɔm? (b) Aw yusɛf dɔn bɛnifit frɔm dis trenin?

9 Bay di ia 1922, i pas 17,000 pipul dɛn we bin de prich di gud nyus bɔt Gɔd in Kiŋdɔm insay 58 kɔntri dɛn. Bɔt, dɛn bin nid fɔ tren dɛn fɔ du dis wok. We di apɔsul dɛn bin de, Jizɔs bin sho in disaypul dɛn klia wan wetin dɛn fɔ prich, usay dɛn fɔ prich, ɛn aw dɛn fɔ prich. (Mat. 10:5-7; Lyuk 9:1-6; 10:1-11) Di Kiŋ de mek shɔ se ɔl di wan dɛn we de du dis wok tide, fɔ no aw dɛn fɔ du am ɛn dɛn fɔ gɛt ɔl wetin dɛn nid fɔ du di wok gud gud wan. (2 Tim. 3:17) Jizɔs de yuz di kɔngrigeshɔn fɔ tren in pipul dɛn aw dɛn fɔ prich. Aw i de du dis? I de yuz di Tiokratik Ministri skul. I pas 111,000 kɔngrigeshɔn dɛn na di wɔl we de du dis skul. Di tin dɛn we wi de lan na dis Skul dɔn ɛp pas sɛvin milyɔn pipul dɛn we de prich, ɛn dis dɔn mek dɛn dɔn rɛdi fɔ prich ɛn tich fayn wan to “ɔlman.”—Rid Fɔs Lɛta Fɔ Kɔrint 9:20-23.

10 Apat frɔm di Tiokratik Ministri Skul, ɔda Baybul skul dɛn de we dɛn dɔn mek fɔ tren di ɛlda dɛn, payɔnia dɛn, brɔda dɛn we nɔ mared, brɔda ɛn sista dɛn we mared, branch kɔmiti mɛmba ɛn dɛn wɛf dɛn, sakit ovasia ɛn dɛn wɛf dɛn, ɛn mishɔnari  dɛn. * Sɔm pipul dɛn we bin go na di skul we dɛn mek fɔ brɔda ɛn sista dɛn we mared, bin sho aw dɛn gladi fɔ dis skul. Dɛn se: “Di spɛshal trenin we wi gɛt na di skul, dɔn mek wi lɛk Jiova mɔ ɛn mɔ ɛn mek wi rɛdi fɔ ɛp ɔda pipul dɛn.”

11. Aw di wan dɛn we de prich bɔt Gɔd in Kiŋdɔm dɔn ebul fɔ bia, pan ɔl we Setan de tray fɔ stɔp dɛn?

11 Setan de si di we aw wi de prich to pipul dɛn ɔlsay na di wɔl ɛn tich dɛn bɔt Gɔd in Kiŋdɔm, ɛn dat de mek i nɔ gladi atɔl. So, i kin yuz kɔni kɔni we dɛn fɔ mek wi lɛf fɔ prich bɔt Gɔd in Kiŋdɔm. Ɔda tɛm dɛn, i kin ivin du am fes-to-fes. Bɔt pan ɔl di tin dɛn we i de du, i nɔ stil ebul fɔ stɔp wi. Jiova dɔn gi in Pikin “pawa pas ɔlman we de rul na ɛvin, ɛn ɔlman we de rul na dis wɔl.” (Ɛfi. 1:20-22) Jizɔs de yuz di pawa we i gɛt as Kiŋ, fɔ protɛkt ɛn gayd in disaypul dɛn, so dat dɛn go ebul fɔ dɔn di wok we in Papa want. * Wi stil de prich di gud nyus, ɛn plɛnti plɛnti pipul dɛn we rili want fɔ lan di tru bɔt Gɔd, dɔn ebul fɔ lan bɔt am. Dis wok we wi de du rili impɔtant. Lɛ wi ol am wit tu an!

DI KIŊ DE ƆGANAYZ IN PIPUL DƐN FƆ WOK TRANGA WAN

12. Tɔk bɔt sɔm pan di chenj dɛn we dɛn mek to di we aw Gɔd in pipul dɛn bin ɔganayz frɔm we Gɔd mek in Kiŋdɔm.

12 Frɔm we Gɔd mek in Kiŋdɔm insay 1914, di Kiŋ dɔn de chenj di we aw Gɔd in savant dɛn ɔganayz so dat dɛn go ebul du wetin in Papa want. (Rid Ayzaya 60:17.) Insay 1919, dɛn bigin pik wan brɔda na di difrɛn difrɛn kɔngrigeshɔn dɛn we go de kia fɔ di prichin wok. Dɛn bin de kɔl dis brɔda di savis dayrɛktɔ. Insay 1927, dɛn mek Sɔnde di de we dɛn go de go prich na pipul dɛn os dɛn. Insay 1931, di wan dɛn we de sɔpɔt di Kiŋdɔm bin gɛt zil fɔ du di prichin wok tranga tranga wan bikɔs na da ia de dɛn gi dɛnsɛf di nem Jiova Witnɛs dɛn. Na di Baybul dɛn pul da nem de. (Ayz. 43:10-12) Fɔs fɔstɛm, na vot di brɔda dɛn na di kɔngrigeshɔn bin de vot fɔ pik di brɔda dɛn we fɔ de bifo na di kɔngrigeshɔn. Bɔt frɔm 1938, dat bin stɔp. Naw, na di bɔy we tru to in masta ɛn we gɛt sɛns de pik dɛn brɔda ya. Fɔs fɔstɛm, na wan ɛlda bin de kia fɔ ɔltin bɔt di kɔngrigeshɔn. Bɔt frɔm 1972, na ɔl di ɛlda dɛn na di kɔngrigeshɔn bigin du da wok de. Dɛn bin de ɛnkɔrej ɔl di brɔda dɛn na di kɔngrigeshɔn we fit, fɔ bi ɛlda fɔ ‘kia fɔ dɛn pipul we Gɔd lɛf na dɛn an lɛk shɛpad we de mɛn ship.’ (1 Pit. 5:2) Insay 1976, di Gɔvnin Bɔdi kam  gɛt siks kɔmiti dɛn we de fɔ kia fɔ di prichin wok we Jizɔs gi dɛn fɔ du. Di Kiŋ we Jiova pik, dɔn de rili ɔganayz in pipul dɛn so dat dɛn go ebul mek Gɔd rul dɛn.

13. Wetin Gɔd in Kiŋdɔm dɔn du fɔ yu, insay di 100 ia we i dɔn rul fɔ?

13 Tink bɔt di tin dɛn we di Kiŋ we Gɔd pik, dɔn ebul fɔ du insay di 100 ia we i dɔn rul fɔ. I dɔn klin Jiova in pipul dɛn so dat dɛn go ebul fɔ du in Papa in wok. I dɔn sho dɛn aw fɔ du di prichin wok insay lɛk 239 kɔntri dɛn so, ɛn dɔn tich plɛnti plɛnti pipul dɛn bɔt wetin Jiova want. I dɔn mek pas sɛvin milyɔn pipul dɛn ebul fɔ wɔship in Papa wit wanwɔd, ɛn dɛn ɔl gladi fɔ du wetin in Papa want. (Sam 110:3) Fɔ tru, Jiova dɔn yuz in Kiŋdɔm fɔ du wɔndaful tin dɛn. I gɛt fɔ yuz am bak fɔ du ɔda wɔndaful tin dɛn tumara bambay.

WƆNDAFUL TIN DƐN WE GƆD IN KIŊDƆM GƐT FƆ DU

14. (a) Ɛnitɛm we wi pre ‘mek Gɔd rul wi,’ wetin rili wi de beg Gɔd fɔ du? (b) Wetin na wi iatɛks fɔ 2014? Wetin mek na in na di iatɛks?

14 Pan ɔl we na insay 1914 Jiova mek in Pikin bi Kiŋ, nɔto dat nɔmɔ Jiova go du fɔ ansa wi prea fɔ mek i rul wi. Ɔda tin dɛn de bak we i go du. (Mat. 6:10) Jiova bin dɔn mek dɛn rayt na di Baybul se Jizɔs ‘go tinap pantap in ɛnimi dɛn ed.’ (Sam 110:2) Setan dɔn yuz mɔtalman gɔvmɛnt dɛn fɔ tray fɔ stɔp Gɔd in Kiŋdɔm fɔ rul. So ɛnitɛm we wi pre mek Gɔd rul wi, i tan lɛk wi de beg Gɔd fɔ mek in Kiŋ ɛn di ɔda wan dɛn we go rul wit am, kam stɔp ɔl mɔtalman gɔvmɛnt dɛn fɔ rul ɛn pul dɛn kɔmɔt. Dat go mek di wɔd we de na Daniɛl 2:44 apin, we tɔk se Gɔd in Kiŋdɔm “go brok ɔl dɛn kindɔm we bin dɔn de bifo am . . . ɛn dɔn dɛn kpatakpata wan.” I go pul di pipul dɛn we de rul na di wɔl ɛn we na di Kiŋdɔm in ɛnimi dɛn kɔmɔt. (Rɛv. 6:1, 2; 13:1-18; 19:11-21) Di tɛm we dis go apin nɔ de fa igen. Na dat mek di iatɛks fɔ 2014 kɔmɔt na Matyu 6:10 we se: “Mek yu rul wi”! Na dis ia mek Gɔd in Kiŋdɔm 100 ia we i dɔn rul fɔ na ɛvin.

Wi iatɛks fɔ 2014: “Mek yu rul wi.”—Matyu 6:10

15, 16. (a) Wetin na di wɔndaful tin dɛn we go apin insay Jizɔs in Wan Tawzin Ia Rul? (b) Wetin na di las tin we Jizɔs go du as Kiŋ? Aw dat go bɛnifit Jiova in pikin dɛn?

15 Afta Gɔd in Kiŋ go dɔn pul ɔl Gɔd in ɛnimi dɛn, i go trowe Setan ɛn in dɛbul dɛn insay di ol we nɔ gɛt bɔtɔm fɔ wan tawzin ia. (Rɛv. 20:1-3) Da tɛm de, di Kiŋdɔm go mek wi ɛnjɔy di blɛsin dɛn we wi fɔ gɛt bikɔs Jizɔs kam day fɔ wi, ɛn i go pul ɔl di bad bad tin dɛn we dɔn de apin na di wɔl frɔm we Adam sin. Di Kiŋ go mek plɛnti pipul dɛn we dɔn day ɛn we de na Gɔd in maynd, gɛt layf bak. Dɔn, i go ɔganayz wan we fɔ mek dɛn go tich ɔl dɛn pipul ya bɔt Jiova. (Rɛv. 20:12, 13) I go mek di wan ol wɔl bi Paradays, jɔs lɛk aw di gadin we bin de na Idɛn, bin de. Dɔn, ɔl di pipul dɛn we fetful to Jiova, go bi pafɛkt pipul dɛn.

16 Gɔd in Kiŋdɔm go dɔn du ɔl di tin dɛn we Gɔd want bifo Jizɔs in Wan Tawzin Ia Rul go dɔn. Afta dat, Jizɔs go gi di Kiŋdɔm bak to in Papa. (Rid Fɔs Lɛta Fɔ Kɔrint 15:24-28.) Da tɛm de naw, na Jiova insɛf sɛf go rul in pikin dɛn na di wɔl; i nɔ go yuz ɔda pɔsin igen. Gɔd in pikin dɛn ɔl, frɔm di wan dɛn we de na ɛvin te kam to di wan dɛn we de na di wɔl, go de wɔship dɛn Papa wit wanwɔd lɛk wan big famili.

17. Wetin yu rɛdi fɔ du fɔ di Kiŋdɔm?

17 Di wɔndaful tin dɛn we di Kiŋdɔm dɔn du insay di 100 ia we i dɔn rul fɔ, dɔn rili sho wi se na Jiova stil gɛt rayt fɔ rul di wan ol wɔl. I dɔn sho wi bak se ɔl di tin dɛn we Gɔd bin want fɔ dis wɔl, go mɔs bi. So lɛ wi kɔntinyu fɔ bi in fetful savant dɛn ɛn advatayz di Kiŋ ɛn in Kiŋdɔm. As wi de du dat, lɛ wi biliv tranga wan se i nɔ go te igen Jiova go ansa we wi de pre to am se: “Mek yu rul wi”!

^ par. 5 Rid di Julay 15, 2013, Wachtawa, frɔm pej 22 to pej 23 na paregraf 12.

^ par. 10 Rid di Sɛptɛmba 15, 2012, Wachtawa, frɔm pej 13 to pej 17 ɔnda di tɔpik we se “Theocratic Schools—Evidence of Jehovah’s Love.”

^ par. 11 If yu want no bɔt sɔm kɔntri dɛn we dɛn dɔn tray fɔ stɔp di wok, bɔt we Jiova dɔn ɛp in pipul dɛn, na fɔ rid di Disɛmba 1, 1998, Wachtawa, frɔm pej 19 to pej 22.