Go dayrɛkt to di men tin

Go dayrɛkt to di say we di difrɛn difrɛn atikul dɛn de

Aw fɔ Chuz di Rayt Tin fɔ Du We Yu Yɔŋ

Aw fɔ Chuz di Rayt Tin fɔ Du We Yu Yɔŋ

“Yɔŋ bɔy ɔ yɔŋgyal, . . . prez PAPA GƆD.”—SAM 148:12, 13.

1. Wetin na di wɔndaful tin dɛn we bɔku yɔŋ Kristian dɛn de ɛnjɔy fɔ du?

DI TƐM we wi de so naw na tɛm we rili impɔtant. Tide, plɛnti pipul dɛn ɔlsay na di wɔl, de kam fɔ wɔship Gɔd di rayt we pas aw dɛn bin de du trade. (Rɛv. 7:9, 10) Bɔku yɔŋ pipul dɛn de ɛp ɔda pipul dɛn fɔ ebul ɔndastand di tru tin dɛn na di Baybul we de gi layf, ɛn dɛn de ɛnjɔy fɔ du dat. (Rɛv. 22:17) Sɔm yɔŋ wan dɛn kin stɔdi di Baybul wit pipul dɛn fɔ ɛp dɛn so dat dɛn go ɛnjɔy dɛn layf bɛtɛ bɛtɛ wan. Ɔda wan dɛn kin go prich di gud nyus na say dɛn we dɛn de tɔk difrɛn langwej. (Sam 110:3; Ayz. 52:7) Aw yusɛf go ebul jɔyn Jiova in pipul dɛn fɔ du dis wok, ɛn ɛnjɔy am?

2. Aw Timoti in ɛgzampul sho wi se Jiova rɛdi fɔ gi yɔŋ pipul dɛn wok fɔ du? (Luk di pikchɔ nia dis atikul in taytul.)

2 Naw we yu yɔŋ, yu go ebul chuz fɔ liv yu layf di we aw Gɔd want, ɛn dat go mek yu ebul fɔ du plɛnti gud tin dɛn tumara bambay we yu go ɛnjɔy. Fɔ ɛgzampul, di we aw Timoti we bin de na Listra, chuz fɔ liv in layf bin mek leta we i dɔn big smɔl, i bin ebul fɔ bi mishɔnari. (Akt 16:1-3) Afta sɔm tɛm, sɔm pipul dɛn kam fɔ du bad tin to Pɔl. Dat bin mek Pɔl kɔmɔt na di nyu kɔngrigeshɔn na Tɛsalonayka. I tɛl yɔŋ Timoti fɔ go bak na Tɛsalonayka fɔ kɔrej ɛn ɛp di brɔda dɛn. (Akt 17:5-15; 1 Tɛs. 3:1, 2, 6) Yu nɔ tink se Timoti bin rili gladi we Pɔl gi am da wok de?

 DI TIN WE YU GO CHUZ FƆ DU WE IMPƆTANT PAS ƆL

3. Wetin na di tin we yu go chuz fɔ du we impɔtant pas ɔl? Ustɛm yu go du am?

3 We pɔsin yɔŋ, i kin ebul chuz fɔ du impɔtant tin dɛn. Bɔt wan tin de we yu go chuz fɔ du we impɔtant pas ɔl. Dat na fɔ sav Jiova. Ustɛm yu tink se na di bɛst tɛm fɔ sav Jiova? Jiova se: “Mɛmba . . . PAPA GƆD we mek yu, naw we yu yɔŋ.” (Ɛkli. 12:1) Di wangren we fɔ “mɛmba” Jiova, na fɔ sav am wit ɔl yu at. (Dit. 10:12) Na dat na di tin we yu go chuz fɔ du we impɔtant pas ɔl. Dat gɛt sɔntin fɔ du wit wetin yu go du wit yu layf tumara bambay.—Sam 71:5.

4. Apat frɔm we yu disayd fɔ sav Jiova, wetin na di ɔda impɔtant tin dɛn na yu layf we gɛt sɔntin fɔ du wit di we aw yu go sav Gɔd?

4 Nɔto we yu de disayd fɔ sav Jiova nɔmɔ gɛt sɔntin fɔ du wit yu layf tumara bambay. Ɔda tin dɛn de bak we gɛt sɔntin fɔ du wit di we aw yu go sav Gɔd. Fɔ ɛgzampul, yu go de tink if yu fɔ mared, udat yu go mared, ɛn uskayn wok yu fɔ du. Ɔl dɛn tin ya na impɔtant tin dɛn we yu fɔ tink bɔt. Bɔt, i go rili fayn if yu chuz fɔs fɔ sav Jiova wit ɔl yu at. (Dit. 30:19, 20) Yu no wetin du? Na bikɔs ɛniwan pan dɛn tin ya we yu go disayd fɔ du, gɛt sɔntin fɔ du wit di ɔda wan dɛn. Wetin yu disayd bɔt mared ɛn wok, gɛt sɔntin fɔ du wit di we aw yu go sav Gɔd. (Lyuk 14:16-20) Semweso, we yu chuz fɔ sav Gɔd, gɛt sɔntin fɔ du wit di pɔsin we yu go mared ɛn di kayn wok we yu go du. So na fɔ disayd fɔ du di tin we rili impɔtant na Gɔd in yay.—Fil. 1:10.

WETIN YU GO DU WE YU YƆŊ?

5, 6. Aw Yuichiro in ɛgzampul sho aw wi kin chuz fɔ du di rayt tin wit wi layf?

5 Wans yu dɔn disayd fɔ sav Gɔd, ɔda tin dɛn de we yu fɔ bigin tink bɔt. Yu fɔ tink bɔt wetin Gɔd want yu fɔ du, ɛn aw yu fɔ sav am. Wan Jepaniz brɔda rayt se: “Wan de we a bin ol 14 ia, a bin de prich wit wan ɛlda na mi kɔngrigeshɔn. Di ɛlda si se a nɔ de ɛnjɔy di prichin wok. So i tɛl mi saful wan se: ‘Yuichiro, go na os. Sidɔm ɛn tek tɛm tink bɔt di tin dɛn we Jiova dɔn du fɔ yu.’ A go na os, ɛn bigin pre to Jiova. Nɔto da de de nɔmɔ a du dat, a kɔntinyu fɔ du am ɔda de dɛn bak. Smɔl smɔl, a bigin chenj. I nɔ tu te, a bigin ɛnjɔy fɔ sav Jiova. A kin lɛk we a de rid bɔt mishonari dɛn, ɛn a bigin fɔ tink bɔt aw a go sav Jiova wit ɔl mi at.”

6 So wetin dis brɔda du? I se: “A bigin chuz wetin a go du we go mek a ebul sav Jiova na ɔda kɔntri. Fɔ ɛgzampul, a bigin fɔ lan Inglish. We a dɔn skul, a bigin wok na say we a de tich Inglish wan wan tɛm insay di wik, so dat a go ebul fɔ payɔnia. We a ol 20 ia, a bigin lan Mɔngolian ɛn go jɔyn wan grup we di pɔblisha dɛn de tɔk Mɔngolian. Afta tu ia, dat na insay 2007, a go fɛn di brɔda dɛn na Mɔngolia. We a bin de prich wit di payɔnia dɛn, a si se bɔku pipul dɛn bin want lan di tru; dat mek a bin want fɔ de de fɔ ɛp dɛn. A go bak na Jepan ɛn bigin plan wetin fɔ du. A dɔn de payɔnia na Mɔngolia frɔm Epril 2008. Layf nɔ izi naya, bɔt di pipul dɛn gladi fɔ di gud nyus, ɛn a ebul fɔ ɛp dɛn fɔ kam nia Jiova. A tink se dis na di bɛst tin we a chuz fɔ du wit mi layf.”

7. Us tin dɛn we na yu fɔ disayd fɔ yusɛf wetin fɔ du? Wetin wi kin lan frɔm Mozis?

7 Na yu fɔ chuz fɔ yusɛf aw yu go want fɔ yuz yu layf fɔ sav Jiova. (Jɔs. 24:15) Wi nɔ go tɛl yu if yu fɔ mared ɔ udat yu fɔ mared. Ɛn wi nɔ go ivin tɛl yu us wok yu fɔ du ɔ aw lɔng yu fɔ tek fɔ lan am. Na yu gɛt fɔ disayd fɔ yusɛf. Sɔm pan yu kɔmpin yɔŋ wan dɛn we dɛnsɛf de wɔship Jiova, de na smɔl smɔl vilej dɛn ɛn dɛn po; ɔda wan dɛn de na big big siti dɛn  ɛn dɛn jɛntri. Una ɔl difrɛn fa fawe. Una gɛt difrɛn abit, una ɔl gɛt difrɛn tin dɛn we una sabi du, una nɔ lɛk di sem tin, ɛn nɔto di sem fet una ɔl gɛt. I go bi se di we aw yu ɛn yu kɔmpin dɛn difrɛn, tan lɛk di we aw di yɔŋ Ibru pipul dɛn we bin de na Ijipt, bin difrɛn frɔm Mozis we i bin yɔŋ. I bin de ɛnjɔy plɛnti tin dɛn na Fɛro in os, bɔt in kɔmpin yɔŋ wan dɛn we na Ibru, na bin slev dɛn. (Ɛks. 1:13, 14; Akt 7:21, 22) Di tɛm we dɛnsɛf bin de na tɛm we rili impɔtant, jɔs lɛk yu yon tɛm. (Ɛks. 19:4-6) Dɛn ɔl bin gɛt fɔ chuz fɔ dɛnsɛf if dɛn go sav Jiova wit ɔl dɛn at. Na di bɛst tin Mozis bin chuz. I bin chuz fɔ sav Jiova wit ɔl in at.—Rid Di Ibru Pipul Dɛn 11:24-27.

8. Us ɛp de fɔ yɔŋ pipul dɛn we de tink bɔt wetin dɛn fɔ du wit dɛn layf?

8 Jiova de ɛp yu fɔ chuz fɔ du di rayt tin naw we yu yɔŋ. I de gi yu advays dɛn we yu go yuz ɛnitɛm we sɔntin mit yu na layf. (Sam 32:8) Apat frɔm dat, yu mama ɛn papa we dɛnsɛf na Jiova Witnɛs dɛn, ɛn di ɛlda dɛn na di kɔngrigeshɔn, kin ɛp yu fɔ tink bɔt aw yu go ebul yuz di advays dɛn na di Baybul. (Prɔv. 1:8, 9) Lɛ wi tɔk bɔt tri advays dɛn na di Baybul we go ɛp yu fɔ chuz di rayt tin we yu go du naw, ɛn we go mek yu ɛnjɔy plɛnti gud tin dɛn tumara bambay.

TRI ADVAYS DƐN NA DI BAYBUL WE GO GAYD YU

9. (a) Aw Gɔd sho se i rɛspɛkt wi? Wetin mek wi se dat na rɛspɛkt? (b) We wi ‘put wi at gud wan pan Gɔd in Kiŋdɔm,’ wetin dat de sho?

9 Put yu at gud wan pan Gɔd in Kiŋdɔm ɛn du di rayt tin we i want. (Rid Matyu 6:19-21, 24-26, 31-34.) We Jiova mek wi, i gi wi di fridɔm fɔ chuz fɔ wisɛf ɛnitin we wi want fɔ du. Dat sho se i rili rɛspɛkt wi. Na tru se i nɔ de tɛl wi fɔ yuz ɔl di tɛm we wi yɔŋ, fɔ du di prichin wok. Bɔt Jizɔs bin gi wi wan fayn advays. I se wi fɔ put wi at gud wan pan Gɔd in Kiŋdɔm. Di we aw yu chuz fɔ du wetin Jizɔs se, go sho se yu lɛk Gɔd ɛn yu bisin bɔt yu kɔmpin mɔtalman. Ɛn i go sho bak se yu gladi fɔ di tɛm we yu go gɛt layf we go de sote go. If yu de tink fɔ mared ɛn if yu de tink bɔt di kayn wok we yu fɔ du, i go fayn fɔ tink bak bɔt ɔda tin. Na fɔ tink bak if di tin we yu dɔn disayd fɔ du, go mek yu ebul fɔ put yu at gud wan pan Gɔd in Kiŋdɔm ɛn du wetin i want.

10. Wetin mek Jizɔs bin gladi? Wetin yusɛf go chuz fɔ du we go mek yu gladi?

10 Yu go gɛt blɛsin we yu du gud fɔ ɔda pɔsin. (Rid Di Apɔsul Dɛn Wok [Akt] 20:20, 21, 24, 35.) Dat na di men tin we go gayd wi na layf. Jizɔs bin gladi bikɔs i bin de du wetin in Papa want, nɔto wetin in want. I bin gladi fɔ ɛp pipul dɛn we want fɔ lan di gud nyus. (Lyuk 10:21; Jɔn 4:34) Sɔntɛm yusɛf dɔn si se ɛnitɛm we yu ɛp ɔda pipul dɛn, yu de gɛt blɛsin. Na fɔ chuz fɔ du di impɔtant tin we Jizɔs tɔk bɔt. If yu du dat, yu ɛn Jiova go gladi.—Prɔv. 27:11.

11. Wetin bin mek Baruk nɔ bin gladi igen we i bin de sav Jiova? Us advays Jiova bin gi am?

11 Di tin we go mek wi gladi pas ɔl na layf, na we wi chuz fɔ sav Jiova. (Prɔv. 16:20) Baruk we na Jɛrimaya in sɛktri, bin lɛf fɔ tink bɔt dat. Wan tɛm bin kam we i nɔ bin gladi igen fɔ sav Jiova. Jiova bin tɛl am se: “Yu de luk fɔ big tin fɔ yusɛf? Nɔ luk fɔ big tin; bikɔs, mi de tɛl yu se, a go du bad bad tin to ɔlman na [di] wɔl, bɔt a go gi yu yu layf as prayz . . . ɔlsay we yu go.” (Jɛr. 45:3, 5) Wetin yu tink se bin fɔ dɔn mek Baruk gladi, na we i de luk fɔ big tin fɔ insɛf ɔ na we Jiova go mek i sev we dɛn kam pwɛl Jerusɛlɛm?—Jems 1:12.

12. Wetin Ramiro chuz fɔ du we mek i gladi?

12 Wan brɔda bin si se i kin gladi we i de du gud tin fɔ ɔda pipul dɛn. In nem na Ramiro. Dis brɔda tɔk se: “A kɔmɔt na famili we po. Wi de na di Andis Mawnten.  A kam gɛt wan big chans! Mi big brɔda se i go pe fɔ mi fɔ go kɔlɛj. Bɔt a bin jɔs dɔn baptayz. Dɔn wan ɔda tin apin. Wan payɔnia tɛl mi fɔ jɔyn am fɔ go prich na wan smɔl tɔŋ. A go wit am, ɛn a lan aw fɔ bab. So a opin babin-shɔp so dat a go ebul kia fɔ misɛf as a de payɔnia. Di pipul dɛn bin rili gladi we wi de tich dɛn bɔt di Baybul. Leta, a jɔyn wan nyu kɔngrigeshɔn usay dɛn de tɔk mi langwej. A dɔn de payɔnia naw fɔ tɛn ia. Nɔ ɔda wok nɔ de we go mek a gladi di we aw a gladi naw, as a de ɛp pipul dɛn fɔ lan di gud nyus insay dɛn yon langwej.”

Frɔm we Ramiro yɔŋ i bin gladi fɔ sav Jiova (Luk na paregraf 12)

13. Wetin mek na we yu yɔŋ i fayn fɔ sav Jiova wit ɔl yu at?

13 Ɛnjɔy fɔ wɔship Jiova naw we yu yɔŋ. (Rid Ɛkliziastis 12:1.) Nɔto pas yu gɛt gud wok fɔs bifo yu fɔ bigin sav Jiova. We yu yɔŋ na fayn tɛm fɔ bigin sav Jiova wit ɔl yu at. Bɔku yɔŋ pipul dɛn nɔ gɛt plɛnti famili prɔblɛm, ɛn dɛn nɔ kin sik so nɔmɔ. Dɛn go ebul fɔ bia ɛnikayn tin we go mit dɛn na di asaynmɛnt we dɛn go gi dɛn. Wetin yu go lɛk fɔ du fɔ Jiova naw we yu yɔŋ? Sɔntɛm yu plan na fɔ payɔnia, ɔ yu go lɛk fɔ go prich na say we dɛn de tɔk difrɛn langwej. Apat frɔm dat, yu kin ivin du mɔ na di kɔngrigeshɔn we yu de rayt naw. Ilɛk uskayn plan yu gɛt fɔ sav Gɔd, yu go gɛt fɔ lan sɔntin we go mek yu ebul fɔ sɔpɔt yusɛf. Yu fɔ no us wok yu go want fɔ du, ɛn aw lɔng yu go tek fɔ lan am.

 YUZ DI ADVAYS DƐN NA DI BAYBUL FƆ CHUZ DI RAYT TIN FƆ DU

14. Wetin pɔsin fɔ tek tɛm wit we i de tink bɔt di wok we i fɔ du?

14 Di tri advays dɛn we wi jɔs dɔn tɔk bɔt, go ɛp yu fɔ tink gud wan bɔt di kayn wok we yu go du. Sɔntɛm, yu ticha dɛn go tɛl yu fɔ du di kayn wok we dɛn tink se go fayn fɔ yu. Dɛn nɔ kin min bad fɔ yu. Bɔt yu fɔ tek tɛm! Pipul dɛn we nɔ lɛk Jiova go tray fɔ mek yu put ɔl yu at pan di tin dɛn na dis wɔl. (1 Jɔn 2:15-17) If yu bigin tink bɔt di tin dɛn we yu go ɛnjɔy na dis wɔl, yu at go ful yu.—Rid Prɔvabs 14:15; Jɛr. 17:9.

15, 16. Udat dɛn na di bɛst pipul dɛn we go gayd yu fɔ fɛn di rayt wok fɔ du?

15 We yu go dɔn ɔndastand di tin dɛn we yu fɔ no bɔt di wok we yu fɔ du, yu go stil nid mɔ advays. (Prɔv. 1:5) Udat go ebul yuz di Baybul in advays fɔ ɛp yu fɔ tink gud wan bɔt di wok we yu want fɔ du? I go fayn mek yu lisin to pipul dɛn we lɛk Jiova, we lɛk yu, ɛn we rili no yu ɛn wetin yu want du. Dɛn go ebul ɛp yu fɔ tink bɔt di tin we yu sabi fɔ du ɛn di tin we mek yu want fɔ du dis wok. Sɔntɛm di tin we dɛn go tɛl yu, go ɛp yu fɔ tink if yu fɔ du di wok ɔ if yu nɔ fɔ du am. Udat dɛn pipul ya kin bi? Dɛn kin bi yu mama ɛn papa we dɛnsɛf na Jiova Witnɛs dɛn, ɔ di ɛlda dɛn na di kɔngrigeshɔn. Dɛn pipul ya go yuz di Baybul fɔ gayd yu. Apat frɔm dɛn, yu kin ivin tɔk to pipul dɛn we na payɔnia ɔ travlin ovasia dɛn. Yu kin aks dɛn wetin mek dɛn disayd fɔ yuz ɔl dɛn tɛm fɔ sav Jiova, wetin ɛp dɛn fɔ bigin payɔnia, ɛn aw dɛn dɔn ebul fɔ kia fɔ dɛnsɛf. Dɔn, yu kin ivin aks dɛn wetin na di blɛsin dɛn we dɛn de ɛnjɔy naw as dɛn de sav Jiova.—Prɔv. 15:22.

16 Di wan dɛn we rili no yu, go tink gud wan bɔt wetin mek yu want fɔ du di tin we yu chuz fɔ du, ɛn gi advays we go ɛp yu. Fɔ ɛgzampul, lɛ wi se yu lɛf skul bikɔs yu nɔ lɛk di bɔku stɔdi we i gɛt, ɛn bigin payɔnia. Sɔmbɔdi we lɛk yu go tink bɔt di tin we mek yu bigin payɔnia, ɛn ɛp yu fɔ no se we yu go skul, yu go ebul lan fɔ bia bɔku tin; ɛn dat na fayn tin we yu go nid if yu want sav Jiova wit ɔl yu at.—Sam 141:5; Prɔv. 6:6-10.

17. Uskayn tin dɛn wi nɔ fɔ disayd fɔ du?

17 Ɛnibɔdi we de wɔship Jiova go gɛt tin dɛn we go mit am, we go mek i want fɔ lɛf fɔ sav Jiova. (1 Kɔr. 15:33; Kɔl. 2:8) Bɔt sɔm wok dɛn de we if yu nɔ tek tɛm, kin pwɛl yu padi biznɛs wit Gɔd. Yu sabi ɛnibɔdi we “nɔ biliv Krays igen” bikɔs i bin chuz wok we nɔ fayn? (1 Tim. 1:19) I go sho se yu rili gɛt sɛns if yu nɔ disayd fɔ du tin we go ambɔg yu padi biznɛs wit Gɔd.—Prɔv. 22:3.

YU GO ƐNJƆY WE YU DE SAV GƆD WE YU YƆŊ

18, 19. If ɛnibɔdi de we fil se i nɔ go ebul du mɔ fɔ sav Jiova, wetin i fɔ du?

18 If yu rili want fɔ sav Jiova, na fɔ ɛnjɔy di tin dɛn we yu ebul fɔ du naw we yu yɔŋ. Na fɔ chuz di tin dɛn we yu fɔ du we go mek yu ɛnjɔy fɔ sav Gɔd insay dis impɔtant tɛm we wi de so naw.

19 If yu fil se yu nɔ go ebul du mɔ fɔ sav Jiova, wetin yu fɔ du? Dat nɔ fɔ mek yu lɛf. Na fɔ kɔntinyu fɔ du tin dɛn we go mek yu fet trɔng. Di apɔsul Pɔl insɛf bin tray tranga wan fɔ liv in layf di we we go mek i gɛt Gɔd in blɛsin. Afta i tɔk bɔt wetin bin ɛp am fɔ du dat, i tɔk se: “If una nɔ gri wit wetin a dɔn tɔk, Gɔd insɛf go sho una se wetin a tɔk na tru. Na wan tin nɔmɔ a gɛt fɔ se, lɛ wi nɔn nɔ lɛf fɔ fala di sem lɔ dɛn we wi dɔn de fala ɔl dis tɛm.” (Fil. 3:15, 16) Kɔntinyu fɔ de tink bɔt di gud advays ɛn di lɔv we Gɔd gɛt fɔ yu. Jiova go rili ɛp yu pas aw ɛnibɔdi go ɛp yu so dat yu go chuz di rayt tin we yu fɔ du naw we yu yɔŋ.