Go dayrɛkt to di men tin

Go dayrɛkt to di say we di difrɛn difrɛn atikul dɛn de

 STƆDI ATIKUL 35

Jiova Valyu in Ɔmbul Savant Dɛn

Jiova Valyu in Ɔmbul Savant Dɛn

“PAPA GƆD [“Jiova,” NW] . . . bisin bɔt pɔsin we nɔ de kak.”—SAM 138:​6.

SIŊ 48 Wi De Waka wit Jiova Ɛvride

WETIN WI GO LAN? *

1. Aw Jiova de fil bɔt di wan dɛn we ɔmbul? Ɛksplen.

JIOVA lɛk ɔmbul pipul dɛn. Na di wan dɛn nɔmɔ we rili ɔmbul go ɛnjɔy tayt padi biznɛs wit am. Bɔt i nɔ de notis di wan dɛn we “de kak.” (Sam 138:​6) Wi ɔl want fɔ mek Jiova gladi ɛn gɛt tayt padi biznɛs wit am, so wi gɛt gud rizin fɔ tray tranga wan fɔ bi pɔsin we ɔmbul.

2. Wetin wi go tɔk bɔt insay dis atikul?

2 Insay dis atikul, wi go tɔk bɔt di ansa dɛn to tri kwɛstyɔn dɛn: (1) Wetin i min fɔ bi ɔmbul pɔsin? (2) Wetin mek wi fɔ tray fɔ gɛt da kwaliti de? (3) Ustɛm i nɔ kin izi fɔ bi pɔsin we ɔmbul? As wi go kam si, we wi tray fɔ bi pɔsin we ɔmbul, wi de mek Jiova gladi ɛn dat de bɛnifit wi.—Prɔv. 27:​11; Ayz. 48:​17.

WETIN I MIN FƆ BI ƆMBUL PƆSIN?

3. Wetin i min fɔ bi ɔmbul pɔsin?

3 Pɔsin we ɔmbul nɔ de tink se i bɛtɛ pas ɔda pipul dɛn ɛn i nɔ prawd. Di Baybul tɔk se pɔsin we ɔmbul de tink di rayt we bɔt in padi biznɛs wit Jiova ɛn wit ɔda pipul dɛn. I no se we i kam pan sɔm tin dɛn, ɔda pipul dɛn bɛtɛ pas am.—Fil. 2:​3, 4.

4-5. Wetin mek pɔsin we luk lɛk se i ɔmbul nɔ kin rili ɔmbul?

4 Sɔm pipul dɛn kin mek lɛk se dɛn ɔmbul. Dɛn kin mek lɛk se dɛn de shem ɔ dɛn kwayɛt. Ɔ dɛn kin mek lɛk se dɛn gɛt rɛspɛkt ɛn dɛn gɛt trenin bikɔs ɔf dɛn kɔlchɔ ɛn di we  aw dɛn mɛn dɛn. Bɔt insay dɛn at, dɛn rili prawd. As tɛm de go, dɛn kin sho udat dɛn rili bi.—Lyuk 6:​45.

5 Ɔda pipul dɛn kin luk lɛk dɛn nɔ de shem ɛn dɛn de tɔk wetin de na dɛn maynd, bɔt dat nɔ min se dɛn prawd. (Jɔn 1:​46, 47) Bɔt pipul dɛn we nɔ de shem, fɔ tek tɛm mek dɛn nɔ abop pan wetin dɛn ebul du. Ilɛksɛf wi de shem ɔ wi nɔ de shem, wi ɔl fɔ tray tranga wan fɔ bi pɔsin we rili ɔmbul.

Di apɔsul Pɔl bin ɔmbul ɛn i nɔ bin de tink se i impɔtant pas ɔda pipul dɛn (Luk na paregraf 6) *

6. Frɔm wetin de na Fɔs Lɛta Fɔ Kɔrint 15:​10, wetin wi kin lan frɔm di apɔsul Pɔl in ɛgzampul?

6 Lɛ wi tɔk bɔt di apɔsul Pɔl in ɛgzampul. Jiova bin yuz am bɔku tɛm fɔ stat nyu kɔngrigeshɔn dɛn na difrɛn siti dɛn. I go bi se Pɔl bin du mɔ na di prichin wok pas ɛni wan pan Jizɔs Krays in apɔsul dɛn. Bɔt stil, Pɔl nɔ bin tink se i bɛtɛ pas in brɔda dɛn. I bin tɔk ɔmbul wan se: “Ɔl dɛn ɔda apɔsul bɛtɛ pas mi; a nɔ fit sɛf fɔ lɛ dɛn kɔl mi apɔsul, bikɔs a bin de mek dɛn pipul we de waka wit Gɔd sɔfa.” (1 Kɔr. 15:​9) Dɔn, Pɔl bin tɔk se di rizin we mek i gɛt tayt padi biznɛs wit Jiova nɔto bikɔs i bin spɛshal ɔ fɔ di bɔku wok dɛn we i bin ebul du, bɔt na bikɔs Jiova lɛk am di we aw i nɔ fit fɔ mek i lɛk am. (Rid Fɔs Lɛta Fɔ Kɔrint 15:​10.) Wi lan fayn lɛsin frɔm di we aw Pɔl bin ɔmbul frɔm di lɛta we i bin rayt to di Kristian dɛn na Kɔrint. Insay da lɛta de, i nɔ bin bost bɔt insɛf, pan ɔl we sɔm pipul dɛn na di kɔngrigeshɔn bin de fɛn fɔlt pan am!

Kal F. Klayn, na ɔmbul brɔda we bin de sav as Gɔvnin Bɔdi mɛmba (Luk na paregraf 7)

7. Aw wan brɔda we bɔku pipul dɛn bin sabi bin sho se i ɔmbul?

7 Bɔku pan Jiova in pipul dɛn dɔn gɛt ɛnkɔrejmɛnt frɔm Brɔda Kal F. Klayn we na bin Gɔvnin Bɔdi mɛmba in stori. Insay  di stori bɔt in layf, Brɔda Klayn bin sho se i ɔmbul bay we i bin tɔk bɔt bɔku pan di tin dɛn we i nɔ bin ebul fɔ du ɛn di prɔblɛm dɛn we i bin gɛt. Fɔ ɛgzampul, insay 1922, i bin tray fɔ prich frɔm os to os fɔ di fɔstɛm ɛn i nɔ bin izi fɔ am. So i nɔ bin prich igen fɔ lɛk tu ia. Leta, we i bin de sav na Bɛtɛl, i bin kip grɔj na in at fɔ sɔm tɛm fɔ wan brɔda we bin gi am advays. Dɔn bak, i bin sik bikɔs i bin strɛs ɛn i bin wɔri, bɔt leta i bin wɛl. l bin de ɛnjɔy fɔ du bɔku impɔtant asaynmɛnt dɛn. Pan ɔl we bɔku pipul dɛn bin sabi Brɔda Klayn, di we aw i bin tɔk bɔt di prɔblɛm dɛn we i bin gɛt sho se i rili ɔmbul! Bɔku brɔda ɛn sista dɛn kin gladi we dɛn de mɛmba Brɔda Klayn in stori bikɔs i nɔ bin de shem fɔ tɔk bɔt di prɔblɛm dɛn we i bin gɛt. *

WETIN MEK WI FƆ TRAY TRANGA WAN FƆ BI PƆSIN WE ƆMBUL?

8. Aw Pita in Fɔs Lɛta 5:​6 (NW) ɛp wi fɔ si se we pɔsin ɔmbul, dat de mek Jiova gladi?

8 Di men rizin we mek wi de tray fɔ bi pɔsin we ɔmbul na bikɔs dat de mek Jiova gladi. Di apɔsul Pita bin mek dis klia. (Rid Pita in Fɔs Lɛta 5:​6, NW.) Di buk we nem “Come Be My Follower” tɔk bɔt wetin Pita bin se. Dis buk se: “Prawd tan lɛk pɔyzin. Di tin we kin apin we pɔsin prawd kin rili bad. Na tin we kin mek ivin pɔsin we sabi du bɔku tin nɔ min natin to Gɔd. Bɔt we pɔsin ɔmbul, dat kin mek Jiova yuz am, ilɛksɛf i nɔ sabi natin. . . . [I] go . . . gladi fɔ blɛs yu bikɔs yu ɔmbul.” * Fɔ tru, di bɛst tin we wi kin du na fɔ mek Jiova gladi!—Prɔv. 23:​15.

9. If wi ɔmbul, wetin mek ɔda pipul dɛn go want fɔ kam nia wi?

9 We wi tray fɔ bi pɔsin we rili ɔmbul wi nɔ jɔs de mek Jiova gladi, bɔt wi de gɛt bɔku bɛnifit. We wi ɔmbul, dat de mek ɔda pipul dɛn want fɔ kam nia wi. Wetin mek? Wɛl, tink bɔt uskayn pipul dɛn yu lɛk fɔ go nia. (Mat. 7:​12) Bɔku pan wi nɔ kin lɛk fɔ go nia pipul dɛn we kin want ɔda pipul dɛn fɔ du wetin dɛn want ɔltɛm ɛn dɛn nɔ kin lisin to ɛni advays. Bɔt i kin rili fayn fɔ de nia wi Kristian brɔda ɛn sista dɛn we ‘gɛt wan at, we lɛk dɛnsɛf lɛkɛ brɔda ɛn sista, we gɛt sɔri-at fɔ dɛn kɔmpin ɛn we nɔ de mek prawd pan dɛn kɔmpin.’ (1 Pit. 3:​8) If wi go nia  dɛn kayn pipul dɛn de, dɛnsɛf go want fɔ kam nia wi wans wi ɔmbul.

10. Wetin mek i izi fɔ pɔsin we ɔmbul fɔ bia prɔblɛm dɛn?

10 We wi ɔmbul, dat kin mek layf izi fɔ wi. Sɔntɛnde, wi kin si tin dɛn we wi tink se nɔ rayt ɔ dɛn kin trit wi we dɛn we wi tink se nɔ rayt. Kiŋ Sɔlɔmɔn we na man we bin gɛt sɛns bin tɔk se: “A dɔn si slev dɛn de rayd ɔs we kiŋ pikin dɛn de waka lɛk slev.” (Ɛkli. 10:​7) Dɛn wan dɛn we sabi du bɔku tin nɔ kin gɛt prez ɔltɛm. Ɛn dɛn wan dɛn we nɔ sabi du bɛtɛ tin kin gɛt mɔ prez. Bɔt pan ɔl dat, Sɔlɔmɔn bin kam fɔ si se i bɛtɛ fɔ gri wit di we aw tin de apin na layf ɛn nɔ pe mɔ atɛnshɔn pan di bad tin dɛn we de apin. (Ɛkli. 6:​9) If wi ɔmbul, i go izi fɔ wi fɔ gri wit di we aw tin de apin na layf, ilɛksɛf i nɔ apin di we aw wi want am.

WETIN MEK I NƆ KIN IZI FƆ BI ƆMBUL PƆSIN?

Wetin mek i nɔ izi fɔ bi ɔmbul pɔsin we dis kayn tin apin to yu? (Luk na paregraf 11 to 12) *

11. Wetin wi fɔ du we sɔmbɔdi gi wi advays?

11 Ɛvride, wi gɛt bɔku chans dɛn fɔ sho se wi ɔmbul. Lɛ wi tɔk bɔt sɔm ɛgzampul dɛn. We sɔmbɔdi gi wi advays. Wi fɔ mɛmba se we sɔmbɔdi tek tɛm fɔ gi wi advays, i go mɔs bi se di mistek we wi mek wɔs pas aw wi bin de tink se i bi. We sɔmbɔdi gi wi advays, di fɔs tin we kin kam na wi maynd na fɔ lɛ wi nɔ gri fɔ tek di advays. Wi kin fɛn fɔlt pan di pɔsin we gi wi di advays ɔ di we aw i gi wi di advays. Bɔt if wi ɔmbul, wi go tray fɔ biev di rayt we.

12. Frɔm wetin de na Prɔvabs 27:​5, 6, wetin mek wi fɔ gladi we sɔmbɔdi gi wi advays? Gi wan ɛgzampul.

12 Pɔsin we ɔmbul de gladi we dɛn gi am advays. Fɔ ɛgzampul, lɛ wi se yu de na mitin. Afta we yu dɔn tɔk to bɔku brɔda ɛn sista dɛn, wan pan dɛn drɔ yu na kɔna ɛn tɛl yu se it de na yu tit. Fɔ tru, yu go shem. Bɔt yu nɔ tink se yu go gladi fɔ we da brɔda ɔ sista tɛl yu? Infakt, yu go de wish se sɔmbɔdi fɔ dɔn tɛl yu kwik! Semweso, wi fɔ ɔmbul wisɛf ɛn gladi we wan brɔda ɔ sista sho se i gɛt maynd fɔ gi wi advays di tɛm we wi nid am. Wi fɔ si da pɔsin de as wi padi, nɔto as wi ɛnimi.—Rid Prɔvabs 27:​5, 6; Gal. 4:​16.

Wetin mek wi nid fɔ bi ɔmbul pɔsin we ɔda pipul dɛn gɛt wok na di ɔganayzeshɔn? (Luk na paregraf 13 to 14) *

13. Aw wi go sho se wi ɔmbul we ɔda pipul dɛn gɛt wok dɛn fɔ du insay di kɔngrigeshɔn?

13 We ɔda pipul dɛn gɛt asaynmɛnt. Wan ɛlda we nem Jesin bin tɔk se: “We a kin si ɔda pipul dɛn de gɛt asaynmɛnt dɛn, sɔntɛnde a kin wɔnda wetin mek dɛn nɔ  pik mi.” Yu dɔn ɛva fil da we de? I nɔ bad if yu “want” fɔ du mɔ fɔ Jiova. (1 Tim. 3:​1) Bɔt wi fɔ tek tɛm wit wetin wi de tink bɔt. If wi nɔ tek tɛm, wi go bigin fɔ mek prawd. Fɔ ɛgzampul, wan Kristian brɔda go bigin fɔ tink se na in fit fɔ du wan patikyula wok na di kɔngrigeshɔn pas ɔlman. Ɔ sɔntɛm, wan mared sista go tink se: ‘Mi man sabi du dis wok gud gud wan pas da ɔda brɔda de!’ Bɔt if wi rili ɔmbul, wi nɔ go tink dis kayn we.

14. Wetin wi kin lan frɔm di we aw Mozis bin biev we ɔda pipul dɛn bin gɛt wok?

14 Wi kin lan frɔm di we aw Mozis bin biev we ɔda pipul dɛn bin gɛt wok dɛn. Mozis bin rili valyu di wok we i bin gɛt fɔ lid di pipul dɛn na Izrɛl. Wetin Mozis bin du we Jiova bin alaw ɔda pipul dɛn fɔ sabi du sɔm pan di wok dɛn we i bin de du? Mozis nɔ bin jɛlɔs. (Nɔm. 11:​24-29) I bin ɔmbul ɛn i alaw ɔda pipul dɛn fɔ ɛp am fɔ jɔj di Izrɛlayt dɛn. (Ɛks. 18:​13-24) Dis bin min se di Izrɛlayt dɛn go gɛt mɔ man dɛn we go wok fɔ dɛn ɛn dɛn nɔ go wet fɔ lɔng tɛm fɔ lɛ dɛn jɔj dɛn. Dat sho se Mozis bin bisin mɔ bɔt wetin go ɛp ɔda pipul dɛn pas di pozishɔn we i bin gɛt fɔ lid di pipul dɛn na Izrɛl. Dis na fayn ɛgzampul fɔ wi! Wi fɔ mɛmba se if wi want fɔ valyu to Jiova, i impɔtant fɔ bi ɔmbul pɔsin pas fɔ sabi du bɔku tin. Pan ɔl we Jiova “sidɔm ɔp na ɛvin, i bisin bɔt pɔsin we nɔ de kak.”—Sam 138:​6.

15. Aw tin dɔn chenj fɔ bɔku pan wi brɔda ɛn sista dɛn?

15 We tin chenj na wi layf. Dɛn biɛn tɛm ya, bɔku brɔda ɛn sista dɛn we dɔn sav Jiova fɔ lɔng tɛm dɔn gɛt ɔda asaynmɛnt. Fɔ ɛgzampul, insay 2014, di ɔganayzeshɔn bin tɔk se wi nɔ go gɛt distrikt ovasia dɛn igen, so dɛn brɔda dɛn de ɛn dɛn wɛf dɛn bin gɛt ɔda  asaynmɛnt dɛn. Insay da sem ia de, di sakit ovasia dɛn we bin dɔn rich 70 ia bin stɔp fɔ bi sakit ovasia. Ɛn di brɔda dɛn we bin dɔn ol 80 ia, nɔ go sav igen as kɔdinetɔ fɔ di ɛlda dɛn na di kɔngrigeshɔn. Dɔn bak, dɛn biɛn tɛm ya, dɛn dɔn sɛn bɔku brɔda ɛn sista dɛn we bin de na Bɛtɛl as payɔnia dɛn. Ɔda wan dɛn bin stɔp fɔ bi spɛshal ful-taym savant bikɔs dɛn gɛt wɛlbɔdi prɔblɛm, dɛn nid fɔ kia fɔ dɛn famili, ɔ fɔ ɔda rizin dɛn.

16. Aw wi brɔda ɛn sista dɛn dɔn sho se dɛn ɔmbul we dɛn gɛt nyu asaynmɛnt dɛn?

16 I nɔ bin izi fɔ bɔku pan dɛn brɔda ɛn sista dɛn ya fɔ ajɔst we tin chenj na dɛn layf. Fɔ tru dɛn bin lɛk di asaynmɛnt we dɛn bin gɛt ɛn fɔ bɔku pan dɛn, dɛn bin dɔn de ɛnjɔy fɔ du fɔ lɔng tɛm. Sɔm pan dɛn bin de rili fil bad as dɛn de ajɔst to dɛn nyu layf. Bɔt as tɛm de go, dɛn kin ebul fɔ ajɔst. Wetin mek? Na bikɔs dɛn lɛk Jiova pas ɛni ɔda tin. Dɛn no se dɛn dɔn gi dɛn layf to Gɔd nɔto to wok, taytul, ɔ asaynmɛnt. (Kɔl. 3:​23, NW) Dɛn gladi fɔ kɔntinyu fɔ sav Jiova ilɛk uskayn asaynmɛnt dɛn gɛt. Dɛn “de put ɔl wetin de wɔri [dɛn] na in an,” bikɔs dɛn no se i bisin bɔt dɛn.—1 Pit. 5:​6, 7, NW.

17. Wetin mek wi gladi we Gɔd in Wɔd de ɛnkɔrej wi fɔ bi ɔmbul pɔsin?

17 Wi gladi we Gɔd in Wɔd de ɛnkɔrej wi fɔ bi ɔmbul pɔsin. We wi tray fɔ gɛt dis fayn kwaliti, wi de bɛnifit wisɛf ɛn ɔda pipul dɛn. Wi de ebul fɔ bia wit prɔblɛm dɛn na layf. Ɛn di tin we pas ɔl na dat, wi de kam nia wi Papa we de na ɛvin. Wi gladi fɔ no se pan ɔl we Jiova na ‘di Ay ɛn Mayti Wan,’ i lɛk in ɔmbul savant dɛn ɛn i valyu dɛn!—Ayz. 57:​15.

SIŊ 45 Di Tin dɛn we De na Mi At

^ par. 5 Wan pan di impɔtant kwaliti dɛn we wi nid fɔ gɛt na fɔ bi ɔmbul pɔsin. Wetin i min fɔ bi ɔmbul pɔsin? Wetin mek wi nid fɔ lan fɔ bi ɔmbul pɔsin? Ɛn wetin mek i nɔ kin izi fɔ wi fɔ kɔntinyu fɔ bi ɔmbul pɔsin we tin chenj na wi layf? Dis atikul go tɔk bɔt dɛn impɔtant kwɛstyɔn dɛn ya.

^ par. 7 Luk di atikul we gɛt di taytul “Jehovah Has Dealt Rewardingly With Me” insay di Ɔktoba 1, 1984, Wachtawa.

^ par. 8 Luk na chapta 3, paragref 23.

^ par. 53 SMƆL TIN BƆT DI PIKCHƆ: Di apɔsul Pɔl de ɛnjɔy we i de kip kɔmpin wit ɔda brɔda ɛn sista dɛn ɛn ivin wit pikin dɛn na wan brɔda in os.

^ par. 57 SMƆL TIN BƆT DI PIKCHƆ: Wan yɔŋ brɔda de gi advays frɔm di Baybul to wan ol brɔda.

^ par. 59 SMƆL TIN BƆT DI PIKCHƆ: Di ol brɔda nɔ de jɛlɔs di yɔŋ brɔda bikɔs di yɔŋ brɔda gɛt wok na di kɔngrigeshɔn.