Go dayrɛkt to di men tin

Go dayrɛkt to di say we di difrɛn difrɛn atikul dɛn de

Yu Bin No?

Yu Bin No?

Us Wok Stiwɔd dɛn Bin De Du di Tɛm we Dɛn Bin De Rayt di Baybul?

INSAY di tɛm we dɛn bin de rayt di Baybul, stiwɔd dɛn na savant dɛn we de in chaj ɔf ɔda pɔsin in os ɔ prɔpati. Di Ibru ɛn Grik wɔd dɛn we dɛn yuz fɔ translet di wɔd “stiwɔd” kin min ovasia ɔ pɔsin we de kia fɔ tin dɛn we de apin na di os.

We Jekɔp in pikin Josɛf bin de na Ijipt as slev, na in na bin de savant we de in chaj ɔf in masta in os. Infakt Josɛf in masta bin “lɛf ɔl in biznɛs nain os na in an.” (Jɛn. 39:​2-6) Leta we Josɛf insɛf bin tɔn bigman na Ijipt, i bin gɛt savant we de kia fɔ di tin dɛn we de apin na in os.—Jɛn. 44:​4.

Insay Jizɔs in tɛm, pipul dɛn we bin gɛt land, bin de liv fa frɔm di say dɛn we dɛn bin de mek fam. So di wan dɛn we gɛt di land bin de pik savant dɛn fɔ wach di wok we di wokman dɛn bin de du na di fam.

Udat dɛn bin de pik fɔ bi stiwɔd? Insay di apɔsul dɛn tɛm, wan Roman rayta we nem Kɔlyumɛla bin tɔk se, bifo dɛn pik ɛni slev fɔ bi ovasia ɔ stiwɔd, “i fɔ sabi du di wok fayn fayn wan.” I fɔ bi pɔsin we de “mek shɔ se di wokman dɛn du dɛn wok ɛn i nɔ fɔ wikɛd wit dɛn.” I bin tɔk bak se: “Di tin we impɔtant pas ɔl na dat; i nɔ fɔ tink se i sabi ɔltin ɛn i fɔ rɛdi fɔ lan nyu tin dɛn.”

Insay Gɔd in Wɔd, dɛn yuz di ɛgzampul bɔt savant we de in chaj ɔf in masta in prɔpati dɛn fɔ sho sɔm pan di tin dɛn we bin de apin insay di Kristian kɔngrigeshɔn. Fɔ ɛgzampul, di apɔsul Pita bin ɛnkɔrej Kristian dɛn fɔ yuz di gift we Gɔd dɔn gi dɛn “fɔ wok fɔ [dɛn] kɔmpin dɛn bikɔs [dɛn] na fayn savant dɛn fɔ Gɔd in spɛshal gudnɛs.”—1 Pit 4:​10, NW.

Jizɔs insɛf bin yuz di ɛgzampul bɔt stiwɔd we i bin de tɔk bɔt wetin de na Lyuk 16:​1-8. We Jizɔs bin de tɔk bɔt di prɔfɛsi we gɛt fɔ du wit di tɛm we i de kam as Kiŋ, i bin tɛl in disaypul dɛn se i go pik “slev we fetful ɛn gɛt sɛns,” ɔ “savant we fetful.” Di men wok we da savant de go gɛt insay di tɛm we di wɔl want fɔ dɔn, na fɔ de gi Krays in disaypul dɛn tin dɛn we go mek dɛn gɛt tayt padi biznɛs wit Jiova. (Mat. 24:​45-47, NW; Lyuk 12:​42, NW) Wi gladi fɔ bi wan pan di wan dɛn we de gɛt di buk, magazin, ɛn ɔda tin dɛn we di fetful savant de mek wi gɛt ɔlsay na di wɔl we de ɛp wi gɛt mɔ fet.