Go dayrɛkt to di men tin

Go dayrɛkt to di say we di difrɛn difrɛn atikul dɛn de

 STƆDI ATIKUL 22

Tray fɔ Du Mɔ we Yu De Stɔdi!

Tray fɔ Du Mɔ we Yu De Stɔdi!

“Mek shɔ ɔf di tin dɛn we rili impɔtant.”—FIL. 1:​10, NW.

SIŊ 35 “Go De Du di Tin dɛn we Rili Impɔtant”

WETIN WI GO LAN? *

1. Wetin mek sɔm pipul dɛn nɔ kin lɛk fɔ stɔdi?

TIDE, bɔku pipul dɛn nid fɔ wok tranga wan so dat dɛn go gɛt mɔni fɔ kia fɔ dɛnsɛf. Bɔku pan wi brɔda dɛn kin spɛn bɔku tɛm ɛnide fɔ wok so dat dɛn go gi dɛn famili tin fɔ it, klos fɔ wɛr, ɛn say fɔ de. Bɔku ɔda wan dɛn kin spɛn plɛnti tɛm de travul ɛvride fɔ go wok ɛn kam bak na dɛn os. Plɛnti ɔda wan dɛn de du tranga tranga wok fɔ gɛt mɔni fɔ sɔpɔt dɛn famili. Bay di tɛm we di de de dɔn, dɛn brɔda ɛn sista dɛn ya we de wok tranga wan kin dɔn rili taya! Di las tin we dɛn go want fɔ du na fɔ stɔdi.

2. Ustɛm yu kin fɛn tɛm fɔ stɔdi?

2 Di tru tin na dat, wi fɛn tɛm fɔ stɔdi Gɔd in Wɔd ɛn wi buk ɛn magazin dɛn gud gud wan. Dis rili impɔtant if wi want fɔ gɛt tayt padi biznɛs wit Jiova, ɛn gɛt layf we go de sote go! (1 Tim. 4:​15) Sɔm kin grap ali mɔnin ɛvride fɔ stɔdi bikɔs na da tɛm de dɛn os kin kwayɛt, ɛn dɛn kin ebul fɔ tink fayn fayn wan afta we dɛn dɔn wek pan slip. Ɔda wan dɛn kin mek shɔ se dɛn fɛn smɔl tɛm fɔ stɔdi di Baybul ɛn wi buk ɛn magazin dɛn na nɛt we di ples kwayɛt, ɛn dɛn kin tek tɛm tink bɔt wetin dɛn dɔn rid.

3-4. Us ajɔstmɛnt dɛn dɔn mek wit di tin dɛn we wi nid fɔ rid ɛn wach? Wetin mek dɛn mek dɛn ajɔstmɛnt dɛn ya?

3 Yusɛf go mɔs gri se i rili impɔtant fɔ fɛn tɛm fɔ stɔdi. Bɔt wetin wi fɔ stɔdi? Yu go se ‘bɔku tin de fɔ rid.’ Ɛn ‘i nɔ kin izi fɔ rid ɔltin.’ Sɔm kin ebul fɔ rid ɔl wi buk ɛn magazin dɛn, ɛn wach ɔl di fim dɛn we wi kin gɛt, bɔt i nɔ kin izi fɔ bɔku pan wi brɔda dɛn fɔ fɛn tɛm fɔ du dat. Di Gɔvnin Bɔdi no bɔt dis. Na dat mek dɛn biɛn tɛm ya, di Gɔvnin Bɔdi dɔn disayd fɔ ridyus sɔm pan di tin dɛn we dɛn kin print ɛn put na di Intanɛt.

 4 Fɔ ɛgzampul, dɛn nɔ de print di Yearbook of Jehovah’s Witnesses igen, bikɔs bɔku fayn fayn ɛkspiriɛns dɛn de na jw.org® ɛn di JW TV program we wi kin gɛt ɛni mɔnt. Dɔn, na jɔs tri tɛm nɔmɔ insay di ia dɛn de print di Wachtawa ɛn Awake! magazin dɛn. Dɛn nɔ mek dɛn ajɔstmɛnt dɛn ya fɔ lɛ wi spɛn mɔ tɛm de du tin dɛn we nɔ gɛt natin fɔ du wit wi wɔship to Jiova. Bɔt dɛn du dis fɔ lɛ wi gɛt mɔ tɛm fɔ pe atɛnshɔn pan “di tin dɛn we rili impɔtant.” (Fil. 1:​10, NW) Lɛ wi tɔk bɔt aw yu go disayd fɔ du di tin dɛn we rili impɔtant, ɛn aw yu go bɛnifit mɔ frɔm yu pasɔnal Baybul stɔdi.

NO DI TIN DƐN WE RILI IMPƆTANT

5-6. Us buk ɛn magazin dɛn wi fɔ mek shɔ se wi stɔdi gud gud wan?

5 Wetin fɔs wi fɔ stɔdi? Wi fɔ spɛn tɛm ɛvride fɔ stɔdi Gɔd in Wɔd. Dɛn dɔn ridyus di vas dɛn we wi fɔ rid fɔ wi kɔngrigeshɔn Baybul ridin insay di wik so dat wi go gɛt mɔ tɛm fɔ tink gud gud wan bɔt wetin wi dɔn rid, ɛn fɔ luk na ɔda buk ɛn magazin dɛn fɔ no mɔ bɔt wetin wi dɔn rid. Wi gol nɔto fɔ jɔs rid ɔl di vas dɛn we dɛn tɛl wi fɔ rid, bɔt na fɔ alaw di mɛsej we wi dɔn rid na di Baybul fɔ tɔch wi at, ɛn mek wi kam nia Jiova mɔ ɛn mɔ.—Sam 19:​14.

6 Wetin bak wi fɔ tek tɛm stɔdi gud gud wan? Wi want fɔ pripia fɔ di Wachtawa Stɔdi ɛn di Kɔngrigeshɔn Baybul Stɔdi. Dɔn, wi want fɔ rid di ɔda tin dɛn we wi de yuz na di mitin dɛn we wi kin gɛt insay di wik. Wi fɔ rid bak di Wachtawa ɛn Awake!

7. Wi fɔ fil bad if wi nɔ ebul fɔ rid ɛn wach ɔltin we de na wi wɛbsayt ɛn na JW TV?

7 Yu go gri se ‘dat fayn, bɔt we ɔl di ɔda atikul ɛn fim dɛn we kin de na wi jw.org, wɛbsayt, ɛn di tin dɛn we dɛn kin sho wi na JW TV? Dɛn rili bɔku!’ Tink bɔt dis ɛgzampul: Bɔku difrɛn fayn fayn tin dɛn de na wan makit. Di kɔstɔma dɛn nɔ go ɛva ebul fɔ bay ɔltin we de de. So dɛn go jɔs bay sɔm pan di tin dɛn we dɛn go ebul fɔ bay. Semweso, if yu nɔ ebul fɔ rid ɔltin we dɛn de gi wi na di Intanɛt, nɔ fil bad. Na fɔ rid ɔ wach wetin yu ebul. Lɛ wi tɔk naw bɔt wetin i min fɔ stɔdi ɛn aw wi go bɛnifit mɔ frɔm wetin wi de stɔdi.

TRAY TRANGA WAN FƆ STƆDI!

8. Wetin-ɛn-wetin wi fɔ du we wi de stɔdi Di Wachtawa? Aw dat go bɛnifit wi?

8 We yu de stɔdi, yu fɔ pe atɛnshɔn mɔ pan wetin yu de rid so dat yu go lan impɔtant tin dɛn. Fɔ stɔdi nɔ jɔs min fɔ rid kwik kwik wan ɛn ɔndalayn di ansa dɛn. Fɔ ɛgzampul, we yu de pripia fɔ di Wachtawa Stɔdi, yu fɔ rid fɔs di say we se wetin wi go lan we de na di fɔs pat na di atikul. Dɔn, rid ɔ tink gud gud wan bɔt di atikul in taytul, wit di sɔbɛdin dɛn ɛn di rivyu kwɛstyɔn dɛn. Afta dat, yu kin tek tɛm rid di atikul. Pe atɛnshɔn mɔ pan di fɔs sɛntɛns na ɛni paregraf we de tɛl yu wetin di paregraf de tɔk bɔt. Da sɛntɛns de, de ɛp yu fɔ no us pɔynt di paregraf de ɛksplen. As yu de rid di atikul, tink bɔt aw ɔl di paregraf dɛn sɔpɔt di sɔbɛdin ɛn di men pɔynt na di atikul. Na fɔ rayt dɔŋ ɛni wɔd ɛn pɔynt dɛn we yu nɔ ɔndastand ɛn we yu go lɛk fɔ no mɔ bɔt.

9. (a) Wetin mek wi fɔ pe atɛnshɔn mɔ pan di skripchɔ dɛn we wi de stɔdi Di Wachtawa? Aw wi fɔ du am? (b) Frɔm wetin de na Sam 1:​2, wetin wi fɔ du bak we wi de rid di skripchɔ dɛn?

9 We wi de stɔdi Di Wachtawa na wi mitin dɛn, dat de ɛp wi fɔ ɔndastand di Baybul. So na fɔ pe atɛnshɔn mɔ to di  skripchɔ dɛn, mɔ di wan dɛn we wi go rid we wi de tɔk bɔt di atikul. Dɔn bak, na fɔ pe mɔ atɛnshɔn to aw di wɔd dɛn na di vas de sɔpɔt di men pɔynt na di paregraf. Afta dat, tek tɛm tink gud gud wan bɔt di skripchɔ dɛn we yu dɔn rid ɛn aw yu go du di tin dɛn we yu dɔn rid.—Rid Sam 1:​2.

Mama ɛn papa dɛn, una tich una pikin dɛn aw fɔ stɔdi (Luk na paregraf 10) *

10. Frɔm wetin de na Di Ibru Pipul Dɛn 5:​14, wetin mek mama ɛn papa dɛn fɔ yuz di tɛm fɔ dɛn famili wɔship fɔ tich dɛn pikin dɛn aw fɔ stɔdi ɛn du risach?

10 Na nɔmɔl tin fɔ lɛ mama ɛn papa dɛn want dɛn pikin dɛn fɔ ɛnjɔy dɛn Famili Wɔship ɛni wik. Bɔt pan ɔl we mama ɛn papa dɛn kin plan ɔltɛm bɔt wetin dɛn go du na dɛn famili wɔship, dɛn nɔ fɔ fil se paopa dɛn fɔ akt drama ɔ du ɔda spɛshal tin dɛn ɛni wik. I nɔ bad fɔ yuz di tɛm we una de du Famili Wɔship fɔ wach di tin dɛn we wi kin gɛt na JW TV ɛni mɔnt ɔ fɔ de du spɛshal tin dɛn lɛk fɔ mek Noa in ak. Bɔt i impɔtant bak fɔ tich di pikin dɛn aw fɔ stɔdi. Dɛn nid fɔ lan aw fɔ pripia fɔ di mitin dɛn, fɔ ɛgzampul, aw fɔ du risach bɔt kwɛstyɔn dɛn we dɛn kɔmpin dɛn kin aks dɛn na skul. (Rid Di Ibru Pipul Dɛn 5:​14.) If dɛn de spɛn sɔm tɛm fɔ stɔdi bɔt ɛni Baybul sɔbjɛkt na os, dat go mek i izi fɔ dɛn fɔ ɔndastand wetin wi de lan na mitin, asɛmbli, ɛn kɔnvɛnshɔn dɛn ilɛksɛf dɛn nɔ ple fim. Na di pikin dɛn ej ɛn udat dɛn bi go mek dɛn mama ɔ papa dɛn disayd ɔmɔs tɛm dɛn go spɛn fɔ stɔdi wit dɛn.

11. Wetin mek i impɔtant fɔ tich wi Baybul studɛnt dɛn aw fɔ stɔdi gud gud wan fɔ dɛnsɛf?

11 Wi Baybul studɛnt dɛn bak nid fɔ lan aw fɔ stɔdi. We wi jɔs stat fɔ stɔdi wit dɛn, wi kin gladi fɔ si we dɛn de pripia ɛn ɔndalayn di ansa dɛn na di buk we wi de stɔdi wit dɛn ɔ fɔ di mitin dɛn. Bɔt wi nid bak fɔ tich wi Baybul studɛnt dɛn aw fɔ du risach ɛn aw fɔ stɔdi gud gud wan fɔ dɛnsɛf. Dat go mek dɛn nɔ go nid fɔ aks ɔda pipul dɛn fɔ ɛp we dɛn gɛt prɔblɛm. Dɛn go no aw fɔ fɛn di tin dɛn we go ɛp dɛn fɔ sɔlv dɛn prɔblɛm dɛn fɔ dɛnsɛf bay we dɛn de du risach na wi buk ɛn magazin dɛn.

NA FƆ GƐT GOL WE YU DE STƆDI

12. Us gol dɛn wi kin sɛt we wi de stɔdi?

12 If yu na pɔsin we nɔ lɛk fɔ stɔdi, yu go tink se yu nɔ go ɛva ɛnjɔy fɔ stɔdi. Bɔt yu go ɛnjɔy fɔ stɔdi. Yu kin stat fɔ stɔdi fɔ shɔt tɛm ɛn dɛn, smɔl smɔl yu kin ad pan di tɛm we yu de spɛn fɔ stɔdi. Tink  bɔt wetin mek yu de stɔdi. Di tin we impɔtant pas ɔl na fɔ kam nia Jiova mɔ ɛn mɔ. Wan pan di men gol we wi go tray fɔ sɛt rayt naw, na fɔ ansa di kwɛstyɔn we sɔmbɔdi bin dɔn aks wi ɔ fɔ du risach bɔt di prɔblɛm we wi gɛt.

13. (a) Ɛksplen wetin-ɛn-wetin yɔŋ pɔsin fɔ du fɔ tɛl in kɔmpin dɛn wetin i biliv na skul. (b) Aw yu go fala di advays we de na Lɛta Fɔ Kɔlɔse 4:​6?

13 Fɔ ɛgzampul, yu na yɔŋ pɔsin we de go skul? I go mɔs bi se yu klasmet dɛn ɔl de sɛlibret dɛn batde dɛn. Yu go lɛk fɔ yuz di Baybul fɔ ɛksplen to dɛn wetin mek yu nɔ de jɔyn dɛn fɔ sɛlibret dɛn batde, bɔt sɔntɛm yu de fil se yu nɔ sabi aw fɔ tɔk to dɛn. Dat na tɛm fɔ stɔdi gud gud wan! Yu gol kin bi tu tin: (1) fɔ mek yusɛf sɛf biliv gud gud wan se fɔ sɛlibret batde na tin we Gɔd et ɛn (2) fɔ lɛ yu sabi aw fɔ tich di trut gud gud wan. (Mat. 14:​6-11; 1 Pit. 3:​15) Yu kin aks yusɛf dis kwɛstyɔn, ‘Us rizin dɛn mi klasmet dɛn go gi fɔ sho se i nɔ bad fɔ sɛlibret batde?’ Dɔn, yuz wi buk ɛn magazin dɛn fɔ tek tɛm du risach. Fɔ tɔk bɔt wetin yu biliv nɔto tin we at fɔ du lɛk aw yu de tink. Bɔku pipul dɛn de sɛlibret batde jɔs bikɔs dɛn tink se ɔlman fɔ du am. If yu ebul fɔ fɛn wan ɔ tu pɔynt we yu go sho pɔsin, yu go ebul fɔ gi fayn ansa to pɔsin we rili want fɔ no bɔt di trut.—Rid Lɛta Fɔ Kɔlɔse 4:​6.

TRAY FƆ LAN MƆ

14-16. (a) Wetin yu go du fɔ lan mɔ bɔt di buk na di Baybul we yu nɔ tu sabi? (b) Ɛksplen aw di skripchɔ dɛn we dɛn yuz na di paregraf go ɛp yu fɔ ɔndastand gud gud wan di Baybul buk we nem Emɔs. (Luk bak di bɔks we gɛt di taytul “ Mek Wetin Yu De Rid Frɔm di Baybul Rial to Yu.”)

14 Imajin se na di mitin we wi go gɛt, wi go rid ɛn tɔk bɔt wan pan di shɔt buk dɛn na di Baybul we wan pan di prɔfɛt dɛn rayt, i go bi se na buk we yu nɔ tu sabi. Di fɔs tin we yu fɔ du na fɔ no mɔ bɔt wetin di prɔfɛt bin rayt. Aw yu go du dat?

15 Fɔs, na fɔ aks yusɛf dis kwɛstyɔn: ‘Wetin a no bɔt di pɔsin we rayt dis Baybul buk? Udat i bin bi, usay i bin de, us wok i bin de du?’ We yu lan mɔ bɔt di pɔsin, dat go mek yu ɔndastand gud gud wan wetin mek i yuz dɛn wɔd ɔ ɛgzampul dɛn de we i bin de rayt. As yu de rid di Baybul, luk fɔ wɔd dɛn we go ɛp yu fɔ imajin di kayn pɔsin we di wan we rayt di buk bin bi.

16 Dɔn, di tin we go ɛp yu mɔ na we yu no di tɛm we dɛn bin rayt di buk. Yu go ebul fɔ no dis bay we yu chɛk di “Table of the Books of the Bible” we de na 1662-1663 insay di New World Translation of the Holy Scriptures. Dɔn bak, yu kin luk di chat we de sho prɔfɛt ɛn kiŋ dɛn na di Buk we Go Ɛp Yu fɔ Stɔdi Gɔd in Wɔd. If di buk we yu de stɔdi de tɔk bɔt tin dɛn we gɛt fɔ apin, i go fayn fɔ lɛ yu no aw layf bin tan lɛk fɔ di pipul dɛn we bin de di tɛm we dɛn bin de rayt di buk. Us bad abit ɔ tin dɛn we di pipul dɛn bin de du we mek Jiova sɛn di prɔfɛt fɔ ɛp dɛn fɔ avɔyd? Udat dɛn bin de di tɛm we di pɔsin we rayt di buk bin de? Fɔ ɛp yu fɔ ɔndastand gud gud wan wetin bin apin, yu go nid fɔ luk na ɔda buk dɛn na di Baybul. Fɔ ɛgzampul, fɔ mek yu ɔndastand wetin bin de apin insay di prɔfɛt Emɔs in tɛm, yu go bɛnifit mɔ if yu rid di vas dɛn we de na Sɛkɛn Kiŋ ɛn Sɛkɛn Kronikul, we de na di majinal rɛfrɛns na Emɔs 1:​1. Afta dat, yu kin luk bak wetin Ozie bin rayt, we na wan pan di man dɛn we bin de insay Emɔs in tɛm. If yu luk ɔl dɛn ɔda buk dɛn ya insay di  Baybul, yu go ɔndastand gud gud wan aw layf bin tan lɛk insay Emɔs in tɛm.—2 Kiŋ 14:​25-28; 2 Kro. 26:​1-15; Ozie 1:​1-11; Emɔs 1:​1.

PE ATƐNSHƆN TO DƐN SMƆL SMƆL TIN DƐN

17-18. Yuz yu yon ɛgzampul ɔ di ɛgzampul we de na di paregraf fɔ sho se tin dɛn we kin luk lɛk se dɛn nɔ impɔtant kin ɛp yu fɔ ɛnjɔy yu pasɔnal Baybul stɔdi mɔ ɛn mɔ.

17 We wi de rid di Baybul, i fayn fɔ lɛ wi rili want fɔ lan mɔ tin dɛn. Fɔ ɛgzampul, lɛ wi se yu de rid di prɔfɛsi we de na Zɛkaraya chapta 12, we de tɔk bɔt di Mɛsaya in day wan. (Zɛk. 12:​10) We yu kam na vas 12, yu rid se “ɔl udat de na Nethan in famili” go kray ɛn dɛn at go rili pwɛl we di Mɛsaya go day. Bifo yu pul yu yay de kwik kwik wan, i go fayn fɔ mek yu aks yusɛf dɛn kwɛstyɔn dɛn ya: ‘Wetin Nethan in famili gɛt fɔ du wit di Mɛsaya? Ɛni we de fɔ lɛ a lan mɔ tin bɔt dat?’ Yu kin tray fɔ du mɔ risach. Di majinal rɛfrɛns go dayrɛkt yu to Sɛkɛn Samiɛl 5:​13, 14, usay yu go lan se Nethan na bin wan pan Kiŋ Devid in bɔypikin. Di sɛkɔn majinal rɛfrɛns we na Lyuk 3:​23, 31, sho se Nethan na Jizɔs in gret gret grampa frɔm Meri in layn. (Luk “Joseph, son of Heli,” na di stɔdi not fɔ Lyuk 3:​23.) Wantɛm wantɛm, yu go lɛk fɔ no mɔ! Yu go no se prɔfɛsi de we bin tɔk se Jizɔs go kɔmɔt frɔm Devid in famili. (Mat. 22:​42) Bɔt Devid bin bɔn pas 20 bɔypikin dɛn. Wi nɔ fɔ sɔprayz we Zɛkaraya tɔk se Nethan in famili go kray di tɛm we Jizɔs go day.

18 Lɛ wi tɔk bɔt wan ɔda ɛgzampul. Insay Lyuk chapta 1 wi rid se enjɛl Gebrɛl bin go fɛn Meri ɛn tɛl am wɔndaful tin  bɔt di pikin we i gɛt fɔ bɔn. I tɛl am se: “Dis pikin go bi pɔsin we gret, ɛn dɛn go kɔl am di Wan we De Pantap Ɔlman, in Pikin, ɛn Jiova Gɔd go gi am in gret gret granpa Devid in tron, ɛn i go rul as Kiŋ oba Jekɔp in fambul dɛn sote go.” (Lyuk 1:​32, 33, NW) Na nɔmal tin fɔ lɛ wi jɔs notis di fɔs tin we Gebrɛl bin tɔk, dat na we i se dɛn go kɔl Jizɔs “di Wan we De Pantap Ɔlman, in Pikin.” Bɔt Gebrɛl bin tɔk bak se Jizɔs go “rul as Kiŋ.” So wi fɔ aks wisɛf wetin Meri bin tink bɔt dɛn wɔd ya we Gebrɛl bin tɔk. Fɔ se Meri bin de tink se Jizɔs go tek Kiŋ Ɛrɔd in ples ɔ ɛni ɔda rula in ples na Izrɛl? If Jizɔs bin bi kiŋ, Meri bin fɔ dɔn bi di kiŋ in mama ɔ mami kwin, ɛn in famili bin fɔ dɔn de na di pales. Bɔt di Baybul nɔ tɛl wi se Meri bin tɔk ɛnitin lɛk dat to Gebrɛl, ɛn wi nɔ ɛva rid ɛnisay na di Baybul fɔ se Meri bin aks fɔ pozishɔn na di Kiŋdɔm, jɔs lɛk aw tu pan Jizɔs in disaypul dɛn bin du. (Mat. 20:​20-23) Dis mek wi biliv tranga wan se Meri na bin uman we rili ɔmbul!

19-20. Frɔm wetin de na Jems 1:​22-25 ɛn 4:​8, wetin na di men rizin dɛn we mek wi de stɔdi?

19 Lɛ wi mɛmba ɔltɛm se di men rizin we mek wi de stɔdi Gɔd in Wɔd ɛn wi buk ɛn magazin dɛn na fɔ kam nia Jiova mɔ ɛn mɔ. Dɔn bak, wi want fɔ no di kayn pɔsin we wi rili bi, ɛn di abit dɛn we wi nid fɔ lɛf so dat wi go du wetin go mek Gɔd gladi. (Rid Jems 1:​22-25; 4:​8.) Ɛnitɛm we wi stat fɔ stɔdi, wi fɔ pre to Jiova ɛn aks am fɔ ɛp wi wit in oli spirit. Wi fɔ beg am fɔ lɛ i ɛp wi fɔ bɛnifit gud gud wan frɔm wetin wi de stɔdi, ɛn fɔ ɛp wi fɔ si klia wan di chenj dɛn we wi nid fɔ mek.

20 Lɛ wi ɔl tray fɔ tan lɛk Gɔd in fetful savant we wan pan di man dɛn we rayt di Sam buk bin tɔk bɔt we i se: “I de ɛnjɔy fɔ rid PAPA GƆD [“Jiova,” NW] in wɔd ɛn de tink bɔt PAPA GƆD in lɔ de ɛn nɛt. . . . I go bɛtɛ pan ɔl wetin i de du.”—Sam 1:​2, 3.

SIŊ 88 Mek A No Yu We

^ par. 5 Jiova de gi wi bɔku bɔku tin dɛn fɔ wach, rid, ɛn stɔdi. Dis atikul go ɛp yu fɔ disayd wetin fɔ stɔdi, ɛn i go sho yu sɔm tin dɛn we go ɛp yu fɔ bɛnifit mɔ we yu de du yu pasɔnal stɔdi.

^ par. 61 SMƆL TIN BƆT DI PIKCHƆ DƐN: Wan mama ɛn papa de sho dɛn pikin dɛn aw fɔ pripia di Wachtawa stɔdi.

^ par. 63 SMƆL TIN BƆT DI PIKCHƆ DƐN: Wan brɔda de du risach bɔt Emɔs we na wan pan di man dɛn we rayt di Baybul. Di pikchɔ dɛn we de biɛn am de sho wetin di brɔda de imajin as i de rid di Baybul ɛn tink gud gud wan bɔt wetin i de rid.