Go dayrɛkt to di men tin

Go dayrɛkt to di say we di difrɛn difrɛn atikul dɛn de

 STƆDI ATIKUL 19

Aw fɔ Sho Lɔv ɛn Du Tin Tret wit di Wan Dɛn We Dɛn Du Bad Tin To?

Aw fɔ Sho Lɔv ɛn Du Tin Tret wit di Wan Dɛn We Dɛn Du Bad Tin To?

“Yu na Gɔd we nɔ de gladi fɔ si wikɛd tin; No bad pɔsin nɔ go kɔntinyu fɔ de usay yu de.”—SAM 5:​4, NW.

SIŊ 142 Wi Op De Mek Wi Tinap Tranga Wan

WETIN WI GO LAN? *

1-3. (a) Frɔm wetin de na Sam 5:​4-6 (NW), aw Jiova de fil bɔt di wikɛd tin dɛn we de apin? (b) Wetin mek wi se fɔ du mami ɛn dadi biznɛs wit pikin na tin we de agens “Krays in lɔ”?

JIOVA GƆD et ɔlkayn wikɛd tin dɛn. (Rid Sam 5:​4-6, NW.) I rili et we dɛn de du mami ɛn dadi biznɛs wit pikin, we na tin we rili bad ɛn na siriɔs sin. Bikɔs wi na Jiova Witnɛs dɛn, wi fɔ falamakata Jiova fɔ et we pipul dɛn de du mami ɛn dadi biznɛs wit pikin dɛn, ɛn nɔ ɛnkɔrej dat na di Kristian kɔngrigeshɔn.—Rom 12:​9; Ibru 12:​15, 16.

2 Fɔ du mami ɛn dadi biznɛs wit pikin dɛn na tin we de agens “Krays in lɔ”! (Gal. 6:​2, NW) Wetin mek wi se so? As wi bin dɔn lan na di atikul bifo dis wan, Krays in lɔ min ɔl di tin dɛn we Jizɔs bin de tich bay wetin i bin de tɔk ɛn wetin i bin de du. I bin de du ɔltin fia wan ɛn wit lɔv. Bikɔs tru Kristian dɛn de obe dis lɔ, dat de ɛp dɛn fɔ trit pikin dɛn di kayn we we dɛn go fil sef ɛn no se dɛn rili lɛk dɛn. Fɔ du mami ɛn dadi biznɛs wit pikin na tin we rili bad, ɛn i de sho se di pɔsin jɔs bisin bɔt insɛf. Dat de mek di pikin de fil se nɔbɔdi nɔ lɛk am ɛn i nɔ de fil sef.

3 I sɔri fɔ no se fɔ du mami ɛn dadi biznɛs wit pikin na tin we de apin ɔlsay na di wɔl, ɛn dis na siriɔs prɔblɛm we de afɛkt tru Kristian dɛn sɛf tide. Wetin mek? Na bikɔs di Baybul se “wikɛd pipul ɛn dɛn wan we de mek pipul ful” go bɔku ɛn sɔm pan dɛn go tray fɔ kam insay di kɔngrigeshɔn. (2 Tim. 3:​13) Dɔn, sɔm pipul dɛn we se dɛn de na di kɔngrigeshɔn dɔn alaw wetin dɛn bɔdi want fɔ mek dɛn du mami ɛn dadi biznɛs wit pikin dɛn. Lɛ wi si wetin mek fɔ du mami ɛn dadi biznɛs wit pikin na siriɔs sin. Dɔn wi go tɔk bɔt wetin di ɛlda dɛn fɔ du we sɔmbɔdi insay di kɔngrigeshɔn kɔmit siriɔs sin lɛk fɔ du  mami ɛn dadi biznɛs wit pikin, ɛn aw mama ɛn papa dɛn go protɛkt dɛn pikin dɛn. *

WAN SIRIƆS SIN

4-5. Wetin mek na sin fɔ du mami ɛn dadi biznɛs wit pikin?

4 We dɛn du mami ɛn dadi biznɛs wit pikin dat kin afɛkt pipul dɛn fɔ lɔng tɛm. I kin afɛkt di pikin ɛn ɔl di wan dɛn we lɛk di pikin, lɛk in famili ɛn in Kristian brɔda ɛn sista dɛn. Fɔ du mami ɛn dadi biznɛs wit pikin na sin we rili siriɔs.

5 Na sin agens di pikin. * Fɔ du bad to ɔda pipul dɛn ɛn mek dɛn sɔfa na sin. As wi go lan na di ɔda atikul, di wan we de du mami ɛn dadi biznɛs wit pikin de du bad tin we go ambɔg di pikin difrɛn we dɛn. Di pɔsin de mek di pikin nɔ trɔst am igen ɛn i nɔ de fil sef. Wi fɔ protɛkt pikin dɛn frɔm dɛn kayn wikɛd tin dɛn de, ɛn wi fɔ ɛnkɔrej ɛn ɛp di pikin dɛn we dɛn dɔn du mami ɛn dadi biznɛs wit.—1 Tɛs. 5:​14.

6-7. Wetin mek fɔ du mami ɛn dadi biznɛs wit pikin na sin agens di kɔngrigeshɔn? Wetin mek na kraym agens di gɔvmɛnt?

6 Na sin agens di kɔngrigeshɔn. We pɔsin we de na di kɔngrigeshɔn du mami ɛn dadi biznɛs wit pikin, i de briŋ badnem pan di kɔngrigeshɔn. (Mat. 5:​16; 1 Pit. 2:​12) Dis nɔ rili fia bikɔs bɔku fetful Kristian dɛn de tray tranga wan fɔ du tin di we we go briŋ prez to Jiova. (Jud 3) Wi nɔ de alaw pipul dɛn fɔ de insay di kɔngrigeshɔn if dɛn de du wikɛd tin dɛn ɛn nɔ ripɛnt ɛn we de briŋ badnem pan di kɔngrigeshɔn.

7 Na kraym agens di gɔvmɛnt. Kristian dɛn fɔ “du wetin dɛn wan we de rul na di kɔntri tɛl [dɛn] fɔ du.” (Rom 13:​1) Wi de sho se wi de du wetin dɛn tɛl wi fɔ du bay we wi de rɛspɛkt ɛn obe di lɔ dɛn we di gɔvmɛnt de gi. If sɔmbɔdi na di kɔngrigeshɔn nɔ obe di lɔ, fɔ ɛgzampul, if i du mami ɛn dadi biznɛs wit pikin, i dɔn kɔmit kraym agens di gɔvmɛnt. (Luk Akt 25:​8.) Pan ɔl we di ɛlda dɛn nɔ gɛt di rayt fɔ pɔnish pipul dɛn we nɔ de obe di lɔ we di gɔvmɛnt de gi, dɛn nɔ de protɛkt di pɔsin we du mami ɛn dadi biznɛs wit pikin we di gɔvmɛnt want fɔ pɔnish am. (Rom 13:​4) Di pɔsin go sɔfa fɔ wetin i du.—Gal. 6:​7.

8. We pɔsin sin agens in kɔmpin mɔtalman, aw Jiova de si am?

8 Di tin we pas ɔl, na sin agens Gɔd. (Sam 51:​4) We mɔtalman sin agens in kɔmpin mɔtalman, i dɔn sin agens Jiova bak. Fɔ ɛgzampul, lɛ wi tɔk bɔt di Lɔ we Gɔd bin gi di Izrɛlayt dɛn. Di Lɔ bin se ɛnibɔdi we de tif ɔ kruk in neba, dɔn sin agens Jiova. (Lɛv. 6:​2-4) Fɔ tru, if sɔmbɔdi we de na di kɔngrigeshɔn du mami ɛn dadi biznɛs wit pikin, i dɔn tif di pikin in rayt we i gɛt fɔ fil sef ɛn dat na sin agens Gɔd. If pɔsin we de wɔship Jiova du mami ɛn dadi biznɛs wit pikin, i de briŋ big big badnem to Jiova. Na dat mek fɔ du mami ɛn dadi biznɛs wit pikin na tin we wi fɔ kɔndɛm ɛn na siriɔs sin agens Gɔd.

9. Fɔ sɔm tɛm naw, wetin-ɛn-wetin Jiova in ɔganayzeshɔn dɔn gi wi? Wetin mek?

9 Fɔ sɔm tɛm naw, Jiova in ɔganayzeshɔn dɔn mek bɔku buk ɛn ɔda tin dɛn we de tɔk bɔt mami ɛn dadi biznɛs wit pikin. Fɔ ɛgzampul, di atikul dɛn insay Di Wachtawa  ɛn Awake! dɔn tɔk bɔt wetin di wan dɛn we dɛn dɔn du mami ɛn dadi biznɛs wit kin du fɔ bia di pwɛl at we dɛn kin gɛt, aw ɔda pipul dɛn kin ɛp ɛn ɛnkɔrej dɛn, ɛn aw mama ɛn papa dɛn kin protɛkt dɛn pikin dɛn. Di ɔganayzeshɔn dɔn tren di ɛlda dɛn fɔ no wetin fɔ du we sɔmbɔdi insay di kɔngrigeshɔn du mami ɛn dadi biznɛs wit pikin. Di ɔganayzeshɔn de kɔntinyu fɔ tɔk bɔt ɛn ajɔst tin dɛn we di ɛlda dɛn fɔ du we pɔsin du mami ɛn dadi biznɛs wit pikin. Wetin mek? Dɛn de du dis fɔ mek shɔ se di ɛlda dɛn de fala Krays in lɔ, fɔ lɛ dɛn du tin fia wan, ɛn wit lɔv we pɔsin du mami ɛn dadi biznɛs wit pikin.

WETIN ƐLDA DƐN FƆ DU WE SƆMBƆDI KƆMIT SIRIƆS SIN?

10-12. (a) We di ɛlda dɛn de andul kes we gɛt fɔ du wit siriɔs sin, wetin dɛn kin mɛmba? Wetin dɛn kin wɔri bɔt mɔ? (b) Frɔm wetin de na Jems 5:​14, 15 (NW), wetin di ɛlda dɛn fɔ tray tranga wan fɔ du?

10 We di ɛlda dɛn de andul kes we gɛt fɔ du wit siriɔs sin, dɛn kin mɛmba se dɛn gɛt fɔ fala Krays in lɔ we se dɛn fɔ trit ɔlman na di kɔngrigeshɔn wit lɔv ɛn dɛn fɔ du tin fia wan ɛn du wetin rayt na Gɔd in yay. So dɛn fɔ tek tɛm tink bɔt bɔku tin dɛn we dɛn yɛri se sɔmbɔdi dɔn kɔmit siriɔs sin. Di tin we impɔtant pas ɔl to di ɛlda dɛn na fɔ ɔnɔ Jiova ɛn fɔ protɛkt in nem. (Lɛv. 22:​31, 32; Mat. 6:​9, NW) Wan ɔda impɔtant tin to di ɛlda dɛn na dat, dɛn want fɔ ɛp dɛn brɔda ɛn sista dɛn insay di kɔngrigeshɔn fɔ gɛt tayt padi biznɛs wit Jiova, ɛn fɔ ɛnkɔrej ɛn sɔpɔt di wan dɛn we dɛn dɔn du mami ɛn dadi biznɛs wit we dɛn smɔl.

11 Dɔn, di ɛlda dɛn kin tray bak fɔ no if di pɔsin we kɔmit di siriɔs sin dɔn ripɛnt, ɛn if na so i bi, dɛn kin tray fɔ ɛp am fɔ gɛt padi biznɛs wit Jiova bak. (Rid Jems 5:​14, 15, NW.) Ɛni Kristian we kɔmit dis kayn siriɔs sin tan lɛk pɔsin we rili sik. Dis min se i nɔ gɛt gud padi biznɛs wit Jiova igen. * So di ɛlda dɛn tan lɛk dɔktɔ dɛn fɔ ɛp di pɔsin. Dɛn kin tray fɔ “mek di sik pɔsin [dat na di wan we kɔmit di sin] wɛl.” Di advays we dɛn go gi am frɔm di Baybul go ɛp am fɔ bi Gɔd in padi bak. Bɔt dat go pɔsibul if i rili ripɛnt.—Akt 3:​19; 2 Kɔr. 2:​5-10.

12 Dis sho klia wan se di ɛlda dɛn gɛt siriɔs wok fɔ du. Di ɛlda dɛn rili lɛk di brɔda ɛn sista dɛn na di kɔngrigeshɔn bikɔs Gɔd dɔn gi dɛn di wok fɔ kia fɔ in pipul dɛn ɛn fɔ du tin fia wan wit dɛn. (1 Pit. 5:​1-3, NW) Dɛn want dɛn brɔda ɛn sista dɛn fɔ fil sef insay di kɔngrigeshɔn. Na dat mek dɛn kin du sɔntin kwik kwik wan we dɛn yɛri se sɔmbɔdi dɔn kɔmit siriɔs sin lɛk fɔ du mami ɛn dadi biznɛs wit pikin. Wetin dɛn kin du? Tink smɔl bɔt di kwɛstyɔn dɛn we de na di fɔs pat na paregraf 13, 15, ɛn 17.

13-14. Fɔ se di ɛlda dɛn kin obe di lɔ we di gɔvmɛnt de gi fɔ ripɔt ɛnibɔdi we du mami ɛn dadi biznɛs wit pikin? Ɛksplen.

13 Fɔ se ɛlda dɛn kin obe di lɔ we di gɔvmɛnt de gi fɔ ripɔt ɛnibɔdi we du mami ɛn dadi biznɛs wit pikin? Yɛs, dɛn kin obe. Na kɔntri dɛn usay dɛn gɛt dɛn lɔ dɛn de, di ɛlda dɛn kin tray tranga wan fɔ obe dɛn lɔ dɛn de ɛn ripɔt wetin dɔn apin. (Rom 13:​1) Dɛn kayn lɔ dɛn de nɔ de agens Gɔd in lɔ. (Akt 5:​28, 29) So we dɛn yɛri se sɔmbɔdi dɔn du mami ɛn dadi biznɛs wit pikin, di ɛlda dɛn kin tray kwik kwik wan fɔ tɛl di branch ɔfis fɔ aks dɛn aw dɛn go obe di lɔ we de na di kɔntri.

14 Di ɛlda dɛn kin mek di pikin we dɛn du mami ɛn dadi biznɛs wit, in mama ɛn papa ɛn ɔda wan dɛn we no bɔt di kes fɔ no se dɛn gɛt di rayt fɔ ripɔt di prɔblɛm to di gɔvmɛnt. Bɔt wetin dɛn go du if di pɔsin we dɛn fɔ  ripɔt de na di kɔngrigeshɔn ɛn ɔlman na di eria no bɔt wetin apin? Yu tink se di pɔsin we ripɔt di tin we apin fɔ fil se i dɔn briŋ badnem pan Gɔd? Nɔ, i nɔ fɔ fil so. Na di pɔsin we du mami ɛn dadi biznɛs wit di pikin briŋ badnem pan Gɔd, nɔto di pɔsin we ripɔt am.

15-16. (a) Frɔm wetin de na Fɔs Lɛta To Timoti 5:​19, wetin mek tu witnɛs dɛn fɔ de bifo di ɛlda dɛn mek judishal kɔmiti fɔ tɔk wit pɔsin? (b) Wetin di ɛlda dɛn go du we dɛn yɛri se pɔsin insay di kɔngrigeshɔn dɔn du mami ɛn dadi biznɛs wit pikin?

15 Wetin mek di ɛlda dɛn na di kɔngrigeshɔn nid tu witnɛs dɛn fɔ pruv se sɔmbɔdi dɔn kɔmit siriɔs sin? Na bikɔs na dat di Baybul se dɛn fɔ du so dat dɛn go du tin fia wan. We dɛn tɛl di ɛlda dɛn se sɔmbɔdi dɔn kɔmit siriɔs sin, bɔt di pɔsin nɔ gri fɔ ansa, tu witnɛs dɛn fɔ de fɔ pruv to di ɛlda dɛn se na so i bi. Dɔn da tɛm de di ɛlda dɛn go mek judishal kɔmiti fɔ sidɔm wit am. (Dit. 19:​15; Mat. 18:​16; rid Fɔs Lɛta To Timoti 5:​19.) Fɔ se dis min se tu witnɛs dɛn fɔ de bifo ɛnibɔdi ripɔt to di gɔvmɛnt se sɔmbɔdi dɔn du mami ɛn dadi biznɛs wit pikin? Nɔ, nɔto so i fɔ bi. Ilɛk di ɛlda dɛn ɔ ɔda pipul dɛn ripɔt ɔ dɛn nɔ ripɔt, dis nɔ gɛt natin fɔ du wit di kraym we dɛn se di pɔsin dɔn kɔmit.

16 We di ɛlda dɛn yɛri se sɔmbɔdi insay di kɔngrigeshɔn dɔn du mami ɛn dadi biznɛs wit pikin, dɛn kin tray tranga wan fɔ fala di lɔ we di gɔvmɛnt dɔn gi fɔ ripɔt di kes. Dɔn dɛn kin tray fɔ no wetin rili apin. Afta dat, dɛn kin yuz wetin de na di Baybul fɔ ɛp dɛn fɔ no if nid de fɔ mek judishal kɔmiti sidɔm wit di pɔsin. If di pɔsin we dɛn se du mami ɛn dadi biznɛs wit pikin dinay se nɔto so i bi, di ɛlda dɛn kin lisin to ɔda pipul dɛn we no bɔt wetin apin. If di pɔsin we kam tɛl di ɛlda dɛn ɛn wan ɔda pɔsin tɔk se na tru fɔ se dis pɔsin du mami ɛn dadi biznɛs wit pikin ɔ i dɔn du dat to ɔda pikin dɛn, dis na klia pruf fɔ lɛ di ɛlda dɛn mek judishial kɔmiti fɔ sidɔm wit di pɔsin. * If ɔda witnɛs nɔ de, dat nɔ min se di pɔsin we kam tɛl di ɛlda dɛn de lay. Pan ɔl we tu witnɛs dɛn nɔ de fɔ sho se di pɔsin dɔn du mami ɛn dadi biznɛs wit pikin, di ɛlda dɛn go stil no se dis pɔsin dɔn du sɔntin we rili bad ɛn we mek ɔda pipul dɛn rili fil bad. Di ɛlda dɛn kin kɔntinyu fɔ ɛnkɔrej ɛn sɔpɔt di wan dɛn we dɛn du dis bad tin to. Dɔn, di ɛlda dɛn kin tray tranga wan fɔ protɛkt di kɔngrigeshɔn so dat di pɔsin we bin dɔn du mami ɛn dadi biznɛs wit pikin nɔ go du di sem tin bak to ɔda pikin.—Akt 20:​28, NW.

17-18. Ɛksplen wetin di ɛlda dɛn we de na di judishal kɔmiti kin du.

17 Wetin di ɛlda dɛn na di judishal kɔmiti fɔ du? Di wɔd “judishal” nɔ min se di ɛlda dɛn fɔ jɔj, ɔ disayd if di gɔvmɛnt fɔ pɔnish di pɔsin we dɔn du mami ɛn dadi biznɛs wit pikin. Di ɛlda dɛn nɔ de put an pan di lɔ we di gɔvmɛnt mek ɛn dɛn de lɛf ɔl kriminal kes na dɛn an. (Rom 13:​2-4; Tay. 3:​1) Bɔt dɛn de disayd if di pɔsin we kɔmit siriɔs sin go kɔntinyu fɔ de na di kɔngrigeshɔn.

18 Di ɛlda dɛn we de na di judishal kɔmiti gɛt di wok fɔ jɔj pɔsin we i kam pan in padi biznɛs wit Gɔd ɛn in kɔmpin Kristian dɛn na di kɔngrigeshɔn. Dɛn de yuz di Baybul fɔ ɛp dɛn fɔ disayd if di pɔsin we du mami ɛn dadi biznɛs wit pikin dɔn ripɛnt ɔ if i nɔ ripɛnt. If i nɔ gri fɔ ripɛnt, di ɛlda dɛn go tɛl am se dɛn go disfɛloship am, ɛn dɛn kin anawns na di kɔngrigeshɔn se di pɔsin nɔto Jiova Witnɛs igen. (1 Kɔr. 5:​11-13) Bɔt if di pɔsin ripɛnt, i go kɔntinyu fɔ de na di kɔngrigeshɔn. Bɔt di ɛlda dɛn go tɛl am se i go te fɔ lɛ dɛn alaw am fɔ gɛt ɛni spɛshal  wok na di kɔngrigeshɔn ɔ sɔntɛm dɛn nɔ go ɛva alaw am sɛf. Bikɔs di ɛlda dɛn bisin bɔt di pikin dɛn, dɛn go kɔl di mama ɛn papa dɛn na di kɔngrigeshɔn na kɔna ɛn wɔn dɛn fɔ mek dɛn tek tɛm we dɛn pikin dɛn de arawnd da pɔsin de. We di ɛlda dɛn de wɔn mama ɛn papa dɛn, dɛn go tek tɛm fɔ lɛ dɛn nɔ sho di pikin we di pɔsin du mami ɛn dadi biznɛs wit ɔ in fambul dɛn.

AW FƆ PROTƐKT YU PIKIN DƐN?

Mama ɛn papa dɛn go protɛkt dɛn pikin dɛn frɔm dɛn wan dɛn we de du mami ɛn dadi biznɛs wit pikin bay we dɛn de tɛl dɛn di kɔrɛkt tin dɛn bɔt mami ɛn dadi biznɛs. Fɔ du dis, mama ɛn papa dɛn fɔ yuz di tin dɛn we Gɔd in ɔganayzeshɔn dɔn gi wi. (Luk paregraf 19 to 22)

19-22. Wetin mama ɛn papa dɛn fɔ du fɔ protɛkt dɛn pikin dɛn? (Luk di pikchɔ na di frɔnt pej.)

19 Udat dɛn gɛt di men wok fɔ protɛkt pikin dɛn fɔ lɛ dɛn nɔ du bad to dɛn? Na mama ɛn papa dɛn. * Yu pikin dɛn na gift frɔm Gɔd ɛn na “blɛsin we PAPA GƆD [“Jiova,” NW] de gi.” (Sam 127:​3) Jiova dɔn gi yu di wok fɔ protɛkt yu pikin dɛn. Wetin yu go du fɔ protɛkt yu pikin dɛn fɔ lɛ dɛn nɔ du mami ɛn dadi biznɛs wit dɛn?

20 Fɔs, tray fɔ no mɔ bɔt pipul dɛn we kin du mami ɛn dadi biznɛs wit pikin dɛn. Tray fɔ sabi di kayn pipul dɛn we de du mami ɛn dadi biznɛs wit pikin dɛn ɛn aw dɛn kin tray fɔ ful pikin dɛn. Na fɔ de wach fɔ pipul dɛn ɔ say dɛn we di pikin go de we nɔ sef. (Prɔv. 22:​3; 24:​3) Mɛmba se bɔku tɛm, pipul dɛn we kin du mami ɛn dadi biznɛs wit pikin dɛn na pipul dɛn we di pikin dɛn sabi ɛn trɔst.

21 Sɛkɔn, go de tɔk ɔltɛm to yu pikin dɛn ɛn ɛnkɔrej dɛnsɛf fɔ de tɔk to yu ɔltɛm. (Dit. 6:​6, 7) Dat min se yu nid fɔ tek tɛm lisin to yu pikin dɛn. (Jems 1:​19) Mɛmba se pikin dɛn we dɛn dɔn du mami ɛn dadi biznɛs wit kin fred fɔ tɛl ɛnibɔdi bɔt wetin apin. Dɛn kin fred se nɔbɔdi nɔ go biliv dɛn, ɔ dɛn kin fred bikɔs di pɔsin we du mami ɛn dadi biznɛs wit dɛn trɛtin dɛn se dɛn go du bad tin to dɛn if dɛn tɛl ɛnibɔdi. If yu notis se sɔntin dɔn apin to yu pikin, tek tɛm aks am kwɛstyɔn dɛn ɛn tek tɛm lisin to wetin i de tɔk.

22 Tɔd, tich yu pikin dɛn. Tɛl dɛn wetin dɛn nid fɔ no bɔt mami ɛn dadi biznɛs. Bifo yu tɛl dɛn ɛnitin, tink bɔt dɛn ej ɛn wetin dɛn ebul fɔ ɔndastand. Tich dɛn wetin dɛn fɔ tɔk ɔ wetin dɛn fɔ du if pɔsin tray fɔ tɔch dɛn usay i nɔ fɔ tɔch dɛn. Jiova in ɔganayzeshɔn dɔn gi yu di tin dɛn we yu go yuz fɔ protɛkt yu pikin dɛn.—Luk di bɔks we gɛt di taytul “Tich Yusɛf ɛn Yu Pikin dɛn.”

23. Wetin wi tink bɔt mami ɛn dadi biznɛs wit pikin? Us kwɛstyɔn wi go ansa insay di nɛks atikul?

23 As Jiova Witnɛs dɛn, wi de si mami ɛn dadi biznɛs wit pikin dɛn as dɔti dɔti tin ɛn na bad bad kraym. Bikɔs wi de fala Krays in lɔ, wi nɔ de kɔba ɛnibɔdi we du mami ɛn dadi biznɛs wit pikin fɔ lɛ i nɔ sɔfa fɔ wetin i du. Bɔt if dɛn dɔn du mami ɛn dadi biznɛs to wi brɔda ɔ sista di tɛm we i bin smɔl, wetin wi go du fɔ ɛp am? Di nɛks atikul go ansa da kwɛstyɔn de.

SIŊ 103 Man dɛn We Na Gift

^ par. 5 Insay dis atikul, wi go tɔk aw wi go protɛkt pikin dɛn fɔ lɛ dɛn nɔ du mami ɛn dadi biznɛs wit dɛn. Wi go lan aw di ɛlda dɛn go protɛkt di kɔngrigeshɔn ɛn aw mama ɛn papa dɛn go protɛkt dɛn pikin dɛn.

^ par. 3 WƆD DƐN WE DƐN ƐKSPLEN: We big pɔsin du sɔntin to pikin fɔ satisfay in filin dat min se i dɔn du mami ɛn dadi biznɛs wit pikin. Dis gɛt fɔ du wit tin dɛn lɛk fɔ ledɔm wit pikin; we di pɔsin de yuz in mɔt fɔ ple wit di pikin in prayvet pat; fɔ du mami ɛn dadi biznɛs wit pikin na in wes; fɔ ple wit di pikin in prayvet pat, in bɔbi ɔ wes, ɔ ɔda bad tin dɛn we gɛt fɔ du wit mami ɛn dadi biznɛs. Bɔku pan dɛn pikin dɛn ya we dɛn kin du mami ɛn dadi biznɛs wit na galpikin dɛn, bɔt dɛn kin du mami ɛn dadi biznɛs wit bɔku bɔypikin dɛn bak. Pan ɔl we bɔku pan di wan dɛn we de du mami ɛn dadi biznɛs wit pikin dɛn na man dɛn, sɔm uman dɛn bak kin du am.

^ par. 5 WƆD WE DƐN ƐKSPLEN: Insay dis atikul ɛn di nɛks wan, wi yuz “pikin dɛn we dɛn dɔn du mami ɛn dadi biznɛs wit” fɔ sho se dis na wikɛd tin, dɛn dɔn tek advantej pan di pikin ɛn di pikin rili inosɛnt.

^ par. 11 If sɔmbɔdi kɔmit siriɔs sin bikɔs i nɔ gɛt gud padi biznɛs wit Jiova, dat nɔ min se i nɔ fɔ pe fɔ wetin i du. Di pɔsin we kɔmit dis siriɔs sin de pe fɔ di rɔŋ tin we i disayd fɔ du ɛn Jiova go jɔj am fɔ wetin i dɔn du.—Rom 14:​12.

^ par. 16 Di ɛlda dɛn nɔ go ɛva alaw di pikin fɔ de usay dɛn de tɔk to di pɔsin we du mami ɛn dadi biznɛs wit am. Di ɛlda dɛn go alaw di pikin in mama ɛn papa ɔ ɔda big pɔsin we di pikin rɛdi fɔ tɔk to ɛn we i trɔst fɔ tɛl di ɛlda dɛn wetin di pikin se. Dat kin mek di pikin nɔ fil bad mɔ ɛn mɔ.

^ par. 19 Wetin dɛn tɔk bɔt mama ɛn papa dɛn de bak fɔ di wan dɛn we de mɛn pikin dɛn we nɔto dɛn yon.