Go dayrɛkt to di men tin

Go dayrɛkt to di say we di difrɛn difrɛn atikul dɛn de

 STƆDI ATIKUL 21

Nɔ Alaw di Wɔl in Sɛns fɔ Ful Yu

Nɔ Alaw di Wɔl in Sɛns fɔ Ful Yu

“Dis wɔl [in] sɛns na nɔnsɛns to Gɔd.” —1 KƆR. 3:​19.

SIŊ 98 Di Skripchɔ dɛn Kɔmɔt Frɔm Gɔd

WETIN WI GO LAN? *

1. Wetin Gɔd in Wɔd, di Baybul, de tich wi?

WI KIN ebul bia ɛni prɔblɛm we wi gɛt bikɔs no ɔda pɔsin nɔ de we sabi tich lɛk Jiova. (Job 36:​22) In Wɔd, di Baybul, de gi wi ɔl wetin wi nid so dat wi go “rili ebul” ɛn “rɛdi fɔ du ɔlkayn gud wok.” (2 Tim. 3:​17, NW) We wi de du di tin dɛn we di Baybul de tich wi, wi de gɛt mɔ sɛns pas di wan dɛn we de se wi fɔ fala ‘dis wɔl in sɛns.’—1 Kɔr. 3:​19; Sam 119:​97- 100.

2. Wetin wi go tɔk bɔt insay dis atikul?

2 Insay dis atikul, wi go si se bɔku tɛm dis wɔl in sɛns de mek wi du tin dɛn we wi bɔdi want. So i nɔ kin izi fɔ wi fɔ stɔp fɔ tink ɛn du tin lɛk di wan dɛn we de na di wɔl. Gud rizin de we mek di Baybul se: “Una luk shap, mek nɔbɔdi nɔ mek una ful ɛn tɔn una lɛkɛ slev wit in yon mɔtalman sɛns we nɔ min natin; di tin dɛn we dɛn pipul ya de tɔk na wetin dɛn lɔntɛm pipul bin de lan pipul.” (Kɔl. 2:​8) Insay dis atikul, wi go lan bɔt aw pipul dɛn stat fɔ biliv tu lay dɛn we Setan de tich. We wi de tɔk bɔt ɛni wan pan dɛn lay dɛn de, wi go si wetin mek di wɔl in sɛns na nɔnsɛns, ɛn aw di sɛns we de insay Gɔd in Wɔd, di Baybul, bɛtɛ fa fawe pas ɛnitin we di wɔl go gi wi.

AW DI WE AW PIPUL DƐN DE TINK BƆT MAMI ƐN DADI BIZNƐS DE CHENJ?

3-4. Bitwin di ia 1900 ɛn di ia 1930, aw pipul dɛn bin chenj di we aw dɛn bin de tink bɔt mami ɛn dadi biznɛs na Amɛrika?

3 Bitwin di ia 1900 ɛn di ia 1930, bɔku pipul dɛn na Amɛrika bin stat fɔ chenj di we aw dɛn de tink bɔt wetin rayt ɛn wetin rɔŋ bɔt mami ɛn dadi biznɛs. Bifo da tɛm de, bɔku pipul dɛn bin biliv se mami ɛn dadi biznɛs de fɔ di wan dɛn we mared nɔmɔ, ɛn na tin we dɛn nɔ bin de tɔk bɔt sɛf na pɔblik. Bɔt as tɛm de go, di we aw pipul dɛn bin de tink bin stat fɔ chenj, ɛn dɛn stat fɔ du tin di we aw dɛn tink.

 4 Afta Wɔl Wɔ Wan, dat na frɔm di ia 1920 to di ia 1929, di we aw pipul dɛn bin de biev, dɛn abit dɛn, ɛn di we aw dɛn bin de tink bɔt mami ɛn dadi biznɛs bin chenj. Wan uman we de rayt bɔt istri bin tɔk se: “Bɔku pan di fim dɛn, kɔnsat dɛn, siŋ dɛn, buk dɛn, ɛn di tin dɛn we dɛn bin de advatayz bin stat fɔ sho bɔku tin bɔt mami ɛn dadi biznɛs. Insay dɛn tɛm dɛn de, di we aw sɔm pipul dɛn bin de dans bin de mek ɔda pipul dɛn tink bɔt mami ɛn dadi biznɛs, ɛn pipul dɛn bin stat fɔ wɛr klos dɛn we bin de mek dɛn nɔ gɛt wan rɛspɛkt. Jɔs lɛk aw di Baybul bin dɔn tɔk bɔt di las dez, pipul dɛn go “lɛk fɔ ɛnjɔy dɛnsɛf.”—2 Tim. 3:​4.

Jiova in pipul dɛn nɔ de alaw di pipul dɛn na di wɔl fɔ ful dɛn fɔ put an pan mami ɛn dadi biznɛs di we aw Gɔd nɔ want (Luk na paregraf 5) *

5. Frɔm di ia 1960, wetin dɔn apin wit di we aw pipul dɛn de tink bɔt mami ɛn dadi biznɛs?

5 Jɔs afta di ia 1960, tap-to-mi biznɛs, we man ɔ uman de ledɔm wit in kɔmpin, ɛn dayvɔs bin bigin fɔ bɔku mɔ ɛn mɔ. Bɔku pan di tin dɛn we pipul dɛn bin de yuz fɔ ɛnjɔy dɛnsɛf bin de sho mami ɛn dadi biznɛs opin opin wan. Wetin dɔn apin we ɔl dɛn tin ya de bi? Wan masta sabi bukman bin tɔk se bɔku bad tin dɛn kin apin we pipul dɛn stɔp fɔ fala wetin di Baybul tɔk bɔt mami ɛn dadi biznɛs. Fɔ ɛgzampul, dat dɔn mek bɔku famili dɛn dɔn skata, bɔku famili dɛn de we na di mama ɔ papa nɔmɔ de mɛn di pikin dɛn, ɛn bɔku pipul dɛn gɛt pwɛl at ɔ dɛn gɛt di abit fɔ de wach dɛn rud rud pikchɔ ɔ fim dɛn. Wan ɔda bad tin we dɔn apin na di bɔku sik dɛn we pipul dɛn dɔn gɛt frɔm mami ɛn dadi biznɛs, lɛk AIDS. Ɔl dis de sho se di tin dɛn we di pipul dɛn na di wɔl de tink se na di bɛst we fɔ liv dɛn layf nɔ rili mek sɛns.—2 Pit. 2:​19.

6. Aw pipul dɛn na di wɔl de tink bɔt mami ɛn dadi biznɛs jɔs lɛk aw Setan want?

6 Pipul dɛn na di wɔl de tink bɔt mami ɛn dadi biznɛs jɔs lɛk aw Setan want dɛn fɔ tink. Setan kin rili gladi fɔ si we pipul dɛn de du mami ɛn dadi biznɛs di we aw Gɔd nɔ want, ɛn we dɛn nɔ gɛt wan rɛspɛkt fɔ mared we na gift we Gɔd gi mɔtalman. (Ɛfi. 2:​2) We pipul dɛn de du mami ɛn dadi biznɛs di we aw Gɔd nɔ want, dat de sho se dɛn nɔ valyu di fayn fayn gift we Jiova gi mɔtalman fɔ bɔn pikin. Dɔn bak, dɛn de lɔs di chans fɔ gɛt layf we go de sote go.—1 Kɔr. 6:​9, 10.

WETIN DI BAYBUL TƆK BƆT MAMI ƐN DADI BIZNƐS?

7-8. Wetin mek wi se di tin dɛn we di Baybul de tich bɔt mami ɛn dadi biznɛs bɛtɛ fawe pas di we aw pipul dɛn na di wɔl de tink?

7 Di pipul dɛn we de fala di wɔl in sɛns kin provok ɔ laf di wan dɛn we de obe wetin  di Baybul tɔk bɔt mami ɛn dadi biznɛs, ɛn dɛn kin tink se dɛn nɔ gɛt sɛns. Dɛn kayn pipul dɛn de kin aks se: ‘Wetin mek Gɔd mek wi wit filin fɔ du mami ɛn dadi biznɛs dɔn i tɛl wi se lɛ wi nɔ du am te wi mared?’ Dɛn kin aks dis kwɛstyɔn bikɔs dɛn tink se if pipul dɛn want fɔ du sɔntin, dɛn fɔ du am. Bɔt di Baybul tɔk difrɛn tin. Gɔd in Wɔd tɛl wi se wi nɔ fɔ fala wetin wi bɔdi want wi fɔ du, bɔt wi fɔ tinap tranga wan fɔ lɛ wi nɔ du di rɔŋ tin. (Kɔl. 3:​5) Dɔn Jiova dɔn mek am pɔsibul fɔ wi fɔ satisfay wi filin we wi mared. (1 Kɔr. 7:​8, 9) Dis de mek maredman ɛn in wɛf de ɛnjɔy mami ɛn dadi biznɛs ɛn nɔ rigrɛt ɔ wɔri bɔt ɛnitin we gɛt fɔ du wit mami ɛn dadi biznɛs di we aw Gɔd nɔ want.

8 Di tin dɛn we di Baybul de tich difrɛn frɔm wetin di pipul dɛn na di wɔl de tink. Di Baybul de tich wi di kɔrɛkt tin bɔt mami ɛn dadi biznɛs. Di Baybul tɔk se mami ɛn dadi biznɛs na wan we dat we maredman ɛn in wɛf de ɛnjɔy dɛnsɛf. (Prɔv. 5:​18, 19) Bɔt di Baybul tɔk bak se: “Una ɔl fɔ no aw fɔ kɔntrol una bɔdi so dat i go oli ɛn gɛt ɔnɔ, ɛn una nɔ fɔ tan lɛk ɔda neshɔn dɛn we nɔ no Gɔd, we nɔ de satisfay ɔ ebul kɔntrol dɛnsɛf we i kam pan mami ɛn dadi biznɛs.”—1 Tɛs. 4:​4, 5, NW.

9. (a) Bitwin di ia 1900 ɛn di ia 1930, wetin bin ɛnkɔrej Jiova in pipul dɛn fɔ fala di sɛns we de insay Gɔd in Wɔd? (b) Us fayn advays de na Jɔn In Fɔs Lɛta 2:​15, 16? (c) Frɔm wetin de na Lɛta Fɔ Rom 1:​24-27, uskayn dɔti tin dɛn wi fɔ avɔyd fɔ du?

9 Bitwin di ia 1900 ɛn di ia 1930, Jiova in pipul dɛn nɔ bin alaw di wan dɛn we “nɔ gɛt wan shem” fɔ ful dɛn. (Ɛfi. 4:​19) Dɛn bin tray tranga wan fɔ du di tin dɛn we Jiova want dɛn fɔ du. Di Me 15, 1926, Watch Tower bin tɔk se: “Man ɔ uman fɔ de tink ɛn du tin dɛn we gud ɛn klin we nɔ de mek pɔsin sin.” Pan ɔl di tin dɛn we bin de apin arawnd dɛn, Jiova in pipul dɛn bin stil kɔntinyu fɔ fala di sɛns we Gɔd in Wɔd de gi dɛn. (Rid Jɔn In Fɔs Lɛta 2:​15, 16.) Wi rili gladi fɔ gɛt Gɔd in Wɔd, di Baybul. Dɔn bak, wi gladi fɔ we Jiova de yuz in ɔganayzeshɔn fɔ gi wi di tin dɛn we wi nid fɔ ɛp wi fɔ tinap tranga wan fɔ lɛ di we aw pipul dɛn de tink bɔt mami ɛn dadi biznɛs nɔ ful wi. *Rid Lɛta Fɔ Rom 1:​24-27.

FƆ TINK SE YU IMPƆTANT Ɔ BƐTƐ PAS ƆDA PIPUL DƐN

10-11. Wetin di Baybul bin se go apin insay di las dez?

10 Di Baybul wɔn wi se insay di las dez, pipul dɛn “go de mɛmba dɛnsɛf nɔmɔ.” (2 Tim. 3:​1, 2) Wi nɔ sɔprayz fɔ si se pipul dɛn jɔs bisin bɔt dɛnsɛf nɔmɔ. Wan encyclopedia bin se arawnd di ia 1970 “buk dɛn we de gi advays bɔt aw fɔ liv bɛtɛ layf, bin bɔku.” Sɔm pan dɛn buk dɛn de, “de ɛnkɔrej pipul dɛn fɔ biliv se natin nɔ rɔŋ wit dɛn, ɛn dɛn nɔ fɔ chenj udat dɛn bi.” Fɔ ɛgzampul, tink bɔt wetin dɛn tɔk insay wan pan dɛn buk dɛn de. Dɛn se: “Lɛk yusɛf bikɔs yu fayn ɛn yu rili gladi pas ɔl di pipul dɛn we dɔn ɛva liv.” Di buk tɔk se “pɔsin fɔ disayd fɔ insɛf aw i want fɔ biev ɛn du ɛnitin we i fil se rayt ɛn fayn fɔ am.”

11 Yu dɔn ɛva yɛri bɔt dat? Setan bin ɛnkɔrej Iv fɔ du sɔntin lɛk dat. I bin tɛl Iv se, “una go tan lɛkɛ [Gɔd]; dɔn una go no wetin gud frɔm wetin bad.” (Jɛn. 3:​5) Tide, bɔku pipul dɛn tink se dɛn so impɔtant dat nɔbɔdi nɔ fɔ tɛl dɛn wetin rayt ɛn wetin rɔŋ, ivin Gɔd sɛf nɔ gɛt da rayt de. Fɔ ɛgzampul, na dis kayn we pipul dɛn de biev mɔ we i kam pan aw dɛn de tink bɔt mared.

Pɔsin we na tru Kristian fɔ put wetin ɔda pipul dɛn want bifo in yon, mɔ di pɔsin we i mared to (Luk na paregraf 12) *

12. Uskayn we di pipul dɛn na di wɔl de tink bɔt mared?

 12 Di Baybul tɛl maredman ɛn mareduman dɛn fɔ rɛspɛkt dɛnsɛf ɛn fɔ du wetin dɛn bin dɔn prɔmis dɛnsɛf we dɛn bin de mared. I ɛnkɔrej maredman ɛn in wɛf fɔ mekɔp dɛn maynd fɔ kɔntinyu fɔ de togɛda we i se: “Man go lɛf in mama ɛn papa ɛn go de wit in wɛf, ɛn dɛn tu go bi wan.” (Jɛn. 2:​24) Bɔt dis difrɛn frɔm di we aw di wan dɛn we de fala di wɔl in sɛns de tink bɔt mared. Dɛn kin se di maredman ɔ mareduman fɔ pe atɛnshɔn mɔ to wetin in nid. Wan buk we de tɔk bɔt dayvɔs bin se: “Na sɔm kɔntri dɛn we pipul dɛn de mared, dɛn kin prɔmis bifo ɔda pipul dɛn se dɛn go de togɛda te dɛn day. Bɔku pipul dɛn dɔn chenj di wɔd dɛn pan da prɔmis fɔ se dɛn go de togɛda di tɛm nɔmɔ we dɛn lɛk dɛnsɛf.” Bikɔs pipul dɛn nɔ fil se mared fɔ de sote go, dis dɔn mek bɔku mared dɛn dɔn skata ɛn bɔku pipul dɛn dɔn gɛt pwɛl at. I rili klia fɔ si se di we aw di pipul dɛn na di wɔl de tink bɔt mared, nɔ mek sɛns.

13. Wetin na wan rizin we mek Jiova et prawd pipul dɛn?

13 Di Baybul tɔk se: “PAPA GƆD [“ Jiova,” NW] et pɔsin we de kak.” (Prɔv. 16:​5) Wetin mek Jiova et prawd pipul dɛn? Wan rizin na bikɔs pipul dɛn we lɛk dɛnsɛf pasmak, de mek prawd jɔs lɛk Setan. Tink bɔt dis: Prawd bin mek Setan tink se Jizɔs we Gɔd bin yuz fɔ mek ɔltin fɔ butu bifo am ɛn wɔship am. (Mat. 4:​8, 9; Kɔl. 1:​15, 16) Di wan dɛn we de tink se dɛn impɔtant pas ɔlman de sho se di wɔl in sɛns na nɔnsɛns to Gɔd.

WETIN DI BAYBUL SE BƆT PIPUL DƐN WE JƆS DE TINK BƆT DƐNSƐF?

14. Aw Lɛta Fɔ Rom 12:​3 ɛp wi fɔ tink di rayt we bɔt wisɛf?

14 Di Baybul de ɛp wi fɔ tink bɔt wisɛf di rayt we. I mek wi no se i nɔ bad fɔ lɛ pɔsin lɛk insɛf. Jizɔs bin tɔk se: “Yu fɔ lɛk yu kɔmpin lɛkɛ aw yu lɛk yusɛf,” we sho se wi fɔ de pe atɛnshɔn smɔl pan di tin dɛn we wi nid. (Mat. 19:​19) Bɔt di Baybul tich wi se wi nɔ fɔ ɛva tink se wi impɔtant pas ɔda  pipul dɛn. Bɔt i se: “Una nɔ fɔ jɛs de du dɛn tin we una want fɔ du nɔmɔ, una nɔ fɔ du ɛnitin bikɔs una want mek dɛn prez una; una nɔ fɔ prawd, una fɔ fil se ɔda pipul bɛtɛ pas una.”—Fil. 2:​3; rid Lɛta Fɔ Rom 12:​3.

15. Wetin yu dɔn si we mek yu biliv se wetin di Baybul tɔk bɔt di we aw wi de tink bɔt wisɛf gud fɔ wi?

15 Tide, bɔku pan di wan dɛn we pipul dɛn fil se gɛt sɛns ɔ we lan bɔku buk de tɔk se di Baybul in advays dɛn nɔ mek sɛns. Dɛn kin tɔk se if yu de tink se ɔda pipul dɛn impɔtant pas yu, dat go mek dɛn tek advantej pan yu. Bɔt wetin dɔn apin we pipul dɛn na di wɔl de biev da kayn we de? Wetin yu dɔn notis? Yu tink se pipul dɛn we jɔs bisin bɔt dɛnsɛf gladi? Yu tink se dɛn famili dɛn gladi? Yu tink se dɛn gɛt tru tru padi dɛn? Yu tink se dɛn gɛt tayt padi biznɛs wit Jiova? Frɔm wetin yu dɔn si, yu tink se fɔ fala di wɔl in sɛns bɛtɛ pas fɔ fala di sɛns we de insay Gɔd in Wɔd?

16-17. Wetin wi de tɛl Jiova tɛnki fɔ? Wetin mek?

16 Pipul dɛn we de fala di advays we di wan dɛn we pipul dɛn na di wɔl tink se gɛt sɛns tan lɛk strenja we de aks in kɔmpin strenja fɔ sho am rod we dɛn ɔl tu lɔs. Insay Jizɔs in tɛm, i bin tɔk bɔt di “wan dɛn we gɛt sɛns” se: “Na blɛnyay pipul we de tray fɔ lid ɔda blɛnyay pipul, ɛn if blɛnyay pɔsin lid in kɔmpin, dɛn ɔl tu go fɔdɔm na ol.” (Mat. 15:​14) Fɔ tru di wɔl in sɛns na nɔnsɛns to Gɔd.

Gɔd in savant dɛn kin gladi we dɛn de mɛmba di tɛm we dɛn bin spɛn fɔ sav Jiova (Luk na paregraf 17) *

17 Di fayn advays we de na di Baybul “gud fɔ mek pipul lan di tru tin, fɔ mek dɛn no dɛn tin we dɛn de du we nɔ rayt, fɔ mek dɛn wan we nɔ de du rayt bigin du wetin rayt, ɛn fɔ tɛl dɛn aw fɔ liv di layf we Gɔd want dɛn fɔ liv.” (2 Tim. 3:​16) Wi de rili tɛl Jiova tɛnki fɔ we i de yuz in ɔganayzshɔn fɔ protɛkt wi frɔm di wɔl in sɛns! (Ɛfi. 4:​14) Di tin dɛn we i dɔn gi fɔ lan bɔt am de gi wi di trɛnk we wi nid fɔ fala wetin in Wɔd se. Na big big ɔnɔ wi gɛt fɔ lɛ di sɛns we de na Gɔd in Wɔd, di Baybul, gayd wi!

SIŊ 54 “Dis Na di Rod”

^ par. 5 Dis atikul go ɛp wi fɔ kɔntinyu fɔ biliv tranga wan se na Jiova nɔmɔ go gayd wi di rayt we. Dɔn, wi go lan bak se we wi fala di sɛns we dis wɔl de gi, dat go mek bad tin dɛn apin to wi. Bɔt we wi fala di sɛns we Gɔd in Wɔd de gi wi, dat go bɛnifit wi.

^ par. 9 Fɔ ɛgzampul, luk di buk we nem Questions Young People Ask—Answers That Work, Vɔlyum 1, chapta 24 to 26, ɛn Vɔlyum 2, chapta 4 ɛn 5.

^ par. 50 SMƆL TIN BƆT DI PIKCHƆ DƐN: Wi si sɔm tin dɛn we bin apin to wan maredman ɛn in wɛf we na Jiova Witnɛs dɛn frɔm we dɛn yɔŋ te dɛn ol. Dɛn kɔntinyu fɔ de togɛda, ɛn dɛn de du di prichin wok pan ɔl we tap-to-mi biznɛs, we man ɔ uman de ledɔm wit in kɔmpin, ɛn dayvɔs bin de bɔku mɔ ɛn mɔ.

^ par. 52 SMƆL TIN BƆT DI PIKCHƆ DƐN: Afta sɔm tɛm, di man de kia fɔ in wɛf di tɛm we i sik ɛn dɛn galpikin de wach.

^ par. 54 SMƆL TIN BƆT DI PIKCHƆ DƐN: Naw, di man ɛn in wɛf de wach pikchɔ dɛn ɛn dɛn gladi we dɛn de mɛmba di fayn tɛm we dɛn bin dɔn yuz fɔ sav Jiova. Dɛn galpikin we dɔn big ɛn in famili de gladi wit dɛn.